Mǒhtûlû̌hǎhtûsa Ta̤hî̌bǎ wǐ dǒ lô̤mô̤̌
Ta̤hî̌bǎ wǐ dǒ lô̤mô̤̌
Dǒ lî̤plò̌shǐ hǒtôbǎ akûnu, lî̤mǒhtûlû̌hǎhtûsa mî̌ lî̤ dǒ awǐlǒ tôbǎ hǒ. Dǒ Hebrǔyô̤̌ dě lî̤ hǒtôbǎnu, kòyò kaǎ lû̌û kû̌ Barè̌shǐ, dě Barè̌shǐ yô̤̌sǎyô̤̌mû mî̌ akòshî̌gutṳ̌. Bǎ pa dô̌ lî̤mǒhtûlû̌hǎhtûsa nî̌ pa sî̌ganǎ̤ kû̌ mǒkhû̌ bǎbǎ, hǎkhû̌ bǎbǎ, kòyòhǎkhû̌phû̌ bǎbǎ, Cǒmara bô̌lò̤ lǒ̤bò ta̤ pṳ̂̌tocǒ. Cǒmara rû̌htò̌ PhaAbraha, PhaIsè̌ kû̌ Phaya̤kò dě a olò̤ asî kû̌ akhlialè lò̤tutṳ̌ tokhlǒ kû̌ a gǔ ǐshowî̤ asî pě. Asî akhlialè lò̤tutṳ̌ tokhlǒ mî̌ Isôrělaphû̌ sîtokhlǒhǒ. Lî̤ hǒtôbǎ mî̌ a hî̌lṳ̌ bǎ bò ta̤ ô̌ dǒ hǎkhû̌ hǒtokhlǒ kû̌ Isôrěla khlilèphû̌ nutôcǒ htûhtò̌ akòshî̌gutṳ̌ awe̤akè tokhlǒ hǒ.
Lî̤mǒhtûlû̌hǎhtûsa awǐlǒ tôkû̌kò, amèdû̌ (1-11) akûnu, a shôbǐǐlṳ̌ kû̌ ta̤bô̌lò̤ awe̤akè kû̌ kòyò khlilè awe̤akè tǒ̤dǒ PhaAbraha htukha. Cǒmara ata̤bô̌lò̤ pṳ̂̌tocǒ mî̌ awô̌ bò bǎbǎkǎlè kòyòhǎkhû̌phû̌ awǐlǒ sò̌ginǐ̤ dǒ amè̤̌kû̌ PhaAda kû̌ Mǒ̤Ěwǎnu a ganǎ̤de Cǒmara ayô̤̌ tô̤̌ dě a no ô̌htûhtò̌kè ta̤sǔta̤plě dǒ hǎkhû̌nu. Kòyòhǎkhû̌phû̌ pṳ̂̌tôpwa̤ htûhtò̌ ta̤sǔta̤plěphû̌ dě Cǒmara cî̌htò̌bò kòyòhǎkhû̌phû̌ pṳ̂̌tôpwa̤ ata̤sǔ tokhlǒ. Dǒ asî ma̤sǔ ta̤ akhû̌akhî, khònò̤̌ kòyò pṳ̂̌tôpwa̤ khòbǎbò ta̤sǔ dě bǎ cû̌tepheyî̤kè kû̌ Cǒmara hǒ. Dǒnô̌kòdě bǎ kòyòhǎkhû̌phû̌ sîtokhlǒ ajî̌ajû̌ aphû̌mò̤̌shǐhtô hè akhanu, Cǒmara bè̌lò̤ asǎphlǒ dǒ a gǔ nodû̌htò̌sibò kòyò pṳ̂̌tôpwa̤ kû̌ shi, a hǎplǎkè pwǎ tǒ̤ kòyòmi̤ kû̌ Phanṳ̂̌a kû̌ ahǐphû̌phòphû̌ tokhlǒ nô̤̌pwǎ. Asî caba Cǒmara, dě pô̤̌khô asî sanǎ̤ gǔ hǎplǎ aya, htokhôtô̤̌ ta̤phû̌ta̤wè̤ htû̌phû̌yṳ̌phû̌ tokhlǒ glè̌ hǎplǎ ayanu, Cǒmara no bô̌htò̌ asî sǒkhlidû̌ tôbǎ. Shidû̌ htodě kòyò tokhlǒ aô̌peshebò dǒ hǎkhû̌ tôbǎ, dě kòyò saprṳ̂ caba pe lô̌khô Cǒmara tô̤̌.
Lî̤bě amèdû̌ dǒ (12-50) akûnu tokhlǒnu, a shôbǐǐlṳ̌ bǎ PhaAbraha kû̌ ahǐphû̌phòphû̌ tokhlǒ awe̤akè. Cǒmara rû̌htò̌ asî dǒ a gǔ htûhtò̌ a kòyò dǒ akhô̌yò kû̌ kòyò dǒ akòshî̌gutṳ̌ tûprṳ̂ hǒ. PhaAbraha kû̌ ama Mǒ̤sarè nî̌ aphû̌ ô̌ kû̌ kòyò tô̤̌, bǎbǎkǎlè Cǒmara olò̤ hto asî kû̌ asî gǔ phû̌ô̌ tôpwa̤ pě, htokhôtô̤̌ a olò̤ asî kû̌ akhlialè lò̤ tokhlǒnu, tôni̤ a gǔ ô̌ tûû̌ kû̌ ashiagǎ, dě lǒ̤bò kòyò tokhlǒ gǔ nǐ̤bǎ bò ta̤showî̤showô̌ dǒ asî akhû̌akhî pě. PhaAbraha yṳ̌ǎsho Cǒmara ta̤olò̤ a nu dě a jûǎ Cǒmara ayô̤̌.
PhaAbraha kû̌ Mǒ̤sara khlè̌cû̌ dǒ Khanagǎ amè̤̌kû̌ gǎ dǒ Cǒmara olò̤ hto kû̌ a gǔ ǐ kû̌ asî akhlialè lò̤tutṳ̌ dǒ nô̌kò tokhlǒ pě nutôgǎ akû. Bǎ PhaAbraha kû̌ Mǒ̤sara mǒ̤pwǎ̤ bòhǒ akhanu, aphû̌ ô̌nṳ̌ phû̌pwa̤khû tôpwa̤ dě ami̤ kû̌ KhûIsè̌. Dǒnô̌kòdě KhûIsè̌ phû̌ô̌ aphû̌pwa̤khû sò̌ginǐ̤ dě ami̤ kû̌ KhûĚtò̌ kû̌ Khûya̤kò. Bǎ lî̤mǒhtûlû̌hǎhtûsa glè̌ pô̌ akhanu, Phaya̤kò aphû̌khû shǐsò̌ginǐ̤ kû̌ ahǐphû̌phòphû̌ tokhlǒ cû̌ô̌ lô̌khô dǒ Ijî̌gǎ. Shigǎ dǒ Cǒmara olò̤ǐ dǒ a gǔ ǐ kû̌ asî pě tôgǎnu, asî ô̌ bǎkhôtô̤̌. Dǒ Cǒmara kè̌khwè̌ǐ wô̌ a kòyò tokhlǒ akhû̌akhî, dǒ asî pṳ̌wè̤̌ kla tôpwa̤ htûbǎ Ijî̌khwǐ dě ami̤ kû̌ Khûyṳ̂tǎ. Khûyṳ̂tǎ dě ata̤yṳ̌ shû̌sho jî̌ dě a sî̌ganǎ̤ kû̌ tôni̤pě Cǒmara gǔ cǒ kû̌ ata̤olò̤ kû̌ a kòyò sîtokhlǒ pě, a yṳ̌ǎ pô̤̌nu.
Bǎ Khûyṳ̂tǎ si khôtô̤̌ akhanu, a hî̌ kû̌, “He ô̌htûpwa̤ yî̤ petô̤̌ hǒ, Cǒmaradû̌ hèlò̤ ma̤jè̌ mè̤̌caca sî pě dě a kaǎhtò̌kè sî kû̌ gǎ bǒo tôgǎ dě a gǔ sûge sî gǎ dǒ a olò̤ hto ayô̤̌ kû̌ PhaAbraha, PhaIsè̌, Phaya̤kò nutôgǎ pě.” (50:24).
Lî̤mǒhtûlû̌hǎhtûsa a dǔlṳ̌ bǎ pa kû̌ Cǒmara hǒtôpwa̤mî̌ Cǒmara dǒ acǒatè̤, a mô̤nṳ̌ kòyò. A cî̌htò̌ kòyò dǒ a yṳ̌ǎ lû̌û tô̤̌ nutokhlǒ dě a ma̤jè̌ bǎ a kòyò dǒ a yṳ̌ǎ lû̌û nutokhlǒ. A kòyò tokhlǒ alǒabe bǎtô̤̌ bǎbǎkǎlè Cǒmara kè̌khwè̌ǐ asî, a sûgenṳ̌ asî dě a ma̤ bǎ asî pô̤̌ a olò̤ hto asînu.
Dǒ Hebrǔyô̤̌nu, mi̤ tokhlǒ yô̤̌sǎyô̤̌mû mî̌ alṳ̂dû̌ jî̌jî̌. Pô̤̌nudě lî̤mǒhtûlû̌hǎhtûsa dǒ ayô̤̌sǎ hǒonu kòyò bǎ wě̤htò̌pô̤̌ phlôwô̌ bǎ lû̌mi̤ yô̤̌sǎyô̤̌mû. Taplǎplǎdě Cǒmara htû̌lè̌khô̌kè a kòyò tokhlǒ ami̤. PhaAbra ami̤ dě Cǒmara htû̌lè̌khô̌kè kû̌ PhaAbraha. Mǒ̤sarè dě a htû̌lè̌khô̌kè lû̌mi̤ kû̌ Mǒ̤sara, Phaya̤kò dě a htû̌lè̌khô̌kè lû̌mi̤ kû̌ PhaIsôrěla. Phaya̤kò akhlialè tokhlǒ htûhtò̌ khlilèdû̌ tôcǒ akhû̌akhî, lî̤plò̌shǐkû kaǎ asîgǎ kû̌ Isôrělagǎ.
Ta̤hî̌bǎ tôtô̤̌ kû̌ tôtô̤̌
- Ta̤bô̌lò̤tèlò̤ awe̤akè (1:1-2:25)
- Ta̤sǔta̤plě dǒ awǐlǒ kû̌ ta̤ma̤si kòyò dǒ awǐlǒ (3:1-4:16)
- Bǎ shidû̌ tǒ̤ nò̌khôtô̤̌ akha PhaAda akhlialè tokhlǒ (4:17-5:32)
- Phanṳ̂̌a kû̌ shidû̌hèbǐ awe̤akè (6:1-9:28)
- PhaAda akhlialè tokhlǒ kû̌ Babǔlû hǐhtǔhtò̌yô̤̌lǒ (10:1-11:32)
- Cǒmara tûjû̌pwa̤ rû̌htò̌ Khûabra (12:1-20)
- PhaAbra kû̌ Phalòtǎ (13:1-14:24)
- Cǒmara tûjû̌pwa̤ olò̤ PhaAbra (15:1-21)
- PhaAbra, Mǒ̤haga kû̌ Khûǐshômelǎ (16:1-16)
- Khûabra ami̤ hǒnu, Cǒmara htû̌lè̌ tikhlǐkhô̌kè kû̌ KhûAbraha (17:1-18:15)
- PhaAbraha, Phalòtǎ, Wî̤̌sǐdû kû̌ Wî̤̌kamûra (18:16-19:38)
- PhaAbraha, Mǒ̤sara kû̌ KhûIsè̌ (20:1-23:20)
- Mǒ̤ribè̌kha, ma dǒ KhûIsè̌ aya (24:1-67)
- PhaAbraha ata̤si (25:1-18)
- PhaIsè̌ kû̌ ahǐphû̌phòphû̌ (25:19-28:9)
- Phaya̤kò kû̌ ahǐphû̌phòphû̌ (28:10-35:29)
- Phaětò̌ kû̌ ahǐphû̌phòphû̌ (36:1-43)
- Khûyṳ̂tǎ apṳ̌wè̤̌ tokhlǒ shaǎkè lû̌û pô̤̌ jû̌ tôpwa̤ (37:1-36)
- Phayǔda kû̌ Mǒ̤tama (38:1-30)
- Khûyṳ̂tǎ ô̌ dǒ Ijî̌gǎ (39:1-41:57)
- Khûyṳ̂tǎ kû̌ apṳ̌awè̤̌ tokhlǒ (42:1-45:28)
- Phaya̤kò kû̌ ahǐphû̌phòphû̌ tokhlǒ khlè̌cû̌ô̌ dǒ Ijî̌gǎ (46:1-47:31)
- Phaya̤kò ǐshowî̤ ahǐphû̌phòphû̌ tokhlǒ dě a sikè (48:1-50:14)
- Phajû̌sè̌ sikè (50:15-26)
Jelenleg kiválasztva:
Mǒhtûlû̌hǎhtûsa Ta̤hî̌bǎ wǐ dǒ lô̤mô̤̌: KXF
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be