JOHAN 7
7
Jisu nah Pe Siname
1Aipau cai, Jisu Galilee ga mbeuh mie; pa Judah ga mbeuh neu tadi, kedanemene cika Judah kenkieng keteume pecu teitset neu la kedine. 2#Lev. 23:34; Hez. 16:13.Kensiuki dung Ngyi ting de mna gwang di, 3cine Jisu siname peda ge rang di, “Heni aide püt ti delü Judah ga miecu, ciciu de n caisuime nang teikela dung de ngau luzie. 4Migede mide peu pecu ci hemi lu neu cai pa tei kelabe kebai di lama. Nang aidung de tei kelane, peu kideu pelane de n ha ci lu!” 5(Pe siname kecang de pecu nlum ma.)
6Jisu penui dage rang gai, “A ziemne peting petaube gwang lu mereu. Peting kehei dau de nnui ziemne au petau lie. 7Kideube nnui de nkau gailak, dede cide acu nkau la, kedanemene I cide dage pe lampui dung au sia lie eh rang kelane. 8Nnui hengyi ga miecu. I hengyi aika mie#7:8. I mie lak; Laisiu kesa ga bam I mie lai bam ma. lau ma, kedanemene peting petaube a ziemne gwang mereu lu.” 9Pa aide rang gai, nah Galilee ga bam si di.
Jisu Kensiuki dung Hengyi ga Kebam
10Pe siname hengyi ga mie kedi cai, Jisu de miedi, ciciu de, pa mi mikngau tei mene, nkim miedi. 11Judah kedihme dung hengyi ga pecu peei gwang. “Pa daiga bam no?” penui keteu di.
12Cika maadi ga pe ha nkim cüt süt bam di. Mina kangge rang di, “Pa au mina keyime ge.” Kedame rang di, “Ma, pa au mina dung de sau mau la dida.” 13Dede migede pe ha rang mdu tadi, kedanemene penui au Judah kedihme de hing kedine.
14Jisu Kerecaki ga mie ledeu cu kedi dau hengyi de pempie nage hangh ladi. 15Judah kedihme dung penui swaga süt eh rang di, “Mina aipau de pa heciem heteu mene dainzwa maci aikiee ge ci lu dino?”
16Jisu keli gai, “I ledeu kela de au akatei a keledeu ma, dede cide acu langkegaibe, Tinggwang dade gwang. 17Keheibe de Tinggwang suibe tei neu kelame au I ledeu kela de Tinggwang dade gwang mi mede I akatei a kenkieng teu rang labi kecu ci luzie. 18Mige pekatei pe kenkieng gade rang kelabe au pe ziemne kendu peei la. Dede mige pecu langkegaibe ziemne kendu luu neu kelabe au masang, nah peda magede kenret gah. 19Mosa nnui de Hezai peu gai, pa peu meni? Dede nnui hang gede Hezai mzai lama. Daitei nnui acu teitset kera tei lano?”
20Hemaabe keli gai, “Nang herakesiabe ge nda la, cau ncu teitset kera tei lano?”
21Jisu keli gai, “I miswa kega bata ge tei gaige, nnui pelane nnui swaga di. 22#Lev. 12:3. Ken. 17:10.Mosa nnui de nnui napei dung geu rum di lo aja kai beu (Cide teicu kegai au Mosa ma dede nnui paome), cine nnui henana gede Sabbath benai hegeurum la. 23#Jhn. 5:9.Henana ge geu Sabbath benai rum liede Mosa zai gileu melie cai, daitei eh I Sabbath benai migede tei myi cangsiak kegaine nnui acu nnui rata lano? 24Hegole rehi gade ncet kecu tei so, nah kesangbe gade ncet lulo.”
Pa Messiah Deni?
25Jerusalem ga midung ge rang di, “Mina aide kedihme dung teitset di zie lie kelabe de meni? 26Pielo! Pa au hemaa ga marang la dida, nah penui migede pecu kemmau sam rang ma! Penui pecu le Messiah lie kecu ci kesang lu deni? 27Dede Messiah kegwang dau, migede pa daiga de gwang bi ci lak. Nah anui pelane mina aipau de dai gade gwang bi kecu ci bam.”
28Jisu Kerecaki gade ledeu eh pa sa eh rang baq gai, “Nnui acu ci kesang nah I daiga de gwang bi ci mi? I a kenkieng gade gwang ma. Dede acu langkegaibe au masang la. Nnui pecu ci ma, 29dede I pecu ci bam, kedanemene I peda de gwang nah pa ne acu lang gai.”
30Pecai penui pecu tuih lu kera teicu, dede migede pe reu gage heba kai ma, kedanemene pe bamdapkak be gwang cang mereu kecune. 31Dede maadibe gade pecu nlum lü rang di, “Messiah kegwang dau, pa mina aipau de tei kegai swa kiee eh mimakecang bata tei zie ni?”
Jisu ze Tuih kera Kekwame ze Langkegai
32Phariseeme hemaabe be Jisu ha aide nkim mpau kebam siu lu, cine penui nah cingku kedihme dung pecu tuih lu kerane kekwame de lang gai. 33Jisu rang di, “I nnui de peting keduihna ge ngngwa bam zie reu, nah pecai I acu langkegaibe da gwang dizie. 34Nnui acu peei zie, dede nnui acu ngau gailak, kedanemene I mie kera ga nnui mie gai laklu.”
35Judah kedihme dung penui kak gade rang bam di, “Pa daiga miedi launo ciciu eh anui pecu peei gailak di kera? Pa anui leuhme lungh kela Greekme namdi dung ga mie eh Greekme de ledeu zie ni? 36Pa rang kecu anui pecu peei zie dede pecu ngau gailak, nah anui au pa mie kera ga mie gai laklie zeu. Pa kecet kieh daino?”
Kering Peu kela Dui reu
37Hengyi kamtube nah nlang tube nai Jisu sap lü sabaq eh rang gai, “Keheibe de hereu kelame ada gwang eh sak lu maisia, #Lev. 23:36. 38nah acu nlum kelube sak maisia. Kesanglaisiu rang kela nzwa eh, “Acu nlum kelube, pe mlung gade kering peu kela reuki lwa pet zie.#7:38. pedum 37-38 ga Jisu sam de kedet lubui: “Keheibe de hereu kelame ada gwang eh sak lu kerabe. 38 Kesanglaisiu rang kela nzwa, ‘Acu nlum kelame keheibe de peda de kering dui reu lwa pet zie.’ ” ” 39Jisu aide Rabe ha rang bam, pecu nlum kelume ngau lulai eh kebam de. Cidau ting Rabe de kai beu mereu, kedanemene Jisu ze kendu gage teucuh lu mereu kecune.
Mina kak ga Mzi kepang
40Maadi gade midung ge pa aide rang kegai siu lü rang di, “Mina aipau de au Caihakecibe kesang delie!”#7:40. Caihakecibe: 1:21 ga pielu.
41Kedame rang di, “Pa au Messiah da!” Dede kangge rang di, “Messiah au Galilee gade gwang lak! 42#2 Sa. 7:12; Mik. 5:2.Messiah au Hegwangpei David leuhme ge nah David kelungh nam, Bethlehem, gage pecu nna zie lie kesanglaisiu rang la.” 43Cine Jisu ziemne hemaabe ga pang kedi tei di. 44Midung ge pecu tuih lu neu di, dede migede pe reu gage heba kai ma.
Judah Kenkieng Kedihme Nlum kemak
45Kekwame caili gwang ge, cingku kedihme dung nah Phariseeme penui de keteu, “Daitei nnui pecu ngngwa gwang meno?”
46Kekwame keli gai, “Migede mina aipau de nzwa marang melie!”
47Phariseeme penui de keteu, “Pa nnui dede tei maang di deni? 48Nnui kenkieng keteu kedihme ge mede Phariseeme ge pecu nlum kedi ci ni? 49Hemaa aide Mosa zai ci ma, cine penui au Tinggwang reset kang ga la!”
50 #
Jhn. 3:1,2. Cika Phariseeme ge Nicodemus la, pedwale pa Jisu ze redau kera mie kecu bede. Pa kedame dung dage rang gai, 51“Hezai gade anui migede pe koa kingnei nah pa tei kedibe peei mpet rai lu kemakne mmau gailak.”
52Penui keli gai, “Yida, nang de Galilee gade ni? Kesanglaisiu pei lo ciciu de madaude caihakecime ge Galilee gade gwang la kemak nang ci luzie.”#7:52. Caihakecibe madaude gwang la kemak; Laisiu ket ga bam the Caihakecibe gwang lak.
Chwazi Kounye ya:
JOHAN 7: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.