Mata 17
17
Labaw kusam Yesu
1Wan ŋkwah a dəwze anta ca, Yesu a ŋta ata Pəyer, Yakuba ey zlaŋgan Yuhana, əy tev ata barla ma jem, tata gagaha. 2A təwse ca, Yesu a baw anta ata nje tata, nje anta a weɗ ana pes, rəgwac ma ata kusam anta, a baw anta pepeɗek tezlezle, ana leweɗ. 3A təwse a təwse, madarlaŋw ma mahkaɗ ege wese, əy gəre ata Musa ey Eləya əy kazlap, a Yesu. 4Aya, Pəyer a zlepene ŋ Yesu, a ŋgaya: «Bay Madakal, kadak ca, heje njakwaw ka ete ŋghe. Mada hwa kaɗaw ca, sa naba guɗakw ege aka mahkaɗ ete ŋghe, teŋguleŋ mala ŋkwa, teŋguleŋ mala Musa, teŋguleŋ mala Eləya.» 5Maa a kazlap kwagwa ca, kəɗe ca, mahwabakw ma keweɗ a ndaha, jaɓ a jaɓata aza. Əy zləme ula a jaha ŋ mahwabakw anta, a ŋgaya: «Ebe ŋghe ca, ara Mba naka maa sa kaɗaw mambaza, sa kasasam dakala a heɗe, hune tehzene zlam.» 6Maa madarlaŋw Yesu ege, əy zləme ula wese ca, əy kálalak tata mambaza, əy ndav a ma a ma, mananakw dac ata hayak. 7A təwse ca, Yesu a zenha mbermber ara tata, a ca ra ata tata, aya, a zlepetene, a ŋgaya: «Hune gwarzam, hune lalak səkwaw.» 8A təwse ca, malaɓ ege wese əy baŋgaɗ nje, əy gəre ca, səy Yesu mbəy teŋguleŋ anta. 9Maa əy katadakwha aza ata barla wese ca, Yesu a ŋgazata ka, a zlepetene, a ŋgaya: «Hune ɗaw ŋ ghwalza səkan maa hune gəre ŋghe ŋ kaw vayay səkwaw, ha a pes maa Mba Ɗala, a kanagwarzamha aza ata lamac.»
10Aya, madarlaŋw wese ege, əy ɗawza Yesu, əy ŋgaya: «Hejəye maghwal ma maŋkanaŋkan ege, əy ŋgaya: “Səy Eləya mandaha aza kwagwa,” əy ca, mavəday vemey?» 11A təwse ca, Yesu a zenetene, a ŋgaya: «Njenjəwen, səy Eləya mandaha aza kwagwa, ŋ lamzata səkan ege ka kadak kadak. 12Cemey, sa kazlapahune, Eləya ca, kándaha aza tew. Hejəye ca, əy kásan askwaw, əy kélene səkan tewtew ana maa əy ɗawaw. Hejəye əy nesene gef ŋ Mba Ɗala, ana ebe ŋghe, yam.» 13A təwse ca, madarlaŋw wese ege, əy kásanza, Yesu a zlepetene ca, ata Yuhana maban hejəye a yam baptəysma.
Yesu a gam zəwet malula ma ŋ ha mbaw, aza
14Ata Yesu ey malaɓ anta ege, əy hwasha ata la ma hejəye əy kéɓeceye. A təwse ca, heje wende aka, a ndaha ara Yesu, a gəleɓene aka a tama anta, a zlepene, a ŋgaya: 15«Bay Madakal naka, san hahar ata mba naka. A kaɓərazl, a kasa gef dakala. A kandav ŋ kwahwaw, askwaw ca, ŋ yam gas vəram. 16Sa kádaza ara madarlaŋw ŋkwa ege, cemey, əy kála kula ŋ rehza səkwaw.» 17Yesu a zlap, a ŋgaya: «Hune hejəye dadawar ege, maa lalam ŋkune ege askwaw. Sa nanja ara hune zeney ca, walaŋ hada vaŋgay? Sa nesewahune zeney ca, walaŋ hada vaŋgay? Hune daza mba anta ete ŋghe.» 18A təwse ca, Yesu a bebecza zəwet malula wese, a damha aza ŋ mba wese, aya, a təwse a təwse, mba wese a reh anta.
19A dəwze anta, madarlaŋw Yesu ege, əy ndaha ara mbe, əy zlepene tata gagaha, əy ŋgaya: «A ŋcəne ca, nene kála kula ŋ gam zəwet malula anta səkwaw ca, mavəday vemey?» 20Yesu a zenetene, a ŋgaya: «Mavəday lalam ŋkune ege parham. Sa kazlapahune, mada lalam ŋkune cekuɗe ende ŋghe aka, ana mba venjeh ca, hune kula aza ŋ zlepene ŋ barla ŋgha, kese aza ete ŋghe, nda ŋkwa ŋ ŋge ŋghe ca, barla anta a nekese anta. Səkan maa hune kanala kula ŋ la səkwaw ca, askwaw. 21[Cemey, ŋ gam ŋseŋ zəwet ŋgha ca, səy ta ŋ larak Gazlavay ey sumay.]»
Yesu a ghwalza lamac anta ey lagwarzamha aza anta ata lamac magbak anta
22A pes wende aka, madarlaŋw Yesu ege, əy kéɓeceye ŋ hayak Galəyləy. A təwse ca, Yesu a zlepetene, a ŋgaya: «Əy navalza Mba Ɗala aza asa ra hejəye. 23Hejəye anta ege, əy naja aza, aya, ata wan ma mahkaɗ anta ca, a nagwarzamha aza ata lamac.» Maa madarlaŋw anta ege əy zləme ana ebe ŋghe ca, unaf tata ege, əy kázla tata mambaza.
Laŋtar budaw
24Ata Yesu əy madarlaŋw anta ege, əy nda ŋ uzam Kafarnahum. Hejəye ma cak budaw mala ujek kwakwas ege, əy ndaha ara Pəyer, əy ɗawza, əy ŋgaya: «Masasərak ŋkune ca, a kaŋtar budaw mala ujek kwakwas, askwaw vaw?» 25Aya, Pəyer, a zenetene, a ŋgaya: «Ayaw, a kaŋtaraw.» Maa Pəyer a dam anta ŋ ujek ca, Yesu, a zlepene, a ŋgaya: «Səymawn! Hwa deŋza ca, vaŋgay? Ma keneŋterene budaw ŋ bay ma ŋ manhayak ŋghe ege ca, ata vayay? Hejəye hayak ege vaw? Mbəlakw ege vaw?» 26Pəyer a zenene a ŋgaya: «Ara mbəlakw ege.» Yesu a ŋgaya: «Ana ebe ŋghe ca, hejəye hayak ege ca, əy kaŋtar budaw askwaw. 27Cemey, heje ɗaw ŋ ghweɗetene unaf səkwaw, mavəday anta, nda a ŋtele, nahza ŋgele ŋma, ŋkəlef maa hwa kanambalaza ma mpar ca, zlarza pakam anta, hwa nendewzene a səlay ŋma, daza, ŋtar budaw mala naka ey mala ŋkwa.»
Chwazi Kounye ya:
Mata 17: BHS
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2025 CABTAL