JOHAN 5
5
Rejaai gade Tei kenkeih
1Aipau cai, Jisu renet ngyi ge ziemne Jerusalem ga miedi. 2Jerusalem ga meurün Rieki tai ga rejaai ge ki keceuna mengei si eh bam;#5:2. Meurün Rieki tai ga... rejaai ge; mede Meurün Jaai tai ga... heni ge. Ibrime led gade cide de Bethzatha lie qu la. 3Ki cina dung ga mina teeikeneime maadi ge zeu bam — mikcietme, pisiame, nah kennoime.#5:3. Laisiu kesa ga pedum 3b-4 bam si: Penui au dui mlai kegai kwa bam la, 4 Penui au dui mlai kegai kwa bam. 4Kedanemene Rampaube gwame ge cu nah hungh eh rejaai ga lüt eh dui de tei kenuak gai beula. Dui tei kenuak kegai cai rejaai cika lüt lu raitube de pe mateei keheibe gade de tei myi beula. 5Cika mige mmi 38 mateei kedi ge bam la. 6Cika pa kezeu Jisu ngau lu, nah mina cide citie ge mateei la kedi ci; cine pa pecu keteu, “Nang yi lu neu lani?”
7Mateei kelabe keli gai, “Kedihbo, I aika migede dui tei kenuak kegai dau rejaaibe gage kai gaibeu kera gah; I lüt lai eh kebam dau, kedame ge cika railüt dila.”
8Jisu peda ge rang gai, “Cuh lu, n jeu pwalu, delü tet lu,” 9Minabe yi zette lu; pa pe jeu pwa lü tetcu di. Aide Sabbath benai tei di, 10#Neh. 13:19; Jer. 17:21.cine Judahme kenkieng keteume yi kelube dage rang gai, “Henai Sabbath, nah nang n jeu pwa kera cide anui Zai gileu la.”
11Pa keli gai, “Acu tei myi kebeube de acu a jeu pwa lü tet lulo rang beu.”
12Penui pecu keteu di, “Aide tei lulo ncu rang kebeube de cau no?”
13Dede tei myi kelube au Jisu cau bi kecu ci ma, kedanemene heni cide ga hemaabe kebam ne, nah Jisu nzüt tet kedine.
14Pecai, Jisu pecu kerecaki gade ngau lü rang gai, “Kingnei lu, nang cu au yi dida; cine kemau tei talu mecai ma siaki kecu ge nda ge tei gai lubui.”
15Pecai minabe tetti nah Judahme kenkieng keteume dage Jisu ne pecu tei myi beu lie rang gai. 16Cine penui Jisu ze sa cuh di, Kedanemene pa tei kenkeih aide Sabbath benai tei kegaine. 17Jisu penui sam keli gai, “A pei au heta tei muih bam la, nah I de tei maisia.”
18Sam aide ne Judahme kenkieng keteume pecu teitset di kera tei nteeiki di; pa Sabbath zai gileu kecube rünne ma, dede pa Tinggwang au pe Pei liedi nah ainzwa eh pa pekatei pecu Tinggwang nsam tei kedine.
Nabe Kenkieng
19Cine Jisu penui sam keli gai, “I nnui dage kesangbe ranglia la: Nabe au pekatei magede tei gailak; pa au pe Pei ketei ngau kelabe rünne teila. Peibe tei kelabe Nabe de teila. 20Kedanemene Peibe au Nabe de ku la nah pa pekatei teikela pelane pecu pwalia la. Pa au aiswa de dihki kecu tei kera pecu lia zie, nah nnui pelane nnui swaga dizie. 21Peibe ketsaime de qwakcuh beu nah penui de kering peu kela nzwa, cinzwa eh Nabe pa pe suime de kering peu la. 22Peibe au pekatei mige dede tiak lama. Pa tutiak tei kera mjeu kepuih pe Na de peu dida, 23ciciu eh mina pelane Peibe de rüt kela nzwa Nabe de rüt lu kerabe. Nabe de rüt la kemakme leune pecu langkegai Peibe de rüt lama.
24“I nnui dage kesangbe rang la: keheibe de a koa siu lü acu langkegaibe de nlum kelube, kelungta kering bam dida. Pecu mmau lakta, dede ketsai gade kering ga kah mpet dida. 25I nnui dage kesangbe rang la: Peting gwang lada — peting gwang bam dida — ketsaime Tinggwang Nabe koa siu lu kera ting, nah cide siu kelume kering ga gwang luzie. 26Peibe au kering rwakbe kecu nzwa, cide nzwa pa pe Na de kering rwakbe tei beu dida. 27Nah Pa Nabe de tutiak tei kera mjeu peu dida, kedanemene pa au Mina Nabe kecune. 28Aide nnui swaga so; ketsaime pelane pe koa siu lu kera 29#Dan. 12:2.nah penui rauh dung gade mpet lu kera ting gwang bam da: keyi tei kedime cuh lü ring luzie, nah kesia tei kedime cuh lü penui de mmau dizie.
Jisu Zierangme
30“I akatei a kenkieng le magede tei gailak; Tinggwang ne acu rang kebeube rünne I tiak la, cine a tutiak au petau lie, kedanemene I au a suibe tei lama, dede acu langkegaibe suibe rünne.
31“I akatei a zierang teila cai, I kerangbe au kesang delie luu lu gailak. 32Dede mige a keloi gade zierang teila, nah pa a ha kerang de au kesang kecu I ci. 33#Jhn. 1:19-27; 3:27-30.Johan dage nnui samgwame de lang gai, nah pa kesangbe keloi gade rang gai. 34Mina ge zierang teu maisia de kecube ma; nnui de keli lu kera ziemne rünne I aide rang la. 35Johan au mitaubung ge nzwa, heu nah baa bam, nah nnui kak ge pe kebaa teu eh kehega neu di. 36Dede Johan zierang tei kegai swade dihki kecu ge a zierang bam: I tei kelabe, cide, a Pei acu tei lo kebeu ta dung, aidung de a keloi gade marang la delü Peibe acu lang gailie kecu keulia gaila. 37Nah Peibe, acu langkegaibe, de a keloi gade zierang teila. Nnui madaude pe koa siu ma mede pe zu ngau ma,#Mat. 3:17; Mrk. 1:11; Luk. 3:22. 38nah nnui pe sam nnui mlung gage kaizeu ma, kedanemene nnui pa ne langkegaibe de nlum kemakne. 39Nnui Kesanglaisiu dung peei la, kedanemene nnui cidung gade kelungta kering ngau lu zie lie cet kelane. Nah Kesanglaisiu aidung de a ha rang la! 40Dede nnui au kering ngau lu kerane ada gwang lu neu lama.
41“I mina twa piela ma. 42Dede nnui dai kenzwa kau dungge bi I ci bam, nah nnui Tinggwang ze keku nnui mlung ga bam kemak I ci bam. 43I a Pei kenkieng teu eh gwang, dede nnui acu luu luma; ciciu de mige pekatei pe kenkieng teu eh kegwang dau, nnui pecu luu luzie. 44Nnui hang gege dade hetwa luu neu la, dede nnui Tinggwang ket rünsangne kecube dade au hetwa kepung peei lama; ciciu cai nnui dainzwa acu nlum lu laino? 45Ciciu de, I au a Pei dade nnui de mmau kerabe de delie kecu cet helo. Mosa, nnui peda ge nnui keregui kaipwa kebambe, au nnui de mmau kerabe de delie. 46Nnui Mosa ze nlum kesang lie cai, nnui acu nlum luzie nage, kedanemene pa a ha rau gai delu. 47Dede nnui pa rau kegai de nlum kemakne, I kerangbe nnui dainzwa nlum lu laino?”
Chwazi Kounye ya:
JOHAN 5: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.