1 Corinthians 7
7
1ယခုသင်တို့ အကျွန်ုပ်ထံသို့ရေးပို့လိုက်သောစာထဲတွင် “ယောက်ျားတစ်ဦးသည် မိန်းမတစ်ဦးနှင့်မေထုန်မှီဝဲ ခြင်းသည်ကောင်းသည်” ဟုရေးသားထားသည်။ 2သို့သော်လူတို့သည်မတရားသောမေထုန်ပြုခြင်းကိုအလွန်ကြူးလွန်ကြသောကြောင့် ယောက်ျားတိုင်း သည်ကိုယ်ပိုင်ဇနီးမယားရှိသင့်ပြီး မိန်းမတိုင်းသည် ကိုယ်တိုင်လင်ရှိသင့်ပေသည်။ 3ခင်ပွန်းဖြစ်သူသည် မိမိ၏ဇနီးမယားအပေါ်၌ ခင်ပွန်းတာဝန်ကျေပွန်ရမည်ဖြစ်သကဲ့သို့ ဇနီးမယားဖြစ်သူ သည်လည်း မိမိ၏ခင်ပွန်းအပေါ်၌ ဇနီးမယားတာဝန်ကျေပွန်ရမည်ဖြစ်သည်။ 4ဇနီးဖြစ်သူသည် မိမိ၏ကိုယ်ခန္ဓာကိုမပိုင်။ ခင်ပွန်းဖြစ်သူသည်ပိုင်သည်။ ထိုနည်းတူ ခင်ပွန်းဖြစ်သူသည်လည်း မိမိကိုယ်ခန္ဓာကိုမပိုင်။ ဇနီးဖြစ်သူသည်ပိုင်သည်။ 5တစ်ဦးနှင့်တစ်ဦး မိမိ၏တာဝန်များကိုမပျက်ကွက်ကြနှင့်။ သို့သော် ဆုတောင်းခြင်းဝတ်ကိုပြုရသောအခွင့် ရှိစေခြင်းငှာ နှစ်ဦးသဘောတူ၍ အချိန်အတိုင်းအတာတစ်ခုအထိလင်မယားဝတ်ကိုရှောင်ကြဉ်နိုင်သည်။ ထိုသို့ရှောင်ကြဉ်လျှင် မိမိကိုယ်ကိုထိန်းချုပ်ရန်ခတ်ခဲသဖြင့် မာန်နတ်၏သွေးဆောင်ဖြားယောင်းခြင်းကိုမခံရစေ ရန် ထပ်မံ၍အတူနေကြလော့။ 6အကျွန်ုပ်ဤသို့ပြောဆိုသည်မှာ အမိန့်ပေးခြင်းမဟုတ်ဘဲ အခွင့်ပေးခြင်းဖြစ်သည်။ 7အကျွန်ုပ်သည်လူအပေါင်းတို့အား အကျွန်ုပ်ကဲ့သို့အိမ်ထောင်မပြုပဲနေစေလိုသည်။ သို့သော်လည်း လူတိုင်းသည် ဘုရားရှင်ပေးသနားတော်မူသည့်ဆုကျေးဇူးတစ်မျိုးစီကို လက်ခံရကြမည်ဖြစ်သည်။ 8ထိုကြောင့် အိမ်ထောင်မရှိသောသူတို့နှင့် မုဆိုးမတို့ကိုငါပြောလိုသည်ကား ထိုသူတို့သည် ငါကဲ့သို့အိမ်ထောင်မပြုပဲနေလျှင်ကောင်းသည်။ 9သို့သော်လည်း ကာမဂုဏ်ကိုမချုပ်တည်းနိုင်လျှင် အိမ်ထောင်ပြုသင်ပေသည်။ တဏှာမီးတောက်လောင် နေခြင်းထက် အိမ်ထောင်ပြုသည်ကပို၍ကောင်းသည်။ 10ဤပညတ်ချက်သည် အိမ်ထောင်သည်များအတွက်အကျွန်ုပ်ထံမှလာခြင်းမဟုတ်ဘဲ ဘုရားရှင်ထံမှ လာခြင်းဖြစ်သည်။ ဇနီးမယားသည် မိမိ၏ခင်ပွန်းနှင့်ခွဲခွာ၍မနေရ။ 11အကဲ၍ ဇနီးမယားသည်ခင်ပွန်းနှင့်ခွဲခွာ၍နေလျှင် နောက်ထပ်အိမ်ထောင်မပြုဘဲနေရမည်။ သို့မဟုတ်လျှင် ခင်ပွန်းဟောင်းနှင့်ပြန်လည်ပေါင်းသင်းနေထိုင်ရမည်ဖြစ်သည်။ ခင်ပွန်းသည်လည်း မိမိ၏ဇနီးမယားနှင့်မကွာ ရှင်းရ။ 12အရှင့်ထံမှလာသောပညတ်မဟုတ်ဘဲ အခြားသောသူများကိုအကျွန်ုပ်ပညတ်လိုသည်မှာ ယုံကြည်သူအမျိုးသား တစ်ဦးတွင် မယုံကြည်သူဇနီးမယားရှိနေပြီး ထိုဇနီးမယားသည်မိမိ၏ခင်ပွန်းနှင့် ပေါင်းသင်းနေထိုင်လိုလျှင် ခင်ပွန်းသည် ထိုဇနီးမယားနှင့်မကွာရှင်းရ။ 13ထိုနည်းတူ ယုံကြည်သူအမျိုးသမီးတွင် မယုံကြည်သူခင်ပွန်းရှိနေပြီး ထိုခင်ပွန်းသည် မိမိ၏ဇနီးမယားနှင့် ပေါင်းသင်းနေထိုင်လိုလျှင် ဇနီးမယားသည် ထိုခင်ပွန်းသည်ကိုမကွာရှင်းရ။ 14အဘယ်ကြောင့်ဆိုသော် မယုံကြည်သူခင်ပွန်းသည် ယုံကြည်သူဇနီးမယားအားဖြင့် စင်ကြယ်သည်။ မယုံကြည်သူဇနီးမယားသည်လည်း ယုံကြည်သူဇနီးမယားအားဖြင့်စင်ကြယ်သည်။ သို့မဟုတ်လျှင် သင်တို့၏ သားသမီးများသည်မစင်ကြယ်သောသူအဖြစ်သို့ရောက်ကြရလိမ့်မည်ဖြစ်သော်လည်း ထိုကဲ့သို့နေထိုင်ကြလျှင် သားသမီးတို့သည်လည်းစင်ကြယ်ကြမည်ဖြစ်သည်။ 15သို့သော်လည်း မယုံကြည်သူခင်ပွန်းသည် သိုမဟုတ် မယုံကြည်သူဇနီးမယားသည် ကွာရှင်လိုလျှင် ကွာရှင်းပါစေ။ ထိုအခြေအနေမျိုးတွင် ယုံကြည်သူခင်ပွန်း သို့မဟုတ် ယုံကြည်သူဇနီးမယားသည် လွတ်လပ်စာပြုလုပ်နိုင်သည်။ ဘုရားရှင်သည် အကျွန်ုပ်တို့အားငြိမ်းချမ်းစွာနေထိုင်ရန်ရွေးကောက်ပြီးဖြစ်သည်။ 16အသင်အမျိုးသမီးတို့၊ သင်တို့သည် မိမိ၏ခင်ပွန်းကို ကယ်တင်နိုင်မည်၊ မကယ်တင်နိုင်မည်ကို သင်တို့မည်ကဲ့သို့သိနိုင်မည်နည်း။ အသင်အမျိုးသားတို့၊ သင်တို့သည် မိမိ၏ဇနီးမယားကို ကယ်တင်နိုင်မည်၊ မကယ်တင်နိုင်မည်ကို သင်တို့မည်ကဲ့သို့သိနိုင်မည်နည်း။ 17သို့သော်ငြားလည်း လူတိုင်းသည် ဘုရားရှင်စီမံသည့်အတိုင်း ဘုရားရှင်ရွေးကောက်တော်မူစဉ်ကအတိုင်းပင် ငြိမ်းချမ်းစွာဆက်လက်နေထိုင်သင့်ပေသည်။ ဤသည်မှာ အသင်းတော်တိုင်းအတွက်ငါချမှတ်သောပညတ်တော် ပင်ဖြစ်သည်။ 18အရေဖျားလှီးမင်္ဂလာကိုခံယူပြီးသောသူသည် ရွေးကောက်ခြင်းခံရသောအခါ အရေဖျားလှီးမင်္ဂလာကိုဖျောက်ဖျက်ရန်မလိုအပ်ပေ။ အရေဖျားလှီးမင်္ဂလာကိုမခံရသေးသောသူသည်လည်း ရွေးကောက်ခြင်းခံရသောအခါ အရေဖျားလှီးမင်္ဂလာကိုလုပ်ဆောင်ရန်မလိုအပ်ပေ။ 19အဘယ်ကြောင့်ဆိုသော်အရေဖျားလှီးမင်္ဂလာခံယူခြင်းသည်အဓိကမဟုတ်သကဲ့သို့ အရေဖျားလှီးမင်္ဂလာမခံယူခြင်းသည်လည်း အဓိကမကျပေ။ ဘုရားရှင်၏ ပညတ်တော်တို့ကို စောင့်ထိန်းလိုက်နာခြင်းကသာအဓိကကျပေသည်။ 20လူတိုင်းသည်ဘုရားရှင်၏ရွေးကောက်ခြင်းခံရသောအခါ ရွေးကောက်တော်မူစဉ်ကအခြေအနေအတိုင်းဆက် လက်တည်ရှိနေရမည်ဖြစ်သည်။ 21ဘုရားရှင်၏ရွေးကောက်ခြင်းကိုခံရသောအချိန်တွင် သင်သည်အစေခံဖြစ်နေလျှင်လည်း သင်သည်ထို့အတွက် စိုးရိမ်စရာမလိုပေ။ ခေါ်တော်မူခြင်းကျေးဇူးကို ခံရလျှင် စိုးရိမ်ခြင်းမရှိနှင့်။ သို့သော်လည်း အစေခံအဖြစ်မှ ကင်းလွှတ်သောအခွင့်ကိုရလျှင် ထိုအခွင့်ကိုအရယူလော့။ 22အဘယ်ကြောင့်ဆိုသော အစေခံဖြစ်နေစေကာမူ အရှင့်၏ရွေးကောက်ခြင်းကိုခံရလျှင် ထိုသူသည်အရှင့် အတွက်လွတ်လပ်သောသူပင်ဖြစ်သည်။ ထိုနည်းတူလွတ်လပ်သောသူတစ်ဦးသည်အရှင့်၏ရွေးကောက်ခြင်း ကိုခံရသောအခါထိုသူသည် အရှင့်၏အစေခံပင်ဖြစ်သည်။ 23သင်တို့အားဘုရားရှင်သည် အဖိုးအခပေး၍ဝယ်ယူတော်မူမည်ဖြစ်သကြောင့် လူတို့ထံ၌အစေခံအဖြစ် မခံကြနှင့်။ 24အကျွန်ုပ်၏ညီအစ်ကိုမောင်နှမတို့၊ လူတိုင်းသည် ဘုရားရှင်ရွေးကောက်တော်မူစဉ်ကအခြေအနေအတိုင်းပင် ဘုရားရှင်နှင့်အတူရှိနေရမည်ဖြစ်သည်။ 25အိမ်ထောင်မပြုသောအမျိုးသမီးများနှင့် ပတ်သက်၍ အရှင့်ထံမှ အကျွန်ုပ်သည်မည်သည့်အမိန့်တော်မှမရ သော်လည်း အရှင့်၏သနားကြင်နာမှုကိုခံစားရသော ယုံကြည်ထိုင်သူတစ်ဦးအနေဖြင့် အကျွန်ုပ်၏ထင်မြင်ယူဆ ချက်ကိုပေးပါမည်။ 26လက်ရှိအကျွန်ုပ်တို့ကြုံတွေ့နေရသောအခတ်အခဲများကြောင့် သင်တို့သည်လက်ရှိအခြေအနေအတိုင်း နေလျှင်အကောင်းဆုံးဖြစ်မည်ဟုအကျွန်ုပ်ထင်သည်။ 27သင်သည်အိမ်ထောင်သည်ဖြစ်လျှင် ကွဲရှင်းပျက်ဆဲရန်မကြံစည်နှင့်။ သင်သည်အိမ်ထောင်သည် မဟုတ်လျှင်လည်း အိမ်ထောင်ပြုရန်မကြံစည်နှင့်။ 28သို့သော် သင်အိမ်ထောင်ပြုလျှင်လည်း သင်သည်အပြစ်ကျူးလွန်ခြင်းမဟုတ်ပေ။ အိမ်ထောင် မရှိသောအမျိုးသမီးတစ်ဦး အိမ်ထောင်ပြုလျှင်လည်း အပြစ်ကျူးလွန်ခြင်းမဟုတ်ပေ။ သို့သော် သင်တို့သိသည့်အတိုင်းပင် အိမ်ထောင်ပြုသောလူတိုင်းသည် ဆင်းရဲဒုက္ခများကြုံတွေ့ကြရမည်ဖြစ်သောကြောင့် ထိုဆင်းရဲဒုက္ခများမှသင်တို့အားအကျွန်ုပ်လွှတ်မြောက်စေလိုသည်။ 29အကျွန်ုပ်၏ညီအစ်ကိုမောင်နှမတို့၊ အကျွန်ုပ်ဆိုလိုသည်ကား ကျန်ရှိသောအချိန်သည်အလွန်တိုတောင်းလှ သည်။ ထို့ကြောင့် ယခုအချိန်မှစ၍ ဇနီးမယားရှိသောသူသည် ဇနီးမယားမရှိသောသူကဲ့သို့နေထိုင်သင့်ပေသည်။ 30ထိုနည်းတူပင် ဝမ်းနည်းနေသောသူများသည် ငိုကြွေးသောသူသည် မငိုကြွေးသကဲ့သို့ ဖြစ်ရမည်။ ဝမ်းမြောက်သောသူသည် ဝမ်းမမြောက်သကဲ့သို့ ဖြစ်ရမည်။ ဥစ္စာဝယ်သောသူသည် ဥစ္စာမရှိသကဲ့သို့ဖြစ်ရမည်။ 31ဤလောကရှိအရာဝတ္ထုများကိုသုံးသောသူတို့သည်လည်း ထိုအရာများကိုမတွယ်တာသင့်ပေ။ အကြောင်းမူကား အကျွန်ုပ်တို့နေထိုင်နေသောဤလက်ရှိကမ္ဘာလောကကြီးသည် မကြာမီတွင်ပျောက်ကွယ်သွားတော့မည်ဖြစ်သောကြောင့်ဖြစ်သည်။ 32သင်တို့သည် စိုးရိမ်ခြင်းနှင့် ကင်းလွတ်စေခြင်းငှာ အကျွန်ုပ်အလိုရှိသည်။ အိမ်ထောင်မရှိသောယောက်ျားသည် အရှင့်၏ အလိုတော်ကိုတွေးတော်လျက် အရှင့်အမှုတော်ကိုသာထမ်းရွက်သည်။ သူသည်အရှင့်ကိုကျေနပ်စေရန် မည်ကဲ့သို့လုပ်ဆောင်ရမည်ကိုစဉ်းစားလေသည်။ 33သို့သော်အိမ်ထောင်ရှိသောယောက်ျားသည်ကား မိမိဇနီးမယားအားမည်ကဲ့သို့ကျေနပ်စေရမည်ကိုသာတွေးပြီး ဤလောကရှိ လောကီအမှုကိစ္စများကိုသာသတိထားတတ်သည်။ 34ထို့ကြောင့်သူသည်စိတ်နှစ်ခွဖြစ်နေတတ်သည်။ ထိုနည်းတူ အိမ်ထောင်မရှိသောအမျိုးသမီး သို့မဟုတ် အပျိုစင် တစ်ဦးသည် အရှင့်၏အလိုတော်ကိုတွေးတော်လျက်အရှင့်အမှုတော်ကိုသာထမ်းရွက်သည်။ သူမ၏ စိတ်နှင့် ခန္ဓာနှစ်ခုလုံးအား အရှင့်ထံ၌အပ်နှံထားသည်။ သို့သော် အိမ်ထောင်ရှိသောအမျိုးသမီးသည် မိမိ၏ခင်ပွန်းအား မည်ကဲ့သို့ကျေနပ်စေရမည်ကိုသာတွေးပြီး ဤလောကရှိလောကီအမှုကိစ္စများကိုသာသတိထားတတ်သည်။ 35ထိုသို့အကျွန်ုပ်ဆိုရသည်မှာ သင်တို့အကျိုးအတွက်သာဖြစ်သည်။ သင်တို့အား ထိန်းချုပ်လိုသောကြောင့် မဟုတ်ပါ။ နှောင့်ယှက်ချင်သောစိတ်နှင့် ဆိုသည်မဟုတ်။ သင်တို့အား မှန်ကန်စွာဖြင့် အရှင့်၏အမှုတော် စိတ်ပူ ပန်မှုမရှိပဲ ထမ်းဆောင်နိုင်ရန်အတွက်သာ အကျွန်ုပ်ပြောရခြင်းဖြစ်သည်။ 36အပျိုစင်တစ်ဦးအားလက်ထက်ရန်အတွက် စေ့စပ်ထားသောအမျိုးသားတစ်ဦးသည် ထိုအပျိုစင်အားလက်ထက်ရန်နောက်မကျသင့်ဟုတွေးပြီး သူ၏စိတ်ဆန္ဒကိုမထိန်းချုပ်နိုင်လျှင် ဆန္ဒရှိသည့်အတိုင်းအိမ်ထောင်ပြုသင့်သည်။ သူသည်အပြစ်ကျူးလွန်ခြင်းမဟုတ်ပေ။ 37သို့သော်လည်း အမျိုးသားတစ်ဦးသည် မိမိစိတ်ထဲတွင်အိမ်ထောင်မပြုဟု စိတ်ပိုင်းဖြတ်ထားပြီး မိမိ၏စိတ် ကိုလည်းထိန်းချုပ်စရာမလိုလျှင် အိမ်ထောင်မပြုခြင်းသည် သူ့အတွက်မှန်ကန်သောအရာပင်ဖြစ်သည်။ 38ထို့ကြောင့် အပျိုစင်အားလက်ထက်သောအမျိုးသားသည်မှန်ကန်သောအရာကိုလုပ်ဆောင်ခြင်းဖြစ်သော် လည်း အိမ်ထောင်မပြုသောအမျိုးသားသည်ပို၍ကောင်းမွန်သောအရာကိုပြုလုပ်ခြင်းပင်ဖြစ်သည်။ 39ဇနီးမယားသည် မိမိ၏ခင်ပွန်းအသက်ရှိစဉ်ကာလပတ်လုံး ချည်နှောင်မှုရှိသည်။ သို့သော် သူမ၏ခင်ပွန်းသေဆုံး သွားလျှင် သူမအလိုရှိသောသူကိုလက်ထက်ခွင့်ရှိသည်။ သို့သော်သူမလက်ထက်သောသူသည် အရှင့်အားယုံကြည် သူဖြစ်ကိုဖြစ်ရမည်ဖြစ်သည်။ 40သို့သော် သူမသည်နောက်အိမ်ထောင်မပြုဘဲနေလျှင် သူမပို၍ပျော်ရွှင်ရမည်ဟု အကျွန်ုပ်ထင်မြင်မိပါသည်။ အကျွန်ုပ်ထံ၌လည်း ဘုရားရှင်၏ဉာဏ်အလင်းတော်ကိန်းဝပ်နေသည်ဟုထင်မြင်မိပါသည်။
Jelenleg kiválasztva:
1 Corinthians 7: TPV-RV
Kiemelés
Megosztás
Összehasonlít
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.