Wóɖómà 11
11
Gèɖèpɔ́ɔ̀ dyé Éézùɖùɛ̀-nyɔ̀ ɓěɔ̀ wìǐn
1Púɛɛ, ḿ diè ɖɛi, ké ḿ ɖá Gèɖèpɔ́ɔ̀ ɖǎ ɔ nyɔ ɓěɔ̀ ɓɔ́ cáe? Hée, ɔ se ná nì. Ḿ mìɔùn mɔ̀ Éézùɖùɛ̀-nyɔ̀. Ḿ mɔ̀ Ééɓòɖòhɛ̃́ɛ̀ nyúà-dyú. Ḿ sɔ̀ Bɛ̃́címà nììn xwéɖé-dùɔ̀ mú. 2Gèɖèpɔ́ɔ̀ se ɔ nyɔ ɓě ɓɛ́ ɔ ɖǎ ma dyí dyuò kĩ́ín nyɛɛ ɓɔ́. Ɓě se ɖɛ ɓɛ́ Gèɖèpɔ́ɔ̀-cèè-ɖɛ̀ɔ̀ cɛ̃ ɓá Ìɖáájɔ̀ jè dyí, ti ɓɛ́ ɔ nì ma Gèɖèpɔ́ɔ̀ ɓaàǔn ɓó Éézùɖùɛ̀-nyɔ̀ ɓěɔ̀ ɖɛ gbà nyu jèɛɛ dyuòò? Ɔ ɖá, 3“Bounɓo, wa ɖǎ nì kpáá-ɖɛ̀-cɛ̃-nyɔ̀ ɓěɔ̀ ɖáɓá, ké wa ɖǎ nì sáa-kɔ̃-zàìn-gbàà ɓěɔ̀ wáɖá. Ḿ ɖòǔn sèǎ, ké wa mɔ́ ḿ ɖáɓáa dyi ɖekè.” 4Kɛɛ ɖɛ́ Gèɖèpɔ́ɔ̀ cɛ̃ ma ɔ gboɛ́? Ɔ ɖá, “Ḿ ɖǎ Éézùɖùɛ̀-nyɔ̀ ɓěɔ̀ nyɔ-kpò táázĩ̀ìn mɛ̀nɛ̌ìn-sɔ̃́ ɓó sè ɓó ḿ mìɔùn bìì, ké wa séè Béò dyúa dú hwuɖu taɓa.” 5Ké kà dyúáɖòɔ̀ kǎà nyɔ xwéɖé wè ɓɛ́ Gèɖèpɔ́ɔ̀ kpeɖe nɔ̀mɔ̀ dyíinɔ̀ ɖǎ gãa nì ɓó tiɛ̀ǐn. 6Kɛɛ Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ dyiɛ nyuín, nìí, ɔ se nyɔǔn-dyùɛ̀ nyuu-ɖɛ̀ ɖe. Ɔ dyiɔ́ nyɔǔn-dyùɛ̀ nyuu-ɖɛ̀ jǔǐn, nìí, Gèɖèpɔ́ɔ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ seɔ́ xwíníín nìà kɛ ɓéɖéɛ mu ɖe.
7Ɖɛ́ kɔó dyíɛ́? Éézùɖùɛ̀-nyɔ̀ ɓěɔ̀ se ɖɛ ɓɛ́ wa mɔ́ ma dyiɛɛ dyé. Nyɔ ɓě ɓɛ́ Gèɖèpɔ́ɔ̀ ɖǎ ma gãa dyéɛ ma, kɛɛ Gèɖèpɔ́ɔ̀ nyuɛ ké nyɔ tɔ̀ɔ̀ ɓěɔ̀ kàmà ɖɛ múin wɔ̃́uń, 8kà Gèɖèpɔ́ɔ̀-cèè-ɖɛ̀ɔ̀ nyuà cɛ̃ɛ kɛ. Ɔ cɛ̃ɛ, ké ɔ ɖá,
“Gèɖèpɔ́ɔ̀ nyuɛ ké wa zuɖu hwòɖǒ kɔ̃in.
Gèɖèpɔ́ɔ̀ nyí wa dyéɖé ɓě se dyi dyéɛ ɓɛ́ìn nyɛ kè ɖùǔ se ɖɛ ɖò wɔ̃́ɔ ɓɛ́ìn nyɛ.
Ké kà ɔ nì ke ɓó tiɛ̀ mú.”
9Ké Dèɓé ɖá,
“Waà ɖii-ɖɛ̀-hwɔ̀ ɓěɔ̀ mɛ mɔ̀ xwáɖá-gbǎ-mú kè kpàǎ ɓó wa bìì.
Wa mɛ mɔ̀ ɖɛ ké nyu wa ké ɓuɖuɛ kè waà ɖɛ gbà ɓěɔ̀ pɛ́ɛ̀-ɖɛ̀.
10M̀ mɛ nyuɛ ɓɛ́ waà dyéɖé ɓěɔ̀ ké kɔ̃in kpè, ɓɛ́ wa ní kɔ̃̀ ɖà dyi dyé.
M̀ mɛ nyuɛ ɓɛ́ waà kɔ̃-kpà ɓěɔ̀ ké se náá dyí pɛ́ɛ̀ ɓɛ́ìn ɖe.”
11Ké ḿ diè ɖɛi, ké ḿ ɖá wa gbǒ ɓɛ́ wa ké ɓuɖu gàná cáà? Hée, ɔ se ná nì. Sepóɛɖé wa ɖǎ ɖɛ gbà nyu jèɛɛ, ɓóɖó-dù kà kò ɖò ɓěɛ̀ nyɔ ɓěɔ̀ ɖǎ pó-póɔ̀ ɓéɖé, ɓɛ́ ɔ ké Éézùɖùɛ̀-nyɔ̀ ɓěɔ̀ hwɛ̀nɛ̌ǐn po. 12Waà ɖɛ-gbà-nyu-nyuɔ̀ dyà bã-bã ɓóɖó-kpàà bìì, ké waà se ɖɛ ɖò ɓéɖéɔ̀ dyà bã-bã ɓó ɓóɖó-dù kà kò ɖò ɓěɛ̀ nyɔ ɓěɔ̀ bìì. Ɔ dyi ná nìǐn, wa ɖǎ kɔ̃ kpá, ké wa ɖǎ ɖé hwɛ̀ǐn, nìí, bã-ɖɛ̀ɔ̀ mu dyí vòɛ̌n ziìn.
Ɓóɖó-dù kà kò ɖò ɓěɛ̀ nyɔ ɓěɔ̀ pó-póɔ̀
13Kɛɛ ḿ ɓéɖé ɖɛ ɖò ɓɛ́ ḿ kéɛ ɓě mɔ̀ ɓóɖó-dù kà kò ɖò ɓěɛ̀ nyɔ ɓěɔ̀ kɛɛ gbo cɛ̃. Ḿ mɔ̀ àpɔ́sò ɓó ɓóɖó-dù kà kò ɖò ɓěɛ̀ nyɔ ɓěɔ̀ bìì, ké ḿ ɓàìn ní kũ̀àɔ̀, 14ɓɛ́ ḿ ké ḿ mǔè Júù-nyɔ̀ tɔ̀ɔ̀ ɓěɔ̀ hwɛ̀nɛ̌ǐn po, ɓɛ́ ḿ ké wa ɖíɛ́ ɓě póìn. 15Gèɖèpɔ́ɔ̀ ɓɔ́ ma wa, ké ɔ nyuɛ ké Gèɖèpɔ́ɔ̀ kè ɓóɖó-kpàà mɔ̀ǎ ma nyɔ dyúáɖò ɖe. Ɔ dyi ná nìǐn, ɔ jǔ ké Gèɖèpɔ́ɔ̀ dyi wa dyi kpɔ̃ín, nìí, xwɛ̌ ɔ mu nììn nyɛ́? Nìí, ɔ nì kà wa ɖǎɔ̌ kà mɛ́, ké wa ɖǎɔ̌ kà fɛ̀ɛ̀ ɓéɖé ɖe cáa.
16Ɔ jǔ ké bɛɖɛɛ̀ɔ̀ kĩ́ín-kĩ́ínɔ̀ dyi Gèɖèpɔ́ɔ̀ kɔ̃̀ɔ̀-ɖɛ̀ jǔǐn, nìí, ɔ séínɔ̀ mɔ̀ǎ ɔ kɔ̃̀ɔ̀-ɖɛ̀. Ké Gèɖèpɔ́ɔ̀ dyi cu ɖòɛ̀ gmɛ̀nɛ̀ɛ̀ kɔ̃̀ ní, nìí, ɔ mɔ̀ nyɔ kɔ̃̀ǎ ɔ ɖɔ́ ɓěɔ̀ ɖekè. 17Kɛɛ Gèɖèpɔ́ɔ̀ jaɖa ma cuɔ̀ ɖɔ́ ɓěɔ̀ ɖò, ké ɔ nɛ́ìn ɔ́ɖè-gɔ̃̀ɔ̀ nyɔ mɛà ɖé xwáɖá xwíɖíiɛɛ wáún, ɓɛ́ ɔ kéɛ pá dyí ɖú. Ɔ nyuɛ náa, ɓɛ́ ɔ kè ɔ́ɖè-gɔ̃̀ɔ̀ ké gmɛ̀nɛ̀ɛ̀ kè cɛ̃ nɔ̀mɔ̀ dyíinɔ̀ dyí poìn. Ɓě mɔ̀ ɓóɖó-dù kà kò ɖò ɓěɛ̀ nyɔ ɓěɔ̀ kè ɔ́ɖè-gɔ̃̀ɔ̀ nyɔ mɛà ɖé xwáɖá xwíɖíiɛɛ hwɔìn ní. 18Ɔ dyi ná nìǐn, nìí, ɓěǐn ɖá ɓɛ́ ɓě kéɛ cɛ̃ kà ɓɛ́ ɓě ɓúá dyí ké ɓě zi cu-ɖɔ́ tɔ̀ɔ̀ ɓěɔ̀ mɔ̀ùn dyíɛ. Ɓě dyiɛ náa cɛ̃ín, ɓě mɛ dyuòɛ̀ kà ɓě mɔ̀ nyɔ se gmɛ̀nɛ̀ɛ̀ɔ̀ dyi kpɔ̃, kɛɛ gmɛ̀nɛ̀ɛ̀ɔ̀ mɔ̀ nyɔ kpɔ̃ ɓě dyiɛ.
19Kɛɛ ɓě muɛ cɛ̃ìn, ɓɛ́ ɓě ké níiń, “Gèɖèpɔ́ɔ̀ jaɖa ma ɓó ɖɔ́ ɓě, ɓɛ́ ɔ ké ɓó à nɛ́ìn jè.” 20Ɔ mɔ̀ jǎà. Gèɖèpɔ́ɔ̀ jaɖa ma ɓó wa, sepóɛɖé wa se ma hwìɖǐǐ-taɓa-taɓa ɖò ɓéɖé. Kɛɛ hwìɖǐǐ-taɓa-taɓa ɖòùn mɔ̀ nyɔ nyuɛ ké ɓě nyànàà dyiɛ̀. Ɔ jèɛɛ, ɓěǐn ɖá ɓɛ́ ɓě ké ɓě mìɔùn dyí ɓúáìn, kɛɛ ɓě mɛ ma mú, 21sepóɛɖé Gèɖèpɔ́ɔ̀ se ma cuɔ̀ mìɔùn nììn ɖɔ́ɔ̀ wìǐn dyéín, nìí, ɔ se ɓě mɔ̀ùn wìǐn dyéɛ mu ɖekè. 22Ɓě mɛ dyuòɛ̀ dyí kà Gèɖèpɔ́ɔ̀ kpeɖe nɔ̀mɔ̀ dyíin, ɔ kè kà ɔ kpɔ̃ nyɔ kóɖó-kóɖóɛ. Ɔ kpɔ̃ nyɔ ɓě ɖǎà ɓuɖuɛɛ kóɖó-kóɖó, kɛɛ ɔ kpeɖe nɔ̀mɔ̀ dyíin ɓó ɓě gbo, ɔ jǔ ké ɓě dyi ɔ kpeɖe nɔ̀mɔ̀ dyíinɔ̀ xwíɖíi nì kánáá pūín. Ɔ jǔ ké ɓě seɛ náa nyuín, nìí, ɓě mɔ̀ùn mu ɓó cɛ̃̀ìn ɖekè. 23Kɛɛ ɔ jǔ ké Júù-nyɔ̀ ɓěɔ̀ dyi hwìɖǐǐ-taɓa-taɓa ɓéɖé ɖe ní, Gèɖèpɔ́ɔ̀ mu wa mɔ̀ùn cuɔ̀ wáún nɛ́ìn, sepóɛɖé ɔ ɓéɖé kpé ɓɛ́ ɔ ké wa cuɔ̀ wáún nɛ́ìn ɖe. 24Gèɖèpɔ́ɔ̀ cɛ̃ ma ɓě ɔ́ɖè-gɔ̃̀ mɛà ɖé xwáɖá xwíɖíiɛɛ dyí, ké ɔ nɛ́ìn ma ɓě ɔ́ɖè-gɔ̃̀ɔ̀ nyɔ nìà hwɔɖɔún wɛ̃ɛ wáún. Nyɔ ní nyu kǎà ná cu jɛ́ɛ́ cá. Kɛɛ ɔ jǔ ké Gèɖèpɔ́ɔ̀ dyi ɖɛa nyuɛ ɓɛ́ìn ní, nìí, ɔ se mú kàmàǎ mu, ɓɛ́ ɔ ké ɔ́ɖè-gɔ̃̀ɔ̀ mìɔùn nììn ɖɔ́ɔ̀ ɓó nɛ́ìn ɖe.
Gèɖèpɔ́ɔ̀ wììɔ̀ nì nyɔ séín bìì
25Ní ɖíí ɓě, ḿ mɔ́ ɓɛ́ ɓě ké ɖɛ ɖò múin wɔ̃́, ɓɛ́ ɓě ní kɔ̃̀ ɖà ɓě mìɔùn dyí ɓúáìn. Ɔ mɔ̀ ɖɛ ɓɛ́ nyɔ se ma dyí dyuò kĩ́ín nyɛ. Ɖɛɔ̀ kɛ̀. Ɔ mɔ̀, Éézùɖùɛ̀-nyɔ̀ ɓěɔ̀ wáká ɖò mu ɖɛ múin wɔ̃́uń kàmàùn, ɓɛ́ ɓóɖó-dù kà kò ɖò ɓěɛ̀ nyɔ ɓěɔ̀ nyɔ ɓě muà ɖé dyáùn wɛ̃ɛ ké ɖé hwɛ̀ kĩ́ín. 26Ɔ ɖǎ ná nìǐn, Éézùɖùɛ̀-nyɔ̀ séín ɓěɔ̀ mu póùn. Ɔ mɔ̀ ɖɛ ɓɛ́ Gèɖèpɔ́ɔ̀-cèè-ɖɛ̀ɔ̀ cɛ̃ ma kɛ. Ɔ ɖá,
“Nyɔ-póìn-nyɔ̀ɔ̀ mu ɖé Zádyɔún-hwɔ̀ɖɔ̀ɔ̀ mú sɔ̀ùn,
ké ɔ mu Gèɖèpɔ́ɔ̀ ɖɛ-gbà-bũ̌-nyu-kpèɖè ɓɛ́ Jékɔ̀ɛ̀ xwíníín-dyù ɓěɔ̀ ɓéɖéà kɛɛ wa mú zàùn.
27Ké ɖɛ nìà kɛ mu ḿ kè waà dèè-wùɖù jǔùn,
ti ní mu waà nàmàǔn ɓěɔ̀ wa bũ̌in zàùn wɛ̃.”
28Ɓá bɔ̃̌ nɔ̀mɔ̀ dyíinɔ̀ dyíɛɛ, Éézùɖùɛ̀-nyɔ̀ ɓěɔ̀ mɔ̀ Gèɖèpɔ́ɔ̀ mú-nyɛ́-nyɔ̀ ɓě ɓó ɓě jè, kɛɛ ɓá Gèɖèpɔ́ɔ̀ nyɔ-gã-gãɔ̀ dyíɛɛ, Gèɖèpɔ́ɔ̀ ɖɛ̀ɓɛ̀ wa mú ɓó wa ɓǎ nììn ɓǎ ɓěɔ̀ jè. 29Sepóɛɖé Gèɖèpɔ́ɔ̀ ní ɖú ɖɛ ɓě ɓɛ́ ɔ nyí nyɔǔn pídyi kɛ kè ɔ nyɔ-ɖá-ɖáɔ̀ dyí ɖe. 30Ɓě se ma Gèɖèpɔ́ɔ̀ wuɖu nyu kĩ́ín, kɛɛ Gèɖèpɔ́ɔ̀ ɖǎ ɓě wìǐn dyé kàǔn, sepóɛɖé Éézùɖùɛ̀-nyɔ̀ ɓěɔ̀ se ma Gèɖèpɔ́ɔ̀ wuɖu nyu. 31Ké kà dyúáɖòɔ̀ kǎà wa se Gèɖèpɔ́ɔ̀ wuɖu nyu kàǔn, ɓɛ́ Gèɖèpɔ́ɔ̀ ké wa mɔ̀ùn wìǐn dyé, kà ɔ nyuà ɓě mɔ̀ùn wìǐn dyéɛ kɛ. 32Sepóɛɖé se Gèɖèpɔ́ɔ̀ wuɖu nyuɔ̀, ɔ hwɔìn kpɔɖɔ ɖeín, ké Gèɖèpɔ́ɔ̀ ɖǎ nyɔ séín ɖé po, ɓɛ́ ɔ ké wa séín wìǐn dyé.
Gèɖèpɔ́ɔ̀ ɓàìn-ɓàìn
33Kē! Gèɖèpɔ́ɔ̀ bã-bãɔ̀ kè ɔ hwòɖǒ-fɔ̀nɔ̀-fɔ̀nɔ̀ɔ̀ ɔ kè ɔ ɖɛ-dyuò-dyuòɔ̀, wa zi kpéín ɓúáuń mìɔ. Ɔ ɖɛ-wɔ̃-po-po ɓěɔ̀, nyɔ ɖò seɛ múin gmɔìn ɓɛ́ìn, ké à se ɔ hwìè ɓěɔ̀ bɛ̃̌ nàìn ɓɛ́ìn. Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá,
34“Nyɛ́ mɔ̀ nyɔ dyuò Bounɓoɔ̀ hwìɖǐi-poìn-ɖɛ̀ dyíɛ́?
Nyɛ́ mɔ̀ nyɔ ɖǎ ɔ náún po ɖòɛ́?
35Nyɛ́ mɔ̀ nyɔ ɖǎ Gèɖèpɔ́ɔ̀ nyíí-ɖɛ̀ ɖò nyí ɖò kĩ́ín,
nìí ɓɛ́ Gèɖèpɔ́ɔ̀ kéɛ ɖe pɛ́ɛ̀ ɖeɛ́?”
36Sepóɛɖé ɖɛ séín sɔ̀ìn ɖé ɔ xwaún, ké wa dyììn ɖé ɔ mú, ké wa mu ɔ gbo ɖe. Ɔ mɛ ɓéɖé ɓàìn-ɓàìn ɓó sè-ná-sèɛ̀ tiín. Kǎà ɔ mɛ nì.
Chwazi Kounye ya:
Wóɖómà 11: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.