Jang 7
7
Brah Jê-sus tu poh Jê-ru-sa-lem. – Ryơơng Naam Buônh
1A kơơi pal kaar nei, Brah Jê-sus han knông kwaal Ga-li-lê; Pang 'bưn êch han knông kwaal Ju-đê đươm bnih Jo-thai wơng lưm Pang. 2Ryơơng Naam Buôn raih Jo-thai ri ja lôh dơơh. 3Đươm bei nei, bơl oh Brah Jê-sus ri mor n'hai Pang laah: “Bi phrui lơơi ktôk au u han rlach kwaal Ju-đê jah bơl jơrnơ bi ri kươt sau kaar bi lơh, 4đươm 'bưn 'bơơn êch kươt jôm bnih gưt tơt baah leet lơh kaar a ruk. Mơq bi lơh pal kaar au nei phrui tơrsau chhak nơơm aan swich teh gưt haanh.” 5Leq dơng bơl oh Pang kot 'bưn jơ Pang. 6Brah Jê-sus mor n'hai bu: “Jơl bêl bi ri ndah tơt, dôh jơl bêl bơl oh ri nei geh ơơm yoot. 7Swich teh 'bưn geh a kiêr bơl oh dôh a kiêr bi, đươm bi ja ndraanh aan swich teh gưt laah kaar bu ri laa ap than. 8Bơl oh phrui han joq ryơơng, nha bi 'bưn hao#7:8 'bưn hao: Knông m'baak plơơp 'bian ti laa ndah hao. joq ryơơng au đươm bêl bi ri ndah sơp.” 9Ja mor, Pang khang gôq lơơi kwaal Ga-li-lê.
10Dôh di kơơi bơl oh Pang ja hao joq ryơơng hôm nei Pang kot hao, dôh troong han a ruk đươm 'bưn srlah srlom. 11Bơl bnih Jo-thai wơng Pang knông jơl ryơơng, u mor: “Bu nei a êch?” 12Geh ơk baak wưu wao teq u Pang klung phung bơl. Bnih nei mor: “Bu nei laa bnih klanh;” bnih nday dơq leet mor: “'Bưn, bu nei laa bnih lhiat phung raih.” 13Dôh đươm n'hông bnih Jo-thai mơ 'bưn 'bơơn baanh mor teq u Pang srlah srlom.
Brah Jê-sus chhuôr kne knông nhi r'bưn
14U nggơl jơl ryơơng, Brah Jê-sus han hao nhi r'bưn u tti kne. 15Bơl bnih Jo-thai êêng aang đat mor laah: “Bnih au ndah ơơm riên, lơh bei êch leet gưt kươt Sm'bưt Brah?” 16Brah Jê-sus ơh: “Baak jơ Hei ri 'bưn êêng Hei ri, dôh Yaang ri ja maanh Hei lôh. 17Mơq 'bơơn dươn chưt lơh tênh rnđêch Brah Ưn ri nei a kươi gưt baak Hei kne lôh a Brah Ưn paich Hei mor êêng tênh rnđêch nơơm. 18Bnih êch mor êêng tênh rnđêch nơơm nei wơng chring chraang aan êêng nơơm, nha 'bơơn wơng chring chraang aan Yaang ja maanh bơn laa bnih ngan nguôn, knông bnih nei 'bưn geh ntil ơơn bn'ap. 19'Bưn geh Môi-se ja ươn ch'bap aan bơl 'bei laang? Dôh 'bưn mbu 'bơơn knông bơl 'bei lơh tênh ch'bap. A hay bơl 'bei leet wơng lưm Hei?” 20Phung raih ơh: “Ay dol chaak rup hơơi! Au geh 'bơơn wơng lưm ay laang?” 21Brah Jê-sus ơh: “Hei ja lơh di kaar pa leq sêch bơl 'bei êêng aang. 22Môi-se ja tơmbơh ch'bap kat pêêk aan bơl 'bei (a ngan ch'bap nei 'bưn geh đươm Môi-se pa đươm bơl yau yi), u bơl 'bei kat pêêk aan bnih klau knông nar sa-'bat. 23Mơq bnih klau phrui dol kat pêêk knông nar sa-'bat jah khơơm tih ch'bap Môi-se nei a hay bơl 'bei leet hao nuih tơt Hei tơmbah leq chhak jan aan mbu bnih knông nar sa-'bat?#Ja 5:9. 24Khơơm pơrkat tênh a gaaih, dôh phrui pơrkat tênh baak sêch song.”
Baak ta poich Jo-thai ri teq u Brah Jê-sus
25Geh pal du raih poh Jê-ru-sa-lem mor laah: “Au 'bưn dip laa bnih pa bu nday wơng lưm laang? 26Mơq tôw, bu nei mor di ndroong srlah srlom pa bu 'bưn mor ơơn bu nei leq! Ach daq bơl bnih geh ch'bap kmheng ja a ngan gưt bu nei laa Yaang Krist? 27Dôh tơt Yaang Krist lôh nei 'bưn 'bơơn gưt Pang lôh a êch, nha bu au nei bơl bơn gưt bu lôh a êch.”
28Plah kne knông nhi r'bưn, Brah Jê-sus tơmbơh: “Bơl 'bei gưt Hei u kot gưt Hei lôh a êch! Hei 'bưn geh lôh êêng, dôh Yaang ja maanh Hei lôh laa ngan nguôn pa bơl 'bei 'bưn gưt Pang. 29Nha Hei nei gưt Pang đươm Hei lôh a Pang, u Pang laa Yaang ja maanh Hei.” 30Bei nei bu wơng ndroong nhôp Pang, dôh 'bưn 'bơơn puut ti lơ Pang kươt đươm bêl Pang ndah tơt. 31Dôh geh ơk bnih knông phung raih jơ Pang u mor laah: “Tơt Yaang Krist lôh, Pang a kươi lơh ơk chmlih chmleek huôih bnih au ja lơh 'bưn?”
Pơrgênh jmlôm nhôp Brah Jê-sus
32Bnih Pha-ri-si ttang pal ntil phung raih wưu wao teq u Brah Jê-sus mơ bu u bơl yau thwaai ndap ttơơm maanh bơl kaanh kaar kray nhi r'bưn han nhôp Pang. 33Đươm nei, Brah Jê-sus mor laah: “Hei nha gôq n'hai bơl 'bei di rbôông dơq, ja nei Hei plơq siq n'hai Yaang ja maanh Hei. 34Bơl 'bei a kươi wơng Hei dôh 'bưn a mơp; ktôk Hei gôq, bơl 'bei 'bưn geh han kươt.” 35Bơl bnih Jo-thai mor tơrnang nơơm: “Bnih au êch han đêch pa bơl bơn 'bưn wơng kươt? Geh lah bu nei êch lôh n'hai bơl raih trlêêng trlaih rêh klung bơl bnih Hi-lap u kne bnih Hi-lap pan?#7:35 rêh klung... u kne... pan? Paich laa rêh klung bơl bnih Hi-lap n'hai kne bnih Hi-lap pan? 36Bu nei geh rnđêch ơơn tơt mor: ‘Bơl 'bei a kươi wơng Hei dôh 'bưn a mơp,’ u ‘ktôk Hei gôq, bơl 'bei 'bưn geh han kươt?’”
37Nar ptut laa nar peh thlay đat knông jơl ryơơng, Brah Jê-sus ta yoong u tơmbơh laah: “Mơq bnih êch nh'hiêr, phrui lôh n'hai Hei baah ôn. 38Bnih êch jơ Hei nei pal troong daak glung baak rêh a kươi hooch rlaai a chưt nơơm, dip bei Sm'bưt Brah ja mor.”#7:37-38 “Mơq bnih êch... ja mor.”: Paich laa “Mơq 'bơơn na nh'hiêr, phrui lôh u Hei! Bnih êch jơ Hei, phrui ôn! Dip bei Sm'bưt Brah ja lah, ‘nei pal n'hooch daak baak rêh a kươi hooch rlaai a chưt nơơm bơn.’” 39Pang mor ntil au chong teq u Brah Wêêng pa bơl bnih jơ Pang a kươi kươt chơp; đươm Brah Wêêng ndah kjưr, đươm Brah Jê-sus ndah kươt tư wơơl.
40Tơt phung raih ttang pal baak au, m'baak bnih mor: “Au ngan laa di mbu grnưt noor.” 41M'baak nday mor: “Au laa Yaang Krist.” Dôh m'baak nday dơq leet mor: “Yaang Krist baah leet lôh a kwaal Ga-li-lê neh? 42'Bưn geh Sm'bưt Brah mor laah Yaang Krist lôh a mbaang Đa-wit u lôh a Bêt-lê-hem, laa poh Đa-wit ri laang?” 43Bei au, đươm Pang baah phung raih ta pơrlang khach. 44M'baak bnih knông phung raih êch nhôp Pang, dôh 'bưn 'bơơn puut ti lơ Pang.
45Đươm bei nei, bơl kaanh kaar kray nhi r'bưn plơq siq n'hai bơl yau thwaai ndap ttơơm u bnih Pha-ri-si. Bơl bnih au ôp bu: “A hay bơl bi 'bưn jưn bu nei siq u đau?” 46Bơl kaanh kaar au ơh: “Ndah khal êch geh bnih êch ja mor bei bnih au.” 47Bơl bnih Pha-ri-si mor n'hai bu: “Bơl bi kot dol lhiat laang? 48Geh 'bơơn knông nak bơl kan ttih paich bơl bnih Pha-ri-si jơ bu nei pan? 49Nha phung bơl raih au 'bưn gưt ch'bap ơơn ơơm, ngan dip jah dol pơđaai sa!” 50Ni-kô-đem, bnih noor n'au ja lôh n'hai Brah Jê-sus, laa di mbu bnih knông phung Pha-ri-si, mor n'hai bu:#Ja 3:1-2. 51“Ch'bap bơl bơn ri geh kaap dôih mbu bnih baah noor tôw ndah ttang baak krơơ u ndah gưt bnih nei lơh ơơn 'bưn?” 52Bu ơh: “Ay kot laa bnih Ga-li-lê ei? Ay phrui mơq sơglap nei a kươi sau laah 'bưn geh mbu grnưt noor êch lôh a kwaal Ga-li-lê laang.” 53[Ja nei jôm bnih kot plơq siq nhi nơơm.
Chwazi Kounye ya:
Jang 7: SBL2024
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2024 Bible Society Vietnam. All rights reserved.