Genesis 3
3
Ouvi womundu nombanguriro ye
1 #
Omav 12:9; 20:2 Nungwari onyoka ya ri novineya tjinene povipuka avihe mbya ungurirwe i Muhona Ndjambi. Noyo ya pura komukazendu ai tja: “Indu Ndjambi otja hee, tjiri, kutja aamu ri komiti ngamwa avihe motjikunino?”
2Nomukazendu wa zira a tja: “Kovihape vyomiti, mbi ri motjikunino, tu nousemba okurya ku vyo, 3nungwari kovihape vyomuti mbu ri mokati kotjikunino, Ndjambi wa tja: ‘Atu ri ko ku wo, nu atu ṱunu ku wo; tjaa matu ṱu.’ ”
4Nonyoka arire tji ya tja komukazendu: “Kamambo! Kako, kamaamu ṱu! 5Nungwari Ndjambi ma tjiwa kutja tji mwa ri ku wo, omeho weṋu maye paturuka, amu sana ku Ndjambi omuini namu tjiwa ouwa nouvi.”
6Nomukazendu arire tja munu kutja omuti mbwi omuwa okurya ovihape vyawo, nomunanyuṋe mombunikiro, nokutja omuti ouini omunanukirwa, tjinga au yandja ounongo. Neye otja pora kovihape vyawo a ri, na yandja komurumendu we, neye wina a ri. 7Nomeho wawo arire tji ya paturuka, nowo ve rimuna kutja ve ri muzu, nu va pamba omaso womukuyumbwa kumwe nave rinambere na wo.
8Nomurumendu nomukazendu we va zuva ombosiro ya Muhona Ndjambi, tjaa ryanga motjikunino morumuinyo rwongurova. Nowo ve mu ṱara mokati komiti vyotjikunino. 9Nu Muhona Ndjambi wa isana omundu na tja: “Ove, u ri pi?”
10Nomundu wa tja: “Ami mba zuu ombosiro yoye motjikunino, notji mba tira, orondu tjinga ambi ri muzu; opu mba zu okukaṱara.”
11Nu Ndjambi wa tja: “Owaṋi ngwe ku raere kutja u ri muzu? Indu ko rire ovihape vyomuti, mbu mbe ku rakiza kutja: Oo ri ku wo?”
12Nomundu wa zira a tja: “Ingwi omukazendu ngu we ndji pa okukara puna ami, ongwe ndji pe otjihape okurya, narire tji mba ri.”
13 #
2Kor 11:3; 1Tim 2:14 Muhona Ndjambi opa purira nai komukazendu: “Ove wa tjitire tjike nao?”
Nomukazendu wa zira a tja: “Onyoka ye ndji wovisa, nopu mba zu okurya.”
Muhona Ndjambi ma yandja ombanguriro ye
14Nu Muhona Ndjambi opa tjera konyoka:
“Ove tjinga awa tjiti nai,
mo sengwa mokati kovinamuinyo avihe;
na movipuka vyokuti.
Ove mo kunguzuka kezumo roye,
no ri ehi omayuva aehe,
ngunda au nomuinyo.
15 #
Omav 12:17
Nu ami me twa po ovita pokati koye nomukazendu,
nopokati korukwato rwoye na indwi orwe,
oro maru ku nyainya otjiuru,
nove mo ru vete kotjipanḓe.”
16Nu komukazendu eye wa tja:
“Ami me twa mo ozongama ozengi mombandukiro yoye,
nove mo panduka ovanatje voye nomihihamo;
notji mo rirumbu kokuhora omurumendu woye,
neye ongu ma rire omuhona woye.”
17 #
Heb 6:8
Nu ku Adam eye wa tja:
“Ove tjinga awa puratene keraka romukazendu woye,
no ri kovihape,
mbi mba tja: O ri ku vyo,
ehi ndi ekunwa otji mari sengwa mena roye;
nove mo riparura nongondjero oure womuinyo woye auhe.
18Oro mari ku hapisire omakuiya novinanyiva;
nove mo ri ovihape vyokuti.
19Morukutu rwomurungu woye mo ri mo omboroto yoye
nga tji mo yaruka kehi punga awa ungurwa.
Orondu ove oove oruuma,
nu mo yaruka koruuma.”
20Adam wa ruka omukazendu we ena Eva, orondu tjinga e ri ina yovandu avehe. 21Nu Muhona Ndjambi wa ungurira Adam nomukazendu we ozombanda pomikova vyovipuka, ne ve zarisa.
22 #
Omav 22:14
Nu Muhona Ndjambi wa tja nai: “Nambano omundu wa rire otja umwe wetu, mokutjiwa ouwa nouvi. Eye a yandjerwa okuroporora eke re nokurya kovihape vyomuti womuinyo kutja a ha karerere omunamuinyo nga aruhe.” 23Muhona Ndjambi opa rambera omundu motjikunino tja Eden kutja e keriungurire ehi pa ungurwa. 24Neye otje mu ramba na twa po Ovakerubi komukuma wokumuhuka wotjikunino tja Eden nengaruvyo ndaari ruruma nokukeṋakeṋa, okutjevera ondjira ndji yenda komuti womuinyo.
Jelenleg kiválasztva:
Genesis 3: HRR-UNI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Herero Revision Bible © Bible Society in Namibia, 2021.