Matayo 5
5
Yesu mí lò-gwíydha ngòw djò nì tsò ngàdha
1Yesu njà tdè bbalè mí njuw ro, à kâ rà ru ngòw djò. À dòw bbi gudjò ro, à kodjú kpa kâ rà à dè. 2À lòw dey ndrǔ gwiy.
Yesu mí lò-gwíydha bû djò
(Lwk 6:20-23)
3À tdrà,
“Bû nì cha ì nì thíy mí zòw nà nì ndrǔ dhò,
ddiydhò rakpa mí pey-mí-nga nì ndrǔ dhî.
4Bû nì cha ì nì dzž nì ndrǔ dhò,
ddiydhò ka rà ndrǔ thíy djow.
5Bû nì cha ì nì ì djow nì ndrǔ dhò,
ddiydhò dziylíy rà dey ndrǔ dhî.
6Bû nì cha ì nì chǒw ní deydha měy nì ndrǔ dhò,
gbè ì nì ɦùw nà ndèymí dda-ꞌwíy nà nì ndrǔ níchú,
ddiydhò ndrǔ ónga rà kì.
7Bû nì cha ì nì zòw-lò njěy njàddí bbalè ró nì ndrǔ dhò,
ddiydhò ndrǔ rà zòw-lò chùw.
8Bû nì cha ì thíy nì thí nì ndrǔ dhò,
ddiydhò ndrǔ rà Ddrà njà.
9Bû nì cha ì nì li-thíy djówdha mí lò tdrǎ nì ndrǔ dhò,
ddiydhò ka rà ndrǔ íy Ddrǎ-ngá nzòw ní.
10Bû nì cha ka nì ì nza chǒw ní lò djù nì ndrǔ dhò,
ddiydhò rakpa mí pey-mí-nga nì ndrǔ dhî.
11“Bû nyì dho ya bbalè nì nyì dhǔw, nzadha bbu nyì dhò, nyì ró ngéy-ngéy ní ngǎjìní lò tdrǎ cha ndèy nì mbwa nì, nyì nì ma kodjú kpa ddiydhò. 12Nyì déy hwî nà ndèymí nyì jow yǐlílí, ddiydhò ddrǒngó ní nyì kobì nì nyì pbǒ rakpa ò. Fú ddì nì tuw nà, ndrǔ bbû tdè nzádha nabi-kpà dhò cha ì tdè nyì njìó nì.
Yesu kodjú kpa nì ku ndèymí kadha níchú
(Mak 9:50; Lwk 14:34-35)
13“Nyì nì ku níchú dziylíy djú bbalè wánì dhò. Chú ya ku kuw thà, ka dhó kuw nì ngù ŋǎchú? À nì lǎní tdíydha dhò, ndaní bbalè bbiy djò mà luw.
14“Nyì nì kadha níchú dziylíy djú bbalè wánì dhò. Ngòw djú ka ss̀ nì ddrǒngó ní bba ru nì ndèy nzǐ. 15Ndèy li ro nì ngǎ ndèy tow nì tǎlà ndèy léy tdyǔ tss̀ tò, chú à léy nì ndèy-koko djú, ndaní à tdyí wánì ndrǔ rónga cha ì nì dzá nì. 16Fú ddì nì tuw nà nyìmí kadha kà ndèy ká bbalè nyú djú, ndaní ndrǔ njǎ nyìmí lǎní njeydha ndèymí ndrǔ bbú madha nyìmí Djǎnì rakpa ó nì dhò.
Yesu mí lò-gwíydha yǎdha djú
17“Nzǐ nyì ddéy ma rà Musa-ngá yǎdha dda ndèymí nabi-kpà dhí li-gwíydha nà, chú ma rà, ndaní ma léy à njěy ndèy dìchú. 18Manì nyì dhò dìchú ní lò tdrǎ, ya děy nzá rakpa màgò dziylíy nà dà ní, drá ní lò hó ǐngí lò hó gitèy rò ddí rà ndèy dda nzǐ yǎdha róddù, pbǔw ddiy wánì rà ndèy njèy ddiy ò. 19Fú ddiy dhò, ya ndèy rà fú yǎdha kàó ddì nì drá ní tá kwò nì li ndèymí cha ndèy rà njàddí ndrǔ gwiy à njěy fǔchú nì li, rà dey drá ní li ní rakpa mí pey-mí-nga ò. Chú cha ndèy njèy fú yǎdha nì li ndèymí ndèy gwîy njàddí bbalè à njěy fǔchú nì li, ka rà fú li iy ddrǒngóli ní rakpa mí pey-mí-nga ò. 20Fú ddiy dhò, manì tdrǎ nyì dhò, ya nyìdhí chǒw ní déydha dà nzá Farisayo ní kpa mî ndèymí Musa-ngá yǎdha mí li-gwíydha-djá djòluw, nyì rà tsùw ddìkpe nzǐ rakpa mí pey-mí-nga ò.
Yesu mí lò-gwíydha thǒw djú
21“Nyì rr̀ Musa-ngá yǎdha tdrà tdè ndruní bbalè dhò, ‘Nzǐ nyi hwi bbalè,#5:21 Ngbídha 20:13. ndèymí ndèy hwì nì li, ka rà ndeyli djú lò-tdèy.’ 22Chú njanja manì tdrǎ nyì dhò, ya thǒw lòw li rò njàddí li ró, ka rà ndeyli mbà lò-tdèydha nyú djò. Ya li rò tdrà, ‘Lǎ thò nyi vúní!’ Ka rà ndeyli mbà ru nì lò-tdèydha-djá njìò. Ya li rò tdrà, ‘Nyi nì vǐy,’ ka rà ndeyli mbà ndru-tey ró nì li sàdha mí kàss ò.
23“Fú ddiy dhò, ya nyi nì nyìmí bbudha bbu Ddrà nzz̀dha mí thí ní dza ó alitari djú ro, ndèymí fungá nyi ddêy njàddí li rò nì thǒw nà nyi ró, 24bba nyìmí bbudha fúnga Ddrà nzz̀dha mí thí ní dza ó alitari njìó. Ra nji nyì kàónga thì ndeyli nà ndèymí nyi ká ngu rà nyìmí bbudha bbu Ddrà dhò.
25“Ya li rò bbòw nyi ndèymí à mbà nyi lò-tdèydha-djá dè, nyì thi nyì kàó lò nji à nà, děy nzá nyì shì lò-tdèydha-djá nyú djò ní. Ya nzá nyì njèy fúnì ro, ka rà nyi bbu lò-tdèydha-djá dè, cha ì rà nyi bbu ngiy-dzà rónga pbòdha djá dè, ndaní ndrǔ bblǎ nyi ngiy-dzà ò. 26Manì nyi dhò dìchú ní lò tdrǎ, nyi rà shì nzǐ fú ngiy-dzà óddù, ya děy nzá nyi bbû nyi djú mb hó wá ní.
Yesu mí lò-gwíydha ddùdha ngǎ ndèy nì nyìmí ków mí li nà nì djú
27“Nyì rr̀ Musa-ngá yǎdha tdrà tdè, ‘Nzǐ nyi ddǔ ngǎ ndèy nì nyìmí ków mí li nà.’#5:27 Ngbídha 20:14. 28Chú njanja manì tdrǎ nyì dhò, ddì-ddì ní li cha ndèy njà ɦìytss-ní-li ndèymí à ddêy ndèy thíy ò ndèy ddǔ fú ɦìytss-ní-li nà, fúnì fú li ddù ŋà fú ɦìytss-ní-li nà ndèy thíy ò. 29Ya ví òluw nì nyi nyú mbà nyi cherr ò, ddá à gu nyi róddù. À nì lǎní drǒ nyi víy nyi rónga la-tsò rò à da nyi rónga wánì chěy ndru-tey ró nì li sàdha mí kàss ò nì. 30Ndèymí ya ví òluw nì nyi-dhokpa mbà nyi cherr ò, ddá à ndèymí nyi ngbǒ à gu. À nì lǎní drǒ nyi víy nyi rónga la-tsò rò à da nyi rónga wánì tsǔw ndru-tey ró nì li sàdha mí kàss ò nì.#5:30 Í versi ó Yesu tèy lò li-rónga la djú cha ma njey nì ndanà cherr nì. À lêy li-nyú ndèymí li-thokpa nà ndaní à dhǒ cha ka nja nì ndèymí ka njey nì ddiy.
Yesu mí lò-gwíydha ków ónga ndòdha djú
(Mat 19:9; Mak 10:11-12; Lwk 16:18)
31“Nyì rr̀ Musa-ngá yǎdha tdrà tdè, ‘Ndèy jì ndèy ndǒ ków ónga nděyngá ɦìytss nà nì li, à kà ndeyli bbú ków ónga ndòdha mí ndíydha-ní-lò à dhò.’#5:31 Yǎdha 24:1. 32Chú njanja ma nì tdrǎ nyì dhò, à ùw ndèy ŋà ndeyli dhò à dǐy nděyngá dza-yà gu, ya à ddù ngǎ ndèy nì àmí ków mí li nà chúddì. Ya à dìy à ngéy ní lò dho, fúnì à lêy nděyngá dza-yà ddǔw ngǎ ndèy nì àmí ków mí li nà. Í nì njey nì ndèy ya à kòw ndèy ngéy ní kpatss̀-ní-li dhò ro. Ndèymí kpatss̀-ní-li cha ndèy kòw fú ɦìytss-ní-li nì, fú li ddí njèy cherr. Ma nì í ddiy tdrǎ, ddiydhò fúli kòwdha nì gbè ddùdha ngǎ ndèy ddù ndèymí ków mí li nà nì li níchú.
Yesu mí lò-gwíydha ju-tsódha djú
33“Nyì rr̀ Musa-ngá yǎdha tdrà tdè ndruní bbalè dhò, ‘Nzǐ kwo nyìmí lò-tdèydha, chú njey nyìmí lò-tdèydha cha nyi lêy Ddrǒngóli dhò nì.’#5:33 Lawi 19:12; Pbúw hwo 30:2; Yǎdha 23:21. 34Chú njanja manì tdrǎ nyì dhò, nzǐ tsó ju ddì kpe, ǐngí rakpa ró dho nà, ddiydhò rakpa nì Ddrà mí pey nyùdha mí thìynga. 35Ndèymí nzǐ nyì tdrǎ, ‘Dziylíy nà,’ ddiydhò dziylíy nì à kotéy thìynga. Ndèymí nzǐ nyì tdrǎ ‘Yerusalemu nà,’ ddiydhò Yerusalemu nì ddrǒngó ní bba, ddrǒngó ní Pey ngâ. 36Ǐngí nzǐ tsó ju, ‘Ma djùkpa nà,’ ddiydhò nyì dho nzǐ ddì nì ɦěy rò ngù sárŕ ǐngí kúw. 37Léy nyìmí ‘Ónì’ déy òní ǐngí ‘Ngǎ’ déy ngǎ, ddiydhò ngéy ní ddiy cha ndèy dà fú nì djòluw nì shì ngǎjìní li Setani dèddù.
Yesu mí lò-gwíydha ngǎjìní lò-bì-tsò ngùdha djú ngǎjìní lò ró
(Lwk 6:29-30)
38“Nyì rr̀ Musa-ngá yǎdha tdrà níchú, nzadha kà ka bbú ddìkàddì li-rónga nyúdha nà, ‘Li-nyú ddí li-nyú dhò, ndèymí li-kuw ddí li-kuw dhò.’#5:38 Ngbídha 21:24, Lawi 24:20, Yǎdha 19:21. 39Chú njanja manì tdrǎ nyì dhò, nzǐ nyì ngu lò bìtsò cha ì njèy nyì ngǎjìní nì ndrǔ dhò. Ya ndeyli thà ví òluw nì nyi gi-tèy, bbú à thǎ ddì nì ddí. 40Ya li rò jì ndèy mbǎ nyi lò-tdèydha nyú djò, ndaní ndèy ddá nyìmí sǎtì, bba à ddá nyìmí kǒtì ddí. 41Ya la-dzàdha-dja kprà nyi, nyi tdúw ndèymí nò kìlómìtà ddì, njey kìlómìtà rwo nì dhò. 42Ya ndeyli rò dhîy ddiy rò nyi dè, bbú à dhò. Ya ndeyli rò jì ndèy kwó bi nyi dè, bbú à dhò.
Yesu mí lò-gwíydha ndrò-djá jìdha djú
(Lwk 6:27-28,32-36)
43“Nyì rr̀ ka tdrà tdè, ‘Ji nyi dyási#5:43 Lawi 19:18. ndèymí ndro nyìmí ndrò-dja.’ 44Chú njanja manì tdrǎ nyì dhò, ji nyìdhí ndrò-djá ndèymí nzz cha í nì nyì nza nì ndrǔ dhò. 45Ya nyì njèy fǔchú, fúnì rà dhò dìchú nyì nì nyì Dja rakpa ó nì ngá nzòw. À léy nì ndèymí itsś ká ngǎjìní ndèymí lǎní bbalè djú wá ddìkàddì, ndèymí à bbú nì dji ì nì chǒw ní ddiy njěy ndèymí ngǎjìní ddiy njěy nì ndrǔ djò. 46Ya nyì jì nyìdhí jǐ-djá chúddì, ddù mí lò kobì ní ndèy nyì rà chùw nì? Ngǎjìní bbalè gbè mùsórò njúwdha-djá níchú nì ddí njey nì fǔchú. 47Ya nyì nì nyì-djú rónga zǔ chúddì, fúnì nyì ná ddu njěy cha ndèy dà ngéy bbalè nì njěy nì djòluw? Nzá ì ùw Ddrà nì ndrǔ ddí njey nì fǔchú. 48Fú ddiy dhò, à jì nyì déy chǒw wánì ddiy ó, gbè nyì Dja rakpa ó nì ddí nì chǒw níchú.
Chwazi Kounye ya:
Matayo 5: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved