Deuteronomio 2
2
26“Cademot cariiquia jiyajiniji, janiyari pueya jiyaramiquiquianu cua rupaa caminiujiuniuria Hesboon tiacajinia camarnurani, pocua na jiyanooniuria quenaaja. Janiyari naa na masecanu maninia juucuani: 27‘Sehoon jiyanishano camarnunaa, canaari quia jiyacuma niishiriojiya niyacununi. Canaari quia jiya tamajiria neteja nucocojua maninia quianutaniyani. Majaari canaa niyacuneetanu quiniutianiya quia jiyajinia. 28Canaa jaara canaa miaquesocoriquiano paniri casaani, canaari tama canaa cumaneecatajaaja na maseriquianoni, canaa ratusocoriquiano mohuaca naajuhuaj. 29Quenaaja quia jiyacuma canaa quia shocotere, taa Esauucuajinio caneno pueya shocoterucuaa cuanaacuaani, noo pojori Seir jiyajinia quijia pueyatej. Naajuhuaj, Moabcuajinio caneno pueyari canaa shocotecanu nojori jiyanishano Ar jiyacumajuhuaj. Naa canaa quia shocotereja canaa jaara niuuri Jordaan moojaatijia, canaa tiuquiijionura canaa Pueyaso niquitiosocoriquiano jiyajiniatej.’
30“Camarnu Sehoonri maja na paniniu quiquiaari pa tajiniuria na jiyacuma. Pa Pueyasojuanaacuajaari naa taraajeyashijiara na jiyatequiaaritij, naa tama nocuarajaaja na ruutanura pajaniyatej. Naacuatej, na nanacaari na shuuniujiutiaquiaari naa na miaquejosaanuratej. Quiarijianij, naa quiyajaari, jamueja tojiyashijiajuhuaj.
31“Jiyacaritij, Pueyasoori naa cua sequeree: ‘Quiarijianij, janiyari Sehoon cojiritiaa niquitionu na jiyataja quiajaniyani. Nia tiuquitiarenoj, niocua jiyareta na miaquejore.’
32“Camarnu Sehoonri na pueyata pa naacuquiaari Jahaza tiacajinia pata na miaquetoojonura tii. 33Pa Camarnu Pueyasoori puera na tojetequiaari. Paajaari saniya nojori miaquejoquiaarini. Paari camarnu Sehoon cojiritiaquiaari miaquejonu puetunu necohuatajani, puetunu na pueyatajanaanio. 34Naa pa paraa pa miaquejonu nuhuaji jiyaretatej, nojori tiacacaari puera quiquiaari. Majaari pa jiyanooniu quiquiaari quenaaja niquiriyatu nojorijinijinio. Paari naacua puecooquiaari puetunu canuujuanaani, puetunu maajipohuajanaa, puetunu mueraasapuejanaanio. Majaari quenaaja niquiriyatu cureenu quiquiaari. 35Tiaca camaruhua pa miaquejonu nuhuaji cuno tiacacajinijinij paari saa juyacaja curoquiaari pueranoni, socua panishano casamijiaajanio. 36Paari nio tiacacajinia quijiaca pueya miaquejoquiaarini. Aroer tiacajinia quijiaca pueya teyonute Arnoon moo shuriuquiumia quijiacacuajani, naajuhuaj, cuno na jamatujinia quijia tiacajaajanio. Paari naa tojetaarucuajanaa tucuataquiaari cuno jiyajinia quijiaca taucuaca miaquejonuni. Paari Galaad tiacajinia quijiaca miaquejoseejaniuhuaj. Naa pa miaquejosacari nojoritij, majaari quenaaja nojori naata quijia pa nujuatanu. Pueyasojuanaa naacunuucua pajaniya, paari saniya nojori shocojotaquiaarini.
Chwazi Kounye ya:
Deuteronomio 2: arl
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 1986, 2008, Wycliffe Bible Translators, Inc. All rights reserved.