Njíkpà 2
2
Bblǒ Thíy shì Yesu kodjú kpa djò ddiy
1Pentekote#2:1Pentekote. Pentekote nì ddrǒngó ní madha mí ddu, ddu drì-drí nga mbu li djòluw dàdha mí ddu dzzdjú (Yesu mí dhi dzzdjú). mí madha mí ddu ó, cha ì ùw Kristo nì bbalè wá tdè ddìngaó. 2Fú nga nà, ddiy chuw rò shì ru rakpa óddù gbè rí ní viy níchú! Fú ddiy kì věy cha Yesu kodjú kpa njûw tdè i ǒmá nì dza ó. 3Ndrǔ njà tdè kàss dà níchú nì ddiy ndò ndèy ka dòw wánì bbalè djòluw. 4Bblǒ Thíy bbû kpa dhò klôw, fú ddiy lêy ndrǔ lòw dey ngéy-ngéy ní lò-tsò tdrǎ cha Bblǒ Thíy bbû ì dhò níchú.
5Fú nga nà, Yahuddi-ddúw ì tdè Ddrà dò njěy nì, cha ì shì ngéy-ngéy ní drò-dró ní bba óddù nì tdè dey Yerusalemu ó. 6Ndrǔ rr̀ tdè í ddiy chuw ro, bíyní ndrǔ njûw ì ddìngaó. Chú, ndrǔ ónga ꞌwìy wá ddiydhò ndrǔ dêy lò rř ndrǔ nì tdrǎ ìdhí déy ní lò-tsò nà cha ì shì mí nga óddù nì.
7Ndrǔ ónga ꞌwìy ddiy nà, ndrǔ dhîy, “Í kpa wá cha ì nì í lò těy nì shí ná ngǎ Galilaya óddù? 8Ddudhò mà ní ndrǔ nì tdrǎ nì lò rř màdhí lò-tsò nà? 9Mà kàó njàddí ndrǔ shì Partiya óddù, njàddí ndrǔ Midiya óddù ndèymí Elam nà. Njàddí ndrǔ nì Mesopotamiya óddù, Yuddeya, Kapadokiya, Pontiyo ndèymí Aziya nà. 10Njàddí ndrǔ rò shì Furujiya óddù ndèymí Pamfuliya, Misiri ndèymí ngéy ní ngòw gitèy Libiya ó nì cha ndèy nì chow Kurene nà nì óddù, Roma óddù nì lu, 11Yahuddi-ddúw ndèymí ngǎ Yahuddi-ddúw cha ì uw tdè Yahuddi-ddúw dhí ddǐnì nì kpa nà, Krete ó kpa ndèymí Arabiya ó kpa mà rr̀ ndrǔ nì lò těy ìdhí bba ó lò-tsò nà cha Ddrà njèy nì ddùw dhò!” 12Ndrǔ ónga ꞌwìy wá ì ónga nì tdǒ ddiy nà, kpa dêy ì dhiy ì kàòluw: “Í ddiy mí lò-tey ní ddu tdrǎ?” 13Chú, njaddí ndrǔ děy kpa njǎ gbè ngǎ nì ddiy níchú. “Ndrǔ dêy tdrǎ tdè fú kpa rr̀ wa nà.”#2:13 Ǐngí ddǔw-ddǔw ní wa.
Petro tèy lò bbalè dhò Pentekote mí ddu ó ddiy
14Petro ngbîy ndèy ru ddìngaó dri ndèy djú ddì na nì kpa nà ro, à kâ lò tdrà rí ní ndèy chuw nà bíyní bbalè kpa dho, “Màdhí ngá Yahuddi-ddúw ndèymí cha ney ì nì Yerusalemu ó ndrǔ nà wá, nyì rr̀ cha manì tdrǎ nì lò. 15Í bbalè rr̀ nzá rr̀dha ní gbè njàddí ndrǔ nì ddey níchú. Nga nì děy sâ gbow bbǔw-bbúw nga mî! 16Chú, í nì cha nabi Yowel tdrà tdè nì lò,
17“ ‘Ddrà kâ tdrà tdè, luwtéy ddu ó,
Ma rà màtsá Bblǒ Thíy ddù wánì bbalè djò.
Ddúw nyí ndèymí dhá nyí rà lò dhò,
nyìdhí kpa-ní-nzòw rà ddùw njà,
nyìdhí drò-dró ní kpa rà nyu nyù.
18Fú ddu ó, ma rà màtsá Bblǒ Thíy bbuw màtsá nokpa ní kpa ndèymí
noyi ní dhì dhò,
ndrǔ rà ndanà lò tdrà cha ndèy rà shì nì lò djò.
19Ma rà ddùw njèy ru rakpa ó,
ndèymí dziylíy djú ɦiy ró
jǔw, kàss ndèymí kwo mí nduw-nduw nà.
20Itsś rà ndèy li ków
bǐy rà ndèy li ngbú jǔw níchú
fú ddiy rà ndèy njèy wá děy nzá Ddrǒngóli ngá lò-tdèydha mí ddu shì ní.
21Chú, cha ndèy rà
Ddrǒngóli ró dho iy nì li rà pa.’#2:21 Yowel 2:28-32.
22“Israeli ó kpa, nyì rr̀ í lò! Nazareti mí bba ó Yesu tdè cha Ddrà chô nyì dhò ddùw, wá li ónga ꞌwíy dhǒ mànì ddiy ndèymí ɦiy nà cha Ddrà njèy nyì kàó à dè nì nga-là-djòluw, cha nyì tsì níchú. Njanja fú ddiy nì dìchú, 23í kpatss̀ Ddrà bbûw tdè nyì dè lò-tey nà ndèymí Ddrà mí lò-tsìdha nà, nyì ì jì ngǎjìní bbalè nà nyì hwì à, à chódha nà musalabba djú. 24Chú, Ddrà ngù fú li djiy ní dhi óddù, à klô à dhi mí nzadha óddù, ddiydhò ddiy kà tdè nzá dhi déy klôw nà à djú. 25Ndruní Pey Dawuddi ndîy cha Masiya tdrà tdè nì ddiy,
“ ‘Ma njà Ddrǒngóli wánì nga nà ma nyú djú.
Ddiydhò, à nì ma dhokpa ví òluw nì djòluw,
ma rónga rà bbìy nzǐ.
26Fú ddiy dhò, ma thíy nì hwî nà, ma dà nì nyi ma,
ma rónga ddi rà dey cha ndèy nì ddey ddiy nà,
27ddiydhò nyi rà ma bbà nzǐ tdôw-dzìy ò,
ǐngí nyi rà nyìmí Thí ní Li bbà nzǐ à ŋwǒ.
28Nyi lêy djiy ní déydha mí tuw tsì ndèy ma dhò.
Nyi rà ley ma rà kì hwî nà nyi nyú djú.’#2:28 Ngwo-kpà 16:8-11.
29“Mà-djú, ma kà ma tdrǎ nyì dhò ma jùw klǒw ní nà, màdhí bbuw Dawuddi dhì, ka tdòw tdè, àmí tdôw-dzìy nì mà kàó pbǔw ndu. 30Dawuddi tdè nabi ddiydhò ndèymí à tsì tdè Ddrà tdèy ndèy dhò nga wádha nà, Ddrà rà nděyngá ddèy rò tduw ddì à rà Pey nyù ndèy rìydja ó. 31Dawuddi, cha ndèy njà tdè Ddrà nì rǎ njèy njitsò djò nì ddiy nì li, fú ddiy lêy à tdrà Masiya#2:31 Njàddí mí lò-tey nì Mesiya. “Kristo” Griki ndèymí “Masiya” (Ebreniya) rwo túw mí lò-tey nì “Vìydha ní li” verse 25 ó ddí. rà ngu djiy ní ddiy ndèymí nyi rà nyìmí Thí ní li bbà nzǐ à ŋwǒ tdôw-dzìy ò. 32Ddrà ngbîy í Yesu dhi óddù djiy ò, mànì fú lò ì tsì nì ndrǔ. 33Fú ddiy dhò, Ddrà tdûw Yesu ndèy dhokpa ví òluw nì djò ru rakpa ò, à chùw Bblǒ Thíy Djǎnì dèddù cha à tdèy tdè nì, à ddùw fú ddiy cha nyì nì njǎ ndèymí cha nyì nì rr̀ níchú. 34Dawuddi djèy nzá rakpa ò, chú à kâ tdrà,
“ ‘Ddrǒngóli Ddrà tdrà, màtsá Ddrǒngóli dhò,
“Dow ingá ví djú nì ma dhokpa djòluw,
35pbǔw cha ma rà nyìmí ndrò-djá ley
nyi ko-ss̀téy tsúw-djùw ní.” ’#2:35 Ngwo-kpà 110:1.
36“Fú ddiy dhò, bba Israeli mí pbúw wánì tsǐ, Ddrà lêy Yesu, cha nyì chô tdè musalabba djú nì Ddrǒngóli ndèymí Masiya ní.”
37Bbalè rr̀ fú lò ro, zòw-lòw ndrǔ, Petro ndèymí njàddí Yesu ngá dyòw-djá kâ tdrà, “Mà-djú cha ì ùw Kristo nì, à kà ná mà njěy ddu?”
38Petro ngù lò, “Nyì lí nyì-dhà rónga, nyìdhí cherr óddù, nyì low bàtízò, bbalè wá Yesu Kristo ró dho nà nyìdhí cherr sàdha dhò. Nyì rà Bblǒ Thíy ko Ddrà dèddù. 39Í lò-tdèydha nì nyì dhò ndèymí nyì ó ddèy nà ndèymí ngéy ní bbalè nà wá cha ì uw nyi nì nà ndèymí wá cha Ddrǒngóli Ddrà rà iy nì ndrǔ nà.”
40Chú, à dhò ndèy bíyní ngéy ní tuw òluw, à chêy ndrǔ, à dêy tdrǎ, “Nyì ùw Ddrà pá nyì, ndaní nzǐ à dhěy nyì ddìngaó ì nì ngǎjìní ddiy njěy nì ndrǔ nà.” 41Cha ì uw àmí lò nì ndrǔ dhò ka bbû bàtízò. Bbalè chow-chow lówfù gbow nì ndrr̂ ndrǔ kíyddà. 42Ndrǔ dêy sǔw cha dyòw-djá dhí li-tsò njúwdha ndèymí li-gwíydha nà, ì chèy tdè ì jùw ddì ddiy nà, mùkátì ónga pbrr̀-dha nà ndèymí Ddrà nzz̀dha nà ddí.
Cha ì ùw Kristo nì ndrǔdhí déydha jì
43Dyòw-djá njèy ddùw ndèymí ddrǒngó ní ɦiy nà, fú ddiy lêy do lòw wánì bbalè. 44Cha ì ùw Kristo nì ndrǔ wá tdè ddìngaó ro, ndrǔdhí ddiy wá ddí tdè tsònì njúwdha ní. 45Njàddí ndrǔ dzẑ ìdhí dziylíy ónga ndèymí ì tdè ndanà nì ddiy nà, ndrǔ ndò bbalè wánì dho cha ì ró ddiy mí zòw tdè nì. 46Ddu wánì ró ndrǔ dêy ì njuw ddìngaó Ddrà dzz̀dha dhò Yahuddi-ddúw dhí Ddrà nzz̀dha mí thí ní nga ó, pbrr̀dha ní mùkátì nà ìdhí bba òluw, ndrǔ dêy mí nyû kwo hwî nà, ì jùw dèy ddì ddiy nà, 47Ddrà mádha nà. Ndrǔ chùw lǎní ddiy bbalè wánì nyú djú. Ddrǒngóli dêy cha ì nì pa nì ndrǔ kíyddà ndrr ndey ndrǔ dhò wánì ddu ró.
Chwazi Kounye ya:
Njíkpà 2: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved