LUKE 18
18
Hemipui ge nah Hetuketiakpe Samgwa
1Ciciu eh pa penui de penui lung keherei di mene kie bam muih lu maisia lie samgwa ge ranglia. 2Pa cu, “Renam gega hetuketiakme ge Tinggwang miehing ma nah mina dede mapei la kemak ge bam la; 3nah cika hemipui ge peda gwang eh, ‘A ngauraume dade a qum rang beu lo lo’ bam di. 4Kakke pa pecu mlai di; dede kekamle pa pekatei pecu mpau eh, ‘I Tinggwang miehing ma nah mina dede mapei melie de, 5ciciu de aipau pui de acu kelio au lu, I pekum rang beu dizie, maige pa ada gwang sap eh acu keleei cet di lau delu’” dedi.
6Nah Rampaube cu, “Nking lu, hetuketiak masang kemakbe kerang sam de. 7Tinggwang pa ne kedetkelume peda ge tingmui tingba mra gai kebamme qum rang lak luini? Pa peting teu ntie di zie ni? 8I nnui dage ranglia zie, pa penui qum rang zette beuzie, ciciu eh Mina Nabe kegwang dau pa kideu ga kenlum bam eh ngau lu zie ni?” dedi.
Phariseeme nah Heraha Kehame Samgwa
9Pa samgwa aide pwa mi penui katei penui dele masang lie mning kela nah kedame de malie la kemakme dung dage rang gai: 10“Mi hang na Kerecaki ga kie zie lie hang, hang ge Phariseeme nah kedabe heraha kehame ge.” 11“Phariseebe pekatei sap tsam lü kie eh cu, #18:11. pekatei sap tsam lü kie; Laisiu kesa ga bam sap lü pekatei kie.‘Tinggwang I mi kedame mide keheutyei kelame, masang kemakme, kemmhame nah mede heraha kehame aipau dede nzwa kemak ziemne ncu twa la. 12I mtakkak ge gade pia na mmwang la, I mangau kelu pelane zi kerei tei eh zige kai beula,’ dedi.
13“Dede heraha kehabe kemdei gage sap lü, pe mik de tinggim le ngang cu lu sia eh, pe heqarak kepeu eh cu, ‘Tinggwang, I kemaume ge, nang acu ngaunggia lo!’ dedi. 14#Mat. 23:12; Luk. 14:11.I nnui dage rang siakte lia zie, mina kedabe mene mina aipau de be pecu tei masang lü pe ki ga nghungh dida; kedanemene keheibe de pekatei pecu tei mdi teu kelame de tei henah dizie, dede pekatei pecu tei henah teu kelame de tei mdi beuzie.”
Jisu Hename ze Samlam Kebeu
(Mat. 19:13-15; Mrk. 10:13-16)
15Ciciu eh penui pecu peu hename de tung gai zie lie peda ngngwa gwang; ge pe caisuime cide ngau ge, penui penui de kesei. 16Dede Jisu penui de pe tai gage qu teugwang eh cu, “Peu hename de ada gwang lulo, penui de kaam helo; kedanemene Tinggwang Hegwangram au cii kenzwame gulu. 17Kesang, I nnui dage ranglia zie, keheibe de hename nzwa Tinggwang Hegwangram luu lumai cika lüt gailak.”
Keheime Ge
(Mat. 19:16-30; Mrk. 10:17-31)
18Nah hangkiame ge pecu keteu eh cu, “Keledeu keyibo, I kelungta kering ngau lu kerane daipai tei zie no?” dedi.
19Ge Jisu peda de, “Nang daitei acu keyibe lie qu lano? Tinggwang gwale migede keyi gah. 20#Tet. 20:14; Hez. 5:18. Tet. 20:13; Hez. 5:17. Tet. 20:15; Hez. 5:19. Tet. 20:16; Hez. 5:20. Tet. 20:12; Hez. 5:16.Nang sam kaikebeu: ‘Mmha so; mide daptset so; rega so; kenret zierang tei so; n pui n pei de rüt lu’ de kecu dung de ci bam” dedi.
21Ge pa cu, “Aidung pelane I a henane gade mzai la dida” debeu.
22Jisu cide siu luge peda de cu, “Nang mage cang ma. Nang kebam pelane zwa di delü kegame de mzi beudi ciciu cai nang tinggim ga n mahei bam luzie; delü a caisui lu” debeu. 23Dede pa aide siu luge pesui gah di, kedanemene pa mahei süt kecune.
24Jisu pecu pie lü rang eh cu, “Keheime dung ziemne Tinggwang hegwangram ga nlüt kera dai hiaa ge paah no! 25Kedanemene keheime ge Tinggwang hegwangram ga kemlüt swa au peu ut gede langhhim mihki gade kemlüt be reluiki zie kecune” dedi.
26Cide siu kelume dung cu, “Ciciu cai cau ne kelikelu ngau luzie bi?” dedi.
27Dede pa cu, “Mina tei gai kelakbe Tinggwang tei lubui,” debeu.
28Nah Peter cu, “Ainie, anui au anui ki dung gidi eh n caisui la dida” dedi.
29Ge pa penui dade, “Kesang, I nnui dage ranglia zie, migede Tinggwang hegwangram ziemne pe ki mede pe naume de pe caireiswacingme mede pe pui pe pei mede pe name dung de gidi cai, 30aipau teilung gade de nah kekambe teilung kelungta kering gade de ciswa kiee gwa kecu ngau zie” debeu.
Jisu Petsit ha Kerang ma pekecumbe
(Mat. 20:17-19; Mrk. 10:32-34)
31Nah pa kereikena bau de peda ngngwa gwanglü penui dade, “Ainie, anui Jerusalem ga hangh la dida, nah caihakecime ne Mina Nabe ha rauteu kela pelane teicang luzie. 32Kedanemene pecu Tinggwang de ci kemakme ba gage tui gai beuzie delü pecu teu henui tei nah hengam tei zie nah pecu ncai msui lua zie; 33penui pecu dap eh teitset dizie, nah lang pekecum benai pa cu dai luzie,” debeu.
34Dede penui aidung de kette ci lu tadi; sam aide penui dade kebai di, cine penui pa kerang samkie de cet lu tadi.
Jisu Mahaketyei Mikcietpe ze Teimmi kebeu
(Mat. 20:29-34; Mrk. 10:46-52)
35Pa Jericho tai ga mna gwang kezeu dau mikcietme ge lampui kuung ga bam lü mahaa bam; 36nah mina maabe kegwang koa siu eh pa aide daitei au bi keteu.
37Ge penui peda de, “Nazarethme Jisu gwang zeu lie” de ranglia.
38Ge pa sabaq eh, “David napei Jisu, acu ngau nggia lo,” dedi.
39Ge mina keraile kelame pecu nlei laklie kesei: dede pa sa nteeiki eh, “Nang David napei, acu ngau nggia lo,” dedi.
40Ge Jisu mtak lu delü pecu ngngwa peda gwang lo rang beu; nah pa gwang mna kelu dau pa pecu keteu eh, 41“Nang acu peu n ziemne daipai tei beu neu lano?” dedi.
Ge pa, “Rampaubo, peu acu mangau dai lulo,” dedi.
42Ge Jisu peda de, “Mangau dai lu; n kenlum ne ncu tei myi luda,” debeu.
43Nah pa mangau zette dai lu nah pa Tinggwang de twa eh pecai sui di, nah mina pelane cide ngau eh Tinggwang de twa di.
Chwazi Kounye ya:
LUKE 18: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.