Njíkpà 1
1
Yesu ka tdûw ru rakpa ò ddiy
1Ddrǒngóli Tewufilo, màtsá njitsò djú nì bǔkù ó, ma ndîy tdè nì ddiy nì cha Yesu lòw dey njèy tdè nì ddiy wá ndèymí à dêy gwiy nì lò-tsò ngà ndèymí nga djúddù nì, 2kpòw ka tdûw à ru rakpa ò mí ddu ò, à bbû fú yǎdha-kpà Bblǒ Thíy tùw òluw dyòw-djá dhò cha ndèy vû tdè ndrǔ ddiy-dzzdjú. 3À nzâ tdè ndèy musalabba djú ddiy-dzzdjú, à dhò ndèy djiy ní ndèy kodjú kpa dhò ddu drì-drí nga tho nì dhò ndèymí à kâ lò tdrà ndrǔ dhò Ddrà mí pey-mí-nga djò. 4Ddì ní à njûw ndèy kpa nà ro, à kâ tdrà kpa dhò, nzǐ nyì ddá nyì Yerusalemu óddù, chú nyì pbǒ mà-dja tdèy nyì dho nì lò cha nyì rr̀ ma tdè tdrǎ nyì dho níchú. 5Yohana bbû tdè bàtízò dda nà, chú drání ddu ó nyì rà bàtízò lòw Bblǒ Thíy nà.
6Ndrǔ njûw tdè ì ddìngaó ro, kpa kâ dhiy à tsò ró, “Ddrǒngóli, ddiy ná fú nga nà, nyi ní rǎ Israeli mí pey-mí-nga ngù?” 7Yesu kâ lò ngù kpa dhò, nyì kà nzá nyì tsǐ fú sâ ǐngí fú ddu cha Ddrà thì ndèymí klôw nà nì. 8Chú nyì rà klôw chùw Bblǒ Thíy rà shì nyì djò ro, fú nga nà nyì rà tdè à djò ì nì lò těy nì kpa ní Yerusalemu ó, Yuddeya ónga chú dzò, Samariya ó ndèymí kpòw dziylíy tsò tdôw mí nga ò. 9Fú ddiy Yesu tdrà tdè ro, Ddrà kâ à tduw ru rakpa ò. Kpa tdè à njǎ ro, nduw-nduw kâ à rónga tsò tà kpa nyú djúddù. 10Kpa tdè nga njǎ chǒw ru rakpa dè cha Yesu tdè rǎ ro, fú nga nà rwo nì kpa ì thô ì ró sárŕ ní rù nì kâ shì ndrǔ dè. 11Kpa kàó ddì li kâ tdrà ndrǔ dhò, “Galilaya mí dziylíy ó bbalè, ddudhò nyì děy ingá, nyì nì nga njǎ rakpa dè ní? Í Yesu, cha Ddrà tduw rakpa ò nyì kà-óddù nì rà ngu dziylíy djò ddí fǔchú cha nyì njà à nì rǎ níchú.”
Matiya ka vû Yudda Iskariyota rìdja ó
12Yesu kodjú kpa kâ ngu Yerusalemu ò, Òlívè tsúw mí ngòw djúddù cha ndèy tdè Yerusalemu kuwtsó ddù chow-chow kìlómìtà ddì nì mí bbiydha ní cha Yahuddi dhí yǎdha uw sabato mí ddu ó nì. 13Ndrǔ shì tdè ro, kpa djî njàddí dza djú ka ss̀ nì dza ò, cha ndrǔ dêy dey ǒmá nì ó, fú dza ó tdè Petro, Yohana, Yakobbo, Anderiya, Filipo, Tomasi, Batolomayo, Matayo, Yakobbo Alifayo mí ddùwnì, Simoni, Zelote#1:13 Zelote. I tdè jǐ Israeli mí nzòw déy ngádha ní kpa. mí bbalè kàó li, ndèymí Yudda, Yakobbo mí ddùwnì. 14Ndrǔ dêy ì tsò njuw wánì nga nà ddìngaó Ddrà nzz̀dha dho ì jùw ddì nì nà. Dhì ní ndrǔ, Mariya Yesu mí yânì ndèymí Yesu mí djúní mànà.
15Drá ní ddu dzzdjú, mà-djú cha ì ùw Kristo nì, 120 nì njûw tdè ì ddìngaó ro, Petro kâ ndèy ngbi ndrǔ kàó, 16“Ma-djú cha ì ùw Kristo nì, lǎnínga ní, Ddrǎ-ngá ndíydha-ní-lò à jì à njěy ndèy cha Bblǒ Thíy tdrà tdè Dawuddi kuw òluw níchú Yudda ró dho nà cha à bbû tdè ndanà Yesu àmí ndrò-djá dhokpa ó nì lò, njanja à njèy ndèy dìchú. 17À tdè mà kàó ddì li, à njèy njí ddí mà kàó.” 18Yudda dzz̀ dziylíy ka bbûw ndèy dhò ngǎjìní ddiy njèydha mí mb nà. À chèy dziylíy djò, à ónga kpà ndèy kpǔ, à zz̀ nyà ndèy kpa wá rúgò. 19Yerusalemu ó bbalè wánì rr̀ í ddiy ro, ndrǔ îy fú nga ìdhí lò-tsò nà Akeldama ní, mí lò-tey nì, Jǔw mí nza.
20Fú ddiy dhò, Petro kâ tdrà, “Ngo mí bǔkù ó à ndîy ndèy ǐchú,
“ ‘Bba í dza ónga,
nzǐ léy li rò déy fulè dzá.’#1:20 Ngwo-kpà 69:25.
Ndèymí,
‘Nyì léy ngéy ní li njěy fú li rìydja ó njí.’#1:20 Ngwo-kpà 109:8.”
21“Fú ddiy dhò, à jì mà vú ddì li cha ndèy tdè mà nà wánì nga nà cha Ddrǒngóli Yesu tdè mà nà ndèymí cha à tdè bbiy rúgò mà kàòluw ro, 22à nga ndèy cha Yohana bbûw à dhò bàtízò mí nga djúddù, pbǔw ka tdûw à ru rakpa ò mí nga djòmà róddù. Fú ddiy dhò ddì li kà à ngú ndèy tsì fú lò ró lò nì li ní mà nà àmí ngúdha djiy ní dhi óddù mî.”
23Ndrǔ bbû bbalè rwo nì ró dho: Ddì li tdè Yusufu cha ka îy tdè ddí Barsaba ní, dja-nì ró dho tdè Yusto, ndèymí Matiya nà. 24Ndrǔ wá kâ Ddrà nzz̀ yà ì nì tdrǎ ǐchú! “Ddrǒngóli, nyi njà bbalè thíy ónga wá, dho mà dhò cha nyi vû nì li í bbalè rwo nì kàó ddù, 25ndaní à njěy cha dyòw-djá rà njěy nì njí Yudda bbà nì, à rà cha ndèy jì mí nga ò nì.” 26Ndrǔ bû dyǎ, dyǎ chèy Matiya djú, ka ndrr̂ à dri ndèy djú ddì nì dyòw-djá kíyddà ní.
Chwazi Kounye ya:
Njíkpà 1: NDRULO
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© Wycliffe Bible Translators, Inc., © SIL Uganda, All rights reserved