Wóɖómà 10
10
1Ní ɖíí ɓě, Éézùɖùɛ̀-nyɔ̀ ɓěɔ̀ pó jè kpɔ̃ ḿ hwòɖǒ mìɔ. Ḿ nì Gèɖèpɔ́ɔ̀ ɓaàǔn ɓóɛ jè tee. 2Ḿ nyu wa zàse kà ɓɛ́ kpé kpá wa dyí ɓó Gèɖèpɔ́ɔ̀ ɓiè jè, kɛɛ wa seɛ fɔ̀nɔ̀-hwòɖǒ ɓéɖéɛ. 3Sepóɛɖé wa se dyí-sɛ́ɖɛ́ìn-sɛ́ɖɛ́ìn ɓɛ́ Gèɖèpɔ́ɔ̀ nyíà nyɔɛɛ jè dyí dyuò, ké wa vɔ̃ ɓɛ́ wa ké wa mìɔùn dyí sɛ́ɖɛ́ìn. Wa se ma wa mìɔùn Gèɖèpɔ́ɔ̀ dyí-sɛ́ɖɛ́ìn-sɛ́ɖɛ́ìnɔ̀ xwáɖáún zàìn. 4Sepóɛɖé Kɛ́ɖɛ́ì mɔ̀ gmaɔ̀ mánáín-hwɛ̀-hwɛ̀, ɓɛ́ ɔ ké nyɔ kã̀ìn séín ɓɛ́ wa mu hwìɖǐǐ-taɓa-taɓa ɓéɖéìn nyɛɛ dyí sɛ́ɖɛ́ìn.
Pó-póɔ̀ nì ɓó nyɔ séín bìì
5Ɖɛ Mózè céè ma ɓá dyí-sɛ́ɖɛ́ìn-sɛ́ɖɛ́ìn dyìàìn ɖé gmaɔ̀ múɛɛ jè dyíɛɛ, ɔ kɛ̀. Ɔ ɖá, “Nyɔ mu ní gma ɓěɔ̀ dyi kpɔ̃ùn wɛ̃ɛ mu cĩ́ìn dyììn ɖéɛ mú.” 6Kɛɛ dyí-sɛ́ɖɛ́ìn-sɛ́ɖɛ́ìn dyìàìn ɖé hwìɖǐǐ-taɓa-taɓa múɛɛ ɖá, “Mɔ̀ǔn ɖá ɓɛ́ m̀ kéɛ ɖéɛ m̀ mìɔùn mú cɛ̃, ɓɛ́ m̀ ké níiń, ‘Nyɛ́ mu ɖé dyɔún muùn wɛ̃́?’ ” (Ɔ xwíníín mɔ̀, ɓɛ́ ɔ ké Kɛ́ɖɛ́ì nɔ̄ ɓíɖíi dyà.) 7“Mɔɔ ɓɛ́ m̀ ké níiń, ‘Nyɛ́ mu ɖé hwuɖu muùn vɛ̃in nyɛ́?’ ” (Ɔ xwíníín mɔ̀, ɓɛ́ ɔ ké Kɛ́ɖɛ́ì ɖé gĩɔ zà.) 8Kɛɛ ɖɛ́ dyí-sɛ́ɖɛ́ìn-sɛ́ɖɛ́ìn cɛ̃ɛ́? Ɔ ɖá, “Wuɖuɔ̀ nì dà m̀ gbo. Ɔ nì m̀ wĩín, ké ɔ nì nì hwòɖǒ bũ̌.” (Ɔ xwíníín mɔ̀, wuɖu ɓá hwìɖǐǐ-taɓa-taɓa dyíɛɛ kɔ̃̀ jè à poà zio kɛ̀.) 9Sepóɛɖé ɔ jǔ ké m̀ dyiɛ mú wɔ̃́ìn ɖé m̀ wĩín kà ɓɛ́ Jízɛ̀ mɔ̀ Bounɓoɔ̀ kɛ, ké m̀ dyiɛ hwìɖǐǐ taɓa ɖé nì hwòɖǒ-dyùàɔ̀ mú kà ɓɛ́ Gèɖèpɔ́ɔ̀ zà ma ɔ gĩɔ kɛɛ ní, nìí, nì mu póùn. 10Sepóɛɖé nyɔǔnɛ̀ hwòɖǒ-dyùàɔ̀ mɔ̀ nyɔ ɓéɖé hwìɖǐǐ-taɓa-taɓa, ké ɔ nyuɛ ké nyɔǔn sɛ́ɖɛ́ìn dyí. Ké ɔ wɔ̃ɔ̀ mɔ̀ nyɔ wɔ̃́ìn mú, ké ɔ nyuɛ ké ɔ pó. 11Gèɖèpɔ́ɔ̀-cèè-ɖɛ̀ɔ̀ ɖá, “Nyɔ mɔ̀ nyɔ mu ɔ hwìɖǐǐ taɓaùn wɛ̃ɛ, dɛ̃ se ɔ nyuɛ́ mu.” 12Mú-ge-ge ɖò se Júù-nyɔ̀ ɓěɔ̀ kè ɓóɖó-dù kà kò ɖò ɓěɛ̀ nyɔ ɓěɔ̀ pṹa nì. Bounɓo dyúáɖòɔ̀ mɔ̀ nyɔ séínɛ̀ Bounɓo, ké ɔ nyí ɔ bã-ɖɛ̀ ɓěɔ̀ nyɔ séín ɓě ɓɛ́ wa ɖá ɔ nyɛ́nɛ́ɛ. 13Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Nyɔǔn séín mu Bounɓoɔ̀ nyɛ́nɛ́ɔ̀ ɖáùn wɛ̃ɛ mu póùn.”
14Kɛɛ xwɛ̌ nyɔǔn ɓɛ́ìn nyɔ ɓɛ́ wa séè hwìɖǐǐ taɓa keɛɛ nyɛ́nɛ́ ɖáa kɛ́? Ké wa séè nyɔɔ̀ jè wɔ̃́ ke ní, xwɛ̌ wa ɓɛ́ìn ɔ hwìɖǐǐ taɓaa nyuɛ kɛ́? Ké xwɛ̌ wa ɓɛ́ìn nyɔɔ̀ jè wɔ̃́ɔ nyuɛ, ɔ jǔ ké nyɔ ɖò se ɔ jè wa gbo cɛ̃ín nyɛ́? 15Ɔ jǔ ké wa se nyɔ ɖò ɖoɓoín, xwɛ̌ nyɔɔ̀ ɓɛ́ìn ɔ jè cɛ̃ɛ nyuɛ kɛ́? Kà ɓɛ́ Gèɖèpɔ́ɔ̀-cèè-ɖɛ̀ɔ̀ nyuà cɛ̃ɛ kɛɛ, ɔ kɛ̀. Ɔ ɖá, “Ɔ mɔ̀ ɖɛ kpa ɖɛ cá ɓɛ́ nyɔ ké kíá ɓɛ́ ɔ nì bɔ̃̌ nɔ̀mɔ̀ dyíin dyàǔn wɛ̃ɛ dyiɛ dyé.” 16Kɛɛ wa séín se bɔ̃̌ nɔ̀mɔ̀ dyíinɔ̀ nyu. Sepóɛɖé Àzédyà cɛ̃ɛ, ké ɔ ɖá, “Bounɓo, nyɛ́ mɔ̀ nyɔ ɖǎ à bɔ̃̌ɔ̀ jè dyi kpɔ̃ dyɛ mɔ̀ùn wɛ̃́?” 17Nìí, à ɓéɖé hwìɖǐǐ-taɓa-taɓa ɓó ɖɛ ɓɛ́ à wɔ̃́à kɛɛ jè. Ké ɖɛ ɓě ɓɛ́ à wɔ̃́à kɛɛ dyììn ɖé Kɛ́ɖɛ́ì jè cɛ̃-cɛ̃ mú.
18Kɛɛ ɖɛ ḿ nì dyi dièɛ̌n nyɛɛ, ɔ kɛ̀. Wa séèɛ̀ wɔ̃́ɔ̀? Hée, wa ɖǎa wɔ̃́. Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá,
“Waà wuɖuɔ̀ ɓeìn ɓóɖó-kpàà dà séín dyi.
Nyɔǔn-dyù ɓɛ́ìn wuɖuɔ̀ wɔ̃́ɔ ɖé ɓóɖó-kpàà sèìn-naín.”
19Ḿ nì ɖɛi dièɛ̌n ɖe. Éézùɖùɛ̀-nyɔ̀ ɓěɔ̀ se ma bɔ̃̌ɔ̀ múin wɔ̃́ɔ̀? Kĩ́ín nyɛɛ, Mózè cɛ̃ɛ ma, ké ɔ ɖá,
“Ní mu ɓóɖó-dù se ɖɛ kpaa dyí ɖúùn, ɓɛ́ ḿ kéɛ ɓě hwɛ̀nɛ̌ǐn pòìn.
Ní muɛ nyuùn ɓɛ́ ɓě ké ɓóɖó-dù ɓɛ́ ɔ seà hwòɖǒ fɔ̀nɔ̀ɛɛ jè dyoɖoún kpá.”
20Ké Àzédyà se fɛ̃̀ìn, ké ɔ ɖá,
“Nyɔ ɓě ɓɛ́ wa se ma ḿ dyi mɔ́ kɛɛ, wa dyé ma ḿ.
Ḿ ɖǎ ḿ mìɔùn nyɔ ɓě ɓɛ́ wa se ma ḿ ɓaà kɛɛ dyí tɛ̀mɛ̀ìn.”
21Kɛɛ ɖɛ ɔ cɛ̃ ma ɓá Éézùɖùɛ̀-nyɔ̀ ɓěɔ̀ dyíɛɛ, ɔ kɛ̀. Ɔ ɖá, “Ḿ gba ma sɔ̃ xwáɖá ɓó nyɔ ɓě ɓɛ́ wa se ní wuɖu nyu, ké wa vɔ̃à ḿ gboɛɛ jè.”
Chwazi Kounye ya:
Wóɖómà 10: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.