2 Corinthians 2
2
1ထို့ကြောင့် အကျွန်ုပ်သည် သင်တို့ထံသို့လာ၍ သင်တို့ကိုဝမ်းနည်းစေသည့်အဖြစ်မျိုးကို နောက်တစ်ဖန်မဖြစ်စေရန် အကျွန်ုပ်ဆုံးဖြတ်ထားသည်။ 2အကျွန်ုပ်သည် သင်တို့ကိုဝမ်းနည်းစေမိလျှင် အကျွန်ုပ်ကိုဝမ်းမြောက်စေမည့်သူအဘယ်မှာရှိဦးမည်နည်း။ သင်တို့ကသာ အကျွန်ုပ်ကို ဝမ်းမြောက်စေနိုင်သည်။ သို့သော်လည်း အကျွန်ုပ်သည် သင်တို့ကို ဝမ်းနည်းစေမိပြီမဟုတ်လော။ 3အကျွန်ုပ်လာသောအခါ အကျွန်ုပ်ကိုဝမ်းမြောက်စေရမည့်သူများသည် အကျွန်ုပ်ကိုဝမ်းနည်းစေမည်စိုး၍ ဤအကြောင်းအရာကို အကျွန်ုပ်ရေးလိုက်ခြင်းဖြစ်သည်။ အကျွန်ုပ်၏ဝမ်းမြောက်ခြင်းသည် သင်တို့ရှိသမျှ၏ဝမ်းမြောက်ခြင်းဖြစ်သည်ဟု သင်တို့အားလုံးနှင့်ပတ်သက်၍ အကျွန်ုပ်ယုံကြည်စိတ်ချလျက်ရှိသည်။ 4အကျွန်ုပ်သည် အလွန်စိတ်ဆင်းရဲခြင်းနှင့် ပူဆွေးခြင်းထဲမှမျက်ရည်များဖြင့် ထိုစာကိုရေးခဲ့သည်။ သင်တို့ကို ဝမ်းနည်းစေလိုသောကြောင့် မဟုတ်ဘဲ သင်တို့ကို အကျွန်ုပ်မည်မျှချစ်ကြောင်းကို သိစေလိုသောကြောင့် ရေးခဲ့ခြင်းဖြစ်သည်။ 5သင်တို့ကိုဝမ်းနည်းစေရန်မဟုတ်ဘဲ သင်တို့အပေါ်အကျွန်ုပ်ထားရှိသော ကြွယ်ဝသည့်ချစ်ခြင်းမေတ္တာကို သင်တို့သိစေရန် အကျွန်ုပ်သည်ကြီးစွာသောစိတ်ဆင်းရဲခြင်းနှင့် ပူဆွေးခြင်းထဲမှ မျက်ရည်များစွာဖြင့် သင်တို့ထံသို့ရေးလိုက်ခြင်းဖြစ်သည်။ 6သင်တို့လူများစု၏ဒဏ်ပေးမှုကိုခံရခြင်းသည်ပင်လျှင် ထိုသူ့အတွက်လုံလောက်သောအပြစ်ဒဏ်ဖြစ်သည်။ 7ထိုသူသည်မခံမရပ်နိုင်လောက်အောင်ဝမ်းနည်းမှုမဖြစ်စေရန် ယခုသူ့အားသင်တို့ အပြစ်လွှတ်၍နှစ်သိမ့်အားပေးကြလော့။ 8ဤသို့ဖြင့် သင်တို့သည်သူ့ကိုအမှန်တကယ်မေတ္တာထားကြောင်းကို သူသိရှိနားလည်အောင်ပြုကြရန်သင်တို့အားအကျွန်ုပ်တောင်းပန်သည်။ 9ယခင်ကအကျွန်ုပ်စာရေးခဲ့ရသည့်အကြောင်းမှာ သင်တို့သည်စုံစမ်းနှောင့်ယှက်ခြင်းကိုအဘယ်မျှခံနိုင်ရည်ရှိသည်ကိုလည်းကောင်း၊ အကျွန်ုပ်၏ညွှန်ကြားချက်များကိုလိုက်နာရန်အစဉ်အသင့်ရှိမရှိကိုလည်းကောင်းသိရှိရန်ဖြစ်သည်။ 10သင်တို့ခွင့်လွှတ်သောသူကို အကျွန်ုပ်လည်းခွင့်လွှတ်သည်။ အကျွန်ုပ်သည် တစ်စုံတစ်ယောက်ကို ခွင့်လွှတ်စရာရှိ၍ ခွင့်လွှတ်လျှင် သင်တို့အကျိုးအတွက် ယေရှုခရစ်တော်၏ရှေ့မှောက်တော်၌ ထိုသူ၏အပြစ်ကိုခွင့်လွှတ်သည်။ 11သို့မှသာမာရ်နတ်အား အကျွန်ုပ်တို့အပေါ်အနိုင်မရစေရန်တားဆီးနိုင်ပေမည်။ အဘယ်ကြောင့်ဆိုသော် အကျွန်ုပ်တို့သည်မာရ်၏အကြံအစည်များကိုသိကြသောကြောင့်ဖြစ်သည်။ 12အကျွန်ုပ်သည် ယေရှုခရစ်တော်၏ မင်္ဂလာသတင်းကောင်းကို ဟောပြောရန် တရောမြိုသို့ရောက်ခဲ့သည်။ အကျွန်ုပ်ရောက်သောအခါ ဘုရားရှင်သည် မိမိ၏အမှုတော်ကို အကျွန်ုပ်အားဆောင်ရွက်စေရန် အကျွန်ုပ်အတွက် အခွင့်အရေးတံခါးကိုဖွင့်ပေးတော်မူသည်။ 13သို့သော်လည်း အကျွန်ုပ်၏ညီတိတု ရောက်မလာသေးသောကြောင့် အကျွန်ုပ်သည်စိတ်မသက်မသာဖြစ်ရ သည်။ ထို့ကြောင့် ထိုသူတို့ကိုနှုတ်ဆက်ပြီးလျှင် တိတုကိုရှာရန် မာကေဒေါနိပြည်သို့ထွက်သွားရသည်။ 14သို့ရာတွင်ဘုရားရှင်၏ကျေးဇူးတော်သည်ကြီးမားလှပါသည်။ အဘယ်ကြောင့်ဆိုသော်ကိုယ်တော်သည် အကျွန်ုပ်တို့အားယေရှုခရစ်တော်နှင့်တစ်လုံးတစ်ဝတည်းဖြစ်စေလျက် သုံ့ပန်းများအဖြစ်ဖြင့်ယေရှုခရစ်တော်၏အောင်ပွဲခံအခမ်းအနားလှည့်လည်ရာတွင် အစဉ်အမြဲလိုက်ပါစေတော်မူသောကြောင့်ဖြစ်သည်။ 15အကျွန်ုပ်တို့သည်ဘုရားရှင်အားယေရှုခရစ်တော်ပူဇော်သည့်မွှေးကြိုင်သောနံ့သာရနံ့နှင့်တူကြသည်။ ထိုရနံ့သည်ကယ်တင်ခြင်းခံရဆဲဖြစ်သူတို့ထံသို့လည်းကောင်း၊ ပျက်စီးဆုံးပါးဆဲဖြစ်သူတို့ထံသို့လည်းကောင်းပျံ့နှံ့၍သွားလေသည်။ 16အချို့သောသူတို့အတွက် သေခြင်းသို့ပို့ဆောင်သည့် သေခြင်း၏ရနံ့ဖြစ်ကြပြီး အချို့သောသူတို့အတွက်ကား အသက်ရှင်ခြင်းသို့ပို့ဆောင်သည့် အသက်ရှင်ခြင်း၏ရနံ့ဖြစ်ကြသည်။ သို့ဖြစ်၍ ဤကဲ့သို့သော တာဝန်ကို မည်သူထမ်းဆောင်နိုင်မည်နည်း။ 17အကျွန်ုပ်တို့သည် များစွာသောလူများကဲ့သို့ ဘုရားရှင်၏ နှုတ်ကပတ်တော်ကို မိမိ၏ကိုယ်ကျိုးအတွက် လှည့်လည်ရောင်းစားသောသူများမဟုတ်ကြပါ။ အကျွန်ုပ်တို့သည် ဘုရားရှင်ထံမှစေလွှတ်ခံရသူများအဖြစ် ဘုရားရှင်၏ရှေ့တော်၌ ယေရှုခရစ်တော်၏ အခွင့်နှင့်ရိုးသားစွာဟောပြောကြသည်။
Jelenleg kiválasztva:
2 Corinthians 2: TPV-RV
Kiemelés
Megosztás
Összehasonlít
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.