Matayo 6
6
Yesu mí lò-gwíydha ddiy bbúdha ró zòw ní ndrǔ dhò
1“Nyì déy nyì nyú nà nyìdhí chǒw ní njí njèydha dhò bbalè nyú djú, ndaní ndrǔ njǎ. Ya nyì njèy bbalè nyú djú nì fú ddiy, nyì rà nzǐ nyì kobì chùw nyì Dja rakpa ó nì dèddù.
2“Fú ddiy dhò, ya nyì nì ddiy bbu, ddiy mí zòw nì ì ró nì ndrǔ dhò, nzǐ nyì ngwo rǒ dho. Fú nì lò-shúwdha-djá nì njěy nì ddiy Yahuddi-ddúw dhí njuwdha-dzà ó ndèymí tuw tsò rá òluw, ddiydhò ndrǔ mey nì ka má ì ndanà. Manì nyì dhò dìchú ní lò tdrǎ, ndrǔ chùw ì kobì ŋà. 3Chú ya nyi bbû ddiy zòw-djá dhò, njey cha nzǐ nyi kàtéy chow nì li dho tsì ní. 4Fú tuw nà, nyìmí ddiy bbúdha rà dey rùdha ní ndèymí nyìmí Djǎnì cha ndèy nja nì ddiy wánì, yakpe ndèy rù ndèy nì, rà nyi kobì bbu.”
Yesu mí lò-gwíydha Ddrà nzz̀dha ró
(Lwk 11:2-4)
5“Ya nyì nì Ddrà nzž ro, nzǐ nyì déy gbè lò-shúwdha-djá níchú. Ndrǔ jì Ddrà nzz̀dha dèydha ní Yahuddi-ddúw dhí njuwdha-dzà ó ndèymí bbalè nì bíy nì tuw tsò rá òluw, ndaní bbalè njǎ ì. Manì nyì dhò dìchú ní lò tdrǎ, ndrǔ chùw ì kobì ŋà. 6Chú ya nyi nì Ddrà nzž ro, tsuw nyǐngá gìy ò, tdyi dzá-tsò ndèymí nzz̀ Djǎ nyi dhò, cha nzǐ ndèy rónga nja nì ndèy nì. Djǎ nyi cha ndèy nja nì ddiy wánì, yakpe ndèy rù ndèy nì, rà nyi kobì bbu.
7“Ya nyì nì Ddrà nzž ro, nzǐ tey ddì nì lò bíy nì nga nà, gbè ngǎ ì nì Yahuddi-ddúw ní nì ndrǔ njèy nì níchú. Ndrǔ ddéy nì ka rà ì rr̀ ìdhí bíy ní lò kpà dhò. 8Nzǐ nyì déy ndrǔ níchú. Nyì Dja tsì ŋa nyì nì jǐ nì ddiy děy nzá nyì dhîy ní.
9“Í nì ŋǎchú nyì kà nyì nzž ddiy,
“Mà Dja rakpa ó nì,
nyi ró dho déy mádha ní,
10nyìmí Pey-mí-nga shǐ,
nyi jì nì ddiy njěy ndèy,
dziylíy djú, gbè à njèy ndèy rakpa ò níchú.
11Bbú mà dho màdhí ddu ró nì nyû.
12Bbà mà dhò màdhí ngǎjìní njeydha,
gbè mà ddí bbà njàddí ndrǔ njèy mà dho nì ngǎjìní-nga níchú.
13Nzǐ dda mà djùkpa mbùdha ò,
chú pá mà ngǎjìní li Setani róddù.”#6:13 Njàddí ndíydha-ní-lò ó ka ndrr̂ í lò, ddiydhò pey mí nga nì nyìmî ndèymí klôw nà ndèymí ddrǒngó-ní-nga nà ndru-tey ró. Amina.
14Yesu ndrr̂ ndèy tdràdha nà, “Ya nyì bbà njàddí ndrǔ dhò ngǎjìní ddiy ndrǔ njèy nyì dho nì, nyìdhí Djǎnì rakpa ó nì ddí rà bbà nyì dho. 15Chú ya nyì bbà nzá njàddí ndrǔ dhí ngǎjìní njèydha, nyì Dja ddí rà nyìdhí ngǎjìní njèydha bbà nzǐ.”
Yesu mí lò-gwíydha Ddrà nzz̀dha ró nyû bbàdha nà
16“Ya nyì nì Ddrà nzz̀dha mí nyû bbǎ ro, nzǐ nyì sa nyì-nyú djú nga gbè lò-shúwdha-djá njey nì níchú. Ndrǔ sa nì ì nyú djú nga, ndaní à dhǒ ì nì nyû bbàdha nà. Manì nyì dhò dìchú ní lò tdrǎ, ndrǔ chùw ì kobì ŋà. 17Chú ya nyì nì nyû bbàdha nà ro, nyì thi nyì djùkpa ró ɦěy ndèymí nyì déy ngbá. 18Fúnì rà ley bbalè rà tsì nzǐ ya nyì nì dey nyû bbàdha nà, chú nyì Dja cha nzǐ ndèy rónga nja nì ndèy nì, rà tsì ndey. Nyì Dja cha ndèy nja nì ddiy wánì, yakpe ndèy rù ndèy nì, rà nyì kobì bbu.”
Yesu mí lò-gwíydha ndèy ɦuwdjò na tǐ nì ddiy ró rakpa ò
(Lwk 12:33-34, 11:34-36)
19“Nzǐ nyì jì ndèy ɦuwdjò nà tǐ nì ddiy nà déydha ingá dziylíy djú cha kǎkà ndèymí nyàlì nà ddí dho sà mí nga ò. Ǐngí bbalè dho tsùw nyǐngà dzá ndèymí ndrǔ dho fú nyì pbò ndèy rónga nì ddiy tdùw. 20Chú nyì kà nyì chǔw ndèy ɦuwdjò nà tǐ nì ddiy rakpa ò cha kǎkà ndèymí nyàlì nà dho sà nzǐ mí nga ò. Bbalè ddí dho tsùw ndèymí nga tdùw nzǐ. 21Nyi lêy nyìmí ddiy mí nga ó, nyi thíy ddí rà tdè fungá.
22“Li-nyú nì li-rónga mí tǎlà. Ya nyi nyú nì nga njǎ lǎní, nyi rónga wá rà kì kadha nà. 23Chú ya nyi nyú nì nga njǎ nzǐ lǎní ro, nyi rónga wá rà dey tèy-tèy nga ó. Ya nyi ó kadha tèy, fú tèy-tèy nga rá dey ngǎjìní ŋàbùkà!
24“Li rò nì ngǎ cha ndèy dho dey piy ní rwo nì drò-dró ní ndrǔ dhò. À rà ddì nì jì ndèymí à rà njàddí ndrò ǐngí à rà njí njèy lǎní ddì nì ddrǒngóli dhò, chú à rà lò ddey ngǎjìní njàddí ró. Nyi dho nzǐ njí njèy Ddrà dhò ndèymí mb nà ddìngà nà.”
Ley nyi thíy Ddrà djú, ndaní nzǐ nyi ónga tdǒ
(Lwk 16:13; Lwk 12:22-31)
25“Fú ddiy dhò, manì tdrǎ nyì dhò, nzǐ nyì ónga tdǒ nyìdhí djiy djú. Nzǐ nyì ónga tdǒ nyì rà nyù ǐngí nyì rà mb nì ddiy djú, ndaní nyì déy djiy ní. Ndèymí nzǐ nyì ónga tdǒ nyì rà tho nyì ró nì ddiy djú. Nyìdhí djiy ɦuwdjò dà ná nzá nyû djòluw ndèymí nyì rónga ɦuwdjò dà ná nzá rù djòluw? 26Nyì nja rì-kpà. Ndrǔ tdow nì nzǐ ǐngí ndrǔ tsi nì nzǐ ǐngí ndrǔ léy nì nzǐ ddèr ò, chú nyì Dja rakpa ó nì bbú nì ndrǔ dhò nyû. Nyì ɦuwdjò dà ná nzá tǐ ndrǔ djòluw? 27Nyì kàó áyì ní ndèy cha ndèy ó tdótdò dho ley ndèy ndrŕ ndèymí djiy mí ddu nì?
28“Ddudhò nyì ónga ní tdǒ rù djú? Nyì ddéy cha tsó téy tsó-zà dhiy nì ddiy. Ndrǔ njèy nì njí nzǐ ǐngí ndrǔ tdya nì rù ddí nzǐ ì dhò. 29Chú manì tdrǎ nyì dhò, Pey Sulemani ndèymí ddrǒngó-ní-nga ó ddí njòw ndèy rónga nzá lǎní, gbè í tsó-zà níchú. 30À nì Ddrà cha ndèy njow nì tsó lǎní rù nà. Ddì ní tsó dhiy nì, chú nêyngá bbǔtss̀ ró ka bbla nì kàss ò. Ddrà rá nzǐ nyì rónga njòw à da fú nì djòluw, nyì drá nyìdhí ùwdha nà nì ndrǔ?
31“Fú ddiy dhò, nzǐ nyì ónga tdǒ í ddiy dhò, tdràdha nà, ‘Mà rá ddu nyù?’ Ǐngí, ‘Mà rá ddu mb?’ Ǐngí, ‘Mà rá ddu njòw mà ró?’ 32Nzá ì tsì Ddrà nì bbalè léy nì ì thíy fǔchú nì ddiy djú. Chú nyì dho, nyì Dja rakpa ó nì tsì nyì jì nì ddiy wá. 33Chú nyì mey nji Ddrà mí pey-mí-nga ndèymí àmí chǒw ní lò nà. Fú nganà à rà ddí nyì dhò ddiy wánì bbu cha nyì nì jǐ nì. 34Fú ddiy dhò, nzǐ nyì thíy tdǒ bbǔtss̀ djú nì ddiy dhò, ddiydhò bbǔtss̀ djú nga rà ndèy rónga pbò ndèy níddò. Wánì ddu kâ ndèymí nzadha nà ndèy djú ndèy níddò.”
Chwazi Kounye ya:
Matayo 6: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved