I Kô-rinh-tô 8
8
Baak kaar kwaai pơsun ri
1A troop tơt baak kaar griêng kwaai pơsun ri, bơl bơn gưt laah “leq sêch bơl bơn kot gưt jhai leq.” Dôh baak gưt jhai lôh n'hih nhjơơl, nha baak srlanh nei ta ldơk. 2Mơq geh 'bơơn kơn ơơn laah nơơm gưt ntil ơơn nei bnih nei ndah a ngan gưt bei chkhôm phrui gưt. 3Dôh mơq 'bơơn êch srlanh Brah Ưn nei Pang gưt bnih nei. 4Bei nei, teq u baak kaar griêng kwaai pơsun ri, bơl bơn gưt pơsun knông swich teh 'bưn a ngan baak mbeet mbei, dơơn geh mbu Brah Ưn 'bưn geh wêêng ơơn nday. 5Paich bu nday aan laah geh pal wêêng a lơ trôôk paich a teh — bu jơ geh ơk “wêêng”, ơk “brah” — 6dôh n'hai bơl bơn nei dơơn geh mbu Brah Ưn laa Bươp, Yaang tơmbut mrơk 'bơk chhư, u bơl bơn rêh đươm Pang; kot dơơn geh mbu Brah laa Brah Jê-sus Krist, mrơk 'bơk chhư chkhôm Pang baah geh, bơl bơn kot chkhôm Pang baah mbeet mbei.
7Dôh 'bưn geh jôm bnih kot geh baak gưt jhai au. M'baak bnih đươm rnđơơih ir n'hai pơsun mơ tơt sa kwaai nei, nei mơq bei ja a ngan baak kwaai aan pơsun, u chưt nuih lhok lhơơi bu ri jrơơk jrơơm. 8Griêng sa 'bưn lơh aan bơl bơn dơơh Brah Ưn huôih; mơq 'bưn sa kot 'bưn ap, mơq sa kot 'bưn klanh huôih. 9Dôh phrui njrang, daq kmheng snôk sroong oh bi ri rook baak aan bnih lhok lhơơi a kơq. 10Mơq mbu bnih geh chưt nuih lhok lhơơi sau day, laa bnih gưt jhai, gôq sa knông ktôk kwaai pơsun nei 'bưn geh bnih nei kươt trôih trôl maanh sa griêng kwaai pơsun laang? 11Bei nei baak gưt jhai day ri ja lơh khuich saap bnih lhok lhơơi nei, laa bnih oh bi pa Yaang Krist ja chhưt gơl. 12Bei nei, tơt geh dôih teq u oh bi, lơh khuich chưt nuih lhok lhơơi bu ri laa day ja lơh dôih n'hai Yaang Krist. 13Nei mơ, mơq griêng sa lơh aan oh bi trơnih, nei hei a kươi 'bưn khal êch sa pai, jah khơơm root trơnih aan oh bi hei.
Chwazi Kounye ya:
I Kô-rinh-tô 8: SBL2024
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2024 Bible Society Vietnam. All rights reserved.