Jang 6
6
Brah Jê-sus tu kwaal Ga-li-lê. – Brah tơ krik nom aan pram ban bnih sa
(Ma-thi-ơ 14:13-21; Mak 6:30-44; Lu-ka 9:10-17)
1Kơi nei, Brah Jê-sus han rlach kơh mak tôw daak rmưt Ga-li-lê, laa daak rmưt Ti-bê-ri-at. 2Di phung bnih ơk đat han tênh Pang, đươm bu ja sau pal chmlih chmleek Pang lơh aan bơl bnih pơrtanh. 3Brah Jê-sus hao bnơm u gôq a nei n'hai bơl jơrnơ. 4Plah nei, êch dơơh tơt ryơơng Chloong Rlach, laa nar ryơơng ttih raih Jo-thai ri. 5Brah Jê-sus nggơơr mat, sau di phung bnih ơk đat han tơt Pang, Pang mor n'hai Phi-lip: “Bơl bơn phrui pook nom a êch jah aan bơl bnih au sa?” 6Pang mor bei nei jah tuul Phi-lip đươm Pang ja gưt ntil nơơm a kươi lơh hơơi. 7Phi-lip ơh: “Baar riêng đơ-ni-ê#6:7 Mơq baak rơih gôq Mat 18:28. nom kot 'bưn sơp aan jôm bnih di ndêq.” 8Anh-rê, oh Si-môn Phi-e-rơ ri, di mbu knông bơl jơrnơ, ơh laah: 9“Geh di mbu drêên klau geh pram ơơk nom ba ra u baar plơơp pi ka, dôh ơk bnih bei au nei lơh bei êch baah sơp kươt?” 10Brah Jê-sus maanh: “Phrui tơmbơh aan jôm bnih gôq u teh.” Kơtôk au geh ơk tơơm deh. Bei nei phung raih gôq u teh, bnih kơơp kươt tơmlai pram ban du. 11Brah Jê-sus ơn nom, piyơ baak or, ja nei tacheq aan bơl bnih ja gôq, pi ka kot kươt tacheq bei nei, 'bơơn êch sa pal êch nei sa. 12Tơt bu ja sa hơơm, Pang maanh bơl jơrnơ: “Phrui sech prgom kơơi pal plơơp nom ngroh jah 'bưn dol saap ndêq pau ơơm.” 13Bei nei, bu sech prgom leq pal kơn hach pram ơơk nom ba ra ri pa bu nday sa nha ngroh, dơơm bêêng jmơt baar sah. 14Bơl bnih sau chmlih chmleek Brah Jê-sus ja lơh nei mor: “Au laa nơơm Yaang grnưt noor#6:14 Mơq baak rơih gôq 1:21. phrui lôh swich teh.” 15Brah Jê-sus gưt laah bu êch dơơh lôh nhôp 'bôôk Pang lơh snđach mơ het hao bnơm mbu êêng.
Brah Jê-sus han jơng lơ mat daak rmưt
(Ma-thi-ơ 14:22-33; Mak 6:45-52)
16Tơt mau jơ ngôw, bơl jơrnơ han sot daak rmưt, 17hao lơ mlơm duuk, han tơt mak tôw kơh, han r'bong poh Ka-bê-na-um. Trôôk u jơ ngôw, dôh Brah Jê-sus nha ơơm lôh u bu. 18Daak rmưt rpôh đươm chaal pơk kơndang. 19Tơt bu bla kươt tơmlai pram tơt prau ki-lô-met#6:19 S'bt: 25 paich laa 30 ếch-ta-đơ; di ếch-ta-đơ tơmlai 185m. nei sau Brah Jê-sus han lơ mat daak rmưt lôh dơơh duuk. Bu n'hông đat. 20Dôh Pang maanh laah: “Hei au, khơơm n'hông!” 21Bu êch wơơt Pang mưt u duuk nei duuk kơndaal tơt bơr, laa ktôk bu êch han.
Nom baak rêh
22Nar a ôi, phung raih gôq mak tôw kơh daak rmưt gưt laah a nei dơơn geh mlơm duuk, nei Brah Jê-sus 'bưn jưr duuk n'hai bơl jơrnơ, dơơn geh bơl jơrnơ han ei. 23Dôh geh pal ơơk duuk nday lôh a Ti-bê-ri-at bat dơơh ktôk bu ja sa nom di kươi Brah or.#6:23 di kươi Brah or: Knông m'baak plơơp 'bian ti 'bưn geh pal sêr au. 24Bei nei, tơt phung raih sau Brah Jê-sus 'bưn geh a nei, bơl jơrnơ Pang kot 'bưn, nei bu hao lơ duuk han tơt poh Ka-bê-na-um jah wơng Brah Jê-sus. 25Plah a mơp Pang a mak tôw kơh daak rmưt, bu ơh laah: “Ơi Yau, Yau han tơt au khal êch?” 26Brah Jê-sus ơh: “Ngan, Hei maanh bơl 'bei ngan, bơl 'bei wơng Hei 'bưn geh đươm ja sau pal chmlih chmleek, dôh đươm bơl 'bei ja kươt sa nom bơm hơơm. 27Khơơm lơh kaar đươm griêng sa luôch lêêk, baah đươm griêng sa nha nggan tơt baak rêh yoot yôw, lah griêng sa Koon Bnih a kươi ươn bơl 'bei; đươm nei laa Yaang pa Brah Ưn, lah Bươp, ja kơt kơwanh.” 28Bu ơh: “Bơl hei phrui lơh ơơn jah kươt lơh kaar Brah Ưn ri?” 29Brah Jê-sus ơh: “Kaar Brah Ưn ri laa bơl 'bei jơ Yaang baah Pang ja maanh lôh.” 30Bu mor nha: “Bei nei, Yau lơh chmlih chmleek ơơn jah bơl hei sau u jơ? Yau lơh kaar ơơn? 31Yau yi bơl bơn ja sa ma-na knông trenh sngat, bei baak ja 'bian: ‘Pang aan bu sa nom a trôôk.’” 32Brah Jê-sus ơh: “Ngan, Hei maanh bơl 'bei ngan, 'bưn geh Môi-se ja aan bơl 'bei nom a trôôk laang; dôh đươm Bươp Hei ja ươn bơl 'bei nom ngan a trôôk. 33Đươm nom Brah Ưn ri laa nom a trôôk, ươn baak rêh aan swich teh.” 34Bu mor: “Ơi Brah, dan ươn nom nei aan bơl hei nggan broih.” 35Brah Jê-sus ơh: “Hei laa nom baak rêh. 'Bơơn lôh n'hai Hei 'bưn geh nh'hit, 'bơơn jơ Hei 'bưn geh nh'hiêr. 36Dôh Hei ja mor n'hai bơl 'bei laah: Bơl 'bei ja sau Hei, kot 'bưn geh jơ. 37Leq sêch bơl bnih Bươp Hei ươn Hei kot lôh n'hai Hei; 'bơơn lôh n'hai Hei, Hei a kươi 'bưn teq sot a gaaih laang. 38Đươm Hei lôh a trôôk, 'bưn geh jah lơh tênh rnđêch Hei, baah lơh tênh rnđêch Yaang ja maanh Hei. 39Au laa rnđêch Yaang ja maanh Hei: Leq sêch bơl bnih Pang ja ươn Hei nei Hei a kươi 'bưn teq saap mbu 'bơơn, dôh Hei phrui lơh aan rêh kươi knông nar ptut. 40Đươm au laa rnđêch Bươp Hei ri: Leq sêch bơl 'bơơn sau Koon u jơ Koon nei kươt baak rêh yoot yôw, Hei a kươi lơh aan bnih nei rêh kươi knông nar ptut.”
41Dôh bơl bnih Jo-thai ta poich teq u Pang, đươm Pang mor: “Hei laa nom lôh a trôôk.” 42Bu mor: “'Bưn geh bnih au laa Jê-sus, koon Jô-sep ri laang? Mei bươp bu nei, bơl bơn gưt leq, a hay bei au bu nei leet mor: ‘Hei lôh a trôôk’?” 43Brah Jê-sus maanh bu: “Bơl 'bei khơơm wưu wao tơrnang nơơm hôm. 44Mơq Bươp, laa Yaang ja maanh Hei, 'bưn têêk tơt nei 'bưn 'bơơn awap lôh n'hai Hei, u Hei a kươi lơh aan bnih nei rêh kươi knông nar ptut. 45Pal sm'bưt grnưt noor geh 'bian: ‘Leq sêch a kươi kot kươt Brah Ưn kne.’ Paich 'bơơn ja iat u riên a ktôk Bươp nei lôh n'hai Hei. 46Ndah geh 'bơơn ja sau Bươp, dơơn Yaang lôh a Brah Ưn; Yaang nei ja sau Bươp. 47Ngan, Hei maanh bơl 'bei ngan, 'bơơn jơ nei kươt baak rêh yoot yôw. 48Hei laa nom baak rêh ri. 49Yau yi bơl 'bei ja sa ma-na knông trenh sngat hơơi kot chhưt. 50Au laa nom lôh a trôôk, jah 'bơơn sa nei 'bưn chhưt. 51Hei laa nom baak rêh lôh a trôôk; mơq 'bơơn sa nom au nei a kươi rêh yoot yôw. Nom pa Hei a kươi ươn đươm baak rêh swich teh ri nei laa pai Hei.”
52Bei nei, geh baak ta tau klung bơl bnih Jo-thai tơrnang nơơm. Bu mor: “Lơh bei êch bu nei awap pơih pai nơơm aan bơl bơn sa kươt?” 53Brah Jê-sus maanh bu: “Ngan, Hei maanh bơl 'bei ngan, mơq bơl 'bei 'bưn sa pai u ôn mhaam Koon Bnih nei 'bưn geh baak rêh yoot yôw knông bơl 'bei laang. 54'Bơơn sa pai u ôn mhaam Hei nei kươt baak rêh yoot yôw; Hei a kươi tak lơh bnih nei rêh kươi knông nar ptut. 55Đươm pai Hei ngan laa griêng sa, mhaam Hei ngan laa daak ôn. 56'Bơơn sa pai Hei u ôn mhaam Hei nei gôq knông Hei, u Hei gôq knông bnih nei. 57Bei Bươp rêh yoot ja maanh Hei, u Hei chkhôm Pang baah rêh bei êch nei bnih sa Hei a kươi kot chkhôm Hei baah rêh bei nei. 58Au laa nom lôh a trôôk, 'bưn bei nom yau yi bơl 'bei sa luôih hơơi chhưt; bnih êch sa nom au a kươi rêh yoot yôw.” 59Brah Jê-sus mor pal ntil au plah lap kne knông nhi pơrgum tu poh Ka-bê-na-um.
60Ơk jơrnơ Pang ri iat ntil au nei mor: “Baak au rngiêl đat, 'bơơn baah iat kươt?” 61Dôh Brah Jê-sus gưt êêng bơl jơrnơ plah wưu wao teq u ntil au mơ mor laah: “Ntil au lơh aan bơl 'bei trơnih 'bôw? 62Bei nei, mơq bei bơl 'bei sau Koon Bnih hao ktôk Pang ơơm a noor n'au nei laang? 63Đươm wêêng lơh aan rêh, pêêk pai 'bưn thlay ơơn. Pal ntil Hei mor n'hai bơl 'bei laa wêêng u baak rêh. 64Dôh geh pal du knông bơl 'bei 'bưn jơ.” Đươm kơndaal a daak bôôk, Brah Jê-sus ja gưt 'bơơn lah bơl bnih 'bưn jơ u 'bơơn laa bah ndun Pang. 65Pang mor nha: “Đươm bei nei, Hei ja maanh bơl 'bei laah mơq Bươp 'bưn ươn nei awap 'bưn 'bơơn lôh n'hai Hei kươt.”
Tơmbơh baak chôôl Phi-e-rơ ri
66A plah nei, ơk bơl jơrnơ rônh kơơi, 'bưn tênh Pang hôm. 67Brah Jê-sus mor n'hai jmơt baar du jơrnơ: “Nha bơl 'bei kot êch rônh kơơi pan?” 68Si-môn Phi-e-rơ ơh: “Ơi Brah, bơl hei a kươi tênh 'bơơn? Brah geh baak rêh ri yoot yôw. 69Bơl hei ja jơ u grnưt laah Brah laa Yaang Jrah Brah Ưn ri.”#Mat 16:16; Mak 8:29; Lu 9:20. 70Brah Jê-sus ơh: “'Bưn geh Hei ja sach bơl 'bei lah jmơt baar jơt jơng laang? Nei baah di mbu knông bơl 'bei laa Chaak!” 71Pang mor teq u Ju-đa, koon Si-môn Ich-ka-ri-ôt ri, laa di mbu knông jmơt baar jơrnơ; nơơm bnih au u kươi ndun Pang.
Chwazi Kounye ya:
Jang 6: SBL2024
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2024 Bible Society Vietnam. All rights reserved.