I Kô-rinh-tô 7
7
III. Ơh pal baak kaar bnih Kô-rinh-tô ri
(7:1 – 11:1)
Baak kaar ta sai
1Nha teq u pal baak kaar oh bi ja 'bian knông khaak bei “klau 'bưn pơih sai ur laa ntil klanh.” 2Dôh jah het klap jat jrôq jrơm, jôm bnih klau phrui geh sai ur, jôm bnih dơur phrui geh sai klau. 3Sai klau phrui lơh sơp kơrnan kaar teq u sai ur, n'hai sai ur teq u sai klau kot bei nei. 4Sai ur 'bưn geh ch'bap lơ chhak jan nơơm, dôh lah sai klau; sai klau kot 'bưn geh ch'bap lơ chhak jan nơơm, dôh laa sai ur. 5Khơơm ta dmôw, khal êch baar bôh ta aan ch'bap rbaq rbôông, jah krah êêng jơl bêl r'bon dan, dôh kươi nei ta plơq kươi n'hai, daq Sa-tan lap mưt lwah oh bi 'bưn prơng baah lêch lung oh bi pan. 6Ntil hei mor au laa baak kơnjur đươm 'bưn geh laa rmaanh. 7Hei êch jôm bnih kươt bei hei. Dôh jôm bnih kươt Brah Ưn ươn baak smlaang êêng; bah baak smlaang au, ơp baak smlaang nday. 8Hei mor u bơl bnih nha chhak soh n'hai bơl pndrau laah, mơq gôq kươt bei hei nei klanh. 9Dôh mơq bu 'bưn geh prơng kươt nei phrui geh sai, đươm n'hop n'hal geh sai nha huôih dol kiat chhak êch tưr.
10Teq u bơl bnih ja geh sai, nei hei, dôh 'bưn geh hei đươm laa Brah, tơmbơh baak au: Sai ur 'bưn kươt teq sai klau,#Mat 5:32; 19:9; Lu 16:18. 11(dôh mơq ja teq sai klau, nei phrui gôq bei nei, paich phrui lơh kluh klar n'hai sai klau). Sai klau kot 'bưn kươt teq lơơi sai ur. 12Nha n'hai bơl bnih nday nei hei, 'bưn dip laa Brah, mor laah: Mơq oh bi êch geh sai ur 'bưn jơ Brah, dôh bnih nei dip chưt rêh pôl n'hai nơơm, nei bnih nei 'bưn kươt teq lơơi sai ur. 13Mơq mbu dơur geh sai klau 'bưn jơ Brah, dôh bnih nei dip chưt rêh pôl n'hai nơơm, nei bnih nei 'bưn kươt teq lơơi sai klau. 14Đươm bnih sai klau 'bưn jơ Brah a kươi chkhôm sai ur kươt klanh jrah; nha bnih sai ur 'bưn jơ Brah a kươi chkhôm sai klau kươt lơh jrah. Mơq 'bưn, nei koon sau oh bi ja dol jrơơk jrơơm, dôh nar au bu kot kươt klanh jrah leq. 15Mơq bnih 'bưn jơ Brah êch pơrgah nei khang teq bnih nei pơrgah. Knông ndroong au, oh bi paich mei ruh 'bưn dol ayơơt ơơn. Đươm Brah Ưn ja khuôl oh bi#7:15 oh bi: Knông m'baak plơơp 'bian ti lah bơl bơn. rêh knông broh sroong. 16Ơi bnih lơh sai ur, 'bưn gưt laang mei ruh leet đoh kươt sai klau nơơm? Ơi bnih lơh sai klau, 'bưn gưt laang oh bi leet đoh kươt sai ur nơơm?
Rêh tênh 'bun Brah ri khuôl
17Jôm bnih phrui rêh tênh 'bun Brah ươn, u tênh baak khuôl duôn Brah Ưn ri. Au laa ntil hei ja kne knông leq sêch pal Phung Jrah. 18Geh 'bơơn ja dol kat pêêk baah kươt khuôl duôn pan? Khơơm teq lơi baak kat pêêk. Geh 'bơơn ndah dol kat pêêk baah kươt khuôl duôn pan? Khơơm wơng joi baak kat pêêk. 19Kat pêêk paich 'bưn kat pêêk kot 'bưn geh ơơn dip kơơp; ntil dip kơơp laa prap ơn pal baak ch'bap Brah Ưn ri. 20'Bơơn nha gôq ktôk êch khal kươt khuôl, phrui khang gôq ktôk nei. 21Oh bi laa dêch tơt kươt khuôl duôn pan? Khơơm chmlam; dôh mơq oh bi awap kươt snôk sroong nei phrui kơrnham phrui. 22Đươm bnih êch kươt Brah khuôl duôn plah nha laa dêch nei but bnih kươt snôk sroong knông Brah. Kot bei nei, bnih snôk sroong plah kươt khuôl duôn nei but dêch Yaang Krist ri. 23Oh bi ja kươt dơng pook thlay đat; khơơm but dêch aan koon bnih. 24Ơi oh bi, 'bơơn gôq ktôk êch kươt khuôl duôn, phrui khang gôq ktôk nei di mat Brah Ưn.
Baak kaar chhak soh
25Teq u baak kaar pal ur rnuônh, hei 'bưn geh rmaanh Brah ri; dôh đươm 'bưn gmaak Brah ri, hei ndơơp baak grơninh hei ri bei di mbu dip jah jơ a ngan. 26Đươm pal kro rngiêl nar au, hei gênh, mơq mbu bnih khang gôq bei nei nha klanh. 27Geh lah day nha dol ayơơt n'hai sai ur? Khơơm wơng ndroong rôih. Geh lah day ndah dol ayơơt n'hai sai ur? Khơơm wơng sai ur. 28Dôh mơq day pơih sai ur, day 'bưn geh dôih ơơn; mơq mbu ur rnuônh pơih sai klau, mei kot 'bưn geh dôih ơơn. Đươm bei nei, bơl bnih geh sai nei a kươi a mơp ơk a kaang klung klap au; hei êch oh bi het rlach ntil nei.
29Ơi oh bi, hei êch mor laah: Nar khay nha gleh đat; mơ a bei au, bơl bnih geh sai ur, phrui rêh bei 'bưn geh; 30Bơl bnih nhim ngliêng, phrui rêh bei 'bưn nhim ngliêng; bơl bnih broh s'bai, phrui rêh bei 'bưn broh s'bai; bơl bnih pook sơmrap, phrui rêh bei 'bưn geh griêng ơơn; 31Bơl bnih plah ta plam n'hai swich teh, phrui rêh bei 'bưn ta plam, đươm ntil swich teh au a kươi han rlach. 32Hei êch oh bi khơơm gênh. Bnih 'bưn pơih sai ur nei dơơn lơh dhaap kaar Brah, wơng ndroong lơh broh chưt Brah. 33Dôh bnih geh sai ur nei pơn ei tơt kaar rêh pêêk pai, wơng ndroong lơh broh chưt sai ur, 34u bu dol rhơq rpơq. Dơur 'bưn pơih sai klau, paich ur rnuônh nei dơơn dhaap kaar Brah, wơng ndroong jah leq chhak jan u chưt kmlơt kươt sêch jrah; dôh bnih geh sai klau nei gênh pơn ei kaar rêh pêêk pai, wơng ndroong jah lơh broh chưt sai klau.
35Hei mor ntil au đươm geh peh thlay aan oh bi, 'bưn geh jah pơrkhaang oh bi, dôh êch weet oh bi tơt ntil tưt u 'bưn geh rhơq rpơq knông baak jraih kaar Brah. 36Mơq geh bnih êch gênh nơơm 'bưn geh gôq rêh di ndroong dơrnip n'hai sai ur pơn nơơm ri, mơq êch jrơm dang, u êch ta sai, nei phrui lơh tênh ntil nơơm êch. Phrui teq bu ta sai. Ntil au 'bưn geh dôih ơơn. 37Dôh mơq 'bơơn plak knông chưt, 'bưn dol baak kơt rêt ơơn, gưt ndim êch kmbưng, u rwach knông chưt khang prap mei bei bnih sai ur pơn nei bnih nei lơh di kaar klanh. 38Bei nei, bnih ta sai n'hai sai ur pơn nơơm ri laa lơh ntil klanh; dôh bnih 'bưn han tơt ta sai nei lơh ntil klanh huôih.
39Sai klau nha rêh pal êch nei sai ur phrui ayơơt n'hai sai klau pal nei. Mơq sai klau chhưt, sai ur kươt snôk sroong ta sai n'hai bnih nơơm êch, chleeng laa gôq knông Brah. 40Dôh tênh rnđêch hei, mơq khang gôq kươt bei nei geh smlaang huôih. Hei gênh laah, hei kot geh Brah Wêêng Brah Ưn ri.
Chwazi Kounye ya:
I Kô-rinh-tô 7: SBL2024
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2024 Bible Society Vietnam. All rights reserved.