1 Kurintu 10
10
Famararang laman wa Gseg at Yud Matuyan fag ngay Fagsegan
1Ku ngay faduksay, kaylat au nu nasaful am at kinfasludan sa tam ngay mangaguyang tagalo Muisis. Kanya fagayu nalao sis daga linyabu ay nadife Dagat Maraska. 2Ay kanya fagayu gina galo linyabu ay gina gdife dagat, kata nu nsurung tuga Muisis at ngay tagadal. 3Ay kanya fagayu naon sik fakonun tagsiginans Dius, 4ay kanya fagayu nainum yangay sik fanfalad fag mamam, aroro kanya fagayu nainum siginans fanfalad fag gang tagufud anya fagayu, ay kanya fag gang tam Fun Isus. 5Dewa katanya, Dius wa guseganan tangayu sanya fag ngay taw, nu katanya ngayu at kinbul sis talun at yud e taw.
6At kinfasludan sanya fag ngay taw sik famararang sa antam laman wa tam gfaning at nafakamulun fag fagmauriun. 7Lag am gseg yud matuyan fag ngay fagsegan, kata ebi tiba at fakamulun. Kata at kinriruk te,
“Fagayu taw malunggung laman kon ay ginum, ay malindug gfalelegan at ngay afud bilug laman gseg ngay fagsegan.”#10:7 Nu Galin 32:6.
8Lag am gfanugtug ay lag namatugtug kata ebi tiba at fakamulun. Aroro kanya fagayu nafakamulun takatanya, sik menit way, at kinbul duak safulu e tuluk libuk taw. 9Lag tam gfaskud tam Fun kata ebi tiba at fakamulun. Kanya fag ngay taw anbul aroro ule nagat. 10Lag tam e fanlonganan kata ebi tiba at fakamulun, nu katanya tagfabul fag tagbarita nafabul anya fagayu.
11At kinfasludan sa kafag ngay taw sik famasaful sa antam, ay at fagnarirukun takatanya laman sik famararang sa antam, tagleleg yay katsi fag ngay buknga taguyan. 12Nu katanya, mataganani tua nusnga sinu tagamatangan te, maksvn wan nu gafanud, laman di gatabanan sas asalanan. 13Ya batang e ndasug famaskud sa ayu, fagayu taw at yud nadalan fag famaskud. Matuyan tam Dius, di gfadasug sa ayu ay fagyudun makatu fag famaskud. Nu bunway kanya gfon ayu sik fagmabitsugun laman mababo tuam.
14Nu katanya, ku ngay fakesugun, ayayui siginan at yud matuyan fag ngay fagsegan. 15Garingang au sa ayu kata sa sik mamatanganan. Nu katanya, amatangani te, o ku ngay longan matuyan. 16Ansadi tam sa tam Fun Isus at taguk nu nainum tam gina tam Fun at yafun, ay guseganan tam sas Dius. Ay ansadi yangay tam sat bilug nu naon tam kafag sadik tinapay. 17Fagayu tam kata tam sadik bilug aroro sadi wayk tinapay tam nafudan. 18Amatangani sabaliwa ngay taw Israel. Kanya fagayu masadi nu gseg Dius, gina kon at afud fag fanggalangun siginans fagirugan. 19Nataw ku longan at masuad? O glong au te, e tungkul sik fakonun at nafon sat yud matuyan fag ngay fagsegan, ay o e tungkul yangay kafag ngay fagsegan? 20Duan. Ku longan fia at masuad te, yud Udyu fag ngay taw nu gfon at ngay fanggalangun sa way at mauri fag ngay falad, ay wa sas Dius, ay kwa kaylat nu nangasadi am sa kafag ngay falad. 21Wam mafafagdua nu ginum am sa tam Fun at faginuman ay sat mauri fag ngay falad at faginuman. Ay wam mafafagdua nu gfangon am sa tam Fun at fagfangonan ay sat mauri fag falad at fagfangonan. 22O kaylat tam gfauri Dius? O nu gamatangan am amabalyanan yap tam anya?
23Masine way tam gfakamulun nusnga setaw, dewa katanya, bunwa fagayu at mafagubuk antam. Ay dewa tam masine gfakamulun nusnga setaw, bunwa fagayu tagfaksvn tam fagafanudun. 24Dangay lang ay ngay sadili ay fagamatanganun, nu bunway amatangani tua anggan ay iba.
25Oni nusnge wain fag yamas ay nabayad siginans fagfalaoan, ay lag am ginto ya laman wa gfamomuy ay amatanganan. 26Aroro at Rirukan nalong wa te,
“Tam Fun tagagbilug fagdaul daga ay fagayu tagsanya.”#10:26 Alubad 24:1.
27Ay sik yud gafanud nu nagewan ayu te, fangoni, ay nu kaylat am nangalo anya, oni nusnge wain at nafon sa ayu, ay lag am ginto ya, laman di gfamomuy ay amatanganan. 28Ay dewa katanya nu e nalong way ayu te, kafag fakonun sik fon way sat yud matuyan fag ngay fagsegan, lag am kon laman ro diam gfamomuy at nalong sa ayu fag taw at amatanganan. 29Bunwa sa ay amatanganan ku fagfatungulan, nu bunway sa way ay ngay faduksay at amatanganan. Wain ku fagsalagun ku fakaylatun laman gfakamulun au gfaning ku iba at amatanganan? 30Ay gina au kon kafag fakonun nu gseg ktua Dius, wain tibak taw at fakauriun ku fakamulun takatanya?
31Nu katanya, nusnga setaw ay fakamulun, dewa am gfangon ay ginum, fauseganani tua Dius. 32Dangay am gfae asalanan nusnga sinu fag taw, ngay taw Udyu, ngay taw Gresya, ay anggan Dius at ngay taw. 33Katanya yangay ku fakamulun, gugatan au gfakamulun sas fagayu ku fakamulun, laman ggubuk au fagayu taw, aroro kdi grvbvy ku sadili fakaylatun, nu bunway grvbvy kyangay at ke tungkul sa ku ngay iba, laman kanya fagayu umlangfe.
Chwazi Kounye ya:
1 Kurintu 10: OCCT
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Copyright © 2021 by OMF International, Philippines