Joira ja Anamarumiwa 17
17
APawulo kagali Tesalonika
1APawulo kagakumile Filipo, kohovira Anfipoli na Apoloniya, aliwa fiya sidadi ya Tesalonika. Muwari mwa Tesalonika mule, mohokala nyumba yofundjamo Mazu ya aJudewu. 2Nnga molemelela mwaye, siku na sabado Pawulo ohovenya dowa volowa nyumba yofundjamo Mazu ile. Ohomalaga masabado mararu oharanene, atukulaga Mazu, agaratelaga na aJudewu, awongaga, 3aaiziwihaga, aaonelrihedagamo ibaribari zela Namatikeliwa ira anamafiyiheda koholremba mMazuni ira ukala Namatikeliwa afuna za aonihiwe goyi, apiwe, amala avenye mokwani. Pawulo kwi: <<Namatikeliwa wenno amuwonga anamafiyiheda uhumala za. Gu Yesu wenno unamulaleya miyo wa nyo.>> 4Muwari mwa aliba vwa, kohokalawo aJudewu karumenle jawonga Pawulo jile fiyeda aliwa roma wendaga vamohi na Pawulo na Sila. Kohokalawo eto aGerego, alombwana oindjiva omuriheda Mulugu kavolowile vamohi na ahiyana angasi angasi oiziweya.
5Mbwenye aJudewu kafwanyeya sidadi yenne, kagaonne atu oindjiva kaaharaga aPawulo, kohakalela nrima. Aliwa kohodowa merkado, avenda alombwana abure ohohinda yengo, aliwa agumaniha ira katatamule madugudugu. Vohodibeliwa madugudugu kafwanyeya musidadi mwatene emule tchali a masika. Voira Pawulo na Sila kahaya vande va mulombwana mmohi eriwa Jasawu, aliba madugudugu ale kohovenya dowa vande vaye, aliwa roma bwanyulaga nyumba ya mulombwana Jasawu ira kankumihemo Pawulo na Sila. 6-7Kagaonne ira: <<Atu nnaafuna hiyo kilimo>>, kohomuhinda Jasawu na abali amohi omuroromela Yesu, kaamburulelaga wa andimuwa. Kohokuwa keraga: <<Hiyo nihimuzana mulombwana Jasawu ula, mwasiwa liye gwaawatchenle atwale kanongile vilambo didjindji. Aliwa banno anaviringaniha malamulo a Sezare.#17:6-7 Sezare ali mwene wa aRoma atene. Ani: <Ukalawo mwene mmohiwa uneriwa Yesu, muhiya mwene Sezare.> >> 8Kagavwile mazwale, andimuwa na atu a sidadile kohokukumuwaga. 9Evale andimuwale kohompagalriha kobiri Jasawu ule vamohi na afwaye.#17:9 Muwari moapagalriha aJasawu kobiri, afwase kohopangana ira: <<Mwahawelele irana jabure akoka, ante siku na ngana, nnouwelihedani kobirinyu.>> Noira eno, aliwa agunya, dowaga vande.
Pawulo na Sila kohotawela Bereya, aliwa laleyaga mazu wewo
10Mwa enne abali omuroromela Yesu a wewule, kagaonne ira Pawulo na Sila anasakiwa, koharuma mobaranya vari va mahiyu ira kadowege Bereya. APawulo kagafiyile Bereya, kohosuruma nyumba yofundjamo Mazu ya aJudewu. 11Kagafiyile wewule, kohafwanya aJudewu apama, ohiyaniha na ale kafwanyeya Tesalonika. Tchoira aJudewu a Bereya kavwaga laleya wa Pawulo, kowatchela mazu mohagalala. Malambo matene kotukula jowonga jalrembiwe mMazuni, aliwa hiyanihaga na jawonga aPawulo ira kaone akala ti jejo owu hehi. 12Kagaonne ira jinawonga Pawulo ti jimohive jilrembiwe mMazuni, aJudewu adjindjene kohoroma muroromela Yesu. Kohokalawo eto aGerego kamuroromela Yesu, amohiwa ahiyana okana mabasa orihediwa vamohi na alombwana amohiwa.
13Mbwenye aJudewu kafwanyeya Tesalonika kagaiziwile ira Pawulo ufiya Bereya, unalaleya mazu a Mulugu wewo, kohogundeya, aliwa fiya wewule, roma atujaga atu oindjiva ira kamuharahare Pawulo. 14Evale abali omuroromela Yesu kafwanyeya Bereya kagaonne ejo, kohomutawiha mobaranya, aliwa aruma atu ira kanvelele Pawulo, kamudowena tcherela ya bara, aliwa gwela mwadeya, dowa ante ilambo ya Atena. Mwa ora yenno, mulombwana Sila na Timoteyo eto kohala Bereya wewule. 15Kagafiyile ilambo ya Atena, Pawulo ohaweliha ale kanvelela eto oharuma ira kamuwandele Sila na Timoteyo ira kanfwanye mobaranya. Evale aliwa kohowela kadowaga Bereya.
Pawulo agali Atena
16Pawulo agali sidadi ya Atena, muwari momudediha Sila na Timoteyo, ohokalaga okukumuwene mmirimani mwaye mwasiwa ilambo yali liye ya Atena ile mwatene mwawenda liye ofwanya vikwamutu josema joindjiva jaroromela atwale. 17Evale liye ohodowaga nyumba yofundjamo Mazu, awandelaga mazu aJudewu na atu omuriheda Mulugu. Odowetcha nimburo neno vagumanetcha atu adjindji a sidadile malambo matene, aawandelaga atu, atapanyaga na atu aafwanya liye. 18Kohokalawo eto anamafundjiha a nikuru na akuda Epikure na nikuru na akuda Estoyiko#17:18 Zela makuru menli anawongiwa eva, akuda Epikure na akuda Estoyiko kohokana jengo jidjindji ja vaheno vene jaumbuwela atu. Ja Yesu tchaiziwile nne ja Mulugu tchaiziwile. Kawendaga, tchabalra ira: <<Ukala Mulugu unipandutchile.>> Kawendave eno na joumbuwela jewa ja vaheno vene johokala pama. katapanya na Pawulo. Evale amohiwa kohowonga ira: <<Mutula murambwe. Liye eto unafuna awonge nni?>> Kohokala amohiwa kamuwanganyeda ira: <<Mutula unakala nnga gu namalaleya wa amilugu a ilambo imohiwene.>> Mwasiwa kawongela atu eno, aliwa kavwa Pawulo alaleyaga zela Yesu eto zela venya mokwani.
19Vevale atwale, kagavwile mazu a Pawulo, kohomutukula, aliwa mudowana wa andimuwa anno kagumana nimburo naitaniwa Areyopago. Andimuwale kohowonga aliwa ira: <<Hiyo nnafuna muniwandele pama mazu maxa munalaleya nyo. 20Mwasiwa hiyo nnaona nnga jinawonga nyo ti jengo johiyana hiyana. Nona nnafuna nnga munitapulelemo pama jengo jinawonga nyo.>> 21Mwasiwa wawongela atu enne tchoira akuda Atena na atu oza kakala Atena tchabalra yengo yatene yali ya wanle mbwenye ora ili yatene kafuna kavwe jengo jixa.
Pawulo ohalaleya akuda Atena
22Evale mulombwana Pawulo ohovenya, roma wonga na andimuwa kafwanyeya Areyopago ule eraga: <<Alombwana afwaga anafwanyeya ilambo ya Atena, miyo dihiiziwa ira nyo muhukana sanganiko didjindji zela amilugu adjindjene. 23Tchoira diviraga musidadi muno, dihifwanya jengo jinatamalela nyo. Dihifwanya eto ibuwa imohi ilrembiwe mazu oira: <Ibuwela, tcha mulugu ohoiziweya.> Miyo peno nnafuna duwandeleni zela Mulugu wa ibaribari, wenno munamutamalela nyo muwari mohomuiziwa. 24Mulugu wa ibaribari gu Mulugu upandutchile ilambo ya vati na jatene jinafwanyeyamo. Muwari mopandutcha jatene mule, Mulugu wenno gu Mbwiye wa zulu na ilambo ya vati. Kahi ira unakala muwari mwa nyumba dedo nnamangiwa na atu. 25Mulugu wa ibaribari kanakamihediwa na atu. Mwasiwa kilivo yengo imuhalenle. Mulugu eto gunanivaha hiyo ingumi no vuma eto na jengo jatene. 26Mulugu ahanampandutche mutu, ohovayela gawa malogo kafuna za kalawo. Liye ohosakulra kada nlogo malambwiwa kafuna atu kalawo na ilambo yewa wafuna atu kala. Liye muwari mompandutcha mutu mmohi, ohapandutcha malogo matene ira kagaweye, kazale mwilamboni mwatene ya vati. 27Mulugu airela eno ira kawande nvenda ira yawandeya atu kampapasaga, kanfwanye. Tchoira liye kalapenle na hiyo atene.>>
28<<Ira niwande kana ingumi eni, vamohi no wanda wenda eto no kalawo, jatene jeji jinazela mwa liye. Kalaga nnga mazu alrembile namalremba mmohi ira: <Hiyo eto nili Mulugu anaye.> 29Voira nili ana Mulugu, kaniumbuwele ira Mulugu gu yengo ya oru nari parata nari mabwe, nnga ikwamutu yosema yosakanyiwa na manda na zelru da atu.
30<<Malambo a mundulrimu Mulugu ohahiya atu ira kawendege pipiri pipiri mohoiziwa yengo tchivi zela ja vikwamutu josema jile. Mbwenye malambwala, Mulugu ukumiha nlamulo ira atu atene mwatene mwene katwaruwe. 31Tchoira Mulugu umala helavo siku nnafuna liye atonga atu atene mwa ibaribari. Muwari motonga mule, Mulugu umusakulra namatonga unafuna za atonga atu. Mutuwa gwenno Mulugu amuvenyihile liye mokwani ira atu atene kakayena ibaribari ira unafuna za tonga gu liye.>>
32Atwale kagavwile mazu oira ukala venya mokwani, kohokala amohiwa karomile mpeta Pawulo. Mbwenye amohi eto kohoira: <<Nnafuna munifundjihegeve mazwala.>> 33Vevale Pawulo ohovenyagavo, liye dowaga. 34Evale kohokalagavo atu kavennyege na liye, kamuharaga. Aliwa kohofiyeda mwezo omuroromela Yesu. Mwa ale kamuroromenle Yesu, mmohi ali mulombwana eriwa Diyonisiyo wa nikuru na andimuwa kagumanetcha nimburo na Areyopago. Mmohiwa ali mwana muhiyana eriwa Damari vamohi na amohiwa.
Chwazi Kounye ya:
Joira ja Anamarumiwa 17: iLolo
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018 Visão Integral