Mwamulizo 31
31
Yakobo yakumutoloka Labani
1Yakobo yakawahulika wana wa Labani vyono wang'ung'ulikaga wakutya, “Lanje, ta, Yakobo vyono yakondya kwigolifya ku soko ye sawo yo sogo yetu.” 2Nayo Yakobo, yakawona vyono sunga na Labani mweneco, yeza si yakumucelelela nha ha lulongozi. 3U Muwaha Mulungu yakamutya Yakobo, “Alu, wuwuye kanyhi ku yisi ye wasogo kuli wanduguzo, nane nowa nili hamonga nagwe.” 4Hobaho Yakobo yakawa kuwatuma wanhu, wabite wakawaceme Laheli na Leya, waze ku nyika kono yadimilaga mitugo zakwe, 5yakawatya, “Nye wagolece zangu, ane nghuwona vyono sogo yenyu, alu yeza si yakunyhelelela nha vyono yanyhelelelaga ha lulongozi. Ninga Mulungu wa baba Isaka, yali hamonga nane. 6Nanye mumanyiye lukulu, vyono namwitumamila u sogo yenyu kwe vilungo vyangu vyose. 7Ninga mulanje, vyono hamba nhavivyo, mwene yakanghonga, yakakawaniza musahala wangu nghanghulo yikumi, ninga hamba nhavivyo, Mulungu siyamukombola yanhamise. 8Lono yanonjelaga yakutya, ‘Zimitugo ze senyhe zose zo zowa wo musahala wako, lanje litewa lyose likalela zo 'senyhe.’ Na yaza kutya, ‘Zimitugo zose ze mabingula zo zowa wo musahala wako, litewa lyose likalela ze mabingula.’ 9Na mu nzila yiyo, vyo Mulungu yazisola zimitugo zo sogo yenyu, yakawa kumhela nene.
10“Mwidaha lyo kutujila wulinda zimitugo, lanje, ane nghalota ndoto, na mu ndoto yiyo, nghawona zimhene zimvulati zose ze mabingula, na ze 'senyhe, na ze bala, zo zazipelaga wulinda i zimhene zinyhekulu. 11Nayo Malayika wo Mulungu, yakalongana nane mu ndoto yiyo, yakanyhema yakatya, ‘Yakobo gwe,’ nane nghedika nghamutya, ‘Ane nili baha.’ 12Nayo yakanyitya, ‘Winule meso gako ta wulanje, nagwe kowona vyono i zimvulati ze mabingula, na ze 'senyhe, na ze bala, zo zikuzipela zimhene zinyhekulu wulinda. Na zizi zose ziwa nhavivyo ku soko vyono niziwona zose zono Labani yakukunozeza. 13Ane yo nene no Mulungu mono nelajila kuli'gwe akulya ku Beteli, kono walisiwanulila i libwe mu nzila yo kulijidila mafuta, hamonga no kumbicila cipingo. Alu nghukunena wuwuce lulu baha mu yisi yiyi, wuwuye ku yisi kono walelelwa.’ ” 14Nawo Laheli na Leya wakamupitula Yakobo wakatya, “Wule, kowa kolili 'fungu lyo lyose, hamba wuhazi wo wose, wono wucisigaliye mu nyumba yo sogo yetu? 15Si yinha yakuciwona ase kotya nha cili wajenzi du? Vyono mwene yaciguza, sunga ne sawo yiyo yono yayibocela lono yaciguziza, yo yiyo yo yakwitumamila. 16Ne sawo yose yono Mulungu yayisolile ku wulawa kuli mwene sogo yetu, ale, yiyo nase yo sawo yetu hamonga ne wana wetu. Holeka nghani yoyose yono Mulungu kokulonjela, ale, ciba wuyihulikaje no kuyityatya.”
17Ale hodu, Yakobo yakawa kwiwikaniza, yakawa kuwapandiza i wanagwe mu zingamiya, hamonga ne wagolece zakwe. 18Yakawa kuzisola ne zimitugo zakwe zose, hamonga ne sawo yakwe yose yono yayisawila mu yisi ya Padani-alamu, yakawa kutuluka yakuwuya ku Kanani kuli sogwe Isaka. 19Na mwi'daha lilyo, Labani yali yabitile ku wucenyenha zingholo zakwe. Kono nyuma, Laheli nayo yakatuga cilejeho co kuhiza i vihwani vye milungu yo wulambi yo sogwe. 20Hodu, Yakobo yakawa kumutoloka Labani, Mwalami, hamba si yamulonjela yaye vyono yali yena wuhile wo kuwuka. 21Ale du, Yakobo yakawa kuzisola zisawo zakwe zose, yakawa kutoloka. Nayo yali yeza kulowoka likolongo lya Efulata, yakawa kubita ku Gileyadi, mu yisi ye matunda.
Labani yakumulonda Yakobo
22Nhondo lizuwa lye kadatu, Labani yakalonjelwa nha vyono Yakobo yatoloka. 23Hodu, Labani yakawasola i wanduguze hamonga no mwene, wakawa kumulonda Yakobo mu nyuma. Vyaza kupuluta vilo mupunghati, nhondo yakawa kumwagana mu matunda mu yisi ya Gileyadi. 24Ninga Mulungu yakamulonjela Labani Mwalami ne cilo mu ndoto, yakamutya, “Ale wilanjililaje, wulecele lukulu kumogofya Yakobo kwa nghani yo yose 'swanu hamba'mbi.”
25Ale, Labani yakamwagana Yakobo. Nayo Yakobo yakawa yakomile lihema lyakwe mwi'tunda. Labani nayo hamonga ne wanduguze, yakakoma lihema lyakwe mu matunda ga Gileyadi. 26Labani yakamutya Yakobo, “Alu nghanici yiyi yono witumile? Na socici kanyhi kuwa kunholoka, kuwa kuwasoleleza ne wanangu nha mateka ku wulugu? 27Alo nhawule kutuluka cinyele nhavivi, kuwa kunghonga, hamba kunonjela nane sume kukwilaga ko wusangalale, kwa nyimbo, na ng'oma hamonga ne masumbi? 28Alo nhawule si wundeceye hamba cilejeho ho sume kuwelaga no kuwanonela wanangu, hamonga ne wezukulu zangu? Mbeka kunoza nghani ya wulele muno muno! 29Manyile vyono ndahile kukutamisa nha vyono nghusaka, ninga u Mulungu wo sogo, kandawila izuwali ne cilo, kawa kunonjela yakutya, ‘Ale wulanjilile, wulecele lukulu kumogofya Yakobo kwa nghani yo yose swanu hamba 'mbi.’ 30Ane manyile vyono agwe watuluka cinyele ku soko ye cisukwa co kusaka wuwuye ku kaya kuli sogo. Ninga alu socici kuhiza vihwani vye milungu yangu?”
31Yakobo yakamupitula Labani yakamutya, “Ane nogopa, nghawa kutya lunji komboka wanago. 32Ninga hamba nhavivyo, munhu wo wose mono kokwijela yena vivyo vihwani vye milungu yako, munhu yuyo yawulagwe. Holeka nghukunena wulajile ha mwande ya wawa wandugu zetu, cinhu cono cako, wucisole.” Ninga Yakobo hamba si yali yamanyile vyono mugolece wakwe Laheli yali yavihizize vihwani vye milungu yo walumbi ya Labani. 33Hodu, Labani yakavilondola vihwani vye milungu yakwe mwi'hema lya Yakobo, na lya Leya, na mwi'hema lya wawalya wetumami wejete we cicekulu, ninga hamba siyavituga yaye. Hanyuma yakawa kuwuka mwi'hema lya Leya, yakenjila mwi'hema lya Laheli. 34Laheli yali yavisola vihwani vivilya vye milungu yo wulambi, yaviwika hasi ye magonelo ge ngamiya, yakawa kwikala mucanyha yayo. Nayo Labani yalondola mwi'hema lyose hamba kuvituga yaye. 35Nayo Laheli yakamutya sogwe, “Gwe baba, nghukunena wunenele, kanyhi wulece kukalala, ane sinosuma kwinuka ha mwande yako, hambi nha nili mu vilo vyangu vyo mwezi.” Labani yakavilondola vihwani vye milungu yakwe, hamba kuviwona yaye. 36Holeka Yakobo yakakolwa ne likuwo muno muno, yakawa kumuwuza Labani yakutya, “Alu 'ne sutya lisutyaci? Hamba wubici wono nitumile, wono wulecile sunga wunhyatilile ko wukali nhavivi? 37Alu kutuga cako cicici, lono wakondya kuyisabamha mitegulo yangu yose? Ale ta wuciwikaje ha mwande ye wandugu zangu awa cinhu cono wuciwene, ho wacilamule! 38Ane nekalana nagwe myaka makumi mejete, na mwi'daha lilyo lyose, hasina hamba ngholo yako, hamba mhene yako yono yahopola, sunga nane nghali sininalya hamba nduwilu ya mwitewa lyako. 39Nghali hamba sinakuletela mutugo wo wose wufwiye wono wuwulagwe na nimu ya mu mbago. Ninga wambuce wuwo, nawudinghulaga nene no mweneco. Hamba izuwa limonga bwete, sinakuletela mutugo wo wose wono wifwiliye, nitye, ali si 'sutya lyangu. Nagwe wukandaya nghulipe, hamba kwihwesa hono mutugo wuwo wahizwa ne misi hamba ne cilo! 40Nhavivyo vyo nekalaga, ku misi lizuwa likanyanya muno muno, na ku cilo nako mbeho yikasuma muno muno, sunga ne zinhongo zikanyala. 41Na mu myaka yiyi yose makumi mejete, nikalaga mu kaya yako. Nane nghakwitumamila myaka yikumi na mine ku soko ye wanago wawa Leya na Laheli, na myaka mutandatu nghawa mudimi we mitugo yako. Ninga hamba nhavivyo, agwe wukawukawaniza musahala wangu nghanghulo yikumi. 42Nane nghulonga mbeka, vyono Mulungu wa baba, u Mulungu wa Abulahamu, Mulungu mono Isaka kamogopaga, mhali yali yawe si yali hamonga nane, mbeka agwe wali wuminje sina hamba cinji co cose. Ninga 'lu, Mulungu yagawona magayo gangu, hamonga no mulimo wono netuma, holeka kakukalipila mu cilo co wele we zuwali.”
Wulagane wa Yakobo na Labani
43Nayo Labani yakamupitula Yakobo yakatya, “I wana awa we cicekulu, wanangu, ne wana awa nawo wanangu, sunga ne zimitugo zizino, mitugo zangu, sunga na vivi vyose vyono wukuviwona baha, vyose vyangu. Ninga 'lu, 'ne, zuwali, ho nosuma kuwatenda wule wanangu hamonga ne wana wawo wono wawalelile? 44Holeka nghukunena, zuwali cilagane ane na gwegwe, i cilagane cico ciwe wuhomelezi muli'se, ane na gwegwe.” 45Hodu, Yakobo yakawa kusola libwe, yakalisimya wima liwe yisumbili lya cikumbucizo. 46Yakobo yakawalonjela i wanduguze yakatya, “Ale mukonghole mabwe.” Nawo wakagakonghola mabwe wakagalunda hamonga. Wakatenga zindigwa zawo wakazilila behi ne lilundo lilyo. 47Nayo Labani yakalicemela lilundo lilyo litagwa lya Yegali-sahaduta, ninga Yakobo yakalicemela litagwa lya Galedi. 48Labani yakatya, “Ililundo lilino, wo wuhomelezi hagati yangu na gwegwe zuwali.” Holeka nayo Labani yakalicema Galedi, 49ne lisumbili lililya yakalicema Mizipa, wo wutya, “U Muwaha Mulungu yacidime lono cili kutali kutali munhu na muyagwe. 50Langa hono wuwagaze du wanangu, hamba lunji hono wutole wacekulu kanyhi wanji si nha wawano, hamba hawe hasina munhu mono yakucihomelela, ninga wumanye vyono Mulungu yo muhomelezi wetu.” 51Hanyuma yayo Labani yakamulonjela kanyhi Yakobo yakatya, “Alu wulanje lilundo lilino, hamonga ne lisumbili lyono wulisimizye gwegwe mweneco hagati yetu agwe na nene. 52Lilundo lilino hamonga ne libwe lili, wo wuhomelezi wono wukulajila vyono, ane sinosuma kulowoka ho nize kuko kwako ho nghutamise, hamba nagwe sikosuma kulowoka lilundo lilino hamonga ne libwe lili ho wuze wunhamise. 53U Mulungu wa Abulahamu no Mulungu wa Naholi, u Mulungu wo sogo yawo, yo yalamule mweneco muli'se.” Hodu, Yakobo yakawa kwilahiza kuli Mulungu mono u sogwe Isaka, kamogopaga. 54Nayo Yakobo yakakumbika kuko kwi'tunda, yakawalalika ne wanduguze waze walye zindigwa hamonga nayo. Nawo wali weza kukondya kulya zindigwa, wakagona ne cilo mwi'tunda. 55Labani yakapinjila kwinuka hakali mitondo muno muno, yakawa kuwanonela wanagwe hamonga ne wezukuluwe, yakawa kuwalugutiza. Hanyuma ho yakawa kutuluka, yakawa kuwuya kwawo.
Chwazi Kounye ya:
Mwamulizo 31: LLKWW
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Cigogo Bible © Bible Society of Tanzania, 2002.