Joira ja Anamarumiwa 15
15
Pawulo na Barnabe koharuniha ale kalaleya ira vulusiwa unazela moineliwa
1Evale kohokalawo alombwana amohiwa kakumile porovinsiya ya Judeya, aliwa roma afundjihaga abali omuroromela Yesu mazu, keraga: <<Mulombwana uli watene ahaineliwe nnga munawongela nlamulo na Mozeji, kaza avulusiwa.>> 2Pawulo na Barnabe kagavwile mazwale, koharuniha na makalelo ohokala a masika aliba wonga enne, fiyeda kalavo wonga wohokala wa masika. Evale kohosakulriwa Pawulo na Barnabe na abali amohiwa omuroromela Yesu ira kadowe Jeruzalemu, kaafuke nkani wenne anamarumiwa na aansiyawu kafwanyeya wewule.
Pawulo na Barnabe kohodowa Jeruzalemu
3Evale aliwa kagarumiwe na nikuru nafwanyeya Antiyokiya, kohogundeyaga kadowaga Jeruzalemu. Kadowaga kohoperuwa ilambo ya Fenisiya na Samariya. Evale kohagumaniha adibiliwa omuroromela Yesu kaawandelagamo muselu watene zela makalelo atu ohokala aJudewu oindjiva katwaruwile atu, karoma muroromela Yesu. Mwa enne abali atene a wewule kagavwile, kohagalala valukulu.
4Kagafiyile Jeruzalemu, kohowatcheliwa pama na nikuru na atu omuroromela Yesu na anamarumiwa vamohi na aansiyawu. Evale kohoroma awandelamo jatene jairile Mulugu muwari mwa aliwa.
Garatela zela mangano ofwanela para atu omuroromela Yesu kahali aJudewu
5Mbwenye muwari mwa atu omuroromela Yesu, kohokalawo amohi kali a nikuru na aFarizewu. Aliwa kohovenyaga, roma wongaga keraga: <<Inafwanela atu ohokala aJudewu anamuroromela Yesu kaineliwe eto naarume ira kaharege malamulo a Mozeji.>> 6Vevale anamarumiwa na aansiyawu kohogumanela ira kagaratele pama nkani wenne. 7Mwa enne vagali wonga wohokala wa masika muwari motchokotchela, mulombwana Peduru ohovenya, liye awandela ira: <<Adibilaga, nyo muhumala iziwa ira Mulugu ohodisakulra wanle muwari mwa nyo ira atu ohokala aJudewu karome vwa Muselu Wapama no muroromela Yesu muwari mwa mulomo waga.#Joira ja Anamarumiwa 10:1-43 8Eto Mulugu wenno unaiziwa murima wa kada mutu, ohahidedela umboni zela nroromelo newa moavaha Munemba Otchena nnga janiirele liye hiyo. 9Mulugu kahiyanihile mwa hiyo na aliwa, tchoira liye ohowanda atcheniha mirima dewa mwa nroromelo.
10<<Nnga mwasiwa gwa nni nyo vendaga muxixa Mulugu, mwaanyemelihaga anamamuhara Yesu mitolro dedo dahanawanda hiyo nne dahawandile makolo ehu?#15:9-10 mitolro dedo dahanawanda hiyo nne dahawandile makolo ehu: Peduru ohorumela ira aIzarayeli wanle nari Peduru na afwaye tchawandile kwakwaneliheda malamulo matene a Mozeji. Peduru eto ohowanda onelramo ira mutu unowanda kala mutu omuroromela Yesu masiki ahaharihilemo malamulo matene a aJudewu mwasiwa Mulugu ohowanda atcheniha mirima dewa mwa nroromelo. Ku wonga atu ohokala aJudewu kohowanda vulusiwa agali aliwa tcharumenle harihamo malamulo a Mozeji, so kohomuroromela Yesu Kiristu. Nona tchali yofwanela atu ohokala aJudewu kaineliwe ira kavulusiwe nne tchali yofwanela katongiwe ira kaharihege malamulo a Mozeji. Malringana kamuroromele Yesu eto karumele tongiwa na jofuna ja Yesu. 11Ineriha hiyo nnororomela ira nnavulusiwa mwa sayi da Nabwiya Yesu. Eto na aliwene sawasawa.>>
12Noira eno, atu atene kohomiyalaga, aliwa roma nvuruwana Barnabe na Pawulo, aliwa roma wongamo jionihedo na jotikiniha jaira Mulugu muwari mwa aliwa muulrendoni mwawenda atu muwari mwa atu ohokala aJudewu.
13Kagamanle wonga, Tiyagu ohoromaga wonga eraga: <<Abalaga, mudivuruwane. 14Mbalihu Simawu Peduru uhumala wonga zela makalelo uirile Mulugu aromaga awendela upama atu ohokala aJudewu#15:14 aromaga awendela upama atu ohokala aJudewu: Owu hehi aapandaga atu ohokala aJudewu. Nione Lukaji 1:68,78, 7:16. ira kakale atwaye. 15Jejo jinakwakwanela na mazu kalrembile anamafiyiheda wanle, nnga mulrembele atu ira:
16 <Jeji jagaireyile, nnowela dize dikunge akoka musasa wa Davi wenno ugwile. # 15:16 Mazu owonga zela musasa wa Davi wenno ugwile anatapulela zela muzizani mwa Davi. Tchoira Davi ali mutu oteteliwa, ovweya. Ali mwene wa aIzarayeli. Mbwenye liye agakwile, atu a muzizani mwaye kohofiyeda balaleya, roma kalaga atu a vaheno vene. Umwene watonga liye vamohi na ahimaye wohogoma. Zagave fiyeda ora ya Yesu. Umwene wa Davi akala ha yengo, ali nnga musasa ugwile. Venyihiwa wa musasa agwile wa Davi ku wonga muzizani mmohive mwemo, pu mwemo mwazile baliwa Yesu Kiristu. Muwari mwa Yesu Kiristu puzile wandeya atu ohokala aJudewu roma wenda na Mulugu. Nnoza divenyihe vadebe vinafwanyeya atu, dikunge akoka, 17ira atu amohiwa ohala vamohi na atu ohokala aJudewu atene oitaniwa na nzina naga kaze wa miyo dagali Nabwiya. Unawonga gu miyo Nabwiya 18uromile wanle aiziwiha atu zela jeji.> >>#15:17-18 ira atu ohokala aJudewu atene kaitaniwe na nzina naga: Mulugu aromile wanle awandela atu ibaribari zela vulusiwa wa atu ohokala aJudewu. Tchoira aIzarayeli kahanakalewo, Mulugu ohomuwandela Abarahamu ira: malogo matene a ilambo ya vati anoza karelihiwe mwa weyo. (Jenesesi 12:3) AJudewu kohotatila mazwale, aliwa umbuwelaga ira: <<Vulusiwa annya gu hiyene.>>
19Tiyagu ohowongagave eraga: <<Nona miyo nnaonamo ira kanaasimeliheni atu ohokala aJudewu, anne anatwaruwa kamuharaga Mulugu. 20So mbwenye naalrembelewo karta nowonga ira aliwa katundege jengo jotakalihiwa muwari mokuteliwa ikwamutu yosema,#15:20 katundege jengo jotakalihiwa muwari mokuteliwa ikwamutu yosema: Fwanyeya ira malambo a mundulrimu vilambo dakala atu, kohokalawo atu olobela vikwamutu josema. Muwari mokutela mwanainyama vikwamutu josema, maliba velela odowana nyama vande. Mwa enne adowana vande, afuna dja, odja; afuna guliha, oguliha. Nona mulombwana Tiyagu awongaga zela yengo yotakalihiwa yenno ikuteliwe ikwamutu yosema, unawonga zela anavinyama kapeliwe jilombolombo jasema atu, aliwa kokorelaga, lobelaga ejo. karambele joraruwa, katundege mwanainyama opiwa moxekiwa vammelo eto katundege sangiri. 21Mwasiwa wewo unakala atu wo, sidadi datene kohokalawo atu karomile tempu ya wanle laleya mazu kalrembiwe na Mozeji. Eto masabado matene mazu a Mozeji anoileriwave munyumbani dofundjamo mazu.>>#15:20-21 Tiyagu na afwaye tchaarumile atu ohokala aJudewu omuroromela Yesu ira kaineliwe eto tchaakamelihile ira kahadje nguluwe na anavinyama kakamelihiwe aJudewu. So mbwenye voira masabado matene mazu a Mozeji anoileriwave munyumbani dofundjamo mazu, yali yofwanela atu omuroromela Yesu anno anafwanyeya kagali atu ohokala aJudewu katundege mwanainyama opiwa moxekiwa vammelo eto katundege sangiri. Ali ira aJudewu kahatakaleliwe na atu ohokala aJudewu omuroromela Yesu ira kakayena tempu yovwa. Tchoira kinafwanela mutu omuroromela Yesu airena yengo yombarela nfwaye ndila ira ahavwe mazu. Nione 1 Korinto 9:20-22.
22Evale anamarumiwa na aansiyawu vamohi na nikuru natene na atu omuroromela Yesu kohorumela mazu awongile Tiyagu eto kohogaratela ira: <<Ndoweni naasakulreni mwa hiyo atu ira kadowe vamohi na Pawulo na Barnabe ilambo ya Antiyokiya.>> Kohomusakulra mulombwana Sila na mulombwana Judasi wenno unaitaniwa Barisaba anno kafwanyeya kagali andimuwa muwari mwa abali omuroromela Yesu.
23Kagaasakunlre aliba dowana karta nne, aliwa koholremba karta nowonga ira: <<Unalremba gu hiyo abalinyu nagali anamarumiwa na aansiyawu a Jeruzalemu. Nnalremba karta ni para nyo abalihu ohokala aJudewu muli ilambo ya Antiyokiya na Siriya na Silisiya. Munatcheliwa avi? 24Hiyo nihivwa ira kohokalawo atu kakumile mwa hiyo uno, kafiyile wewo, kaza kawongaga mazu oukatamihani fiyeda nyo kukumuwa valukulu. Aliwa mbwenye tcharumiwe na hiyo. 25Nihimala garatela vamohi nkani wenno zela jatene jinereya wewo. Hiyo atene nihivwanana ira nurumeleni alombwana ambinli ira kanvelele Barnabe na Pawulo anno nnaaziveliwa hiyo 26eto anno anafwanyeya kagali alombwana kavivelenle vingumi dewa muwari molaba mabasa a Nabwiya Yesu Kiristu. 27Atu anaaruma hiyo, mmohi gu mulombwana Judasi, nfwaye gu mulombwana Sila. Aliwa kafiya wa nyo, jinafuna nyo fwanya mukartani mu, mulombwana Judasi na nfwaye Sila anorumelela na mulomo.>>
28<<Tchoira Munemba Otchena nari hiyo vano nionne ira ili yapama nahausimelihegeni na mazu amohi. So nnafuna nukokomezeni zela mangano a vang'ono bahi. 29Ilukuluwa inafuna hiyo ukokomezani tchi ila. Inafwanela mwahadje yengo ikuteliwe ikwamutu yosema eto mwahadje sangiri eto mwahadje mwanainyama opiwa moxekiwa vammelo eto murambele joraruwa. Mwarambela jatene ejo, muhusakanya pama. Kukala hiyo.>>
30Evale aliba rumiwa ale kagamanle lanya Jeruzalemu ule, kohodowaga Antiyokiya. Kagafiyile wewule, kohagumaniha atu omuroromela Yesu, aliwa avaheda karta nne. 31Evale kagailerile, kohagalalaga zela mazu olimbihana kafwanyeya mukartani mule. 32Sila na Judasi voira aliwa kali eto anamafiyiheda a Mulugu, kohakokomeza abali omuroromela Yesu a wewule kaalimbihaga na mazu madjindjene. 33Kagamanle malambo mangasi mangasi, abali omuroromela Yesu kafwanyeya Antiyokiya kohagunya Sila na Judasi, aliwa ira: <<Nyo akala munofuna welela mundulri, venyani mudowe mwafiye na murendele!>> 34Mbwenye Sila ohoumbuwela ira: <<Yapamiwa inafwanela dikale wewuno.>> 35Pawulo na Barnabe eto kohalaga Antiyokiya wewule, roma afundjihaga, kalaleyaga mazu a Nabwiya vamohi na anamafundjiha amohiwa oindjivene.
Mwalana wa Barnabe na Pawulo
36Kagali Antiyokiya ule, vagavirile malambo, Pawulo ohowonga na Barnabe eraga: <<Ndoweni nivireni muwari mwa sidadi datene mwalaleyile hiyo mazu a Nabwiya malambo a mundulrimu, naapandege abalihu omuroromela Yesu, naaone akala kali apamene.>> 37Muwari mwa ulrendo wafuna atu wenda, mulombwana Barnabe ofuna nnga kamudowena Juwawu wenno eriwa Markuji. 38Pawulo mbwenye ohomukonda eraga: <<Kanimutukule mwasiwa liye ohonitawa ilambo ya Panfiliya, anihiyaga ira nilabe okave.>> 39Voira Barnabe ofuna nnga Juwawu Markuji akale vamohi na aliwa, evale vohoza madugudugu ohokala a masika fiyeda Pawulo na Barnabe kohomwalana.
Mulombwana Barnabe ohomutukula Juwawu Markuji, aliwa venyihana, gwela mwadeya, aliwa dowaga Xipire. 40Mulombwana Pawulo mbwenye ohomusakulra Sila. Mwa enne kamaruwaga, abali omuroromela Yesu a Antiyokiya kohavaheda mmandani mwa Nabwiya#15:40 Kawongaga ira kohavaheda mmandani mwa Nabwiya ku wonga ira kohalobelela ira Nabwiya akale na aliwa, aasogolrelre muwari mwa mabasa ewa matene kafuna atu laba. ira kasogolrelriwe na sayi daye. Aliwa venyihana, 41vira muwari mwa ilambo ya Siriya na Silisiya, aliwa alimbihaga makuru a atu omuroromela Yesu kafwanyeya wewule.
Chwazi Kounye ya:
Joira ja Anamarumiwa 15: iLolo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral