Mwamulizo 30
30
1Nayo Laheli yali yeza kuwona vyono siyakumulelela Yakobo wana, hodu hobaho yakawa kwanza kumuwonela wivu muwahawe Leya, hobaho yakawa kumulonjela Yakobo yakutya, “Gwe Yakobo wumhelaje wana, na hono wulece kumhela du, langa ane nghufwa.” 2Nayo Yakobo yakamukolelwa muno muno likuwo Laheli, no kumutya, “Alu 'gwe Laheli, wukwihwesa vyono ane neza kotya nili Mulungu mono yakwimiye agwe ho wulece kutuga wana?” 3Nayo Laheli yakamupitula yakatya, “Ale, mwitumami wangu Biliha nha yali baha. Holeka musolaje yuyo ho yandelele nane wana, nane ho niwatujile wana muli mwene.” 4Hodu Laheli yakawa kumukombolela Yakobo u mwitumami wakwe. Biliha yawe mugolece wakwe. Nayo Yakobo yakawa kwinjila kuli Biliha. 5Nayo Biliha yakadinghula'nda, yakamulelela Yakobo mwana we cilume. 6Nayo Laheli yakawa kutya, “Mulungu kanhendela yono yili ling'ani, hambi nha kacihulika cililo cangu no kumhela mwana we cilume.” Holeka yakamucemela mwana yuyo litagwa lya Dani. 7Nayo Biliha mwitumami wa Laheli, yakadinghula muda kanyhi, yakamulelela Yakobo mwana yunji kanyhi wa cilume. 8Baho Laheli yakawa kutya, “He! Alu langa! Cesumaniza muno muno no muwaha wangu Leya, ninga alu nakondya kumusumiza.” Holeka yakamucemela mwana yuyo litagwa lya Nafutali.
9Nayo Leya yali yeza kuwona vyono, zisambo hodu zatema, sikolelela lukulu kanyhi, hobaho nayo yakawa kumusola mwitumami wakwe Zilipa, yakawa kumupela Yakobo ho yawe mugolece wakwe. 10Nayo Zilipa yakamulelela Yakobo mwana wa cilume. 11Leya yakatya, “Ka! Nye, ali lyuwa lyangu.” Holeka yakamucemela mwana yuyo litagwa lya Gadi. 12Nayo Zilipa mwitumami wa Leya, yakamulelela Yakobo, mwana yunji wa cilume kanyhi. 13Nayo Leya yakatya, “Ka! Mwene ayi nyemoci yono nayituga! Alu i wacekulu wonyhema nene Nyemo.” Holeka yakamucemela mwana yuyo litagwa lya Asheli. 14Lyali lyeza kufika lidaha lyo kududula wuhemba, Lubeni yakawa kubita mu mawimbi, na mumo mu mawimbi, yakawona nyanya za mu mbago, yakazihepa yakamuletela nyina, Leya. Nayo Laheli yakamutya Leya, “Wayiko Leya, nghukunena wumhelaje nane nyanya za mu mbago nyhefu, zono mwanago yakuleteye.” 15Ninga mwene Leya yakamukalipila yakutya, “Mwene hongo wukwihwesa vyono nghani ndodo yo kumboka mulume wangu, alu kanyhi wukusaka wusole sunga ne zinyanya za mu mbago zono yaziletile mwanangu?” Laheli nayo yakamupitula yakatya, “Hono wumhele zizo zinyanya za mu mbago zo mwanago, holeka Yakobo kokuza yagone kuli'gwe zuwali.”
16Holeka i cinyamihe lono Yakobo yawuyaga yakulawa ku mugunda, Leya yakamumanyhilila musunho, yakabita yakamubocela, yakamutya, “Gwe Yakobo, izuwalili yikunojeye wugone kono kwangu, hambi nha nghwazima agwe kwe zinyanya za mu mbago zo mwanangu Lubeni.” Holeka Yakobo mu cilo cico, yakagona kuli Leya. 17Nayo Mulungu yakawuhulika wulombe wa Leya, Leya yakadinghula'nda, yakamulelela Yakobo mwana we 'hano we cilume. 18Nayo Leya yakawa kutya, “Alu langa, Mulungu yakondya kumhela cihumbilizwa cangu, vyono ane namukombolela mulume wangu, u mwitumami wangu Zilipa.” Holeka yakamucemela mwana yuyo litagwa lya Isakali. 19Leya yakadinghula kanyhi 'nda, yakamulelela Yakobo mwana yunji kanyhi wa cilume, mwana wo mutandatu. 20Leya yakatya, “Mulungu yamhela cipegwa ciswanu muno. Alu mulume wangu komhela lilumbo yiwaha, ku soko nakondya kumulelela wana mutandatu, wana wa cilume wose.” Holeka yakamucemela mwana yuyo litagwa lya Zabuloni. 21Hanyuma yayo kanyhi, yakalela mwana wa cicekulu, nayo yakamucemela litagwa lya Dina.
22Nayo Mulungu yakawa kumukumbucila Laheli, yakawuvumila wulombe wakwe, yakamupela wana. 23Laheli yakadinghula 'nda, yakalela mwana we cilume, yakatya, “Alu Mulungu yakondya kumbusiza cevu cangu.” 24Holeka yakamucemela mwana yuyo litagwa lya Yusufu, yakawa kutuniliza yakutya, “Muwaha Mulungu wunyonjeleze mwana yunji kanyhi wa cilume.”
U wusugu wa Yakobo wukumugolifya
25Na lono Laheli yali yakondya kumulela Yusufu, Yakobo yakamulonjela, u mukwewe Labani yakatya, “Ale, lu, nghukunena, wunghombole, mbuye kwetu kono nalawilila ku yisi yangu. 26Ninga nghukunena, wunghombolele wagolece zangu Leya na Laheli, hamonga ne wanangu wose, wono netujila mu witumami wangu wa kuli'gwe, cibitane nawo wose. Hambi mbeka agwe nha wumanyile muno, vyono nakwitumamila viswanu.” 27Ninga Labani yakatya, “Ale, leka ta, nane nonje. Ane nakondya kugubulilwa, no kumanya, vyono Muwaha Mulungu kandugutiza ku soko yako gwegwe. 28Holeka nane nghukunena wunonjele musahala wono kosaka nghulipe, nane nokulipa.” 29Nayo Yakobo yakamupitula yakatya, “Gwegwe go mweneco, wumanyile manyi manyi nghango nha vyono nakwitumamila, na vyono nali kuzidima zimitugo zako. 30Na kanyhi wumanyile manyi manyi vyono, lono nali nghali si naza kono kwako, agwe wali wina sawo nyhefu du, ninga ku wulawilila ane nali neza kuza, lanje, sawo yako vyono yonjelezeka muno muno, no Muwaha Mulungu yali kukulugutiza ko kose kono nali kubita. Ninga hamba nhavivyo ane lu, ho noyilula nili nyumba yangu no mweneco?”
31Nayo Labani yakamuwuza kanyhi yakatya, “Heya, ninga alu wukuhila nghupele cici?” Yakobo nayo yakamupitula yakatya, “Ane si nosaka agwe, wumhele cinhu cinji cocose. Ane nosuma kujendelela kuzidima zimitugo zako du, hono cilumbanize langa nghani monga du, nayo yoyi: 32Nghukunena wunghombole zuwali ninjile mwi'tewa lye zimitugo zako zose. Ho nizikome no kuziwika siya i zingholo zose zono zina liwala lye senyhe na ze bala, na ze liwala lititu zose, sunga ne zimhene zose zono zina liwala lye senyhe na ze bala nhavivyo. Nazo zizo wo wowa wo musahala wangu. 33Na mu nzila yiyo, holeka wihuwilwa wangu wa kuli'gwe, wokwijela calinze mu vilo vyono vikuza, kolo weza kuza ku wulanga musahala wangu. Na mu nzila yiyo, mhene yoyose yono yisina liwala lye senyhe hamba lye bala, hamba ngholo yoyose yono si ye liwala lititu, hono yijele mwi'tewa lyangu, ale yiyo yowa hizwe.”
34Nayo Labani yakatya, “Ale viswanu! Yiweze nha vyono wulonjile.” 35Ninga mwizuwa lilyo du, Labani yakawa kubita, yakawa kuzikoma zimhene zose zimvulati ze mabingula na zo senyhe, hamonga ne zimhene zose zinyhekulu ze liwala lyo senyhe na ze bala, na zose zono zali zina mabandagu mazelu mu miwili yazo, sunga ne zingholo zose zinhitu, yakawa kuzikombola kuli wanagwe ho wazidime. 36Nayo Labani vikawa kwitemanuka na Yakobo, Labani yakabita kutali muhinzo wa vilo vidatu. Ninga mwene Yakobo yakasigala no kujendelela kuzidima zimitugo za Labani zono zasigala. 37Ale, kono nyuma, nayo Yakobo yakawa kusola mikotya midece ye mibici ye milibina, no mulozi, no muwalamoni, yakayikubula kubula i mabada gayo mikotya yiyo, no kuyinoza yiwe na mabandagu mazelu. 38Yakayisola mikotya yiyo yono yayikubula kubula, yakayisimya wima vidomile ne zimitugo, ha mulambo wo kung'weseza, hanhu hono zimitugo zazaga kung'wa malenga. Nazo zimitugo vyono zatujilaga wulinda baho ha wung'we we malenga, 39holeka zikatawila ha mwande ye mikotya yiyo, na ku soko yiyo zikalela nyana ze liwala lye bingula, na zo senyhe, na ze bala.
40Nayo Yakobo yakazikoma zinyhinda ze zingholo zizo, hanyuma yakawa kuzilanzya wusu wazo kwi 'tewa lye zimitugo za Labani zono zina liwala lye bingula ne zinhitu. Na mu nzila yiyo, Yakobo yaketujila litewa lyakwe nayo mweneco, hamba si yazitowelela kanyhi ne litewa lye zimitugo za Labani. 41Nayo Yakobo nhondo zose lono yawonaga i mapango go kutujila wulinda zimitugo gafika, yayisolaga i mikotya yiyo, kawa kuyiwika mu milambo yo kuzing'weseza, ha mwande ye zimitugo zono zina miwili miswanu, ho zisume kutawila ha mikotya yiyo. 42Ninga Yakobo siyayiwikaga i mikotya yiyo, ha mwande ye zimitugo zono zisina miwili miswanu, mu cipango lono zatujilaga wulinda. Na mu nzila yiyo, zimitugo zono zali zigandile, zikawa za Labani, na azilya zono zina miwili miswanu, zikawa za Yakobo. 43Ale Yakobo yakagolipa muno muno, yakawa yena matewa mawaha muno ge zimitugo, hamonga ne wetumami we cicekulu na we cilume, hamonga ne zingamiya ne zindogowe.
Chwazi Kounye ya:
Mwamulizo 30: LLKWW
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Cigogo Bible © Bible Society of Tanzania, 2002.