1 Corinthians 10
10
1အကျွန်ုပ်၏ညီအစ်ကိုမောင်နှမတို့၊ အကျွန်ုပ်တို့၏ဘိုးဘေးအပေါင်းတို့သည် ကြီးမားသောမိုးတိမ်ကြီးနောက်ကို လိုက်ကြပြီး ပင်လယ်နီကိုဖြတ်သန်းခဲ့ကြသည်ကို သင်တို့အားအကျွန်ုပ်မမေ့စေလိုပါ။ 2သူတို့အားလုံးသည် မိုးတိမ်နှင့် ပင်လယ်ထဲတွင် မောရှေ၏နောက်လိုက်တပည့်များဖြစ်လာကြရန် ရေနှစ်မင်္ဂလာကိုခံယူခဲ့ကြသည်။ 3သူတို့အားလုံးသည် ဘုရားရှင်ပေးတော်မူသောတူညီသည့်ပေါင်မုန့်ကိုစားခဲ့ကြသည်။ 4သူတို့အားလုံးသည် ဘုရားရှင်ပေးတော်မူသောတူညီသည့်ရေကိုသောက်ခဲ့ကြသည်။ သူတို့သည်မည်သည့် နေရာကိုသွားသွား သူတို့အားဘုရားရှင်ထောက်ပံ့ပေးသောအံ့ဖွယ်ကျောက်တုံးမှထွက်သည့်ရေကိုသောက်ခဲ့ ကြသည်။ ထိုကျောက်တုံးသည်ကား ယေရှုခရစ်တော်ပင်ဖြစ်သည်။ 5သို့သော်လည်း ထိုသူတို့တွင် များစွာသောသူတို့ကို ဘုရားရှင်သည် အားရနှစ်သက်တော်မမူ။ သူတို့သည် တောကန္တာရထဲ၌သေကြေပျက်စီးခြင်းသို့ရောက်ကြရသည်။ 6ထိုသူတို့သည်မကောင်းသောအရာတို့ကို တပ်မက်သကဲ့သို့ အကျွန်ုပ်တို့မတပ်မက်ကြစေရန် ထိုအကြောင်းအရာတို့သည် အကျွန်ုပ်တို့အဖို့သင်ခန်းစာများဖြစ်ကြသည်။ 7ကျမ်းစာထဲတွင် “လူတို့သည် စားသောက်ရန်ထိုင်နေကြပြီး နောက်တစ်ဖန်ထ၍ ကခုန်မြူးထူးနေကြသည်” ဟုရေးသားထားသည့်အတိုင်း သင်တို့သည် ထိုသူများထဲမှအချို့သောသူများကဲ့သို့ ရုပ်ထုကိုးကွယ်သူများမဖြစ်ကြ စေနှင့်။ 8အကျွန်ုပ်တို့သည်ထိုသူများထဲမှ အချို့ကဲ့သို့အကျင့်ပျက်သောမေထုန်မှီဝဲခြင်းအမှုကိုမကျူးလွန်ကြနှင့်။ သူတို့သည် ထိုကဲ့သို့သောအပြစ်ဒုစရိုက်ကိုကျူးလွန်ကြသောကြောင့် တစ်နေ့ထဲတွင် လူနှစ်သောင်းသုံးထောင်သေဆုံးခဲ့ကြရ သည်။ 9အကျွန်ုပ်တို့သည် ထိုသူများထဲမှအချို့ကဲ့သို့ ယေရှုခရစ်တော်ကိုစိန်မခေါ်ကြနှင့်။ ထိုသူတို့သည် ထိုကဲ့သို့ စိန်ခေါ်ခဲ့ကြသောကြောင့် သူတို့သည် မြွေကိုက်ခံရ၍သေဆုံးကြရလေသည်။ 10သင်တို့သည်ထိုသူများထဲမှအချို့ကဲ့သို့မညည်းညူကြနှင့်။ ထိုသူတို့သည်ညည်းညူခဲ့ကြသောကြောင့် သေမင်းတမန်၏လက်ချက်ဖြင့်သေကြရလေသည်။ 11ထိုသူတို့၌ဖြစ်ပျက်ခဲ့သောအကြောင်းအရာတို့သည်သင်ခန်းစာများအနေဖြင့် ကပ်ကမ္ဘာကုန်ဆုံးနီးကပ်ချိန်တွင် အသက်ရှင်နေကြသောအကျွန်ုပ်တို့အားသတိပေးရန်ရေးသားဖော်ပြခဲ့ကြသည်။ 12ထိုကြောင့် မိမိကိုယ်ကိုခိုင်ခံ့စွာရပ်နေသည်ဟုထင်နေသော သင်တို့သည် မယိုင်လဲရန်သတိရှိကြလော့။ 13သင်တို့လှည့်ဖျားခံရသည့်အတိုင်း လူသားအားလုံးတို့သည် လှည့်ဖျားခြင်းခံကြရသည်ဖြစ်သည်။ သို့သော် သင်တို့သည်ဘုရားရှင်အပေါ်၌သစ္စာရှိကြသောကြောင့် သင်တို့သည်းမခံနိုင်လောက်သည့်အင်အားကြီးသော လှည့်ဖျားခြင်းကို ဘုရားရှင်သည်သင်တို့အတွက်ခွင့်ပြုလိမ့်မည်မဟုတ်ပေ။ သင်တို့သည်လှည့်ဖျားခြင်းကိုခံရ၍ ဒုက္ခဆင်းရဲနှင့်ကြုံတွေ့ကြရသောအခါ ဘုရားရှင်သည် သင်တို့မကျရှုံးစေရန်ခုခံနိုင်သောခွန်အားကိုပေးမည် ဖြစ်သည်။ 14ထိုကြောင့် ချစ်လှစွာသောအကျွန်ုပ်၏မိတ်ဆွေတို့၊ ရုပ်ထုကိုးကွယ်ခြင်းအမှုကိုရှောင်ကြဉ်ကြလော့။ 15သင်တို့သည် ဆင်ခြင်တုံတရားရှိသောသူများဟုအကျွန်ုပ်ပြောမည်။ အကျွန်ုပ်ပြောသောစကားကို မိမိကိုယ်ကို ဆင်ခြင်ကြလော့။ 16ငါတို့သည် ကျေးဇူးတော်ကို ချီးမွမ်းရာ ကောင်းချီးမင်္ဂလာခွက်ကိုသောက်သည်မှာ ကိုယ်တော်ယေရှု၏အသွေးကိုမျှဝေခံယူကြခြင်းဖြစ်သည်မဟုတ်လော။ ငါတို့မုန့်ကိုဖဲ့၍စားသည်ကား ကိုယ်တော်ယေရှု၏ ကိုယ်ခန္ဓာကိုမျှဝေခံယူခြင်းဖြစ်သည်မဟုတ်လော။ 17မုန့်တစ်လုံးတည်းရှိသည်ဖြစ်၍ အကျွန်ုပ်တို့အားလုံးသည် ထိုမုန့်ကိုသုံးဆောင်ခဲ့ကြသောကြောင့် အကျွန်ုပ်တို့ သည် ကိုယ်ခန္ဓာတစ်ခုတည်းဖြစ်ကြသည်။ 18အစ္စရေးလူမျိုးတို့ကိုကြည့်ရှုကြလော့။ ပူဇော်ပလ္လင်ပေါ်တွင်ပူဇော်ထားသောအသားကိုစားကြသဖြင့် သူတို့သည် ထိုပူဇော်ပလ္လင်ပေါ်ပူဇော်ခြင်းတွင်ပါဝင်ကြသည်မဟုတ်လော။ 19ထိုသို့ဆိုသော် အကျွန်ုပ်သည် ရုပ်တုကိုပူဇော်ခြင်းသည်အရေးပါသည်ဟုဆိုလိုသလော။ သို့မဟုတ်ရုပ်ထုသည်အရေးပါသည်ဟုဆိုလိုသလော။ 20ထိုသို့မဆိုလို။ ဘုရားရှင်ကိုမကိုးကွယ်သောသူတို့ပူဇော်သည့်ပူဇော်သောအသားသည် ဘုရားရှင်ကိုပူဇော်ခြင်းမဟုတ်ဘဲ နတ်ဆိုးကိုပူဇော်ခြင်းဖြစ်သည်။ အကျွန်ုပ်သည် သင်တို့အား နတ်ဆိုးနှင့် မပါတ်သက်စေလိုပါ။ 21သင်တို့သည်ဘုရားရှင်၏ ခွက်ကိုသောက်သော်လည်းကောင်း၊ နတ်ဆိုး၏ခွက်ကိုသော်လည်းကောင်းမသောက် နိုင်ကြပေ။ သင်တို့သည်ဘုရားရှင်၏စားပွဲတွင်သော်လည်းကောင်း နတ်ဆိုး၏စားပွဲတွင်သော်လည်းကောင်း ဝင်ရောက်မစားသောက်နိုင်ကြပေ။ 22အကျွန်ုပ်တို့သည် ဘုရားရှင်အားသဝန်တိုစေဝံ့သလော။ အကျွန်ုပ်တို့သည် ဘုရားရှင်ထက်ပို၍တန်ခိုးကြီး သလော။ 23သင်တို့ထဲမှအချို့သည် “အကျွန်ုပ်တို့တွင်အရာခပ်သိမ်းကိုလုပ်နိုင်သောအခွင့်ရှိသည်” ဟုပြောဆိုကြ သော်လည်း အရာခပ်သိမ်းသည်အသုံးဝင်သည်တော့မဟုတ်ပေ။ သင်တို့ထဲမှအချို့သည် “အကျွန်ုပ်တို့တွင် အရာခပ်သိမ်းကိုလုပ်နိုင်သောအခွင့်ရှိသည်” ဟုပြောဆိုကြသော်လည်း အရာခပ်သိမ်းသည်အကျိုးရှိသည်တော့ မဟုတ်ပေ။ 24မည်သူမျှကိုယ်ကျိုးကိုမရှာဖွေသင့်ဘဲ သူတစ်ပါးအကျိုးကိုသာရှာဖွေသင့်ပေသည်။ 25ဈေး၌ရောင်းသောအသားကိုအမေးအမြန်းမရှိဘဲဝယ်စားကြလော့။ 26အဘယ်ကြောင့်ဆိုသော် ကျမ်းစာထဲတွင် “ဤလောကကြီးနှင့်တကွ ဤလောကရှိအရာအားလုံးကို ဘုရားရှင်သည်ပိုင်တော်မူသည်” ဟုရေးသားထားသောကြောင့်ဖြစ်သည်။ 27မယုံကြည်သောသူသည် သင်တို့ကိုအစာစားရန်ဖိတ်ခေါ်လျှင် သင်တို့သွားလိုပါကသွားကြလော့။ ကျွေးမွေး သမျှတို့ကိုလည်း အမေးအမြန်းမရှိစားကြလော့။ 28သို့သော် ဤအစားအစာတို့သည် ရုပ်ထုအားပူဇော်ထားသောအစားအစာဖြစ်သည်ဟု တစ်စုံတစ်ဦးကပြော လျှင် ထိုပြောဆိုသူကိုလည်းကောင်း၊ အသိစိတ်ကိုထောက်ထား၍သော်လည်းကောင်း မစားကြနှင့်။ 29အသိစိတ်ဟုဆိုရာတွင် သင်တို့၏အသိစိတ်ကိုဆိုခြင်းမဟုတ်ဘဲ ထိုသူ၏အသိစိတ်ကိုဆိုလိုခြင်းဖြစ်သည်။ အဘယ်ကြောင့် အကျွန်ုပ်၏လွှတ်လပ်မှုကို အခြားသောသူတစ်ဦး၏အသိစိတ်ကချုပ်ချယ်နိုင်မည်နည်း။ 30အကယ်၍ အကျွန်ုပ်သည် အကျွန်ုပ်စားရသောအစားအစာအတွက် ဘုရားရှင်၏ကျေးဇူးတော်ကိုချီးမွမ်းပါက အဘယ်ကြောင့် အကျွန်ုပ်သည်သူတို့၏ဝေဖန်ခြင်းကိုခံရမည်နည်း။ 31ထို့ကြောင့်သင်တို့သည် စားသည်ဖြစ်စေ၊ သောက်သည်ဖြစ်စေ၊ မည်သည့်အမှုကိစ္စကိုမဆိုပြုလုပ်သည်ဖြစ်စေ ဘုရားရှင်၏ ဘုန်းတန်ခိုးတော်အတွက်သာအရာခပ်သိမ်းကိုလုပ်ဆောင်ကြလော့။ 32ဘုရားရှင်၏အသင်းတော်ဝင်များကိုသော်လည်းကောင်း၊ ဂျူးလူမျိုးများကိုသော်လည်းကောင်း၊ ဂရိလူမျိုးများ ကိုသော်လည်းကောင်း၊ မည်သူ့အပေါ်ကိုမှ အမှားမပြုလုပ်မိကြစေနှင့်။ 33အကျွန်ုပ်ကိုယ်တိုင်ပင်လျှင်လူတိုင်းအပေါ်၌ သူတို့နှစ်သက်လာစေရန်နည်းလမ်းမျိုးစုံဖြင့်ကြိုးစားသည်။ အကျွန်ုပ်ထိုကဲ့သို့ပြုလုပ်ရခြင်းမှာ အကျွန်ုပ်၏အကျိုးကိုရှာဖွေခြင်းမဟုတ်ဘဲ များစွာသောလူတို့ ကယ်တင်ခြင်းခံရသောအကျိုးကိုရရှိစေရန်သာလုပ်ဆောင်ခြင်းဖြစ်သည်။
Jelenleg kiválasztva:
1 Corinthians 10: TPV-RV
Kiemelés
Megosztás
Összehasonlít
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.