Matayo 25
25
Nzá njà kpa nì dhì-nzòw dri nì mí lò-ngbòdha
1Yesu tdrà, “Fú nga nà rakpa mí pey-mí-nga rà dey ǐchú. Dri nì nzá njà kpa nì dhì-nzòw tdûw tdè ìdhí tǎlà ndèymí ndrǔ rà sǐngba tdey mí kpatss̀ tsò tdèy. 2Ndrǔ kàó mbu nì tdè vǐy ní ndèymí njàddí mbu nì tdè nyǔꞌwiy nà. 3Vǐy ní ndrǔ tdûw ìdhí tǎlà ro, ndrǔ tdûw nzá ndèy kâ nì tǎlà ó chì. 4Nyǔꞌwiy nà nì ndrǔ tdûw chì ìdhí chì-tdéy ó ndèymí tǎlà nà. 5Sǐngba tdey mí kpatss̀ tdyà nga shìdha nà, fúddiy dhò ndrǔ wá nzà ndèymí ndrǔ ddù.
6“Chú fú kúw chir nà ka swâ, ‘Nyì nja! Sǐngba tdey mí kpatss̀ shì ŋà! Nyì shi, nyì ra à tsò tdèy!’ 7Nzá njà kpa nì dri nì dhì-nzòw ní nzòw ngbî ì ru ndèymí ndrǔ thì ìdhí tǎlà. 8Vǐy ní ndrǔ tdrà nyǔꞌwiy nà nì ndrǔ dhò, ‘Nyì bbú nyìdhí chì rò mà dhò, ddiydhò màdhí kàss nì rǎ dhi.’
9“Nyǔꞌwiy nà nì ndrǔ ngù lò, ‘Nzǐ à rà ka mà dhò nyì nà. Nyì ra cha ì nì chì ó nga dzź nì ndrǔ dè ndèymí nyì dzz chì nyì dhò nyìníddò.’
10“Chú ndrǔ tdè rǎ chì dzz̀ mí nga nà, sǐngba tdey mí kpatss̀ kâ shì. Ì thì tdè ì nì ndrǔ tsùw à nà ddìngaó ków mí madha mí nyû dè. Ndèymí ka kâ dzá-tsò ì.
11“Luwtéy njàddí ndrǔ ddí kâ shì. Ndrǔ kâ tdrà, ‘Ddrǒngóli! Ddrǒngóli! Pu dzá-tsò mà dhò!’
12“Chú à ngù lò, ‘Manì nyì dhò dìchú ní lò tdrǎ, ma tsì nyì nzá.’”
13Fú ddiy dhò Yesu tdrà, “Nyì pbo nga, ddiydhò nyì tsì nzá ma rà ngu mí ddu ǐngí mí sâ.
Lò-ngbòdha tàlántù ró
(Lwk 19:11-27)
14“Fú nga nà, rakpa mí pey-mí-nga rà dey ǐchú. Ddì nì kpatss̀ tdè rǎ bbiydha ò, à îy nděyngá nokpá ndèymí à bbû nděyngá ddiy ndrǔ dè. 15Ddì li dè à bbû tàlántù ní mb mbu, njàddí dhò rwo, njàddí dhò ddì. Ddì-ddì ní li dhò à bbû cha ndèy kâ ndeyli mí klôw nà nì. Ndèymí à kâ rà ndèymí bbiydha ò. 16Ndèy kwô tdè tàlántù mbu nì li rà ddì-ngà-nà ndèymí nà à lîy ónga ndèymí à chùw kíyddà mbu ngéy ní nì. 17Fú ddì nì tuw nà, ndèy kwô tdè rwo nì li chùw ndèymí kíyddà rwo. 18Chú ndèy kwô tdè ddì nì li rà gu, à bbîy bbuw dziylíy ò ndèymí à rù ndèymí ddrǒngóli ngá tàlántù dziylíy ò.
19“Bíy ní ddù dzzdjú, fú nokpá dhí ddrǒngóli kâ ngu ndèymí ndrǔ kâ dòw tàlántù ónga zòwdha dhò. 20Cha ndèy kwô tdè tàlántù mbu nì li mbà njàddí mbu nì. À kâ tdrà, ‘Ddrǒngóli, nyi bbû tdè ma dè tàlántù mbu nì. Nja ma chùw kíyddà mbu.’
21“Àmí ddrǒngóli ngù lò, ‘Nyi njèy déy, nyi nì lǎní ndèymí dìchú ní nokpa. Nyi njèy dìchú ní ddiy drá ní ddiy nà, ma rà ley nyi njǎ bíy ní ddiy djú nga. Ra ndèymí tsuw nyìmí ddrǒngóli ngá hwî ò.’
22“Ndèy kwô tdè tàlántù rwo nì li ddí shì. À kâ tdrà, ‘Ddrǒngóli, nyi bbû tdè ma dè tàlántù rwo, nja, ma chùw kíyddà rwo.’
23“Àmí ddrǒngóli ngù lò, ‘Nyi njèy déy, nyi nì lǎní ndèymí dìchú ní nokpa. Nyi njèy dìchú ní ddiy drá ní ddiy nà, ma rà ley nyi njǎ bíy ní ddiy djú nga. Ra, ndèymí tsuw nyìmí ddrǒngóli ngá hwî ò.’
24“Chú ndèy kwô tdè tàlántù ddì nì li ddí shì. À kâ tdrà, ‘Ddrǒngóli, ma tsì nyìmí lò ónga tdè nì klǒw, nyi tsi nì nzá nyi tdòw mí nga óddù ndèymí nyi njúw ní tsònì nzá nyi ɦìy mí nga óddù. 25Fú ddiy dhò, ma tdè nyí nà, ma rà ndèymí ma rù nyìmí tàlántù dziylíy ò. Nja nyìmí ddiy nì i.’
26“Àmí ddrǒngóli ngù lò, ‘Nyi nì ngǎjìní ndèymí tss-dja ní nokpa. Nyi tsǐ tdè ma tsi nì nzá ma tdòw mí nga óddù ndèymí ma njúw nì nzá ma ɦìy mí nga óddù? 27Ya nyi tsì tdè ma nì fǔchú ro, nyi kà tdè nyi léy màtsá tàlántù, mb rónga pbòdha mí nga ò, ndaní ma ngû ro, ma chǔw ŋà kíyddà ndrr̂ ndèy.’
28“À jà, ‘Nyì tdúw fú tàlántù gu à dèddù ndèymí nyì bbú cha ndèy tdè ndanà dri nì li dè. 29Fú ddiy dhò, ndèy nì ddiy nà nì li, ka rà kíyddà ndrr ndeyli dhò ndèymí à rà dey ndanà věy. Ngǎ ndèy nì ddiy nà nì li, àmí drá ní tá kpe ka rà dda gu à dèddù. 30Nyì ngbo ngǎ ndèymí njí nà nì nokpa rúgò, tèy-tèy nga ò. Fulè ndrǔ rà dzz̀ ì kuw kádha nà.’”
Luwtéy nì lò-tdèydha
31Yesu tdrà, “Ma Ndrǔ-Ddùw rà shì màtsá ddrǒngó-ní-nga ó ro, Ddrǎ-ngá wánì malayika-kpà rà shì ma nà. Ma rà dòw màtsá pey nyùdha mí ddrǒngó-ní-nga mí thìynga djú. 32Ka rà bbalè njuw wánì dziylíy ó nì ma nyú djú, ndèymí ma rà bbalè ónga ndò ddì nì njàddí róddù gbè měyá rónga pbòdha-dja ndo nì towmbù ndrr róddù níchú. 33Ma rà chǒw ní bbalè ley ví òluw nì ma dhokpa djò ndèymí njàddí ndrǔ gǔw djòluw nì ma dhokpa djò.
34“Fú nga nà, ma Pey rà tdrà cha ì nì ví djòluw nì ma dhokpa òluw nì ndrǔ dhò ǐchú, ‘Nyì ra, cha màtsá Djǎnì bbû nyì dhò bû nì ndrǔ. Nyì déy pey-mí-nga ó cha à thì nyì dho à nga ndèy dziylíy ka tdyà mí nga djúddù. 35Ma tdè ɦùw nà ro, nyì bbû ma dhò nyû. Ma tdè dda-ꞌwíy nà ro, nyì bbû dda ma dhò. Ma tdè lu ní ro, nyì kwô ma dzá. 36Ma tdè ngǎ rù ní ro, nyì njòw ma rónga. Ma tdè dhi nà ro, nyì kwô ma tsotso. Ma tdè ngiy-dzà ò ro, nyì rà ma rónga njà.’
37“Chǒw ní ndrǔ rà lò ngù ma dhò, ‘Ddrǒngóli, ŋǎngí mà njǎ tdè nyi, nyi tdè ɦùw nà ndèymí mà bbû nyi nyǔ, ndèymí nyi tdè dda-ꞌwíy nà ro, mà bbû nyi mbrř? 38Ŋǎngí mà njǎ tdè nyi, nyi tdè lu ní ndèymí mà kwó tdè nyi dzá, ǐngí nyì tdè ngǎ rù ní ro, mà njòw tdè nyi rónga? 39Ŋǎngí mà njǎ tdè nyi dhi nà nyi tdè ro, ǐngí ngiy-dzà ò ro, mà rà tdè nyi njǎ?’
40“Ma Pey rà lò ngù, ‘Manì nyì dhò dìchú ní lò tdrǎ, nyì njèy tdè drá tǐ ndèy ɦuwdjò na ndèy nì ma dyǒw nì li dhò nì ddiy, fú nì nyì njèy ma dhò.’
41“Fú nga nà ma rà tdrà, cha ì nì gǔw djòluw nì ma dhokpa òluw nì ndrǔ dhò, ‘Nyì ngbí nyì gu ma kuw tsó ddù, nyì cha Ddrà wâ tdè nì ndrǔ. Nyì ra ndru-tey ró nì li sàdha mí kàss ò, cha ka thì Setani dho ndèymí nděyngá malayika-kpà nà nì. 42Ma tdè ɦùw nà ro, nyì bbû nyû nzá ma dhò ma nyǔ, dda-ꞌwíy tdè ma njěy ro, nyì bbû ddiy rò nzá ma dhò ma mbrř. 43Ma tdè lu ní, chú nyì kwô ma nzá nyìdhí dza ò. Ma tdè ngǎ rù ní, chú nyì njòw ma rónga nzá. Ma tdè dhi nà ndèymí ngiy-dzà ò ro, nyì kwô ma tsotso nzá.’
44“Ndrǔ rà ddí lò ngù, ‘Ddrǒngóli, ŋǎngí mà njǎ nyi ɦùw nà ǐngí dda-ꞌwíy nà ǐngí lu ní ǐngí nyi tdè ngǎ rù ní ǐngí nyi tdè dhi nà ǐngí nyi tdè ngiy-dzà ò, ndèymí mà kwô nyi tsotso nzá?’
45“Ma rà lò ngù, ‘Manì nyì dhò dìchú ní lò tdrǎ, nzá nyì njèy tdè drá tǐ ndèy ɦuwdjò nà nì li dhò nì ddiy, fú nì nyì njèy nzá ma dhò.’
46“Fú nga nà ndrǔ rà rà gu ndru-tey ró nì li-dhèydha ò, chú chǒw ní ndrǔ rà rà ndru-tey ró nì djiy ò.”
Chwazi Kounye ya:
Matayo 25: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved