Matayo 2
2
Lùlú mí nyǔꞌwiy-djá rà tdè Yesu njà
1Yesu ka gòw tdè Betelehemu mí ddrǒngó ní bba ó, cha ndèy nì Yuddeya mí ngòw ó nì. Fú nga nà, ddrǒngó ní Herodde#2:1 Herodde. Fú lò hó dhò nja, Klǒw ní lò ndèy tey nà. tdè Pey. Yesu ka gòw tdè ddiy-dzzdjú, lùlú mí nyǔꞌwiy-djá kâ shì Yerusalemu mí ddrǒngó ní bba ò, itsś shi nì mí nga là djúddù. 2Ndrǔ kâ dhîy, “Ndèy ka gòw Yahuddi-ddúw dhí pey ní nì li ní ŋangá? Mà njà àmí lùlú shì itsś shi nì mí nga là djúddù ndèymí mà rà, ndaní mà kwǒ mà tdyòw-tey à dhò.”
3Herodde rr̀ tdè í ddiy ro, à ónga tdò ndèymí Yerusalemu ó bbalè nà wá. 4À îy tdè Ddrǎ-ngá dyǎ-djá djú kpa wá ddìngaó ndèymí Musa-ngá yǎdha mí li-gwíydha-djá nà ndèymí à dhîy ndrǔ, “Ka rá Masiya gòw ŋangá?” 5Ndrǔ ngù lò, “Betelehemu mí ddrǒngó ní bba ó, Yuddeya mí ngòw ó nì. Mà tsì í ddiy, ddiydhò í nì nabi ndîy tdè nì lò,
6“ ‘Chú nyì, Betelehemu ó bbalè, Yudda mí ngòw ó nì,
nyì dhí ddrǒngó ní bba ɦuwdjò nì ngǎ drá Yudda mí ngòw ó,
ddiydhò nyìdhí ddrǒngó ní bba óddù li-djùkpa ddàdha-dja rà shì,
cha ndèy rà màtsá bbalè Israeli djú nga njà, gbè towmbù rónga pbòdha-dja níchú.’#2:6 Mika 5:2.”
7Pey Herodde kâ lùlú mí nyǔꞌwiy-djá iy rùdha ní nga ò ndèymí à dhîy ndrǔ déy ní sâ cha lùlú shì tdè mî. 8À chô ndrǔ Betelehemu ò ndèymí à tdrà ndrǔ dhò, “Nyì ra ndèymí nyì měy fú ngba lǎní. Ya nyì chùw à ro, nyì dho ma dhò, ndaní ma ddí rǎ ma tdyòw-tey kwò à nyú djú.”
9Ndrǔ rr̀ tdè pey tdrà nì lò ddiy-dzzdjú, ndrǔ rà ìdhí tùw nà. Ndrǔ njà tdè cha ndèy shì itsś shi nì mí nga là djúddù nì lùlú rà ndrǔ nyú djú, pbǔw à rà dèy cha fú ngba tdè mí nga djú. 10Ndrǔ njà tdè lùlú ro, hwî njèy ndrǔ dà ní dà nga djòluw. 11Ndrǔ tsùw dzá ro, ndrǔ njà ngba yânì Mariya nà ndèymí ndrǔ kâ ì tdyòw-tey kwò à nyú djú ndèymí ndrǔ bbû à dhò ddrǒngó-ní-nga. Ndrǔ ddâ ìdhí léydha ní ddiy, ndèymí ndrǔ bbû bbudha ní, ngbú ní órr̀, rř ndèy dzz̀ nà nì ddǒkí ndèymí rř ndèy dzz̀ nà nì chì.
12Fú ddiy-dzzdjú Ddrà ddù ndrǔ nyú nyu òluw nzǐ ndrǔ ngú Herodde dè. Ndrǔ ngû ìdhí bbà, njàddí tuw nà.
Yesu màgò ndèymí gôw-djá nà kòw Misiri ò
13Lùlú mí nyǔꞌwiy-djá rà tdè ro, Ddrǒngóli ngá malayika kâ shì Yusufu dè nyu òluw. À kâ tdrà, “Ngbí nyi ru, tdúw ngba màgò yânì nà ndèymí ra nyì rù Misiri mí ngòw ò. Déy fulè pbǔw ma rà tdrà nyì dhò, ddiydhò Herodde nì rǎ fú gba mèy, ndaní ndèy hwǐ.” 14Fú kúw nà Yusufu ngbîy ndèy ru, à tdûw ngba màgò yânì nà, ndrǔ kâ rà Misiri ò. 15Ndrǔ dêy fulè pbǔw Herodde dhì ddiy ò. Fú tuw nà, Ddrǒngóli tdrà tdè nabi tsò ró nì lò njèy ndèy dìchú, “Ma îy màtsá ddùwnì à ngú Misiri óddù.”#2:15 Hoseya 11:1.
Ka hwì tdè Betelehemu ó kpa-ní-nzòw
16Herodde tsì tdè cha lùlú mí nyǔꞌwiy-djá tsâ ndèy ónga ro, thǒw lòw à. À jà ka hwǐ Betelehemu mí ddrǒngó ní bba ó kpa-ní-nzòw wá ndèymí ì nì fú nga gitéy nì nà. Ka hwǐ cha ìdhí cho nì rwo ndèymí děy nzá ìdhí cho shì rwo nì nà. Í ddiy njèy tdè ndèy cha à chùw tdè nyǔꞌwiy-djá dèddù nì ddu cha lùlú shì ndanà nì. 17Í tuw nà nabi Yeremiya tdrà tdè nì lò njèy ndèy dìchú,
18“Li-chuw rò rr̀ ndèy Rama mí ddrǒngó ní bba ò,
dzz̀ ndèymí ddrǒngó ní zòw nà.
Rakeli nì nděyngá nzòw dzž
ndèymí à gù ndèy thíy ka djów ddiy,
ddiydhò ndrǔ dhì ŋà.”#2:18 Yeremiya 31:15.
Yusufu, Mariya ndèymí Yesu mà rà tdè Nazareti ò
19Herodde dhì tdè ddiy-dzzdjú, Ddrǒngóli ngá malayika dhò ndèy nyu òluw Yusufu dhò Misiri mí ngòw ò. 20Malayika kâ tdrà Yusufu dhò, “Ngbí nyi ru, tdúw í ngba màgò yânì nà, nyì rǎ Israeli mí ngòw ò, ddiydhò cha í tdè ddey í hwǐ à nì ndrǔ dhì ŋà.”
21Yusufu ngbî ndèy ru, à tdûw ngba màgò yânì nà ka ngu ndrǔ nà Israeli ò. 22Chú à rr̀ tdè Arkelawu nyù pey Yuddeya mí ngòw ó djǎnì Herodde rr̀dja ó ro, à tdè nyí nà ngúdha nà fulè. Ka dhò tdè à dho lò nyu òluw ro, ndrǔ kâ rà Galilaya mí ngòw ò. 23Ndrǔ shì Galilaya ò ro, ndrǔ rà dey Nazareti mí ddrǒngó ní bba ò. Í tuw nà, cha nabi-kpà tdrà tdè Yesu ró nì lò shì dìchú, “Ka rà à iy Nazareti-ddùw ní.”
Chwazi Kounye ya:
Matayo 2: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved