Mata 18
18
Ɗala ma pa ma dakal ŋ Lazam bay ma mgba ata uzlaf ca, vayay?
1Aya, ata vah wese ca, madarlaŋw ege əy zen ara Yesu, əy ɗawza, əy ŋgaya: «Ɗala ma pa ma dakal ŋ Lazam bay ma mgba ata uzlaf ca, vayay?» 2A təwse ca, Yesu a yaɓa mba ma pəzekw, a garza ka ŋ taba tata. 3Aya, a zlepetene, a ŋgaya: «Sa kazlapahune njenjəwen, mada hune kábawza lanja ŋkune ege aza, ŋ baw ŋkune ana uzəye ma pəzekw pəzekw ege askwaw ca, hune kanala kula ŋ dam ŋ Lazam bay ma mgba ata uzlaf səkwaw. 4Ɗala ma wanza ha anta ka ana mba ma pəzekw ŋghe ca, wese ca, mbəy ma pa ma dakal ŋ Lazam bay ma mgba ata uzlaf. 5Ɗala ma lamza mba ma pəzekw ma da ebe ŋghe aza a zlam naka ca, a lamza ca, sa.»
Hune sla aka, hune ɗaw ŋ ndav ŋ la gay səkwaw
6Yesu a zlepetene zeney, a ŋgaya: «Kaw vayay ma baɗza ɗala ma pa ma pəzekw ŋ taba hejəye ma lemzekey aza ŋghe ege ŋ la gay ca, zukwan əy mejewene ŋvan ma dakal ata ula, əy manahza aza ata ndaŋw ŋtele. 7Gef ata hejəye ma kabaɗazata hejəye vedəye ŋ la gay. Njenjəwen ca, səkan ma kabaɗzata hejəye ŋ la gay ca, aka. Cemey, gef ata heje ma baɗza ɗala ŋ la gay anta. 8Mada ra ŋkwa, askwaw ca, ŋgas ŋkwa, a kanahzahwaw ŋ la gay ca, razlza, nahza aza gədak a hwa. Zukwan hwa madam ŋ lanja ma taŋtaŋ ma katuwaɗ səkwaw kaw vepey a ra teŋguleŋ askwaw ca, a ŋgas teŋguleŋ, aha maa əy kananahzahwaw ŋ kwahwaw ma kamac səkwaw kaw vepey zlaɓa ŋgas ŋkwa ege gbak tata, askwaw ca, a ra ŋkwa ege gbak tata. 9Mada nje ŋkwa a kabaɗzahwaw ŋ la gay ca, hweslekaza aza, nahza aza gədak a hwa. Zukwan hwa madam ŋ lanja ma taŋtaŋ ma katuwaɗ səkwaw kaw vepey a nje teŋguleŋ aha maa əy kananahzahwaw ŋ kwahwaw ma kamac səkwaw kaw vepey, zlaɓa nje ŋkwa ege gbak tata.»
Laslaŋgal ma ata ŋtəmek ma fətek anta
10Yesu a zlepetene a laslaŋgal ma ŋgha zeney, a ŋgaya: «Hune sla ka! Mada hune kececefzata uzəye ma pəzekw pəzekw ŋghe ege askwaw ca, sa kazlapahune, hune san ka, malaɓ Gazlavay tata ege, əy kégereye ata pes ata pes, a tama Vana ma mgba ata uzlaf. [11Ayaw, Mba Ɗala a ndaha ca, ŋ rehzata hejəye ma fətek tata ege.] 12Hune deŋza ca, vaŋgay? Mada ɗala maa ŋtəməye anta ege temere aka, aya, ma teŋguleŋ fətek a fətek anta ca, heje anta a kanayakzata ma rajafaɗ aha jafaɗ ege wese ege aka ata barla ndar, ŋ nda mpam aza ma teŋguleŋ ma fətek anta wese, askwaw vaw? 13Sa kazlapahune njenjəwen, mada kéndewzene aza ca, a nasasam ata ŋtəmek ma teŋguleŋ wese day aha ma rajafaɗ aha jafaɗ, maa əy kéfətek askwaw wese. 14Ana ebe ŋghe yam, Cehw ŋkune ma mgba ata uzlaf a kaɗaw ɗala teŋguleŋ ŋ taba uzəye ma pəzekw pəzekw ŋghe ege, a fətek anta səkwaw.»
Lapal gay
15Yesu a zlepetene zeney, a ŋgaya: «Mada zlanahw kálahwaw gay ca, hwa nda ara mbe, ghwelzene gay anta hune gbak gbak ka. Mada kétehzahwaw zlam ca, hwa kérehza aza. 16Cemey, mada a kaɗaw ŋ tehzahwaw zlam səkwaw ca, ŋta ɗala ara teŋguleŋ, askwaw ca, hejəye gbak, hune nda ara mbe, ndar hune ŋgaɗ ma ŋkune ege a tama hejəye gbak, askwaw ca, hejəye mahkaɗ ana maa leŋter a zlap. 17Mada a kaɗaw ŋ tehzetene zlam, səkwaw ca, jeɓza ma anta a tama lajav hejəye ma lamza ma mala Yesu aza ege. Mada a kaɗaw ŋ tehzene zlam ŋ lajav hejəye ma lamza mala Yesu aza ege, səkwaw war ca, sarza ana ɗala ma kasan Gazlavay səkwaw, askwaw ca, ana ɗala macak budaw.» 18A zlepetene zeney, a ŋgaya: «Sa kazlapahune njenjəwen, ma maa hune kanaŋkan ka a manhayak ete ŋghe ca, kéŋkeneye mgba ata uzlaf yam. Ma maa hune kanapalza ka manhayak ete ŋghe ca, képeleye mgba ata uzlaf yam. 19Sa kazlapahune zeney, mada hejəye gbak ŋ taba ŋkune ŋ manhayak ŋghe, əy kájav ŋ ɗaw səkan kaw vekey a larak ca, Vana ma mgba ata uzlaf a neveletene. 20Mada hejəye gbak askwaw ca, mahkaɗ, əy kéjeveye mavəday zlam naka ca, sa ŋ taba tata.»
Laslaŋgal ma ata mala zlan ma kaɗaw ŋ pal gay səkwaw
21Aya, Pəyer a nda ara Yesu, a ɗawza, a ŋgaya: «Bay Madakal, mada zlana kélekey gay ca, sa nepelzene gay anta ka ca, ŋ gas vanay? Ŋ gas ŋsəleɗ vaw?» 22Yesu a zenene, a ŋgaya: «Andəwse səkwaw, ŋ gas ŋsəleɗ səkwaw, cemey, reŋsəleɗ, ŋ gas ŋsəleɗ.» 23Aya, Yesu a zlap a laslaŋgal ma zeney, a ŋgaya: «Lazam bay ma mgba ata uzlaf ca, a nja ana ebe ŋghe. Bay wende aka, a ɗawzata mala zlan anta ege, əy meŋgeɗene səkan anta ma asa ra tata ege. 24Aya, bay wese a mar zlan anta, a təwse ca, əy dene ɗala maa a kasəbaraw, a səlay dakala mambaza. 25Heje anta ca, kaw səkan anta ma ata ŋtar səlay ma a heɗe wese ca, askwaw. Təwjek anta, a zlepetene ŋ hejəye, əy masəkamza zlaɓa wala anta, uzəye anta ege leŋ səkan ma asa ra anta ege tewtew ŋ ŋtar duwa ma a heɗe wese. 26Mala zlan wese, kuraɓ, a gəleɓ a tama təwjek anta, a jene mbahw, a ŋgaya: “Madakal naka! Mbahw! Tehzekey cekuɗe, sa naŋtarahwaw aka tewtew.” 27Təwjek anta wese, a san hahar ata mala zlan anta anta, a pelzene duwa ma a heɗe wese aka tewtew. 28A dəwze maa mala zlan wese, a damha aza a wata təwjek anta ca, əy ŋgel ma a mala zlan wende maa a kasəbar a səlay bakatar temere. A təwse ca, kap, a mbalza a ula, a ɓərataw, a zlepene, a ŋgaya: “Ŋterekey duwa naka.” 29Aya, heje wese a gəleɓene ka a tama anta, a jene mbahw, a ŋgaya: “Mbahw! Tehzekey, sa naŋtarahwaw aka.” 30Cemey, a kalamza səkwaw, nah a nahza heje wese ka ŋ daŋgay, səy mbəy meŋterene duwa anta aza tewtew. 31Maa mala zlan vedəye, əy gəre səkan maa a la ca, əy kághwaɗ tata, əy nda, əy ŋgeɗene ma anta ŋ təwjek tata. 32A təwse ca, təwjek anta a yaɓa, a zlepene, a ŋgaya: “Hwa ca, hwa mala zlan ma dadawar, sa kápalzahwaw duwa naka ma ata hwa aka tewtew, mavəday hwa kéjekey mbahw. 33Cemey, ŋkwa, hwa san hahar ata mala zlan ana hwa, ana maa sa san hahar ata hwa yam səkwaw ca, ata vemey?” 34Təwjek anta kághwaɗ anta a heɗe mambaza, val a valza ka asa ra hejəye ma ɓarɓar ege, ŋ la zlan ma ɓarɓar ma kanaŋgwavaw, səy mbəy maŋtar duwa ma a heɗe aza tewtew.» 35Aya, Yesu a zlap zeney, a ŋgaya: «Mada kaw vayay ŋ taba ŋkune, képelzene gay mala zlaŋgan aka ŋ unaf teŋguleŋ askwaw ca, wese ca, Vana ma mgba ata uzlaf a nalahune ana ebe ŋghe yam.»
Chwazi Kounye ya:
Mata 18: BHS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2025 CABTAL