Acts 24
24
1ငါးရက်ခန့်ကြာပြီးနောက် အကြီးဆုံးပုရောဟိတ် အာနိနသည် အချို့သော လူထုခေါင်းဆောင်များနှင့်တကွ တေရတုလုဟုခေါ်သော ရှေ့နေတစ်ဦးနှင့်အတူ ဆီဇာရီးယားမြို့သို့ ရောက်လာ၍ ဘုရင်ခံဖေးလဇ်၏ရှေ့၌ ပေါလုကိုစွဲချက်တင်ကြလေ၏။ 2ပေါလုသည်လည်း ဆင့်ခေါ်ခံရပြီးနောက် ရှေ့နေတေရတုလုက "အရှင်မင်းမြတ်၊ အရှင့်ရဲ့အုပ်ချုပ်မှုအောက်မှာ ကျွန်ုပ်တို့သည် ကာလကြာရှည်စွာဖြင့် ငြိမ်းငြိမ်းချမ်းချမ်းနေထိုင်ရပြီး ဤတိုင်းပြည်ကောင်းစားရန် လိုအပ်သည့် ပြုပြင်ပြောင်းလဲမှုများကိုလည်း လုပ်ဆောင်နေပါ၏။ 3ကျွန်ုပ်တို့သည်လည်း အရှင့်၏လုပ်ဆောင်မှုများအတွက် အရှင့်အားအချိန်တိုင်း၌ အမြဲတမ်းအထူးကျေးဇူးတင်ရှိပါ၏။ 4ကျွန်ုပ်သည် အရှင့်ကိုလည်း စိတ်အနှောင့်အယှက်ပေးလိုခြင်း မရှိခဲ့ပေ။ သို့သော် ကျွန်ုပ်တို့၏ အကျဉ်းချုံးတင်ပြချက်အား နားထောင်ပေးပါဟု တောင်းပန်ချင်ပါ၏။ 5ဤလူသည် နာဇရက်ဟုခေါ်သည့် ဂိုဏ်းတစ်ခု၏ ခေါင်းဆောင်တစ်ယောက်ဖြစ်ပြီး ကမ္ဘာအရပ်ရပ်တွင်ရှိသော ဂျူးလူမျိုးများအကြားတွင် အဓိကရုဏ်းများဖြစ်ပေါ်စေရန် လှုံ့ဆော်နေသည့် ပြဿနာကိုဖန်တီးသူပင်ဖြစ်ပါ၏။ 6ထို့အပြင် သူသည် ဗိမာန်တော်ကိုလည်း ညစ်ညမ်းစေသည့်အတွက် ကျွန်ုပ်တို့သည် သူ့အားဖမ်းဆီးခဲ့ပါ၏။ 7သို့သော် ရောမတပ်မှူးကြီးလုသိသည် သူ့အား ကျွန်ုပ်တို့၏လက်ထဲမှ အတင်းအဓမ္မ လုယူ၍ ခေါ်ဆောင်သွားခဲ့ပါ၏။ 8အရှင်ကိုယ်တိုင် သူ့အား စစ်ဆေးမေးမြန်းလိုက်ပါက ကျွန်ုပ်တို့၏ စွပ်စွဲတင်ပြချက်များသည် မှန်ကန်သည်ဆိုသည်အား အရှင်သိလာပါလိမ့်မည်" ဟုလျှောက်တင်လေ၏။ 9ဂျူးလူမျိုးတို့ကလည်း ထိုအကြောင်းအရာများ မှန်ကန်ကြောင်းကို ဝိုင်းဝန်းထောက်ခံကြလေ၏။ 10ထိုအခါ ဘုရင်ခံသည် ပေါလုအား စကားပြောခွင့်ပေးသဖြင့် ပေါလုကလည်း "အရှင်သည် ဤတိုင်းပြည်တွင် နှစ်ပေါင်းများစွာ တရားစီရင်ခဲ့ဖူးသူဖြစ်သည့်အတွက် ကျွန်ုပ်သည် အရှင့်၏ရှေ့တွင် ချေပပြောဆိုခွင့် ရသည့်အတွက် ဝမ်းမြောက်မိပါ၏။ 11ကျွန်ုပ်သည် ဂျေရုဆလင်မြို့ထဲသို့ ဝတ်ပြုဆုတောင်းရန် သွားခဲ့ခြင်းသည် တစ်ဆယ့်နှစ်ရက်ထက် မပိုသေးကြောင်း အရှင် လွယ်လွယ်ကူကူပင် စုံစမ်းသိရှိနိုင်ပါ၏။ 12ဂျူးလူမျိုးများသည် ဗိမာန်တော်ထဲ၌ ကျွန်ုပ် တစ်စုံတစ်ယောက်နှင့် အငြင်းအခုံဖြစ်နေခြင်းများ၊ ဓမ္မာရုံများနှင့် မြို့ထဲတွင် လူတို့အား သွေးထိုးလှုံ့ဆော်ခြင်းများ လုပ်ဆောင်နေခဲ့သည်ဆိုသည်အား သူတို့သည် တစ်ကြိမ်တစ်ခါမျှပင် မမြင်တွေ့ခဲ့ဖူးပေ။ 13ကျွန်ုပ်အပေါ်တွင် စွပ်စွဲထားသည့်အချက်များအတွက် သူတို့ထံတွင် သက်သေပြစရာလည်း မရှိကြပေ။ 14သို့သော် ကျွန်ုပ်သည် သူတို့က လွဲမှားသည့်လမ်းဟု မှတ်ယူကြသည့် လမ်းအားလိုက်လျှောက်နေပြီး ကျွန်ုပ်တို့ဘိုးဘေးများ၏ ဘုရားရှင်အား ဝတ်ပြုကိုးကွယ်နေတယ်ခြင်း ဖြစ်သည်ဆိုသည်အား အရှင့်၏ရှေ့တွင် ကျွန်ုပ်ဝန်ခံပါ၏။ ကျွန်ုပ်သည် မောရှေ၏ပညတ်ကျမ်းနှင့် အရိယာသူတော်စင်များ၏ ကျမ်းများတွင် ရေးသားထားသမျှအားလုံးကိုလည်း ယုံကြည်သူဖြစ်ပါ၏။ 15ကောင်းသည့်သူဖြစ်စေ၊ ဆိုးသည့်သူဖြစ်စေ သေခြင်းမှ ပြန်လည်ရှင်သန်ခွင့်ရမည်ဆိုသည့် ဘုရားရှင်ထံမှ သူတို့မျှော်လင့်နေကြသကဲ့သို့ ကျွန်ုပ်ကိုယ်တိုင်သည်လည်း ထပ်တူမျှော်လင့်နေသည့်သူ ဖြစ်ပါ၏။ 16ထို့ကြောင့် ကျွန်ုပ်သည် ဘုရားရှင်နှင့် လူအားလုံးတို့၏ရှေ့တွင် လိပ်ပြာသန့်စေရန် အစဉ်အမြဲ အစွမ်းကုန်ကြိုးစားအားထုတ်ခဲ့ပါ၏။ 17နှစ်ပေါင်းများစွာကြာပြီးနောက်တွင် ကျွန်ုပ်သည် ဆွေမျိုးသားချင်းတို့အား ပေးကမ်းစွန့်ကြဲရန်နှင့် ပူဇော်သက္ကာများ ဆက်ကပ်ရန်အတွက် ဂျေရုဆလင်မြို့သို့ ပြန်လာခဲ့ခြင်းဖြစ်ပါ၏။ 18ဗိမာန်တော်ဝင်းထဲ၌ စင်ကြယ်ခြင်းဓလေ့အား ကျွန်ုပ်ဆောင်ရွက်နေသည်ကို သူတို့မြင်တွေ့ခဲ့သည့်အချိန်တွင်လည်း လူအစုအဝေးလည်းမရှိ၊ ရုန်းရင်ဆန်ခတ်လည်းဖြစ်မနေခဲ့ပေ။ 19သို့သော် ထိုနေရာတွင် ရှိနေခဲ့သည့် အာရှပြည်မှ ဂျူးလူမျိုးများသည် ကျွန်ုပ်အား စွဲဆိုပြစ်တင်စရာများရှိခဲ့လျှင် အရှင့်၏ရှေ့မှောက်၌ ကိုယ်တိုင်လာပြီး စွဲဆိုသင့်ပါ၏။ 20သို့မဟုတ် ကျွန်ုပ်သည် ယခုတရားလွှတ်တော်ရှေ့တွင် ရပ်နေသည့်အချိန်၌ ကျွန်ုပ်ထံတွင် မည်ကဲ့သို့သော ပြစ်မှုမျိုးတွေ့ရှိသည့်အကြောင်းကို ယခုဤနေရာတွင် ရှိနေကြသည့်သူများက ထွက်ဆိုကြပါစေ။ 21သူတို့ ကျွန်ုပ်အား စွဲဆိုနိုင်စရာဟူ၍ "ယခုကျွန်ုပ်သည် သေလွန်ပြီးသောသူများ အသက်ပြန်ရှင်လာမည်ဟု ယုံကြည်သည့်အတွက်ကြောင့် ဤနေရာတွင် ဤသို့ အစစ်ဆေးခံနေရခြင်းဖြစ်ပါ၏" ဟုတရားလွှတ်တော်တွင် အော်ဟစ်ပြောဆိုခဲ့ခြင်းတစ်ခုသာရှိပါ၏" ဟု လျှောက်တင်လေ၏။ 22ထိုအခါ တရားလမ်းစဉ်အား ကောင်းစွာသိသောဘုရင်ခံဖေလဇ်သည် "တပ်မှူးကြီးလုသိ ရောက်လာသည့်အခါတွင် သင်တို့၏အမှုအား ငါစစ်ဆေးမည်" ဟုပြောဆိုလျက် ကြားနာမှုအား ရပ်နားခဲ့လေသည်။ 23သူသည် ပေါလုအား အစောင့်အကြပ်များဖြင့်ထားရှိရန် တာဝန်ခံအရာရှိအား မှာကြားခဲ့ပြီး သူ့အား လွတ်လပ်မှုအနည်းအကျဉ်းပေး၍ သူ၏မိတ်ဆွေများက သူလိုအပ်သည့်အရာများကို ထောက်ပံ့ခွင့်ပေးရန် မိန့်မှာခဲ့လေသည်။ 24ရက်အနည်းငယ်ကြာပြီးနောက် ဖေလဇ်မင်းသည် ဂျူးလူမျိုးဖြစ်သော သူ၏ဇနီးဒြုသိလေနှင့်အတူရောက်လာခဲ့၏။ သူသည် ပေါလုအားဆင့်ခေါ်လျက် ယေရှုခရစ်တော်အား ယုံကြည်ခြင်းအကြောင်းကို သူ့ထံမှ နားထောင်လေ၏။ 25ပေါလုက အမှန်တရားကိုသာလုပ်ဆောင်ရန်၊ မိမိကိုယ်မိမိ စောင့်ထိန်းရန်နှင့် ရောက်လာတော့မည့် တရားစီရင်ခြင်းအကြောင်းကို ပြောကြားသောအခါ ဖေလဇ်သည်လည်း ကြောက်လန့်တုန်လှုပ်၍ ပေါလုအား "သင်သည် ယခုပင် သွားနိုင်ပြီဖြစ်၏။ နောက်ထပ်ငါ့ထံတွင် အချိန်ရှိလျှင် သင့်အား ခေါ်လိုက်မည်" ဟုပြောဆိုလေ၏။ 26ထိုနောက်ပိုင်းတွင်လည်း ဖေလဇ်သည် ပေါလုသည် သူ့အား လာဘ်ထိုးလိမ့်မည်ဟု မျှော်လင့်ချက်ဖြင့် ပေါလုကို မကြာခဏခေါ်ယူ၍ စကားပြောခဲ့လေ၏။ 27နှစ်နှစ်ကြာပြီးနောက် ပေါကိဖေတ္တုသည် ဘုရင်ခံဖေလဇ်၏ အရိုက်အရာကို ဆက်ခံလေ၏။ သို့သော်လည်း ဖေလဇ်သည် ဂျူးလူမျိုးတို့ထံမှ မျက်နှာသာပေးမှုကို လိုလားသဖြင့် ပေါလုအား အကျဉ်းထောင်ထဲတွင် ဆက်လက်ထားရှိစေခဲ့လေ၏။
Jelenleg kiválasztva:
Acts 24: TPV-RV
Kiemelés
Megosztás
Összehasonlít
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
