JOHAN 8
8
Kemmha eh Tuihkelu Puige
[1Pecai mina leune kilung gwang di, dede Jisu Olive Deutuh ga miedi. 2Pecai benai tingcang nuge pa Kerecaki ga caili miedi. Mina pelane pecu togwa lu, nah pa ntum lü penui de ledeu cuh di. 3Hezai keledeume nah Phariseeme mipui ge kemmha ta tei bam eh tuih lü teugwang, nah penui pecu peu penui pelane dwa ga sap lu. 4Penui Jisu dage rang di, “Keledeubo, mipui aide de kemmha ta tei bam siak eh tuih lu. 5#Lev. 20:10; Hez. 22:22-24.Anui gu Mosa zai cikenzwa pui gede ntsu le samtset di lo rang beu lie. Cu, nang dai rang laino?” 6Penui Jisu ze tuih lu kerane aide rang gai, ciciu eh penui pecu mmau lu kerane. Dede pa keumie hangdeu ga pe zurang teu marau bam di. 7Penui cika de pecu keteu bam ge, pa mzangcu eh penui dage rang gai, “Nnui kak ga kemau tei kemakbe peda ge keraibe tei eh ntsu sam gai lubui.” 8Pecai pa keumie hangdeu ga marau dai bam di. 9Penui aide siu luge, penui pelane tetti, hang ge cai hang gege eh, kecingbe rai eh. Jisu rünne bangh nzeu di, mipui cide cika sap eh. 10Pa mzangcu peda ge rang gai, “Daiga penui lano? Ncu mmau kera migede bangh nzeu me deni?”
11Pa keli gai, “Kedihbo, migede gah da.” Jisu rang gai, “Yida, sui, I de ncu mmau laklie. Tet cu, dede kemau tei dai so.”]#8:11. Laisiu kekiee gega nah raukehedet kerai dung ga pesau aide bam ma (8:1-11); Keda dung ga cide Jhn. 21:24 cai ga la; Kedabe cide Luk. 21:38 caile la; Laisiu gega cide Jhn. 7:36 cai ga la.
Jisu au Kideu Kebaabe
12 #
Mat. 5:14; Jhn. 9:5. Jisu Phariseeme dage marang dai eh rang gai, “I au kideu kebaabe delie. A caisui kelame kering kebaabe bam luzie nah madau gede kemui ga tet lak.” 13#Jhn. 5:31.Phariseeme peda ge rang gai, “Nang cu au nkatei n zierang tei bam dida; nang kerang de au magede nci meda.” 14Jisu keli gai, “Ma, I akatei a ha zierang tei liede, I kerangbe au kesang, kedanemene I au daiga de gwang nah I daiga mie labi ci kebam ne. Nnui au ci lama. 15Nnui au mina kecet rünne gade macet la; 16I mige tutiak liedi cide au kesang zie, kedanemene aika I akatei ma; acu langkegai Peibe acu ngngwa la. 17#Hez. 19:15.Zierang kena nzwa di cai, penai kerang de au petau lie eh nnui zai ga raupwa la. 18I akatei a keloi gade zierang teila, nah acu langkegai Peibe de a keloi gade zierang teila.” 19Penui keteu, “Daiga n Pei bam no?” Jisu sam keli gai, “Nnui acu mede a Pei de ci lama. Nnui acu ci lie cai, nnui a pei dede ci zie nage.” 20Jisu aidung pelane Kerecaki gade ledeu eh, reca bung dung kaipwa kebam kibung gade rang gai. Nah migede pecu tuih ma, kedanemene pe bamdapkak be gwang mereu kecune.
I Kemie ga Nnui Mie gailak
21Jisu penui dage rang gai dai, “I tetti zieda; nnui acu peei zie, dede nnui au nnui mau dung gade tsai zie I kemie ga nnui mie gailak.” 22Cine Judah kedihme dung rang di, “Pa kemie ga anui mie gai laklie pa rang la. Aide pekieh pa pekatei pecu teitset tizie ni?” 23Jisu keli gai, “Nnui au hungh kideu aika me, dede I au nreuhle de gwang. Nnui au kideu aika de, dede I au kideu aika de ma. 24Cine I nnui de au nnui mau dung gade tsai zie lie rang beudi. Nah nnui ‘I au I lie’ kecu nlum lu mecai nnui mau dung gade tsai zie.” 25Penui pecu keteu, “Nang cau no?” Jisu keli gai, “I raitu gade nnui dage rang kebeu de delie.#8:25. I raitu gade nnui de rang kebeu de; mede I daitei nnui dage marang laino? 26I nnui ha ma kekiee ge rang kera bam, nnui de kekiee ge mmau kera. Ciciu de, acu langkegaibe au masang, nah I kideube dage peda de siu kelube rünne ranglia bam la.” 27Penui au Jisu penui dage Peibe ha ranglia bam lie kecu ci ma. 28Cine pa penui dage rang gai, “Nnui Mina Nabe de pwacuh kecu dau, nnui au ‘I au I’ lie kecu ci luzie; pecai nnui I au akatei a kenkieng gade magede teila melie kecu ci luzie, dede Peibe acu rang kerabe ledeu kebeu de rünne rang kela nnui ci luzie. 29Nah acu langkegaibe acu ngngwa la; pa acu püt ti ma, kedanemene I pe suibe tei mui kelane.” 30Jisu aide kerang kesiume kekiee ge pecu nlum lu.
Kesangbe ne Ncu Suirang Peu zie
31Cine Jisu pecu nlum kelume dage rang gai, “Nnui a keledeu mzai lu cai, nnui au I ne ledeukelume kesang da; 32nnui kesangbe ci luzie, nah kesangbe ne nnui de lungmpet beuzie.” 33#Mat. 3:9; Luk. 3:8.Penui keli gai, “Anui au Abraham leuhme, nah anui madaude mina keheibe baangme tei ma. Cine nang ‘Nnui de lungmpet beuzie’ de eh kerang de pekieh daino?” 34Jisu penui dage rang gai, “I nnui dage kesangbe rang gaila: kemau tei kelabe kemau baangme ge teila. 35Hebaangme ge kelak gega lungh mui bam lama, dede napei ge au kelungta cika lungh la. 36Nabe nnui de lungmpet beu cai, ciciu cai nnui de lungmpet kesang tei luzie. 37Nnui Abraham leuhme kecu I ci bam. Dede nnui au acu teitset kera teila, kedanemene nnui a keledeu luu lulak kecune. 38I a Pei acu lia kegaibe ha rang la, dede nnui au nnui pei rang kebeube teila.”
39Penui pe sam keli gai, “Anui pei au Abraham.”
Jisu keli gai, “Nnui au Abraham name kesang lie cai nnui au pa tei#8:39. magade nnui... nnui tei zie; Laisiu kesa ga bam Magade nnui... tei kela kenzwabe tei zie nage. 40I teikela pelane au I Tinggwang dade siu kelu kesangbe nnui dage ranglia kela deda, dede nnui au acu teitset kera teila. Abraham au magede ainzwa tei ma! 41Nnui au nnui pei tei kegwangbe teila.” Penui keli gai, “Tinggwang rünne anui Pei kebam lie, nah anui au pe na kesangme delie.”
42Jisu penui dage rang gai, “Tinggwang nnui pei kesang lie cai, nnui acu hung zie, kedanemene I Tinggwang dade gwang nah I cu aika bam. I akatei a kenkieng gade gwang ma, dede pa ne acu lang gai. 43Daitei nnui I kerangbe ci lula meno? Cide au nnui a samlia eh kingnei gailak kedine lie. 44Nnui au nnui pei, Herakesiabe name dung, nah nnui au nnui Pei lungning mzai neu la. Raitu gade pa au dapketset mege nah madaude kesangbe lam bam lama, kedanemene peda au kesangbe kegane. Pa kenret kerang dau, pa au pezailui be teila kecu delie, kedanemene pa au kenretme nah kenret pelane peibe kecune. 45Dede I kesangbe rang la, nah cine nnui acu nlum lama. 46Nnui cau be I mau lie kecu rang nci lubui no? I kesangbe rang cai, ciciu cai daitei nnui acu nlum lu meno? 47Tinggwang dade kegwangbe Tinggwang sam dung kingnei la. Dede, nnui au Tinggwang dade ma, nah cine nnui au kingnei lak.”
Jisu nah Abraham
48Penui Jisu ze keteu, “Anui au nang Samariame ge nah n lung ga herakesiabe ge lalie kecu kerang de petau meni?” 49Jisu keli gai, “ada herakesiabe bam ma. I a Pei de rüt la dede nnui acu rüt lama . 50I a ziemne hetwa peei lama. Dede mige cide peei la nah pa a lam pwa eh tiak la. 51I nnui dage kesangbe rang la: a keledeu mzai kelabe madaude tsai dilak.” 52Penui peda ge rang di, “Cu au nang herakesiabe ge kebam anui ci nci luda! Abraham tsai dida, nah caihakecime tsai dida, dede nang au n keledeu mzai kelube madaude tsai laklie zeu. 53Anui pei Abraham tsai dida; nang Abraham swa dihki lie eh rang lama, nang ciciu lani? Caihakecime de tsai dida. Nang ncu le cau lie lano?” 54Jisu keli gai, “I akatei acu rüt zie lie cai, herüt cide au magede ma. Acu rüt kelabe au a Pei nnui pecu le nnui Tinggwang lie kelabe de. 55Nnui madaude pecu ci ma, dede I pecu ci bam. I pecu ci melie rang cai, I de nnui nzwa kenretme dizie. Dede I pecu ci bam nah I pe sam mzai la. 56Nnui pei Abraham I kegwang ting de ngau zie lie eh pesui yi gwang; pa cide ngau lü pesui yi lu.” 57Penui peda ge rang gai, “Nang mmi rengei de mereu nah nang Abraham de ngau deni?”#8:57. nnui Abraham de ngau ni?; Laisiu kesa ga bam Abraham nnui de ngau ni? 58Jisu keli gai, “I nnui dage kesangbe rang gaila. Abraham ze kenna dwa ‘I la’.” 59Pecai pecu saam kera penui ntsu keu lu, dede Jisu mbaih di nah Kerecaki de püt ti.
Chwazi Kounye ya:
JOHAN 8: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.