Joira ja Anamarumiwa 16
16
Ineliwa wa mulombwana Timoteyo
1Mulombwana Pawulo agavennye, agadowile Derebe, ofiya ante Listira. Agafiyile wewule, ohonfwanya mulombwana mmohi omuhara Yesu eriwa Timoteyo. Timoteyo mmaye ali muJudewu omuroromela Yesu mbwenye babaye ali muGerego. 2Abalaye omuroromela Yesu a Listira na Ikoniyo kowonga upama zela wa liye. 3Evale Pawulo okanamo yofuna nnga amutukule mulombwana Timoteyo amuwendegena vamohi. Pawulo eto ohomutukula, dowa muinela mwasiwa aJudewu kafwanyeya vilambo da vakwikwi kohomala iziwa ira mulombwana Timoteyo babaye ali muGerego.#16:3 Timoteyo ahadowe eno ahaineliwe na makalelo a aJudewu, aJudewu tchamubalrege mwasiwa tchavuruwana jowonga ja mutu ohoineliwa. Nona Timoteyo oineliwa ira mabasaye kavweyege pama mwa aJudewu.
4Kuma evo, mulombwana Pawulo ohoroma wendawenda sidadi da mwilamboni mule na mulombwana Timoteyo, kaawandelaga abali omuroromela Yesu ira kaharege mangano kafwanyeya mukartani neno nalrembiwe na anamarumiwa na aansiyawu a Jeruzalemu zela mangano ofuneya ira atu ohokala aJudewu kairegena. 5Kagavwile mazwale, nroromelo na atu omuroromela Yesu nohowendjedeyave. Va kada siku numero na atu omuroromela Yesu nodowa sogolro.
Munemba Otchena ohakondiha aPawulo laleya ilambo ya Aziya na Bitiniya
6Evale aPawulo kohogundeyaga ulrendo ira kalaleye mazu a Mulugu ilambo ya Aziya. Munemba Otchena mbwenye ohakondiha. Evale aliwa kohoviraga mmadilreni mwa Firijiya na Galasiya, 7aliwa dowa ante Miziya. Kamahi kadowe kalaleye mazu ilambo ya Bitiniya, Munemba wa Yesu ohakondiha akoka. 8Evale aliwa koholupa Miziya, aliwa dowave sogolro ante sidadi ya Toroyade. 9Mahiyu anne kafiya atu Toroyade, mulombwana Pawulo ohoona jengo mmuruni mwaye. Amuonne mutu mmohi wa Masedoniya agaimenle vali Pawulo, anvepaga eraga: <<Hiyo nazela uvepani muvenye, muze ilambo ya Masedoniya, munikamihede hiyo vano.>> 10Pawulo aganiwandenle#16:10 Pawulo aganiwandenle: Ku wonga ora yenno maliba lremba Lukaji ali vamohi na aPawulo. jengo jaonne liye mmuruni mwaye, hiyo atene evale nohokana yofunafuna ira nidowe Masedoniya mwasiwa hiyo naonamo ira: <<Jejo tapulela ira Mulugu unafuna nidowe Masedoniya, naalaleyewo Muselu Wapama atu kali wewo.>>
APawulo kohodowa sidadi ya Filipo, porovinsiya ya Masedoniya
11Evale nohogwelaga mwadeya Toroyade, hiyo dowaga ilambo ya Samotaraziya nahaperuwile. Mmetcheloni muwa, hiyo kwaranyavo, hiyo dowa Neyapolisi. 12Eto nohokwaranyagavo, hiyo fiya Masedoniya, sidadi ya Filipo. Muwari mwa sidadi dindimuwa da Masedoniya, imohi tchi sidadi ya Filipo. Filipo eto tchi sidadi ya akuda Roma. Hiyo nagafiyile sidadi ya Filipo ile, nohokalaga wewule malambo mangasi mangasi.
13Siku na sabado, nohovenya, hiyo dowa unde wa sidadi, dowa tcherela ya muhindje, nivendaga akala nohokalawo nimburo nalobeletchavo atu. Nagadowile wewo, nohafwanyaga ahiyana kagumanne ira kalobele. Hiyo garati, roma wongaga mazu na ahiyana kagumanne evale. 14Mwa ale kavwa jowonga jehu, ohokalavo mwana muhiyana mmohi eriwa Lidiya wa sidadi ya Tiyatira. Liye alaba mabasa oguliha nguwo dokwima, da usalru wapama wa kore ya musuzu wa bwanda. Ali eto mutu omutamalela Mulugu. Nabwiya ohomuhula mmirimani mwaye ira aroromele mazu awonga Pawulo.#16:14 Nabwiya ohomuhula mmirimani mwaye ira aroromele mazu: Mazwala anoniwandela ira muwari mwa aliba vuruwana atene, ikalawo Mulugu yairile liye ira Lidiya awande roromela mazu. Ku wonga mutu unovulusiwa muwari momuroromela Yesu mbwenye ira amuroromele Yesu, Mulugu gusakunlre ira airena eno eto Mulugu unonvaha kopolo domuroromela. Nona Yesu ohowonga ira vulusiwa unazela muwari mobaliwa akoka. (Nione Juwawu 3:3) Sawasawa nnga mwana kanabaliwa mwa kopolo daye, so unaona baliwa wene, tchi imohive inaireya ira mutu amuroromele Yesu. Ku wonga vulusiwa uli mmandani mwa Mulugu hiya kala mmandani mwa mutu. (Juwawu 15:16; Roma 16:16-24) 15Agaroromenle mazu, liye ohobatiziwa vamohi na atu a vande vaye. Nomala eno, ohoira: <<Akala munodiona ira nnomuroromela Nabwiya Yesu, ndoweni mwahaye vande vaga.>> Ohokalelave ntindi fiyeda hiyo rumela dowa haya vande vaye.
Pawulo na Sila kagali mukadeya
16Siku nimohi nidowaga nimburo neno nimohive nalobeletcha atu, nohongumanana mwana namwali eni anna munemba wabure omuwongiha jengo ja mitalre. Mwana namwali ule eto ali muzari. Ambwiyaye kompetchana kobiri dilukulu mwasiwa owonga jengo ja musogolro. 17Namwali ule aganionne, ohoroma muharaga Pawulo na hiyo atene, akuwaga eraga: <<Alombwana anna ba anamalaba a Mulugu, Mulugu Okwaranya Jatene. Anouwandelani makalelo ovulusiwa.>> 18Kuma siku nenne dowa sogolro, omala malambo madjindjene airagana eno. Evale Pawulo agaonne makalelo anne, ohofiyeda mwezo otakaleliwa valukulu. Muwari motakaleliwa mule, ohorungunuwela mundulri, liye wonga na munemba wabure ule eraga: <<Munemba wabure we, nnouruma na nzina na Yesu Kiristu, ukumemo mwa namwali ula.>> Evale ora imohive yenno, munemba wabure ule ohokumamo.
19Namwali ule ambwiyaye kagaonne ira mwasa wewa opana kobiri ohomala, kohomuhindaga Pawulo na Sila, kaamburulelaga vali andimuwiwa.#16:19 kohomuhindaga Pawulo na Sila, kaamburulelaga vali andimuwiwa. MaBibiliya amohiwa anawonga ira: kohomuhindaga Pawulo na Sila, kaamburulelaga varampani, vamentoni va andimuwiwa. Mwasiwa tempu ya wanle andimuwa a sidadi kokayetchana nimburo eni vagaratetcha atu varampani ira kawandege tonga makani kafwanyeyana atu a musidadi mule. 20Kagaafiyilena wa anamatonga ale, kohowongaga keraga: <<Atwala ba aJudewu. Ananonga sidadi yehu ila. 21Nonga uwa, anafundjiha makalelo oviringaniha malamulo ehu a hiyo aRoma. Hiyo muwari mokala aRoma, jejo kannanda rumela nne hara jinawonga atwala.>> 22Anamwindji a atu kafwanyeya evale kohoroma mbubuda Pawulo na Sila. Vevale anamatongale kohokumiha nlamulo noira Pawulo na Sila kawunguliwe jowara jewa, kabubudiwe na jimiri. 23Aliwa kohabubuda fendo didjindji dene. Nobubudiwa, anamatonga kohaheliha kadeya, aliwa muwongana mundimuwa wa kadeya ira: <<Udowe waaing'anele pama.>> 24Norumiwa eno, ohatukula, adowana kadeya ule nimburo nolapela na va mulango. Evale ohafungela mmendoni muwa na nigolri.
25Ora ya mahiyu vari na vari Pawulo na Sila kafwanyeya mukadeya mule kalobelaga eto kamuimbelaga Mulugu nyumbo diwa eto anyakadeya afwiwa kali emule koavuruwanaga. 26Morurumutcha yohoza indarandara yohokala ya masika fiyeda aliserisi wa kadeya roma inaina. Mobaranya mwene misuwo datene da kadeya dohomala huleya okave. Jomangana jaamangilena atu anyakadeya jile johomala moramo okave. 27Mundimuwa wa kadeya agarurumuwile, agaonne misuwo datene da kadeya dagali dohuleya dene, liye esaga anyakadeya atene kohomala tawamo. Evale ohopulula supada naye ira avipena.
28Pawulo mbwenye ohowonga mokuwa eraga: <<Kuviporotche. Mwasiwa hiyo atene nili emuno.>> 29Evale mundimuwa wa kadeya ohoira: <<Kazanani moneya.>> Evale ohotamanga, liye fiya waligi Pawulo na Sila, liye gwela vati vali atu, angurumelaga moova. 30Vevale ohomukumihamo Pawulo na Sila, liye afuka eraga: <<Andimuwa, dire avi ira divulusiwe?>> 31Aliwa kohoira: <<Wafunaga vulusiwa, umuroromele Nabwiya Yesu. Weyo nari atu a vande vawo mwamuroromela, munovulusiwa.>> 32Evale aPawulo kohomulaleya liye vamohi na atu atene a vande vaye kaawandelaga mazu a Nabwiya. 33Mwa enne yagalive mahiyu, mundimuwa wa kadeya ohomutukula Pawulo na Sila dowa ahuwa vilonda danna atu. Noira eno, liye vamohi na atu atene a vande vaye kohobatiziwa. 34Noira eno, ohadowana vande vaye, liye avaha udja. Vevale mundimuwole na atu atene kafwanyeya vande vaye kohagalala valukulu mwasiwa kohomuroromela Mulugu.
35Unde ule mbe, anamatongale koharuma anyakondo ewa ira kadowe kamuwandele mundimuwa wa kadeya ira aakutche. 36Vevale mundimuwa wa kadeya ule ohovenya, afwanya aPawulo eraga: <<Anamatonga kohoukutchani. Kumani mudowe mwa murendele.>> 37Mbwenye Pawulo ohoruniha eraga: <<Nari. Aliwa kohonibubuda vatando nahanna mulandu, hiyo vano nagali asidadawu a Roma. Nomala eno, aliwa eto kohonivokeda mukadeya. Akala aliwa anafuna kanigunye, kanivokede unde mozembiheya, hiyo mbwenye kannarumela. Inafwanela kaze annya, kanikutchemo.>>
38Evale anyakondo ale kagadowile awandela anamatongale mazu oira: <<Atwale kawongile ira: <Nyo muhunibubuda hiyo asidadawu a Roma nahanna mulandu.> >>, anamatongale kohorendjeyaga. 39Evale kohovenya, aliwa dowa afwanya aPawulo mukadeya mwali atu mule, aliwa ira: <<Nnouvepani munikurumuwele.>> Evale kohakumihamo keraga: <<Nnafuna nyo muvenye, mudowege sidadi imohiwene.>> 40Vevale aPawulo kagakumilemo mukadeya, kohodowaga mpanda Lidiya na abali amohiwa kafwanyeya wewule, aliwa alimbihaga. Vevale kohovenyihana, kadowaga muulrendoni mwewa.
Chwazi Kounye ya:
Joira ja Anamarumiwa 16: iLolo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral