1 Kurintu 9
9
Sik Nasugu at Fakamulun
1O nunda kwa nalfas wan? O nunda bunwa au sik nasugu? O nunda kwa nalag tam Fun Isus? Ay o nunda bunwa am ku nataban sas fagafanudun siginan nu gfaning au tam Fun? 2Tibak taw dewa gamatangan te, bunwa au sik nasugu, am, gtuyan tuam te, sik nasugu au. Ay siginan nu gafanud am sa tam Fun, kanya wan tagfatuyan te, au wan tam Fun at nasugu at sadi.
3Katatuy ku famalus sas fagayu at yud gtoglag angku laman sik nasugu. 4O nunda wami masine gbul em fakonun ay em fanginum siginan em nainlufuyan? 5O nunda wami masine gtaban em ngay mangena fag ngay tagafanud yangay kata tibak nasugu at fakamulun, ay kata tam Fun at ngay arian, ay kata Pedru. 6O nunda ami way lang Bernabe at masine gfakamulun laman e fakonun tuami?
7Sinu fag tagfawayan tagfakamulun sat fun ay kanya yay tagrvbvy at sadili fagayudanun? We taw gtanum sik wat sat gamasun nu dway ban nangon ya at rawvg. Ay we taw nangalaga fagbaugun nu dway ban gbul susu bilug sanya ginan fag fagbaugun. 8Ku longan takatanya bundi siginans taw at amatanganan, nu bunway siginan tua Muisis at Faugali. 9Katatuy at marirukan sis Muisis at Faugali:
“Lag am gbuksung ay baka at dungus kaduge gruyus.”#9:9 Deuterunumyu 25:4.
O Dius at fagnalongun takatanya sa way lang baliwas baka? 10Bundi. At masuad sa tua baliwa antam. Aroro takali ay tagruyus gsud e fagsegun at afud. 11Ami wan tagtanum fanfalad fag bvtang. O nunda mauri way nu nabul ami ay famonun takalag? 12Ay tibak taw nu masine tua gbul takatanya siginan ayu, ami kaugat wan. Ay dewa katanya, wami nafakamulun, dewa ami masine gfakamulun takatanya. Nu bunway nagwantan tuami fagayu nusnge wain laman we gsalag nu karapyag at Masine fag Barita sabaliwas Isus.
13O nunda wam nasaful te, sik taw tagfakamulun sis Dius at bale, sanya ginan wan nu gbul at fakonun, ay anggan tagfakamulun sas fagirugan, e afud sanya ginan. 14Ay katanya yangay tam Fun at suguan te, tagfoyung at Masine fag Barita, siginan wan at fagfoyungan nu gbul at ngay fagayudanun.
15Ay dewa katanya kwa gfakamulun takatanya. Ay kwa griruk sa ayu laman gfon am angku ay fanggubukun. Ay dewa au gakabulun wan, kwa get sa ayu nusnge wain, laman ban we gfae yud e tungkul ku fakamatungudunun. 16Dewa katanya, kdi kamatungudun nu gfoyung au at Masine fag Barita aroro Dius nasugu angku. Ay afanyuan kban kway nafoyung at Masine fag Barita. 17Ay nu guseganan ktua fia kamoyung at Masine fag Barita, e fagnamulun ktua ban. Ay at matuyan, gfakamulun au Dius at nafatigwanan sa angku fag fakamulun. 18Nu katanya, nataw ku fagfanyaun fag famayad? Nu gfoyung au at Masine fag Barita kwa get famayad, dewa au masine gbul aroro sik takamoyung au at Masine fag Barita.
19Aroro dewa au yud sik fagsuguan, gafagsuguanan au fagayu taw laman ban ngayu tua ku nataban sas fagafanudun. 20Ay gina au si sangay taw Udyu, ku ugali kata taw Udyu, laman mafataban au sas fagafanudun. Dewa au yud gagbilugan ya Muisis at Faugali kaduge au gfadgaloan ngay taw tagagbilugan kafag Faugali, kata yangay nu gagbilugan au kafag Faugali laman mafataban au anya fagayu sas fagafanudun. 21Ay katanya yangay kaduge au gfadgaloan yud Udyu fag ngay taw, at yud gfaning Muisis at Faugali, kwa yangay gugali gfaning kafag Faugali, laman mafataban au anya fagayu sas fagafanudun. Bunwa te, kwa gfaning ya Dius at faugali, nu bunway aroro gfaning au tam Fun Isus at faugali. 22Ay gina au si sangay taw at mamomuy at fagafanudun, kata kyangay anya fagayu, laman mafataban au kafag ngay taw sas fagafanudun. Fagayu ku fakamulun gfaning au nu setain sik taw at kayaunanan, laman ban tibak taw umlangfe tua, sas nusnga setaw fag balyawvtan. 23Gfakamulun au takatanya fagayu laman mafafamoyung au at Masine fag Barita, laman ban e kwa kyangay tam Fun at famonun.
24Nasaful wam te, fagayu taggudgunan gtarung, ay dewa katanya, sadi way tagbabo. Nu katanya, fasinei fia nu gtarung am laman ban mababo tuam.
25At nanggudgunan maksvn nu gfananad ay nu gfaragang at sadili laman mafabul sik sangbo takarasras way. Ay dewa katanya, itam fag ngay tagafanud, tam fagnamulun fag sangbo at yud tua ban karasras kabavn. 26Nu katanya, gtarung au sat matuyan fia fag fakadasugan. Ay kata sik taw tagawean tagfalang at daluap sat usama, nu gfugfug au, kdi gfasas tagmara. 27Gfaidapan au ku bilug ay gfaragang au ku sadili fakaylatun aroro kwa kaylat nu sik fagaiyanun kban, nu ntabu au gfoyung sa ku ngay iba.
Chwazi Kounye ya:
1 Kurintu 9: OCCT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Copyright © 2021 by OMF International, Philippines