प्रस्थान 11
11
ओंसों फिब्मैं सिब
1झाइले याहवेहजी मोशाने बिइ, “ङइ धबै थेबै दुःख घ्रि फारो नेरो मिश्रफिर कुलब्मुँ। च लिउँइँ चइ क्हेमैं च ह्युलउँइँले छेनाले ह्याल् पिंब्मुँ। 2तारे ताँन् मुइँमैं नेरो च्हमिरिमैंइ ह्रों-ह्रोंसए ङ्हेब् ट्हुब्मैंने मारा चाँदिए घानामैं ह्रिद् बिसि क्हिए म्हिमैंने बिद्।” 3झाइले याहवेहजी मिश्रीमैंइ च इस्राएलीमैंलाइ मान लबै सैं पिंइ। धै मिश्र ह्युलर्बै फारोए के लब्मैं नेरो समाजर्बै म्हिमैंइ मोशा बेल्ले थेबै म्हि मुँन बिसि मैंइ।
4छतसि मोशाइ फारोने बिइ, “‘म्हुँइँस आधाजरे ङ मिश्रए म्हाँजोउँइँले तसि ह्याब्मुँ’ बिसि याहवेहजी बिइमुँ। 5‘राजगद्दिर टिबै फारोए च्ह थेबउँइँले किंसि ह्रेंदो प्ह्रोबै केब्स्योए च्ह थेब, खेदोमैंए ओंसों फिबै प्हसेमैं नेरो मिश्रर्बै च्ह थेब समा ताँन् सिब्मुँ। धबै खेदोमैंए ओंसों फिब्मैं या ताँन् सिब्मुँ 6मिश्रर ओंसों खोंयोंइ आथेबै क्रोबै कै थेब्मुँ, छाबै कै धबै थेरिब् आरे। 7छान् तलेया खेदोमैंए बिरोधर मुँले म्हिमैंए बिरोधर मुँले इस्राएलीमैंए म्हाँजोर नगि घ्रि या छुरिब् आरे। छतमा याहवेहजी मिश्रीमैं नेरो इस्राएलीमैंए म्हाँजोर फेलमन बिसि क्हेमैंइ सेब्मुँ।’” 8झाइले मोशाइ म्रुँने बिइ, “क्हिए के लब्मैं ङ ङाँर खसि फ्योसि ‘क्हि नेरो क्हिए लिलि ल्हैदिबै ताँन् म्हिमैं त्होंह्याद्!’ बिब्मुँ। च लिउँइँ ङ त्होंह्याब्मुँ।” च्हौ बिसि मोशा बेल्ले ह्रिस खसि फारोउँइँले त्होंह्याइ।
9“मिश्रर ङए औदिबै केमैं ल्हें तदै ह्यारिगे बिसि फारोइ क्हिए ताँ थेरिब् आरे,” बिसि याहवेहजी मोशाने बिल। 10मोशा नेरो हारूनइ औदिबै केमैं ताँन् फारोए उँइँर लइ। दिलेया याहवेहजी फारोए सैं सारो लमिंसि चइ इस्राएलीमैं ह्रोंसए ह्युलउँइँले ह्याल् आपिं।
Jelenleg kiválasztva:
प्रस्थान 11: GCMB
Kiemelés
Másolás
Összehasonlít
Megosztás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2020, Wycliffe Bible Translators, Inc. All rights reserved.
