Colossians 1
1
1ဘုရားရှင်၏အလိုတော်အရယေရှုခရစ်တော်၏သာဝကအဖြစ်ရွေးကောက်ခြင်းခံရသော အကျွန်ုပ်ပေါလုနှင့် အကျွန်ုပ်တို့၏ညီတိမောသေတို့ထံမှစာဖြစ်ပါသည်။ 2ဤစာသည် ကောလောသဲမြို့ရှိ ယေရှုခရစ်တော်နောက်သို့ သစ္စာရှိစွာလိုက်ကြသော သူများထံသို့ ရေးပို့လိုက်သောစာဖြစ်ပါသည်။ သင်တို့အပေါ်ဘုရားရှင်၏ကျေးဇူးတော်နှင့် ငြိမ်ချမ်းခြင်းမင်္ဂလာများ သက်ရောက်ပါစေဟုဆုတောင်းမေတ္တာပို့သလိုက်ပါသည်။ 3ကျွန်ုပ်တို့သည် သင်တို့အတွက်ဆုတောင်းသည့်အခါတိုင်း အကျွန်ုပ်တို့၏အရှင်ယေရှုခရစ်တော်၏ အဖဖြစ်သောဘုရားရှင်၏ကျေးဇူးတော်ကိုချီးမွမ်းပါသည်။ 4အဘယ်ကြောင့်ဆိုသော်သင်တို့သည် ယေရှုခရစ်တော်အပေါ်ယုံကြည်ကြပြီး ယုံကြည်သူအပေါင်းကိုလည်း ချစ်မြတ်နိုးကြောင်းအကျွန်ုပ်တို့ကြားသိရသောကြောင့်ဖြစ်ပါသည်။ 5သင်တို့တွင်ထိုယုံကြည်ခြင်းနှင့် ချစ်ခြင်းမေတ္တာတို့ရှိခြင်းမှာ ယေရှုခရစ်တော်၏စစ်မှန်သော မင်္ဂလာသတင်းကောင်းကိုသင်တို့ကြားခဲ့ကြပြီးပြီဖြစ်ပြီးရွှေမြို့တော်တွင်အဖဘုရားရှင်သည်သင်တို့အတွက် ပြင်ဆင်ထားသည်ဟုသင်တို့မျှော်လင့်ချက်ထားကြသောကြောင့်ဖြစ်သည်။ 6သင်တို့သည် မင်္ဂလာသတင်းကောင်းကိုကြားနာပြီး ဘုရားရှင်၏ကျေးဇူးတော်ကိုအမှန်တကယ်ပင်နားလည်သွားကြသကဲ့သို့ပင် နေရာတိုင်းတွင်လည်း မင်္ဂလာသတင်းကောင်းအားယုံကြည်ကြသူများတိုးပွားလာကြပြီဖြစ်သည်။ 7သင်တို့သည်ဤမင်္ဂလာသတင်းကောင်းကို ဧပဖြထံမှသင်ယူခဲ့ကြခြင်းဖြစ်သည်။ အကျွန်ုပ်တို့သည် သူ့အားချစ်မြတ်နိုးကြသည်။ သူသည် အကျွန်ုပ်တို့ကဲ့သို့ပင် ဘုရားရှင်၏အမှုတော်ကိုထမ်းရွက်သောသူဖြစ်သည်။ သူသည် ယေရှုခရစ်တော်၏သစ္စာရှိသောအမှုတော်ဆောင်တစ်ယောက်အဖြစ်အကျွန်ုပ်တို့ကို ကိုယ်စားပြုနေသည်။ 8ဉာဏ်အလင်းတော်အားချစ်မြတ်နိုးသော သင်တို့၏ချစ်ခြင်းမေတ္တာအကြောင်းကိုလည်းပြောပြသောသူ ဖြစ်ပေသည်။ 9ထို့ကြောင့် သင်တို့၏သတင်းကိုကြားသိရသည့်အချိန်မှစ၍ အကျွန်ုပ်တို့သည် သင်တို့အတွက် အစဉ်အမြဲဆုတောင်းပေးလျက်ရှိပါသည်။ သင်တို့သည်ဝိညာဉ်ရေးရာဉာဏ်ပညာနှင့် နားလည်နိုင်စွမ်းအားလုံးဖြင့် ဘုရားရှင်၏အလိုတော်ကို အလုံးစုံသိရှိနိုင်ရန်ကူညီပေးရန်ဘုရားရှင်ထံ၌အကျွန်ုပ်တို့ဆုတောင်းပေးပါသည်။ 10သင်တို့သည်ဘုရားရှင်နှစ်သက်တော်မူသည့်နည်းလမ်းဖြင့်ဘဝခရီးလမ်းကိုလျှောက်လှမ်းနိုင်သူများဖြစ်စေရန်နှင့် ကောင်းမွန်စွာထမ်းဆောင်သောအမှုတော်တိုင်း၌ အသီးအပွင့်များသီးပွင့်စေရန် အကျွန်ုပ်တို့သည်ဘုရားရှင်ထံ၌ ဆုတောင်းပါသည်။ 11ဘုရားရှင်သည် သူ၏ကြီးမားလှသောအနတ္တတန်းခိုးတော်ဖြင့် သင်တို့အား ခွန်အားပေးရန် အကျွန်ုပ်ဆုတောင်းပါသည်။ ထို့မှသာသင်တို့သည် အလွန်စိတ်ရှည်သည်းခံလာနိုင်ပြီး ဝမ်းမြောက်ပျော်ရွှင်နိုင်ကြ မည်ဖြစ်သည်။ 12ဘုရားရှင်သည် ရွှေမြို့တော်တွင် ယုံကြည်သူများအတွက်ပြင်ဆင်ထားသောအရာများကို သင်တို့ဝေမျှနိုင် သောအခွင့်ကိုပေးသည့်အတွက် ဘုရားရှင်၏ကျေးဇူးတော်ကိုဝမ်းမြောက်စွာချီးမွန်းကြလော့။ 13မာရ်နတ်၏မကောင်းသောစွမ်းအားအမှောင်ထုထဲမှ အကျွန်ုပ်တို့အားဘုရားရှင်သည်ကယ်တင်တော်မူပြီး သားတော်၏သာသနာတော်ထဲသို့ခေါ်သွင်းတော်မူခဲ့ပြီဖြစ်သည်။ 14ယေရှုခရစ်တော်ထံမှ အကျွန်ုပ်တို့ရရှိထားသောကတိတော်အတိုင်း အကျွန်ုပ်တို့၏အပြစ်ဒုစရိုက်များသည် ခွင့်လွှတ်ခြင်းခံရပြီဖြစ်သည်။ 15ယေရှုခရစ်တော်သည် မျက်စိဖြင့်မမြင်တွေ့နိုင်သောဘုရားရှင်၏ပုံသဏ္ဍာန်တော်ပင်ဖြစ်၏။ ဖန်ဆင်းသောအရာအားလုံးတို့ထက် သားတော်ထံတွင်ကြီးမားသောအခွင့်အာဏာရှိပေသည်။ 16မိုးကောင်းကင်၌ရှိသမျှအရာအားလုံးတို့ကိုလည်းကောင်း၊ မြေကြီး၌ရှိသမျှအရာတို့ကိုလည်းကောင်း၊ မြင်ရသောအရာများ၊ မမြင်ရသောအရာများ အားလုံးကိုလည်းကောင်း၊ ရာဇပလ္လင်တို့ကိုလည်းကောင်း၊ တန်ခိုးအစွမ်းတို့ကိုလည်းကောင်း၊ အုပ်ချုပ်သူတို့ကိုလည်းကောင်း၊ အခွင့်အာဏာရှိသူတို့ကိုလည်းကောင်း ဘုရားရှင်၏အလိုတော်အတိုင်းသားတော်သည်ဖန်ဆင်းခဲ့ခြင်းဖြစ်ပါသည်။ 17ယေရှုခရစ်တော်သည်အရာအားလုံးမပေါ်ပေါက်မှီကပင် တည်ရှိတော်မူသည်ဖြစ်ပြီး ထိုအရာအားလုံးတို့သည်လည်း ယေရှုခရစ်တော်အားဖြင့် အတူတကွတည်ရှိတော်မူလျက်ရှိသည်။ 18ယေရှုခရစ်တော်သည် အသင်းတော်တည်းဟူသော ကိုယ်ခန္ဓာ၏ဦးခေါင်းဖြစ်ပြီး ကိုယ်ခန္ဓာအားအသက်ကို ပေးသောသူလည်းဖြစ်သည်။ အဘယ်ကြောင့်ဆိုသော် ယေရှုခရစ်တော်သည် ကွယ်လွန်ရာမှပြန်လည်ရှင်သန် သောပထမဦးဆုံးသားဦးဖြစ်ပြီး အရာအားလုံးအားလွှမ်းမိုးနိုင်သောစွမ်းအားရှိသောကြောင့်ဖြစ်သည်။ 19ဘုရားရှင်သည် မိမိ၏ပြည့်စုံမှုအလုံးစုံကို ယေရှုခရစ်တော်တွင်ထပ်တူရှိစေရန်ဆုံးဖြတ်ခဲ့ပြီးဖြစ်သည်။ 20ဘုရားရှင်သည်ရွှေမြို့တော်ရှိအရာများ သို့မဟုတ် ကမ္ဘာမြေပေါ်ရှိအရာများနှင့် ပြန်လည်သင့်မြတ် လိုသောကြောင့် လက်ဝါးကပ်တိုင်ပေါ်တွင် သားတော်၏အသက်ကိုစွန့်လှူတော်မူရန်ဆုံးဖြတ်ခဲ့ခြင်းဖြစ်သည်။ 21တစ်ချိန်ကသင်တို့သည်ဘုရားရှင်နှင့်ဝေးကွာခဲ့ကြပြီး သင်တို့၏စိတ်နှလုံးထဲတွင်လည်းဘုရားရှင်ကို ဆန့်ကျင်ခဲ့ကြသည်။ အဘယ်ကြောင့်ဆိုသော် သင်တို့သည်မကောင်းသောအကျင့်များကို လုပ်ဆောင်နေကြ သောကြောင့်ဖြစ်သည်။ 22သို့သော်ဘုရားရှင်၏ယေရှုခရစ်တော်၏ခန္ဓာကိုယ်ကိုစွန့်လှူ၍ ဘုရားရှင်နှင့်သင်တို့ကိုပြန်လည်ပေါင်းစည်းစေ ခဲ့လေသည်။ ဤသည်မှာ သင်တို့သည်သန့်ရှင်းမြင့်မြတ်လျက်အပြစ်ကင်းစင်စွာဖြင့် ဘုရားရှင်၏ရှေ့တော်မှောက်တွင်မြင့်မြတ်သူများအဖြစ်ခစားနိုင်ရန်ဖြစ်သည်။ 23သို့သော်သင်တို့၏ယုံကြည်ခြင်းသည်အုတ်မြစ်ကဲ့သို့ခိုင်မာနေစေရန် ဆက်လက်၍ယုံကြည်မှုကိုထားရှိကြရ မည်ဖြစ်ပြီး ကျမ်းစာထဲတွင် သင်တို့အားဘုရားရှင်ပေးထားသည့်ကတိတော်အပေါ်မျှော်လင့်ထားသော မျှော်လင့် ချက်ကိုမည်သူမျှမရပ်တန့်စေနှင့်။ ဤသတင်းစကားသည် သင်တို့ကြားနားပြီးသားဖြစ်သော ယေရှုခရစ်တော်၏ အကြောင်းဖြစ်ပြီး နေရာတိုင်း၌ လူတိုင်းကိုဟောပြောနေသောသတင်းစကားလည်းဖြစ်သည်။ အကျွန်ုပ်ပေါလုသည်လည်း လူတို့အားဤသတင်းစကားကို ဟောပြောရန်တာဝန်ထမ်းရွက်သော အစေခံတစ်ဦးပင်ဖြစ်သည်။ 24ယခုအကျွန်ုပ်သည်သင်တို့အတွက် ဆင်းရဲဒုက္ခခံရခြင်းကိုကျေနပ်ဝမ်းမြောက်ပါသည်။ အကျွန်ုပ်သည် ကိုယ်တော်၏ကိုယ်ခန္ဓာနှင့်တူသော သူ၏လူများအားကူညီရန် ယေရှုခရစ်တော်၏ကိုယ်စား အကျွန်ုပ်ခံစားရမည့်လိုအပ်သည့်ဒုက္ခဆင်းရဲအားလုံးကိုခံစားရန်အကျွန်ုပ်ဆန္ဒရှိပါသည်။ 25ဘုရားရှင်သည် အကျွန်ုပ်အား အသင်းတော်အတွက်အမှုတော်ထမ်းဆောင်ရန် အစေခံတစ်ဦးအနေဖြင့် နှုတ်ကပတ်တော်တရားများကိုဟောပြောရန် တာဝန်ပေးအပ်တော်မူသည်။ 26ဤသတင်းကောင်းအားခေတ်အဆက်ဆက်လျှို့ဝှက်ထားခဲ့သော်လည်းယခုအခါကိုယ်တော်အားယုံကြည်သူ တပည့်တော်များကိုဖော်ပြတော်မူလေပြီ။ 27ဘုရားရှင်၏အကြံအစည်တော်သည် အမှန်တကယ်ပင်မည်မျှအံ့ဩဖွယ်ကောင်းကြောင်းကို သူ၏လူများအား ဘုရားရှင်သိရှိစေခဲ့ခြင်းမှာ လူမျိုးခြားတို့အတွက်ဖြစ်သည်။ ဘုရားရှင်၏အကြံအစည်တော်သည် သင်တို့၏စိတ်အတွင်း၌ ယေရှုခရစ်တော်ကိန်းဝပ်တော်မူစေခြင်းဖြစ်ပြီး သင်တို့၌ ဘုရားရှင်၏ဘုန်းအသရေကို ယုံကြည်မှုရှိစွာမျှော်လင့်နိုင်ရန်ဖြစ်သည်။ 28ကျွန်ုပ်တို့သည် ယေရှုခရစ်တော်၏အကြောင်းကိုဟောပြောကြသည်။ ကျွန်ပ်တို့သည် လူတိုင်းအားဝိညာဉ်ရေးရာ ခိုင်မာရင့်ကျက်သူအဖြစ်ဘုရားရှင်၏ရှေ့တော်မှောက်သို့ရောက်ရှိစေရန် မိမိတို့ဉာဏ်စွမ်းရှိသမျှ ဆုံးမသွန်သင်၍သတိပေးကြသည်။ 29ကိုယ်တော်ယေရှုသည် ကျွန်ုပ်အားခွန်အားများပေး သနားတော်မူသောကြောင့် အကျွန်ုပ်သည် အစွမ်းကုန်ကြိုးစားလုပ်ဆောင်လျှက်ရှိသည်။
Jelenleg kiválasztva:
Colossians 1: TPV-RV
Kiemelés
Megosztás
Összehasonlít
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.