JOHAN 6
6
Jisu Mina 5,000 Puk ketei
(Mat. 14:13-21; Mrk. 6:30-44; Luk. 9:10-17)
1Aipau cai, Jisu Galilee jaai de kah gwang di (mede Tiberias jaai lie qu la). 2Mina maadi ge pecai suila, kedanemene penui keteei keneeime de tei kenkeih mimakecang bata dung de ngau kelu ne. 3Jisu kideutuh gega hangh lü pa ledeukelume de ngngwa ntum lu. 4Kahkegwang Ngyi ting mna ladi. 5Jisu pie togwa gaige mina maadi peda gwang kela ngau lu, cine pa Philip ze keteu, “Mina aidung pelane puk tei kerane daiga de anui ketyeipuk kennung lui lubui no?” 6(Pa Philip ze kedakpie kerane aide rang gai; kesangbe au pa daitei zie bi kecu ci bam.)
7Philip keli gai, “Hang ge kecam nage ngau lu kera ziemne liede, nku kennung lui kerane rangkang goi 200#6:7. rangkanggeu: Renam ga ma keteime nai ge ziehi rangkang goi ge la (Mat. 20:2 ga pielu). swa kiee eh teu zie.”
8Ledeukelu kedabe, Andrew, Simon Peter sinabe rang gai, 9“Aika mipeina ge barley nku mengei nah heka kena lalie. Dede mina aidung pelane ziemne cidung au nnung gailak.”
10Jisu penui dage rang gai, “Mina dung de peu ntum lu.” (Cika tsehei kekiee ge bam.) Cine mina pelane ntum lu; cika mipei 5,000 kenzwa ge bam. 11Jisu nkube pwalu, Tinggwang ze twa gai, delü cika ntum kebam dung dage mzi gaibeu. Pa heka de cinzwa tei gai nah penui pelane nggei lu. 12Pa ledeukelume dage rang gai, “Pesuihna kebanghbe pwa hekwa lu; anui kette tei zang diso,” 13Cine penui cidung pelane hekwa kelu mina dung tyei kelu barley nku mengei gade pesuihna dung bangh kelu hebie kereikena puih lu.
14Jisu miswa kega bata tei kegai aide ngau luge, cika mina dung rang di, “Aide Caihakecibe kesangbe deda#6:14. Caihakecibe: 1:21 ga pielu. kideu ga gwang lai eh kebambe de!” 15Jisu au penui gwang eh pecu tuih lü pe kemeih tei eh pecu peu hegwangpei tei di kera ci di; cine pa pekatei kideutuh dung ga mie dai di.
Jisu Dui reu ga Ketet
(Mat. 14:22-33; Mrk. 6:45-52)
16Tinghegi gwang luge, Jisu caisuime rejaai ga hungh di, 17lim gega lüt lu, delü rejaai tet kah caili Capernaum le miedi. Tingmui gwang di, nah Jisu penui da gwang lu mene ladi. 18Cidau kaichi ge gui bam di nah dui nswak bam di. 19Ledeukelume kilometre mengei mede herok nsam gega lim teumie kedi dau penui Jisu dui reu ga tet kela, lim tai ga mna gwang kela ngau, nah penui ngngi süt ti. 20Jisu penui dage rang gai, “Ngngi so, aide I lie.” 21Pecai penui neungga eh pecu lim ga peu nlüt lu, nah penui gwang zie lie kela ni hangdeu kecang ga lim be zette gwang lu.
Mina dung Jisu ze Kepeei
22Pecai benai rejaai kedale gim bam kedi hemaabe cika liem ge rünne kebam ci lu. Penui au cika pa ledeukelume de ngngwa tetti kemak ci bam, dede penui pecu si mene tet kedi. 23Lim keda Tiberias gade kegwang dung de hemaabe Rampaube hetwa peu kegai cai nku tyei kecu ni de tai ga duikuung ga gwang lu. 24Hemaabe Jisu mede pa ledeukelume cika bam kemak ngau luge, penui liem cidung de ga lüt lu delü pecu peei eh Capernaum ga miedi.
Jisu au Kering Nkube
25Mina dung Jisu ze rejaai kedale la eh ngau luge, penui peda ge rang gai, “Keledeubo, nang daidau aika gwang lu dino?”
26Jisu keli gai, “I nnui dage kesangbe ranglia gaila: nnui au acu peei la kedanemene nnui nku tyeilu nah nnui keneube pelane ngau kelu ne, a bata miswa kega dung nnui ci kelu ne ma. 27Ketyeipuk sia di kelabe ziemne heta tei so; meliene, kelungta kering ziemne bam lu kela ketyeipuk ziemne heta tei lulo. Mina Nabe nnui de peu lai kebam ketyeipuk au aide da, kedanemene Tinggwang, Peibe, pesui kedi giak pe reu gage kai di delu.”
28Cine penui keteu di, “Tinggwang anui de peu tei keneube tei lu kerane anui daipai tei lubui no?”
29Jisu keli gai, “Tinggwang nnui de peu tei neu kela de au pa langkegaibe de nlum kelu de delie.”
30Penui keli gai, “Anui ngau eh ncu nlum lu kerane nang miswa kega bata daipai tei gai laino? Nang daipai teilai? 31#Tet. 16:4,15; Lei. 78:24.Anui paome hetaideu gade manna tyei, kesanglaisiu rang kela nzwa, ‘Pa penui de tyei kera tinggim gade nku peu.’”
32Jisu rang gai, “I nnui dage kesangbe rang la. Mosa nnui de kepeu de au tinggim gade gwang ma#6:32. Mosa nnui de kepeu de au ma; mede Cide Mosa ne nnui de peu ma.; a Pei ne tinggim gade nnui de nku kesangbe peu la. 33Kedanemene Tinggwang nku pwa kepeu de au tinggim gade kehunghbe nah kideube de kering peu la.”
34Penui pecu keteu di, “Kedihbo, nku aide anui de peu lamuih lo.”
35Jisu penui dage rang gai, “I kering nkube da. Ada gwang kelume madaude hereu lak. 36Cu, I nnui dage rang gai dida nnui acu ngau luda dede nlum lak. 37A Pei acu kepeume ada gwang zie. I madaude ada kegwangme de gi dilak, 38Kedanemene I tinggim gade hungh kelu au a lungning tei zie lie ma dede acu langkegaibe lungning tei zie lie gwang lu. 39Nah acu langkegaibe lungning au pa ne acu kepeu pelane de tei nggah di kelak deda, dede I penui pelane de kamtube nai kering gage qwakcuh lu kera deda. 40Kedanemene Peibe luu neu kela de au Nabe de kengaume nah pecu nlum kelume pelane kelungta kering ngau lu kera deda. Nah I penui de kekam benai kering gage qwakcuh luzie.”
41Mina dung pe ha ziemne ncam di, pa kerang ne, “I Tinggim gade kegwang nkube da.” 42Cine penui rang di, “Mina aide au Joseph napei Jisu, pa meni? Anui pe pui pe pei de ci bam. Sui, dainzwa eh pa tinggim gade hungh lie rang lu laino?”
43Jisu keli gai, “Nnui kak gade ncam kebam de mtak dilu. 44Peibe acu langkegaibe ne pecu ada ngngwa gwang beu mecai migede ada gwang gailak; nah I pecu kekam benai kering gage qwakcuh luzie. 45#Isa. 54:13.Caihakecime rau gai, ‘Mina leune de Tinggwang ne ledeu beuzie.’ Keheibe de Peibe koa siu lü peda de maci kelume ada gwang la. 46Aide pekieh keheibe de Peibe de ngau lie kecube ma; Tinggwang dade kegwangbe rünne Peibe de ngau lie. 47I nnui dage kesangbe rang la: nlum kelube kelungta kering bam dida. 48I kering nkube. 49Nnui paome hetaideu gade manna tyei, dede penui tsaidi. 50Dede tinggim gade kegwangbe nku au cide tyei kelu leune de tsai di kelakbe lie. 51I tinggim gade kehungh kering nkube lie. Keheibe de nku aide tyei cai, pa kelungta ring dizie. I pecu peu kera nku de au a teih, I cide peu la ciciu eh kideube ring lu kerane.”
52Aide ne penui kak ga rata samlim ge cuh di. Penui keteu di, “Dainzwa eh mina aipau de tyei kera pe teih anui de peu lu laino?”
53Jisu penui dage rang gai, “I nnui dage rang gaila: nnui mina Nabe teih tyei mecai nah pe jai sak mecai, nnui da kering bam gailak. 54A teih tyei nah a jai kesakme leune kelungta kering bam, nah I pecu kekam benai kering gage qwakcuh luzie. 55Kedanemene a teih au taktyei puk kesang; a jai au kesak kesangbe. 56A teih ketyeime leune nah a jai kesakme leune a lung ga lungh bam, nah I pelung ga lungh bam. 57Ring kela Peibe acu lang gai, nah pe ziemne I de ring la. Cinzwa acu tyei kelame a ziemne ring luzie. 58Cine, aide au tinggim gade kehung nku lie; cide au nnui paome tyei lü pecai tsai kedi nku de nzwa ma. Nku aide ketyeibe au kelungta ring la dizie.”
59Jisu Capernaum synagogue gade ledeu kecu dau aide rang gai.
Kelungta Kering Sambe
60Pe caisuime kekiee ge aide siu lü rang di, “Keledeu aide whung zu. Cau ne cide kingnei lulai?”
61Peda ge rang gai melie de penui au aide ha samlim kebam Jisu ci lu, cine pa penui dage rang gai, “Aide ne peu nnui de püt ti neu lani? 62Magade, sui, nnui Mina Nabe ndaa pa kebam ga caili hangh kedi ngau lie cai? 63Kering peu kelabe au Tinggwang Rabe; mina kenkieng au pe keyi gah zing. I nnui dage rang kegai sam dung dene Tinggwang gu kering Rabe teugwang beula. 64Dede nnui midung ge nlum lama.” (Raitu gade Jisu au cau dung nlum luzie bi nah cau ne pecu tuih gai beuzie bi ci bam.) 65Nah pa rang si gai, “Makieh aide ziemne I nnui dage rang beu dida Peibe ne pecu tei beu melie cai migede ada gwang gai laklie.”
66Aide ziemne, Jisu caisuime kekiee caili di nah pecu ngngwa mie si gailak di. 67Cine pa ledeukelu kereikena dung de keteu, “Nah nnui — nnui de püt ti neu lani?”
68 #
Mat. 16:16; Mrk. 8:29; Luk. 9:20. Simon Peter pe sam keli gai, “Rampaubo, anui cau da mie laino? Nang au kelungta kering peu kela sam dung bam. 69Nah anui cu nang au Tinggwang dade kegwang Kemcibe lie kecu nlum nah ci bam dida.”
70Jisu keli gai, “I nnui kereikena de kedet lu, I ciciu lu meni? Dede nnui hang ge au herakesiabe ge!” 71Pa au Simon Iscariot napei Judas ha rang bam. Kedanemene Judas, pa au kereikena gade ket liede, pecu tuih gaibeu lai eh kebam ne.
Chwazi Kounye ya:
JOHAN 6: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.