Matayo 24
24
Yesu tèy lò Yahuddi-ddúw dhí Ddrà nzz̀dha mí nga rà ndèy sà ddiy djú
(Mak 13:1,2; Lwk 21:5,6)
1Yesu bbà Yahuddi-ddúw dhí Ddrà nzz̀dha mí thí ní nga ndèymí à dêy rǎ fungá ddù ro, à kodjú kpa rà à dè. Ndrǔ lòw dey à dhò thí ní nga ó nì dza dhò. 2À dhîy, “Nyì ní ney í ddiy wánì njǎ? Manì nyì dhò dìchú ní lò tdrǎ, ka rà nzǐ ddì nì djuw bbà njàddí djú. Djuw wánì ka rà ngbo dziylíy djò.”
Cho tsò tdówdha mí ɦiy
(Mak 13:3-13; Lwk 21:7-19)
3Yesu kâ rà Òlívè tsúw mí ngòw djò, ndèymí à dòw fungá. À kodjú kpa rà à dè nga gidjò ndèymí ndrǔ tdrà à dhò, “Tdra mà dho, í ddiy rá ndèy njèy ŋǎngí, ndèymí ddu rá ndey nyìmí shìdha dhò ndèymí cho tsò tdówdha nà?”
4Yesu ngù lò, “Nyì pbo nga, ndaní nzǐ njaddí li rò tsǎ nyì nyú. 5Bíy ní ndrǔ rà shì ma ró dho ó, ndrǔ rà tdrà, ‘Ma nì Masiya,’ ndèymí ndrǔ rà bíy ní bbalè nyú tsà. 6Nyì rà chow nì la ɦuwdjò rr̀ ndèymí ndì nì la mí lò-ɦéy ɦuwdjò rr̀. Chú nzǐ nyì thíy kǒw. Fǔchú ní ddiy kà à njěy ndèy, chú nga tsò tdówdha rà tdè děy. 7Ddì nì pbúw rà tsa njàddí ró, ddì nì pey-mí-nga rà tsa njàddí pey-mí-nga ró. Ddrǒngó ní ɦùw rà chèy ndèymí chìychìy rà tdè bíy ní nga òluw. 8Í ddiy wá rà dey li gòwdha mí ndéy tsò ngà ndèy ddiy níchú.
9“Fú nga nà ka rà nyì bbu nzadha dhò ndèymí ka rà nyì hwì. Pbúw wánì rà nyì ndrò, màtsá lò dhò. 10Fú nga nà bíy ní bbalè rà ìdhí ùwdha bbà. Ndrǔ rà ì bbu ndrò-djá dè ì kàó ndèymí ndrǔ rà ì ndrò ì kàó. 11Bíy ní mbwa mí nabi-kpà rà shì ndèymí ndrǔ rà bíy ní bbalè nyú tsà. 12Ngǎjìní njeydha rà nya, fúddiy dhò bíy ní bbalè dhí jǐ rà ngu shú. 13Chú ì rà dèy ngbiy-kpiy pbǔw tsòmà tdówdha ò nì bbalè, rà pa. 14Í pey-mí-nga mí Hwî mí Lò-ɦéy ka rà tdrà dziylíy òluw wá, ndaní pbúw wánì rř. Ndùw fú ddiy-dzzdjú, nga tsò tdówdha rà shì.
Ddrǒngó ní nzadha
(Mak 13:14-23; Lwk 21:20-24)
15“Ddì ní nyì rà ngǎjìní drǒ ní ddiy njà. Nyì rà ddiy njà à dèy Ddrà nzz̀dha mí thí ní nga ó cha ndèy rà mí nga tey ndèymí à rà sà. Nabi Danieli tdrà ndèy ɦuwdjò ndruní nì.#24:15 Danieli 9:27; 11:31; 12:11. Bbalè wá cha ì nì zǒw nì, à jì ndrǔ tsǐ, ya ddu mí lò-tey nì ddiy. 16Fúnga nà, bba cha ì nì Yuddeya mí ngòw ó nì ndrǔ kǒw ngòw djò. 17Ndèy nì rúgò nì li nzǐ à tsuw dzá, à rǎ ddiy rò tduw nděyngá dzá ddù, chú ndùw à kǒw. 18Ndèy nì nza ó nì li nzǐ à ngú bba kàò, à rǎ ndèy ró kǒtì zz̀, chú ndùw à kǒw. 19À rà tde ngǎjìní ì nì tǔw nà nì ndrǔ dhò fú ddu ó ndèymí ì djà nzòw nì njǔ nì nzòw ɦíy dhò. 20Nyì nzz Ddrà, ndaní nyìdhí ngow kòwdha nzǐ à déy grr̀ mí nga nà ǐngí Sabato ddù ó. 21Fú ddu ó, nzadha rà tdè ddrǒngó tǐ à dà cha ndèy njèy tdè ndèy ndruní nì djòluw, à nga ndèy cha dziylíy tsò ngà ndèy mí nga djúddù kpòw rà shì ndu. Ǐngí fǔchú ní ddiy rò rà tdè ngǎ ddíyàchú. 22Ya fú nzadha mí ddu ka ngǔ tdè nzá chow ro, li rò tdè ngǎ cha ndèy dho pa nì. Chú ì ka vû nì ndrǔdhí lò dhò, ka rà fú ddu ngù chow.
23“Fú nga nà, ya njàddí li rò tdrà nyì dhò, ‘Nja, Masiya nì ingá!’ Ǐngí, ‘À nì changá!’ Nzǐ uw. 24Mbwa mí Masiya ndèymí mbwa mí nabi-kpà rà shì. Ndrǔ rà ddrǒngó ní ɦiy njèy ndèymí wá li ónga ꞌwiy dho mà nì ddiy, ndaní ì tsǎ ndanà ka vû ì nì ndrǔ nyú, ya ney à dho ndèy njèy ro. 25Nyì déy nyì nyú nà, ddiydhò ma tdrà tdè nyì dhò í lò njitsò djú děy nzá mí nga shì ní.
26“Fú ddiy dhò, ya ndrǔ rà tdrà nyì dhò, ‘Nja Masiya nì ɦiy ní nga ò,’ nzǐ nyì ra fúlè, ǐngí ‘Nja à nì rùdha ní nga ò,’ nzǐ nyì uw. 27Ma Ndrǔ-Ddùw mí shìdha rà tdè gbè làlà níchú cha ndèy tdá nì nga rakpa chuwtò luw ndèymí à njà nì ndèy ndrǎ djúddù ngítsśyà djò. 28Nga wá cha bu nì ndèy ó nì, chwô rà ì njuw ddìngaó.
Yesu mí shìdha
(Mak 13:24-27; Lwk 21:25-28)
29“Ndùw fú nzadha mí ddu dzzdjú,
“ ‘itsś rà ngu kúw,
ndèymí bǐy rà ka nzǐ,
lùlú-kpà rà chèy rakpa chuw-téy ddù,
ndèymí rakpa chuw-téy klôw nà nì ddiy rà ì jà.’#24:29 Isaya 13:10; 34:4.
30“Fú nga nà, ma Ndrǔ-Ddùw mí ɦiy rà ndèy dhò rakpa chuw-téy. Dziylíy djú bbalè wá rà dzz̀ ya ndrǔ rà njà ma Ndrǔ-Ddùw shì rakpa chuw-téy nduw-nduw djú, klôw nà ndèymí ddrǒngó-ní-nga nà ro.#24:30 Danieli 7:13-14. 31Ma Ndrǔ-Ddùw ma rà màtsá ngá malayika-kpà cho, rí ní lo chuw nà ndèymí ndrǔ rà ma vû nì bbalè njuw dziylíy mí wánì nga la djúddù ddìngaó.
Yesu mí lò-gwíydha fígì tsúw ró
(Mak 13:28-31; Lwk 21:29-33)
32“Njanja nyì tsi í lò fígì-tsúw róddù. Ya fígì-tsúw gi-lá lòw ta ndèymí à lòw dey ndèy gi dda, nyì tsǐ fú nì dji nì chow. 33Fú ddì nì tuw nà, nyì rà fúddiy wánì njà mí nga nà, nyì tsǐ màtsá shìdha mí ddu nì chow, dzá-tsò kuw ó. 34Manì nyì dhò dìchú ní lò tdrǎ, í njanja nì bbalè rà dhì nzǐ wá pbǔw í ddiy rà ndèy njèy ddiy ò. 35Rakpa ndèymí dziylíy nà rà dà gu, chú màtsá lò rà dà nzǐ.
Li rò nì ngǎ cha ndèy tsì Yesu rà shì mí ddu nì
(Mak 13:32-37; Lwk 17:26-30,34-36)
36“Li rò nì ngǎ cha ndèy tsì mí ddu ǐngí mí sâ í ddiy rà ndèy njèy mî, yakpe à tdě rakpa ó malayika-kpà, ǐngí Ddùwnì ndèyníddù. Djǎnì chúddì tsì ndèy. 37Gbè à tdè Nowa ngá cho ó níchú, à rà tdè ddí fǔchú ma Ndrǔ-Ddùw mí shìdha ó. 38Děy nzá ddrǒngó ní dji kwo ndèymí mí dji dda tss̀ tdè dziylíy djú nga ní, bbalè tdè nga nyǔ ndèymí mbdha ní ddiy mb, dhì ndèymí kpa dêy ì kǒw kpòw Nowa tsùw ngǒ ò mí ddu ò. 39Bbalè tsì tdè nzá ya ddu rà ndey ndèy njèy ddiy pbǔw ddrǒngó ní dda shì ndèymí à chì ndrǔ wá. Ma Ndrǔ-Ddùw mí shìdha rà dey ddí fǔchú. 40Fú nga nà, rwo nì kpa rà tdè nza ó, ka rà ddì li tduw ndèymí njàddí li rà mà. 41Rwo nì dhì rà dey ddiy ùw djuw nà, ka rà ddì li tduw ndèymí njàddí li rà mà.
42“Fú ddiy dhò, nyì pbo nga, ddiydhò nyì tsì nzá ŋá ddu ó ma nyìdhí Ddrǒngóli rà shì ddiy. 43Chú nyì tsi í ddiy. Ya dza-dja tsǐ tdè kúw ónga mí ŋá sâ djú gbu-dja nì rǎ shì, à dho nga pbò ndèymí à dho ùw nzǐ gbu-dja kwǒ nděyngá dza. 44Fú ddiy dhò, nyì déy nyì thì nyì ddiy nà, ddiydhò ma Ndrǔ-Ddùw rà shì nzá nyì tsì nì sâ ó.
Lò-ngbòdha ndèy nì déy ndèymí ngǎ déy ní ddiy njěy nì nokpa ró
(Lwk 12:41-48)
45“Áyì ní ndey cha ndèy nì dìchú ní ddiy njěy ndèymí cha ndèy nì nyǔꞌwiy nà nì nokpa? À nì cha ddrǒngóli lêy nděyngà dzá nì nokpa djú, à bbú nyû ngéy-ngéy ní nokpa dhò ìdhí déy ní sâ ó nì li. 46À rà dey bû ní fú nokpa dhò ya ddrǒngóli shì ndèymí à chùw à nì fú ddiy njěy. 47Manì nyì dhò dìchú ní lò tdrǎ, à rà fú li ley nděyngá ddiy wánì djú. 48Chú ya à nì ngǎjìní nokpa, à rà tdrà ndèy dho ndèyníddù, ‘Màtsá ddrǒngóli rà ngu nzǐ bíy ní ddu dhò.’ 49À rà lòw dey ndèy dyasi ní ngéy ní nokpa dhèy ndèymí à rà nga nyù ndèymí wa mb wa-rŕ nà. 50Fú ddrǒngóli rà ngu ddì ní, cha nzǐ fú nokpa nì ddey nì ddu ó, ndèymí nzá à tsì nì sâ ó. 51Àmí ddrǒngóli rà à pwo ngéy-ngéy ndèymí à rà à dhò ddìkàddì nì nzadha bbu gbè lò-shúwdha-djá dhí níchú. Fulè ndrǔ rà dzz̀ ì kuw kádha nà.”
Chwazi Kounye ya:
Matayo 24: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved