Deuteronomio 3
3
Supuetana Rubeencuajinio caneno pueya maanu, supuetana Gadcuajinio caneno pueya maanujuhuaj, supuetana Manaseescuajinio caneno pueya maanu cajiniocuanio, nojori quijiara niquitiosaaquiaariiri jiya Jordaan moo taquijiria pananu muetasamajiria
12“Paa miaquejonu nuhuaji cuno jiya camaruhua, puetunu cuno jiyajanaa tii quijia na tiacacajuhuaj, puetunujuanaari puerano quiquiaari. Naacuatej janiyari cuno jiya serotaquiaari supuetana Rubeencuajinio caneno pueya maanuni, supuetana Dancuajinio caneno pueyajuhuaj cuno jiya camaruhua nojori quiniuria saniniuujia. Cuno jiyari Aroer tiacajiniji coteya, Arnoon moo casaqueyaji puequeeseeri. Naajuhuaj, Galaad tuhuananuhua cajiniocua puecaari nojori jiya, puetunu tii cuno jiyajinia quijiaca na tiacatajuhuaj. 13Saniniuujia, janiyari Galaad jiya raqui niquitioquiaari supuetana Manaseescuajinio caneno pueya maanuni. Cuno pueyari maja puetunu Manasees pueyajanaa, saa nojorijinijinio na cajiniocua ueyaja. Puetunu Basaan jiyajanaari nojori jiyara quiquiaari. Puetunu cuno jiyajanaari coteenu tariucuacaanu Og jiyanishano tahue jiya quijia. Naajuhuaj, puetunu Argob jiyajanaari Manasees maapue jiyara quiquiaari. Tariucuacaanu cuno Argob jiyari Refaitas jiya quijia. Quiarijia saniniuujia, supuetana Manasees niquiohuacuajinio pueya maapue cajiniocuaari cuno jiya camaruhuara quiquiaari saniniuujia.
Pueyaso juaashacari Moisees
26“Israel pueyanaa, Pueyasoori cua juaaquiaari nia rupaajinia. Majaari tari na tojiniu paniniu quiquiaari nojuaja cua masesano. Saaja naa cua riucuaquiaariiri: ‘Tariucuaja. Quia sanaajere, maja socua tequejonu. Majaari cuno jiyajinia quia tiuquiniu paniniujiniji socua cua sequenu. 27Quiarijianij, nareja quia tacaare Pisgaa jiyanishano tuhuananuucua. Quiocua cuno tuhuananujiniji niquinijiosee tiquiyocua: pananu tiuquishacora, pananu muetasamajinio, naajuhuaj, pananu muetasamaji muenecara, pananu muetasamaji miaquetajaranio. Maja cutaraari quenaaja quia niuuniu quiniutianiya Jordaan moo. 28Quiarijia saniniuujia, Josuee quia rootare cua niishitiojosano quiajaniyacuaa. Nojuaja quia shuniujiuri maja na cohuanashitianura na paraa. Cayacuajate, cuaara cumaquiiria tama na cuaqueyajaaja. Nojuacuajaari puetunu cuno pueyajanaa puetariquiano quiarijia quia niquishano jiyajiniara, nojori na camarutenura cuno jiyac.’”
Chwazi Kounye ya:
Deuteronomio 3: arl
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
© 1986, 2008, Wycliffe Bible Translators, Inc. All rights reserved.