Néra Njékaḭkulaje 21
21
Deḛ tel d’aw Jerusalem gogo
1Loo gə́ jeḛ j’ya̰ dee mba̰ ndá jeḛ j’uru mee bato’g j’aw sur n’teḛ Kos. Bèlè ndá j’aw Rodə ɓa j’ḭ keneŋ j’aw Patara. 2J’iŋga bato keneŋ gə́ si gaŋg mán kəmee gə́ Penisi ndá j’uru mée’g j’aw. 3Loo gə́ j’un kəm sí j’oo dɔgoré-loo gə́ Siprə ndá j’ya̰ gə́ dɔgel bèe ɓa j’un rəw kəm sí gə́ par gə́ Siri ndá j’wa naŋg Tir, mbata lée neelé ɓa d’a gə kɔr néje gə́ mee bato’g lé kɔm keneŋ. 4J’iŋga njékwakiláje keneŋ ndá j’isi sə dee ndɔ sí siri. Ndilmeenda ɔs njékwakiláje budu ar dee d’ula Pool gə mba karee aw Jerusalem el. 5Nɛ Loo gə́ ndɔ sí aḭ siri mba̰ ndá j’ḭ j’ɔm na̰ rəbə gə mba kaw ndá deḛ lai gə denéje lə dee gə ŋgan deeje dan sí saar d’unda sí gir ɓee gə́ raga. Jeḛ j’ɔs kəji sí naŋg dɔ koŋgo, jeḛ n’ra tamaji lé na̰’d. 6Yen ɓa j’ḭ n’ra na̰ lapia kára-kára lai ndá j’ḭ j’uru mee bato’g ləm, deḛ kara deḛ tel gə́ ɓée lə dee ləm tɔ.
Agabus teggin né gə́ a gə ra Pool lé
7Loo gə́ jeḛ j’ya̰ rəw gə́ mán gə mba taa rəw gə́ raga ndá j’ḭ Tir j’aw Tolemayis. Lée neelé jeḛ n’ra ŋgako̰ na̰je lapia keneŋ ləm, j’isi sə dee na̰’d ndɔ kára ɓa ləm tɔ. 8Bèlè lookàree j’ḭ keneŋ j’aw saar n’teḛ Sejare. Jeḛ j’aw kəi lə Pilibə gə́ to gə́ njekaw gə loo-loo kila mber tagə́maji lé. Yeḛ lé to njekɔm dee gə́ siri gə́ d’ɔr dee gə́ njékaa dɔ néje mee Eglisə gə́ Jerusalem lé ndá jeḛ n’to kəi ləa#NNk 6.5, 8.5. 9Ŋganee gə́ ma̰də deḛ sɔ gə́ lal taa ŋgaw, deḛ nja to gə́ njéteggintaje. 10J’isi keneŋ ndɔ sí aḭ bula bəl ya ndá njetegginta kára ria lə Agabus ḭ Jude teḛ keneŋ#NNk 11.28. 11Yeḛ ree rɔ sí’g ndá un ndar lə Pool tɔ ne gɔlee gə jia-yeḛ ya ɓa tel pana: Aa ooje, ta gə́ Ndilmeenda riba dəa lé ɓa nee: Dəw gə́ njendar neelé Jibje d’a teá ne togə́bè Jerusalem’g ɓó gə kulá ne ji njépole-magəje’g ya.
12Loo gə́ jeḛ j’oo ta nee ndá jeḛ gə deḛ gə́ d’isi lée’g lé n’ra ndòo rɔ Pool’g gə mba karee aw Jerusalem el. 13Yen ŋga Pool tel ila dee keneŋ pana: See ban ɓa seḭ no̰je arje ɓəŋgərəm a gə ti ne dus nee wa. Lée kwa əsé kwəi Jerusalem’g kara m’isi dɔ gɔlm’g kəgəgə gə mba kaw keneŋ mbata lə ri Mbaidɔmbaije Jeju Kristi lé ya.
14Loo gə́ yeḛ ya̰ rəw ar sí j’ula ta mée’g el lé ndá jeḛ j’yá̰ tɔ, m’pa ne pana: Maji karee to gə goo rəw gə́ Mbaidɔmbaije wɔji mée’g ya.
15Gée gə́ gogo lé jeḛ j’wa dɔ gɔl néje lə sí gɔl-gɔl j’ḭ j’aw Jerusalem. 16Njékwakiláje gə́ na̰je gə́ Sejare lé deḛ d’aw sə sí na̰’d d’unda sí kəi lə Mnaso̰ gə́ to gə́ dəw gə́ dɔgoré-loo gə́ Siprə. To njekwakila gə́ ləw, kəi ləa ɓa j’a gə to keneŋ.
Pool si Jerusalem
17Loo gə́ jeḛ n’teḛ Jerusalem mba̰ ndá ŋgako̰ na̰je d’wa sí gə́ rɔ dee’g gə meendakaḭ. 18Bèlè lookàree Pool aw sə sí kəi lə Jak ndá ŋgatɔgje lai d’wa dɔ na̰ keneŋ. 19Yeḛ ra dee lapia mba̰ ɓa yeḛ ɔr sor néje lai-lai gə́ Ala ra mbuna njétareeje’g gə goo kula’g ləa lé. 20Loo gə́ deḛ d’oo taree lé ndá deḛ d’ula rɔnduba dɔ Ala’g. Tɔɓəi deḛ d’ulá pana: Ŋgokɔm oo, Jibje bula-bula gə́ d’un meḛ dee lé rɔ dee wɔilɔ pélé-pélé dɔ godndu’g. 21Deḛ neelé d’oo taree pana: I lé ndoo Jibje lai gə́ d’isi mbuna njépole-magəje’g ar dee mbad Moyis ləm, ula dee ar dee d’inja tamɔd ŋgan deeje el ləma, ar dee ndolè goo néjiɓee lə dee el ləm tɔ. 22Ŋga see j’a ra banwa. Dəw-bulaje d’a gə mbo̰ dɔ na̰ mbata d’a koo ta ree ləi mba̰ ɓó loo maḭyee godo. 23Gelee gə́ nee ɓa maji kari ra né gə́ j’a gə kulai lé. Dəwje sɔ mbuna sí’g nee to gə́ njekun ndu deeje. 24Maji kari ɔr némina̰ rɔi’g sə dee na̰’d ndá i nja a ndogo né kar dee ndisa ne dɔ dee mbɔji. Togə́bè dəwje lai d’a kooi gə́ njekaa dɔ godndu lé kər-kər ndá d’a koo ta gə́ dəwje təd d’ɔm tai’g lé gə́ taŋgɔm ya#BI 6.13-21. 25Ta gə́ wɔji dɔ njépole-magəje gə́ d’un meḛ dee lé j’ɔm na̰’d gə mba ndaŋg maktub kar dee mba kar dee d’ɔg rɔ dee dɔ da gə́ deḛ d’inja ne məs pole ne magəje ləm, gə dɔ məs’g ləm, gə dɔ nékulje gə́ mbiri gwɔs dee ləma, gə dɔ mɔdkaiya’g ləm tɔ#NNk 15.29.
26Yen ŋga Pool ɔr dəwje neelé ɔr némina̰ rəa’g sə dee na̰’d. Tɔɓəi bèlè lookàree yeḛ aw sə dee mee kəi-Ala’g wɔji ne rudu ndɔ kɔr némina̰ rɔ dee’g ɓa d’a gə ree gə nékinjanéməsje gə́ wɔji dɔ dee kára-kára lai ɓəi.
D’wa Pool mee kəi-Ala’g
27Ndɔ siri ləa nai dəb ndá Jibje gə́ d’ḭ Asi d’oo Pool mee kəi-Ala’g ndá d’ɔs kudu boo-dəwje lai ɓɔḭ-ɓɔḭ d’ar dee ɓugu na̰ dəa’g d’wá 28ra né wəl-wəl pana: Dəwje gə́ Israɛl, ree laje sə sí! Aa ooje dəw gə́ ɔr goo ta gə loo-loo ar dəwje lai ila ne ta dɔ dəwje gə́ Israɛl ləm, gə dɔ godndu’g ləma, gə dɔ loo’g neelé ləm tɔ. Ɓasinè yeḛ ar Grekje kara d’andə mee kəi-Ala’g ila ne ndɔl dɔ loo gə́ to gə kəmee neelé tɔ.
29Deḛ pa togə́bè mbata kédé lé d’oo Tropim, dəw gə́ Epesə səa na̰’d mee ɓee’g, yee ɓa meḛ dee ndaji ta pana: Pool aree andə mee kəi-Ala’g ya#NNk 20.4. 30Kaar dəwje lai mee ɓee’g wa dee paḭ, ar dee d’ḭ gə loo lai d’aḭ yao-yao. D’ur dɔ Pool’g d’ubá d’wá d’ḭ səa mee kəi-Ala’g ndɔree teḛ səa raga ndá léegəneeya d’udu takəi bugum. 31To gə́ deḛ saŋg loo gə mba tɔlee lé taree oso mbi ɓé-njérɔje ar dee d’ulá pana: Dəwje lai-lai gə́ mee ɓee gə́ Jerusalem d’aw dɔ na̰’d pum-pum. 32Léegəneeya yeḛ ɔr njérɔje gə njékɔrno̰ njérɔje gə́ tɔl-tɔl lé ɔm dee dəa’g aḭ aw iŋga dee ne. Loo gə́ d’oo ɓé-njérɔje gə njérɔje gə́ d’aw səa lé ndá d’əw rɔ dee kunda Pool. 33Yen ŋga ɓé-njérɔje ree pər gə́ rəa’g ubá wá ar dee teá gə kúla lar gun joo. Tɔɓəi yeḛ dəji pana: See yeḛ to gə́ nawa əsé kula rəa to ɗi wa. 34Nɛ mbuna boo-dəwje’g lé njé gə́ na̰je pata u-u-u d’oo ne ka̰ na̰ el aree askəm koo ginee gəd el mbata d’aw dɔ na̰’d pum-pum ndá yeḛ un ndia ar dee gə mba kar dee d’aw səa gadloo’g lə dee. 35Loo gə́ Pool teḛ Pool loo-tuga-kaw-tar gə́ wɔji dɔ gadloo’g lé ndá njérɔje d’unee mbata koso-dəwje d’usu ŋgwɔi dee rɔ na̰’d wur-wur. 36Mbata dəw-bulaje gə́ d’ɔm na̰ goo dee’g lé ra né wəl-wəl pana: Areeje udu gə́ kudu ya.
Pool teggin meekun ləa ar deḛ gə́ d’wá lé
37Nai lam bèe kar dee d’uru səa gadloo’g lé ndá Pool dəji ɓé-njérɔje pana: See i a kya̰’m karm m’pata ləm m’ari oo el wa.
Ɓé-njérɔje ilá keneŋ pana: See i gər ta Grek wa. 38See i to dəw gə́ Ejiptə gə́ njekḭ gə njéko̰ɓeeje gogo nee kɔr gayim-dəwje tɔl-dɔg-loo-sɔ kaw sə dee gə dɔdilaloo’g lé el wa.
39Pool tel ilá keneŋ pana: Ma m’to Jib, dəw gə́ Tarsə dəb ɓeeko̰ gə́ Silisi. M’to gə́ njeɓee gə́ kojikəi ya ɓó ri ɓee ləm iya el. Ma m’ra ndòo rɔi’g gə mba kari ya̰ rəw am m’ula koso-dəwje neelé ta ya.
40Ɓé-njérɔje un ndia aree ndá Pool aar tar dɔ loo-tuga-kaw-tar gə́ wɔji dɔ gadloo’g lé ɓa yə jia ta koso-dəwje’g neelé. Loo to ndiŋ ndá paul un ta pa gə ta Ǝbrə pana:
Chwazi Kounye ya:
Néra Njékaḭkulaje 21: SBA2015
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Ngambai Bible © Alliance Biblique du Tchad 1989, 2015.