LUKE 19
19
Jisu nah Zacchaeus
1Pa Jericho ga lüt lü kah gwang zeu. 2Nah cika mige pezi Zacchaeus lie kecu ge bam; pa heraha kehame reu kedibe nah mahei. 3Nah pa Jisu cau bi pie zie lie peeicu, dede mina maabe ziemne nah pa pera keduihne, ngau luma. 4Cine pa pak nto gwang eh pecu pie zie lie caimün bang reu ga rahang lu, kedanemene pa cilam kah gwang kezeu ne. 5Nah Jisu heni cika gwang cang luge ngangcuh pecu pie eh peda de, “Zacchaeus kelwa nghungh lu; kedanemene I henai n ki ga gwang maisia lu” dedi.
6Cine pa kelwa nghungh pesui yi süt eh pecu ngngwa lu. 7Nah mina pelane cide ngau eh ncam eh cu, “Pa kemaume ge gia tei zie lie gwang dida,” dedi.
8Ge Zacchaeus sap eh Rampaube dade, “Ainie, Rampaubo, I a ma pempie ge pwa kegame de peu dizie; nah ma gade I makeheibe lede keheibe dede cwa di cai I cii mdai kieege peu dai dizie” dedi.
9Ge Jisu peda de, “Henai ki aika kelikelu gwang luda, kedanemene pa de Abraham na kecu ziemne. 10#Mat. 18:11.Kedanemene Mina Nabe gah kedi mede pei nah keli lu zie lie gwang kecu ziemne,” dedi.
Kechak Goi Samgwa
(Mat. 25:14-30)
11Penui sam aidung de siu luge, pa samgwa keda ge ranglia si, kedanemene pa Jerusalem ga gwang mna di zeu nah mina dung Tinggwang hegwang gwang zette zie lie mning la kedine. 12Cine pa cu, “Kedihme ge mie renam kemdei gage de kenkieng ngau lüne caili gwang dai zie lie tetti. 13Pa tet kedi dwa pe kilame hang kerei de qu lü penui de rangkang bung gege peukap eh cu, ‘Aidung de keu heli tei lu I gwang kemaktane’ debeu. 14Dede pe ramme na dung pecu ngaurau eh hegwame gede pecai de lang gai eh, ‘Anui peu aipau dede anui reu hegwang tei neu ma’ delo rang beu.”
15“Pa hegwang kenkieng ngau lü nli gwang kelu dau, pa kila penui de rangkang peu kedime dung de qu hekwa lü penui heli tei eh dai kieege pet lu dibi rang gailo beu. 16Mina keraibe peda gwang eh cu, ‘Rampaubo, nang acu kepeu le pwa heli tei eh kecak kanggeu kerei pet lu’ debeu. 17Ge pa peda de, ‘Teidau da, kila keyibo! Kedanemene nang ma keceuna ge gade de masang kelu ziemne, peu ncu renam kerei reu hegwang tei zie’ debeu. 18Nah kenabe de gwang peda de, ‘Rampaubo, nang acu kepeu le pwa heli tei eh kecak kanggeu mengei pet ludi’ dedi. 19Ge pa peda de, ‘Nang de nam mengei reu hegwang tei zie’ debeu.
20“Pecai keda ge gwang, ‘Rampaubo, ainie n rangkang, I cide banoipai gage hezuilü kebai pwabam; 21ncu hing di kedanemene nang mina ketakh kauge; nang kai kemak gade de keu lala, nah ling gai kemak gade de rum la kelane,’ kedi. 22Ge pa peda de, ‘Nang kila kenlienbe, I n samrang ziemne ncu mmau zie! Nang I a lung ketakh kauge, kai kemak gade de keu kela nah ling gai kemak gade de rum kela ci ni? 23He nang daitei a rangkang rangkang ki gage kai ma ah, delü I nli kegwang dau I cide nah peqai de si eh pwalu kera?’ dedi.
24“Nah pa cika kesapme dade, ‘Rangkang de peda de keu lü kerei kebambe de peudi,’ debeu. 25Ge penui peda de, ‘Rampaubo pa kerei bam!’ dedi. 26#Mat. 13:12; Mrk. 4:25; Luk. 8:18.‘I nnui dage ranglia zie, keheibe de kebambe de peusi zie; dede kegabe dade kebam na dede keteu si dizie. 27#Mat. 25:14-30.Dede a ngauraume, peu acu penui reu hegwang tei rau kedime dung, penui de au aika ngngwa gwanglü a dwa de penui de daptset dilu’” debeu.
Jisu Hecili eh Jerusalem ga Kelüt
(Mat. 21:1-11; Mrk. 11:1-11)
28Pa aide rang cang dige, Jerusalem lege tet gaidi. 29Pa olive deutuh lie qu kela ga Bethphage penai Bethany tai ga gwang mna kelu dau, pa pe caisuime hang na de lang gai eh cu, 30“Renam mcua kebam de ga gwang cu, cika nnai lüt de gada pe reu migede madaude hangh kemak nage keupwa ngau luzie; cide heuhlü aika teugwang lu. 31Mi nnai de ‘Daitei nnai cide heuh zeu no?’ decai, nnai ‘Rampaube#19:31. Rampaube; mede pe mpaube. cide teu maisia lie’ lulo beu.”
32Ge langkegai kena de mie ge pa penai de rang kebeu de nzwa bam eh ngau lu. 33Nah penai gadana de heuh bam ge pe gume penai dade, “Daitei nnai gadana de heuh zeu no?” dedi.
34Ge penai, “Rampaube aide teu maisia lie” debeu. 35Nah penai cide Jisu da teugwang beu delü penui pai gadana reu gage kahmlü peu Jisu de pe reu ga bam lu. 36Ge pa pe reu cwa gwang kezeu dau penui penui pai puidi gage kahm gai.
37Pa olive deutuh gade tet nghungh eh mna gwang kezeu dau pe caisuime maadi penui suiyi eh nah mimakecang bata penui kengau dung de ziemne sabaq eh Tinggwang de twa eh cu, 38#Lei. 118:26.“Rampaube zi teu kegwangbe de peu samlam pung kelube tei lulo! Tinggim ga keyibe tei lu nah ting hutu gade pezi heci kelube tei lulo!” dedi.
39Ge mina maabe gade Phariseeme ge peda de, “Keledeubo, n caisuime de kesei di lo!” dedi.
40Pa cu, “I nnui dage ranglia zie, ma gade aidung de nlei ta dide, ntsu dung de nlei eh sa pet dizie,” debeu.
Jisu Jerusalem ziemne Kehap
41Pa gwang mna lü renam be ngau luge cide ziemne hap eh cu, 42“Nang henai de n keyi ha ci lie cai! Dede cu au cidung de n mik gade kebai dida. 43Kedanemene peting ge gwang zeu, cidau n ngauraume tsuqoa qoa togwa luzie delü ncu suah lü togwa luzie. 44Delü ncu nah n name dung de si eh kideu gage nkap dizie, nah penui peu ntsuqang ge dede kesua pwabam lak; kedanemene nang ncu pei kegwang ting ci kemak ziemne,” dedi.
Jisu Kerecaki Tei Kemci
(Mat. 21:12-17; Mrk. 11:15-19; Jhn. 2:13-22)
45Pecai Jisu pa Kerecaki ga lüt eh cika mazwa kebamme de gwa mpet eh cu penui dade, 46#Isa. 56:7; Jer. 7:11.“ ‘A ki le pwa kekie ki tei zie’ de eh rau nzeu meni; dede nnui cide pwa sütketyeime ki ge tei dida,” dedi.
47 #
Luk. 21:37. Delü pa Kerecaki ga tingba nsangne ledeu bam di. Cingku kedihme nah laisiu kecime nah mina hangkiame pecu daptset di zie lie pei bam di; 48dede penui teidau lu mene ladi, kedanemene mina pelane pe sam nking bam kedine.
Chwazi Kounye ya:
LUKE 19: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.