1 Thessalonians 2
2
1ညီအစ်ကိုမောင်နှမတို့၊ သင်တို့ထံ ကျွန်ုပ်တို့ရောက်လာခဲ့ခြင်းသည် အချည်းနှီးမဖြစ်ခဲ့ကြောင်း သင်တို့ကိုယ်တိုင်သိကြ၏။ 2သင်တို့သိကြသည့်အတိုင်း ကျွန်ုပ်တို့သည် ဖိလိပ္ပိမြို့၌ ညှဉ်းပန်းနှိပ်စက်ခြင်းနှင့် စော်ကားမှုများကို ခံခဲ့ကြရသော်လည်း ဘုရားရှင်၏ကူညီမစမှုဖြင့် ပြင်းထန်သည့် ဆန့်ကျင်တိုက်ခိုက်မှုကြားကပင် ဘုရားရှင်၏မင်္ဂလာသတင်းကောင်းကို သင်တို့ထံ ရဲဝံ့စွာ ဟောပြောခဲ့ကြ၏။ 3ကျွန်ုပ်တို့သည် အတွေးအခေါ်အမှား၊ မသမာသောရည်ရွယ်ချက်၊ လိမ်ညာလှည့်ဖျားလိုခြင်းတို့အပေါ်အခြေခံ၍ တိုက်တွန်းဟောပြောကြခြင်းမဟုတ်ပေ။ 4ထို့အစား ဘုရားရှင်သည် ကျွန်ုပ်တို့ကို မင်္ဂလာသတင်းကောင်းကိုဟောပြောရန်အတွက် ယုံကြည်ထိုက်သူများအဖြစ် လက်ခံတော်မူသည့်အလျောက် ငါတို့သည် လူတို့နှစ်သက်စေရန်မဟုတ်ဘဲ ငါတို့၏စိတ်နှလုံးကိုစစ်ဆေးတော်မူသောဘုရားရှင်ကို နှစ်သက်စေရန် ဟောပြောကြ၏။ 5ကျွန်ုပ်တို့သည် မြှောက်ပင့်သောစကားကို တစ်ကြိမ်တစ်ခါမျှ ပြောဆိုခြင်းမရှိသကဲ့သို့ လောဘစိတ်ဖြင့် ဟန်မဆောင်ခြင်းလည်းမရှိကြောင်းကို သင်တို့သိပါ၏။ ဘုရားရှင်သည် ကျွန်ုပ်တို့၏ သက်သေဖြစ်၏။ 6ခရစ်တော်၏ သာဝကများဖြစ်သည့် ကျွန်ုပ်တို့သည် မိမိတို့၏ အခွင့်အာဏာကို သုံးနိုင်သော်လည်း သင်တို့ထံမှဖြစ်စေ၊ တစ်ဦးတစ်ယောက်ထံမှဖြစ်စေ လူတို့၏ချီးမွမ်းခြင်းကို ခံရရန်မကြိုးစားခဲ့ပေ။ 7ထို့အစား နို့တိုက်မိခင်သည် မိမိ၏သားသမီးများကို ပြုစုစောင့်ရှောက်သကဲ့သို့ ကျွန်ုပ်တို့သည်လည်း သင်တို့ကို ကြင်နာယုယစွာ ပြုစုခဲ့ကြ၏။ 8ထိုသို့ ကျွန်ုပ်တို့သည်လည်း သင်တို့ကို အလွန်ချစ်သောကြောင့် ဘုရားရှင်၏မင်္ဂလာသတင်းကောင်းကို ဝေမျှသည်သာမက ကျွန်ုပ်တို့၏ ဘဝကိုပင် သင်တို့အတွက် ပေးဆပ်ရန် ဆန္ဒရှိကြ၏။ အကြောင်းမူကား သင်တို့သည် ကျွန်ုပ်တို့ကိုအလွန်ချစ်သောကြောင့်ဖြစ်၏။ 9ညီအစ်ကိုမောင်နှမတို့၊ ကျွန်ုပ်တို့ မည်မျှကြိုးစားအားထုတ်ခဲ့ကြကြောင်းကို သင်တို့ မှတ်မိကြ၏။ ကျွန်ုပ်တို့သည် သင်တို့အား ဘုရားရှင်၏ မင်္ဂလာသတင်းကောင်း ဟောပြောသည့်အချိန်တွင် မိမိတို့၏ ဝမ်းစာအတွက် မည်သူ့ကိုမျှ ဝန်ထုပ်ဝန်ပိုးမဖြစ်စေရန် နေ့ရောညပါ အလုပ်လုပ်ခဲ့ကြ၏။ 10ယုံကြည်သူဖြစ်သောသော သင်တို့နှင့်အတူရှိနေစဉ်တွင် ကျွန်ုပ်တို့သည် မည်သို့မြင့်မြတ်၊ ဖြောင့်မတ်ပြီး အပြစ်ဆိုဖွယ်မရှိအောင် လုပ်ဆောင်ခဲ့ကြောင်းကို သင်တို့နှင့် ဘုရားရှင်သည် ကျွန်ုပ်တို့၏ သက်သေများဖြစ်၏။ 11ကျွန်ုပ်တို့သည် ဖခင်က သားသမီးများအပေါ် ပြုမူဆက်ဆံသကဲ့သို့ သင်တို့ တစ်ယောက်ချင်းစီတိုင်းအပေါ် ပြုမူဆက်ဆံလျက် 12ဘုရားရှင်သည် မိမိ၏သာသနာတော်နှင့် ဘုန်းတန်ခိုးတော်သို့ သင်တို့ကို ခေါ်တော်မူသည့်အလျောက် သင်တို့သည် ဘုရားရှင်နှစ်သက်တော်မူသည့်အတိုင်း ပြုမူနေထိုင်ရန် အားပေးနှစ်သိမ့်၍ တိုက်တွန်းနှိုးဆော်ကြ၏။ 13သင်တို့သည် ကျွန်ုပ်တို့ထံမှ ကြားနာသော ဘုရားရှင်၏ နှုတ်ကပတ်တော်ကို လူတို့၏စကားအဖြစ် မဟုတ်ဘဲ ဘုရားရှင်၏ နှုတ်ကပတ်တော်အဖြစ် လက်ခံသောကြောင့် ဘုရားရှင်ကို ကျွန်ုပ်တို့ အစဉ်အမြဲကျေးဇူးတင်ကြ၏။ ထိုနှုတ်ကပတ်တော်သည် အမှန်ပင် ဘုရားရှင်၏ နှုတ်ကပတ်တော်ဖြစ်၍ ယုံကြည်သောသင်တို့အထဲတွင် သက်ဝင်လှုပ်ရှားတော်မူ၏။ 14ညီအစ်ကိုမောင်နှမတို့၊ ယေရှုခရစ်တော်ကို ယုံကြည်သည့် ယုဒပြည်၌ ရှိကြသော ဘုရားရှင်၏အသင်းတော်များ တွေ့ကြုံသကဲ့သို့ သင်တို့တွေ့ကြုံနေကြ၏။ ထိုအသင်းတော်များသည် ဂျူးလူမျိုးများလက်တွင် ဆင်းရဲဒုက္ခများခံစားခဲ့ရသကဲ့သို့ သင်တို့သည်လည်း မိမိလူမျိုးတို့၏လက်တွင်အလားတူခံစားကြရ၏။ 15ဂျူးလူမျိုးတို့သည် အရှင်ယေရှုနှင့် အရိယာသူတော်စင်များကို သတ်၍ ကျွန်ုပ်တို့ကိုလည်း နှင်ထုတ်ကြ၏။ သူတို့သည် ဘုရားရှင်ကို မနှစ်သက်စေသည့်အပြင် လူအပေါင်းတို့ကို ဆန့်ကျင်ကြ၏။ 16သူတို့သည် လူမျိုးခြားများ ကယ်တင်ခံရရန်အတွက် ကျွန်ုပ်တို့ဟောပြောသည်ကိုပင် တားမြစ်ကြ၏။ ဤသို့ဖြင့် သူတို့သည် မိမိတို့၏ အပြစ်များကို ပိုမိုပွားများလာစေ၏။ နောက်ဆုံးတွင် ဘုရားရှင်၏ အမျက်တော်သည် သူတို့အပေါ်သို့ ကျရောက်လေ၏။ 17ညီအစ်ကိုမောင်နှမတို့၊ ကျွန်ုပ်တို့သည် သင်တို့နှင့် ခဏတာမျှသာ (စိတ်နှလုံးအားဖြင့်မဟုတ်ဘဲ လူချင်း) ခွဲခွာခဲ့ရသော်လည်း အလွန်အောက်မေ့သတိရသဖြင့် သင်တို့နှင့် ပြန်ဆုံနိုင်ရန် အစွမ်းကုန်ကြိုးစားကြ၏။ 18ထိုကြောင့် ကျွန်ုပ်တို့သည် သင်တို့ထံသို့လာရန် အလိုရှိကြ၏။ ကျွန်ုပ် ပေါလုကိုယ်တိုင် အကြိမ်ကြိမ်ကြိုးစားခဲ့သော်လည်း မာရ်နတ်သည် ကျွန်ုပ်တို့ကို တားဆီးခဲ့၏။ 19ကျွန်ုပ်တို့၏အရှင်ဖြစ်သော ကိုယ်တော်ယေရှုကြွလာတော်မူသောအချိန်တွင် ကိုယ်တော်၏ရှေ့တော်၌ ကျွန်ုပ်တို့၏မျှော်လင့်စရာ၊ ဝမ်းမြောက်စရာနှင့် ဂုဏ်ယူစရာသရဖူဖြစ်မည့်သူမှာ မည်သူနည်း။ သင်တို့ပင်မဟုတ်လော။ 20အမှန်ပင် သင်တို့သည် ကျွန်ုပ်တို့၏ ဂုဏ်ယူစရာနှင့် ဝမ်းမြောက်စရာများ ဖြစ်ကြ၏။
Jelenleg kiválasztva:
1 Thessalonians 2: TPV-RV
Kiemelés
Megosztás
Összehasonlít
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.