LUKE 17
17
Kemau
(Mat. 18:6-7,21-22; Mrk. 9:42)
1Nah pa pe caisuime dade cu, “Mide tei kemsia gwang megai lak; dede co, cau be dade gwang zie bi cipau de au tei lu buida! 2Mina cipau de hena keceu aidung de hang gede tei msia kedi swa au pecu pe gong gage ma kegimtsu pwa gimlü dui kedi gage kelien gai kedibe yiki zie. 3#Mat. 18:15.Nnui mriak lulo!
“N sinabe kemau tei cai pecu kesei lo, nah ma gade pa pelung nreu lu cai, pe mau gi beu lo; 4nah pa ma gade tingnai ge gage pia sena nda ge kemau tei gai de pia sena nreu gwang dai lu cai, nah ‘I a lung nreu lu zieda’ decai nang pe mau gi beu maisia.”
Kenlum
5Apostleme Rampaube dade, “Anui kenlum tei nkieng beu lo!” dedi.
6Ge Rampaube, “Nnui kenlum ziegitsi pum lang nage de bam lie cai, nnui aipau caimün bang dade, ‘Nang nlwak mpet lü duidi ga sap lulo’ debeu de cide nnui sam mzai zie.
Kilame Ta
7“Nnui mige pe kilame ge bam eh lu gade mede meurün kwa la eh gwang de peda de, ‘Kelwa gwang bam lü matyei lu’ de zie ni? 8Ciciu meliene pa peda de, ‘A ziemne ma telei lu delü nkia kaanglü I matyei lu kemaktane makai acu peu bam lu; nah pecaine nang tyei nah sak lu,’ de zie. 9Pa tei lo kebeu dung de tei kebeu ne pa kilabe de pecu deu keherei delie zie ni? 10Cine nnui de tei lo kebeube pelane tei kelu dau, ‘Anui au kila tei lu kebuime ma, anui anui ta na de rünne tei kelu lie’ delo” debeu.
Jisu Mipei Kerei ze Teimmi kebeu
11Pa Jerusalem ga gwang kela dau Samaria penai Galilee deu kak ga kah gwang zeu. 12Nah pa renam gega lüt ge kempame hang kerei pecu redau lu, penui kemdei gage sap eh, 13marang sabaq eh cu, “Jisu, Keledeubo, anui de ngau nggia lo” dedi.
14 #
Lev. 14:1-32. Pa penui de ngau luge penui dade, “Gwang delü cingkume dage nnui de lia lo” dedi.
Nah penui gwang kela dau penui nci lu.#17:14. tei nci di: 5:12. ga pielu 15Ge penui hang ge pa yi kedi ngau luge marang sabaq eh Tinggwang de twa eh nli gwang dai; 16delü pe ju Jisu pi gage nkum pung eh pecu twa. Nah pa Samariame ge. 17Ge Jisu cu, “Mina kerei nci lu melui ni? Daiga hang hekui bau ladi ah? 18Sang aipau de gwale kedame hang gede gwang Tinggwang de ketwa gade mi?” dedi. 19Ge pa peda de, “Cuh lü nang lampui le gwang cu; n kenlum ne ncu teimmi luda” debeu.
Tinggwang Hegwangram Gwang Kera ha
(Mat. 24:23-28,37-41)
20Phariseeme daidau Tinggwang hegwang gwang zie bi pecu keheteu dau pa penui dade, “Tinggwang hegwangram au pe rehi ngau eh gwang lak; 21mede penui, ‘Ainie, cide aika!’ mede ‘Luga!’ de rang lak, kedanemene ainie, Tinggwang hegwang au nnui kak ga bam delu,”#17:21. nnui lung ga; mede nnui kak ga, mede nnui kak ga mikngau tei zette gwang zielu. debeu.
22Nah pa pe caisuime dade cu, “Nnui Mina Nabe tingba ziee dung ngau keneu tingba dungge gwang zeu, dede nnui cide ngau lak. 23Nah penui nnui dade, ‘Ainie, aika’ mede ‘Lunie luga’ de zie, dede pet pie so mede cide caisui so. 24Kedanemene ting kekepik dau tinggim lambie gede kepik gaige kedale baa gwang di kela nzwa Mina Nabe kegwang benai de ciciu zie. 25Dede keherei süt kecu ngau rai eh cudau name de peu pecu mlai di rai zie. 26#Ken. 6:5-8.Nah Mina Nabe tingbazie de Noah ting dau nzwa zie. 27#Ken. 7:6-24.Noah lim ga nlüt di kemakta au mi matyei masak, nah henau tei nah hemeu meu bam eh duidi kegwang dau mina pelane de kegak cet kap di. 28#Ken. 18:20; 19:25.Lot kelungh tingdau de cinzwa; mi matyei, masak, malui, maling, ki tei eh bam; 29dede Lot Sodom gade tetkempet benai tinggim gade mi nah mitsu rui mie eh penui de nkap kap di. 30Mina Nabe mi mikngau tei kegwang benai de cide nzwa zie.
31 #
Mat. 24:17,18; Mrk. 13:15,16. “Cipau nai keheibe de kireu kebamme nah pe kilung ga kebamme de peu pe gu keu zie lie nghungh so; nah luh ga kelame de peu nli gwang so. 32#Ken. 19:26.Lot nau ha nsung lulo. 33#Mat. 10:39; 16:25; Mrk. 8:35; Luk. 9:24; Jhn. 12:25.Keheibe de pekatei pepum pwa pe gu tei lu neu cai cide tei nggah dizie, dede pepum nkap nggah kegaibe au cide kuak luzie. 34I nnui dage ranglia zie, cipau ziu zeu gega mi hang na zeu bam zie; hang gede keuteu dizie, dede kedabe de au gi dizie. 35Mipui hang na ngngwa maniak bam zie; hang gede keuteu dizie nah kedabe de au gi dizie.”#17:35. Laisiu kesa pedum 36 kai si: mepei hang na luh gega heta tei lazie: ket de keutet dizie, kedabe de gi dizie (Mat. 24:40 ga pielu).
37Ciciu ge penui peda de, “Daiga lia, Rampaubo?” dedi.
Ge pa penui dade, “Daiga hepaau be bam bi cika herarui dung de nkwa la,” debeu.
Chwazi Kounye ya:
LUKE 17: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.