Acts 22
22
1"ဂျူးလူမျိုးအပေါင်းတို့၊ ငါ၏ခုခံချေပမှုအား နားထောင်ပေးကြလော့" ဟုပြောဆိုလေ၏။ 2သူတို့အား ဟေဗြဲဘာသာဖြင့် ပြောကြားသည်ကို ကြားကြသောအခါ လူထုပရိသတ်တို့သည် ပို၍ပင် တိတ်ဆိတ်စွာနေကြ၏။ ပေါလုက ဆက်လက်၍ 3"ငါသည် ကိလိကိပြည် တာရှုမြို့တွင် မွေးဖွားခဲ့သည့် ဂျူးလူမျိုးတစ်ဦးဖြစ်သော်လည်း ဤမြို့တွင်ရှိသော ဂါမလျေလ၏ တပည့်အဖြစ် ဂျေရုဆလင်မြို့တွင်လည်း ကြီးပြင်းခဲ့သူဖြစ်ပါ၏။ ဘိုးဘေးများထံမှ ဆက်ခံရသည့် ပညတ်တရားတွေနှင့်အညီ တင်းတင်းကျပ်ကျပ် ဆုံးမသွန်သင်ခြင်းအား ခံယူပြီး ဤနေ့တွင် ဤနေရာတွင်ရှိသည့် သင်တို့ကဲ့သို့ မိမိကိုယ်မိမိ ဘုရားရှင်ထံတွင် အပ်နှံထားသည့်သူဖြစ်ပါ၏။ 4ငါသည် အရှင်ဘုရား၏ လမ်းစဉ်အား လိုက်နာကြသည့်သူတို့အား အသေသတ်သည်အထိ ညှဉ်းဆဲခဲ့ပြီး ယောကျ်ားများနှင့် မိန်းမများအား ဖမ်းဆီးပြီး ထောင်ထဲသို့ပို့ခဲ့ဖူးပါ၏။ 5ဤသည်ကို အကြီးဆုံးပုရောဟိတ်နှင့် တရားလွှတ်တော်အဖွဲ့ဝင်များအားလုံးက ငါသည်အမှန်ကိုပြောနေခြင်း ဖြစ်သည်ဆိုသည်အား သက်သေထူနိုင်ပါ၏။ ငါသည် ဒမတ်စကပ်မြို့တွင်ရှိသော ဂျူးလူမျိုးများထံ ရေးသားပေးပို့သည့်စာအား သူတို့ထံမှ လက်ခံရရှိသည့်အတွက် လူတို့အား ဖမ်းဆီးပြီး အပြစ်ပေးရန် သူတို့ကို ချုပ်နှောင်ပြီး ဂျေရုဆလင်မြို့သို့ ပြန်ခေါ်လာရန် ထိုနေရာသို့ ငါသည်သွားခဲ့ခြင်းဖြစ်၏။ 6နေမွန်းတည့်ချိန်တွင် ငါသည် ဒမတ်စကပ်မြို့အနီးသို့ ရောက်သည့်အခါ ကောင်းကင်မှ အလွန်တောက်ပသည့် အလင်းရောင်တစ်ခုသည် ငါ၏ပတ်ပတ်လည်သို့ ရုတ်တရက်ဖြာကျလာခဲ့၏။ 7ငါသည်လည်း မြေပေါ်သို့လဲကျသွားပြီး 'ရှောလု၊ သင်သည် အဘယ်ကြောင့် ငါ့အားညှဉ်းဆဲရသနည်း' ဟု ငါ့အားပြောဆိုနေသည့်အသံကိုလည်း ငါသည်ကြားခဲ့ရ၏။ 8ငါက 'အရှင်သည် မည်သူဖြစ်သနည်း' ဟုမေးသည့်အခါ သူက 'ငါသည် သင်နှိပ်စက်ညှဉ်းဆဲနေသည့် နာဇရက်မြို့သား ယေရှုပင်ဖြစ်၏' ဟုမိန့်တော်မူ၏။ 9ငါနှင့်အတူရှိနေကြသည့်သူများသည် အလင်းရောင်အား မြင်ရကြသော်လည်း ငါ့အား ပြောဆိုနေသည့် စကားသံအား မကြားကြရပေ။ 10ငါကလည်း 'အရှင်၊ ဤသို့ဆိုလျှင် ကျွန်ုပ်မည်သို့ပြလုပ်ရမည်နည်း' ဟုမေးသည့်အခါ သူက 'ထ၍ ဒမတ်စကပ်မြို့သို့ သွားလော့။ ထိုမြို့သို့ရောက်လျှင် သင်လုပ်ဆောင်ရမည့်အရာများအား ငါပြောမည်' ဟုမိန့်တော်မူခဲ့၏။ 11ငါသည်လည်း ထိုတောက်ပလင်းလက်သည့်အလင်းရောင်ကြောင့် မျက်စိမမြင်ရတော့သည့်အတွက် အပေါင်းအဖော်များသည် ငါ့အားလက်တွဲ၍ခေါ်သွားကြပြီး ဒမတ်စကပ်မြို့သို့ ပို့ဆောင်ပေးခဲ့ကြ၏။ 12ထိုမြို့တွင် မောရှေ၏ပညတ်တရားအတိုင်းလိုက်လျှောက်ကာ ဘုရားတရားကိုင်းရှိုင်းပြီး ဂျူးလူမျိုးများ၏ ချီးမွမ်းခြင်းကိုခံရသည့် အာနနိဟုခေါ်သောသူတစ်ယောက် ရှိနေခဲ့၏။ 13သူသည် ငါ့ထံသို့လာ၍ အနီးတွင်ရပ်ကာ 'ငါ၏မိတ်ဆွေဖြစ်ရှောလု၊ မျက်စိပြန်မြင်စေလော့' ဟုပြောလိုက်သည့်အခါ ချက်ချင်းပင် ငါသည် မျက်စိပြန်မြင်နိုင်ပြီး အာနနိအား တွေ့မြင်ခဲ့ရ၏။ 14သူက 'ငါတို့ဘိုးဘေးများ၏ ဘုရားရှင်သည် သူ၏အလိုတော်ကို သိစေရန်၊ သူ့၏ဖြောင့်မတ်သော အမှုတော်ဆောင်အား မြင်တွေ့ရရန်နှင့် သူ့၏အသံတော်ကို ကြားရစေရန်အတွက် သင့်အား ရွေးချယ်တော်မူပြီဖြစ်၏။ 15သင်မြင်ရကြားရသည့်အရာမှန်သမျှကိုလည်း လူအပေါင်းတို့ရှေ့တွင် သင်သည် သက်သေခံရလိမ့်မည်။ 16ယခု သင်သည် မည်သည်ကိုစောင့်ဆိုင်းနေသနည်း။ ထ၍ ကိုယ်တော်ယေရှု၏အမည်နာမကို အမှီပြုကာ ရေနှစ်မင်္ဂလာခံယူပြီး သင်၏အပြစ်ဒုစရိုက်များအား ဆုတောင်းခြင်းနှင့် ဆေးကြောလော့' ဟုပြောဆိုလေ၏။ 17ထို့နောက် ငါသည် ဂျေရုဆလင်မြို့သို့ ပြန်လာခဲ့ပြီး ဗိမာန်တော်တွင် ဆုတောင်းနေချိန်၌ ရူပါရုံတစ်ခုအား မြင်ခဲ့ရ၏။ 18ထိုရူပါရုံတွင် အရှင်ဘုရားက 'ဤဂျေရုဆလင်မြို့မှ အမြန် ထွက်သွားလော့။ ဤမြို့ရှိလူများသည် ငါ၏အကြောင်းအား သင်သက်သေခံသည်ကို လက်ခံကြမည်မဟုတ်ပေ' ဟု ငါ့အားမိန့်တော်မူ၏။ 19ငါသည်လည်း 'အရှင်ဘုရား၊ ကျွန်ုပ်သည် ဓမ္မာရုံများသို့သွားပြီး အရှင့်အား ယုံကြည်ကြသူတို့အား ဖမ်းဆီးရိုက်နှက်ခဲ့သည်ဆိုသည်ကို သူတို့ကောင်းကောင်းသိကြပါ၏။ 20အရှင့်၏သက်သေဖြစ်သည့် သတေဖန် အသတ်ခံရသည့်အခါ၌လည်း ကျွန်ုပ်သည် ထိုနေရာတွင် ရှိနေခဲ့ပြီး သူ၏အသတ်ခံရမှုတွင် အလိုတူအလိုပါဖြစ်ရုံသာမက သူ့အားသတ်သည့်သူများ၏ အဝတ်များကိုပင် စောင့်ပေးခဲ့ရပါ၏' ဟုပြောဆိုခဲ့၏။ 21သို့သော် ကိုယ်တော်က 'သွားလော့။ ဝေးလံသည့်အရပ်တွင်ရှိသော တိုင်းတပါးသားများထံသို့ သင့်အား ငါစေလွှတ်မည်' ဟု မိန့်တော်မူခဲ့၏။ 22လူအုပ်ကြီးသည် ပေါလုပြောသမျှအကြောင်းအရာများကို ဤမျှအထိနားထောင်ပြီးလျှင် 'ဤလူကို သတ်ပစ်လော့။ သူသည် အသက်ရှင်မနေသင့်ပေ' ဟုအော်ဟစ်ပြောဆိုကြလေ၏။ 23သူတို့သည် ထိုသို့အော်ဟစ်လျက် သူတို့၏အဝတ်များကိုဝှေ့ယမ်းကာ မြေမှုန့်များကို လေထဲသို့ပစ်လွှင့်ကြ၏။ 24ထိုအခါ ရောမတပ်မှူးကြီးသည် ပေါလုအား စစ်စခန်းထဲသို့ ခေါ်ဆောင်သွားရန် စစ်သားများအား အမိန့်ပေးလေ၏။ တပ်မှူးကြီးသည် လူထုက အဘယ်ကြောင့် ထိုကဲ့သို့အော်ဟစ်ကြသည်ကို သိရှိနိုင်ရန်အတွက် သူ့အားကျာပွတ်နှင့်ရိုက်၍ စစ်ဆေးရန် ညွှန်ကြားလေ၏။ 25သို့သော် သူတို့သည် ပေါလုကို ရိုက်နှက်ရန် ကြိုးတုပ်လိုက်ကြသောအခါ ပေါလုသည် ထိုနေရာတွင် ရပ်နေသောအရာရှိအား "ပြစ်မှုတစ်စုံတစ်ရာ မကျူးလွန်ထားသည့် ရောမနိုင်ငံသားတစ်ယောက်အား ရိုက်နှက်ခြင်းသည် ဥပဒေနှင့်ညီပါသလော" ဟုမေးလိုက်သဖြင့် 26ထိုစကားကို ကြားသောအခါ အရာရှိသည် တပ်မှူးကြီးထံသို့သွား၍ "သူသည် ရောမနိုင်ငံသားတစ်ယောက်ဖြစ်၏။ မည်သို့လုပ်ရပါမည်နည်း" ဟုပြောကြားလေ၏။ 27ထိုအခါ တပ်မှူးကြီးသည် ပေါလုထံသို့သွား၍ "သင်သည် ရောမနိုင်ငံသား ဟုတ်ပါသလေလာ" ဟုမေးလျှင် ပေါလုက "ဟုတ်ပါသည်" ဟုဖြေလေ၏။ 28တပ်မှူးကြီးကလည်း "ငါသည် ရောမနိုင်ငံသားဖြစ်လာရန် ငွေအမြောက်အမြားပေးခဲ့ရ၏" ဟုဆိုလျှင် ပေါလုက "ကျွန်ုပ်သည် ရောမနိုင်ငံသားအဖြစ် မွေးဖွားလာခဲ့ခြင်းဖြစ်ပါ၏" ဟုပြောဆိုလေ၏။ 29ချက်ချင်းပင် ပေါလုအား စစ်ဆေးမေးမြန်းမည့် စစ်သားများသည် သူ့ထံမှဆုတ်ခွာသွားကြ၏။ တပ်မှူးကြီးသည်လည်း ရောမနိုင်ငံသားတစ်ဦးအား ချုပ်နှောင်ထားမိကြောင်းကို သိရှိသွားသောအခါ ကြောက်ရွံ့သွားလေ၏။ 30နောက်တစ်နေ့တွင် တပ်မှူးကြီးသည် ပေါလုအား ဂျူးလူမျိုးတို့ အဘယ်ကြောင့် စွပ်စွဲသည်ကို အတိအကျသိလိုသောကြောင့် ပေါလုအား ချုပ်နှောင်ထားရာမှ လွှတ်ပေးကာ ပုရောဟိတ် အကြီးအကဲများနှင့် တရားလွှတ်တော်တစ်ခုလုံးအား စုဝေးစေပြီးလျှင် ပေါလုကိုခေါ်ဆောင်လာ၍ သူတို့၏ ရှေ့၌ရပ်စေ၏။
Jelenleg kiválasztva:
Acts 22: TPV-RV
Kiemelés
Megosztás
Összehasonlít
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
