Wóɖómà 12
12
À fɛ̀ɛ̀ɔ̀ mɔ̀ Gèɖèpɔ́ɔ̀ kũ̀à-mú-nyùìn-ɖɛ̀
1Ɔ jèɛɛ, ɖíí ɓě, ɓó Gèɖèpɔ́ɔ̀ wìì ɓɛ́ ɔ ɓéɖéà ɓó nyɔ gboɛ jèɛɛ, ḿ nì ɓě ɓaàǔn, ɓɛ́ ɓě ké ɓěɛ̀ kpóɖó-dyùàɔ̀ Gèɖèpɔ́ɔ̀ xwáɖáún zàìn, ɓɛ́ ɓěɛ̀ fɛ̀ɛ̀ɔ̀ ké Gèɖèpɔ́ɔ̀ nyíí-ɖɛ̀ jǔ kánáá pū, ɓɛ́ ɔ ké se kɛɛ ɖò ɓéɖé, ɓɛ́ ɔ ké Gèɖèpɔ́ɔ̀ hwìɖǐi dè. Ɖɛ nìà kɛɛ, ɔ mɔ̀ ɓiè-ɓiè ɓɛ́ ɓě mɔ̀à nyɔ ɓéɖéà hwìɖǐi-poìn-hwòɖò-dyùà kɛɛ ké nyuɛ. 2Ɓěǐn ɖá ɓɛ́ ɓěɛ̀ kpeɖe ké dyí zàìn, ɓɛ́ ɔ ké nì kà ɓóɖó-kpàà nyɔ ɓěɛ̀ kpeɖe nìà kɛ. Kɛɛ ɓě mɛ wɔ̃́ ɓɛ́ Gèɖèpɔ́ɔ̀ kéɛ nyu, ɓɛ́ ɓěɛ̀ hwìɖǐi-poìn-poìnɔ̀ ké ɖɛ ɖìè jǔ, ɓɛ́ ɓěɛ̀ kpeɖe ké gbo zĩàìn gàná cá. Nìí, ɓě mu ɖɛ ɓě ɓɛ́ Gèɖèpɔ́ɔ̀ mɔ́ jɛ́ɛ́ kɛɛ dyí dyuòùn, ɓɛ́ ɓě ké ɖɛ mɔ̀ ɖɛ nɔ̀mɔ̀ dyíin kè ɖɛ dè Gèɖèpɔ́ɔ̀ hwìɖǐi ɔ kè ɖɛ mɔ̀ ɖɛ sɛ́ɖɛ́ìn dyí jɛ́ɛ́ cáa dyí dyuò.
3Ɖɛ ɓɛ́ Gèɖèpɔ́ɔ̀ kpeɖe nɔ̀mɔ̀ dyíinɔ̀ ɖǎ ma ḿ nyíɛɛ, ɔ kɔ̃̀ jè ní muà nyɔ séín ɓě nìà ɓě hwìɛ̀ kɛɛ gbo cɛ̃ìn nyɛ̀. Ɔ mɔ̀, ɓěǐn ɖá ɓɛ́ ɓě ké hwìɖǐi poìn kà ɓě ɓúá dyí mìɔ kɛ. Kɛɛ ɓě mɛ poìn ɖɛ ɓě ɓɛ́ìn nyuɛ kɛɛ jè hwìɖǐi nɔ̀mɔ̀ dyíin, kà ɓɛ́ Gèɖèpɔ́ɔ̀ nyuà ɓě ɖò-ɖò séín hwìɖǐǐ-taɓa-taɓa nyíɛ kɛ. 4Nyɔǔn-dyùɛ̀ kpóɖó-dyùàɔ̀ ɓéɖé wáká ɓáún-ɓáún ɓě, ké wáká séín ɓěɔ̀ se kũ̀à dyúáɖòɔ̀ ɓéɖé. 5Kà dyúáɖòɔ̀ kǎà à mɔ̀ùn vòǐ dyɛ jǎà, kɛɛ à mɔ̀ kpóɖó-dyùà dyúáɖò ɖé Kɛ́ɖɛ́ì mú. À ɖò-ɖò mɔ̀à kpóɖó-dyùàɔ̀ wáká ɓěɛɛ, à ɓáìn ɓàìn dyí. 6Gèɖèpɔ́ɔ̀ kpeɖe nɔ̀mɔ̀ dyíinɔ̀ nyí à nyíí-ɖɛ̀ ɓě, ké nyíí-ɖɛ̀ ɓěɔ̀ kpa kòɛ̀ ɖò-ɖò. Ɔ jǔ ké à nyíí-ɖɛ̀ɔ̀ dyi ɓɛ́ à ké wuɖu ɓě ɓɛ́ Gèɖèpɔ́ɔ̀ dèìn à wĩín nyɛɛ cɛ̃-nyɔ̀ jǔǐn, nìí, à mɛ nyuɛ kà à ɓéɖé hwìɖǐǐ-taɓa-taɓa à kéɛ nyuɛ. 7Ɔ jǔ ké à nyíí-ɖɛ̀ɔ̀ dyi ɓɛ́ à ké nyɔ ɓě gbo kpá kɛɛ jǔǐn, nìí, à mɛ nyuɛ náa. Nyɔ-ɖɛ-tɛ̀mɛ̀ìn-nyɔ̀ ɓéɖé ɓɛ́ ɔ ké ɔ nììn nyíí-ɖɛ̀ɔ̀ kũ̀à mú nyùìn ɖé nyɔ-ɖɛ-tɛ̀mɛ̀ìn-tɛ̀mɛ̀ìn mú. 8Nyɔ kɔ̃̀ nììn nyíí-ɖɛ̀ mɔ̀à nyɔǔn-kpéí-po-poɛɛ, ɔ ɓéɖé ɓɛ́ ɔ ké nyɔǔn kpéí po. Nyɔ mɔ̀à nyɔ-ɖɛ-nyí-nyɔ̀ kɛɛ, ɔ mɛ nyíɛ nyɔǔn hwòɖǒɛ̀-ɖé-hwɛ̀-kà. Nyɔ mɔ̀ nyɔ-nàìn-nyɔ̀ kɛɛ, ɔ mɛ po ɔ mìɔùn kpéí. Nyɔ mɔ̀ nyɔ mɔ̀à nyɔǔn-wìǐn-dyé-nyɔ̀ɛɛ, ɔ mɛ nyuɛ ɖé múà mú.
9Ɓě mɛ ɖɛ̀ɓɛ̀ nyɔǔn mú cá. Ɓě mɛ nyɛ́ ɖɛ gbà mú. Ɓě mɛ kpɔ̃ ɖɛ nɔ̀mɔ̀ dyíin dyi kóɖó-kóɖó. 10Ɓě mɛ ɖɛɓɛìn ɖɛ̀ɓɛ̀ìn mú kà ɖíí ɓě ɖɛ̀ɓɛ̀ìn kà múɛ. Ɓěɛ̀ dyɔɔ̀ mɛ nyu cà-cà ɓó ɓě mǔè ɖò kpéín dyé jè. 11Ɓěǐn ɖá ɓɛ́ kpé ké ɓě dyí hwɛ̀. Ɓě mɛ nyu ɖɛ ɓě hwòɖǒɛ̀-ɖé-hwɛ̀-kà. Ɓě mɛ nyu Bounɓoɔ̀ bìì kũ̀à. 12Ɖɛ ɓě dèà hwòɖǒ kɔ̃ɛɛ mɛ po ɓě múàǔn. Ɓě mɛ ku hwòɖǒ ɖé gǎ-dyé-dyé mú. Ɓě mɛ ku dúún, ɓɛ́ ɓě ké ɓaà tee. 13Ɓě mɛ kpá Gèɖèpɔ́ɔ̀-nyɔ̀ ɓě kɔ̃̀ ɓɛ́ wa ké gbo-kpá-kpá dyéɛɛ gbo. Ɓě mɛ kpɔ̃ ɖéè ɓě jè dyi tee.
14Ɓě mɛ po nyɔ ɓě ɓɛ́ wa dyéìn ɓě gǎ kɛɛ mana kɔ̃. Ɓě po wa mana kɔ̃, ké ɓěǐn ɖá ɓɛ́ ɓě ké wa gboò. 15Nyɔ ɖò dyi múàǔn kpáín, nìí, ɓě kèɔ̀ kè mɛ kpá múàǔn, ké nyɔ ɖò dyi vĩ̌ǐn, ɓě kèɔ̀ kè mɛ vĩ̌. 16Ɓě séín mɛ ɓéɖé hwòɖǒ dyúáɖò. Ɓěǐn ɖá ɓɛ́ ɓě ké ɓě mìɔùn dyí ɓúáìn, kɛɛ ɓě kè nyɔ ɓě mɔ̀à gǎ-dyé-nyɔ̀ ɓěɛɛ mɛ téìn tèìn gboi. Ɓěǐn ɖá ɓɛ́ ɓě kéɛ hwìɖǐi poìn kà ɓě zi hwòɖǒ fɔ̀nɔ̀ǔn mìɔ kɛ.
17Ɓě ní zà kpa, kɛɛ ɓě mɛ poìn hwìɖǐi, ɓɛ́ ɓě ké ɖɛ mɔ̀ ɖɛ nɔ̀mɔ̀ nyɔǔn séín hwìɖǐiɛɛ nyu. 18Ɖɛ ɓě mɛ nyuɛɛ mɔ̀, ɓě mɛ vɔ̃ ɓɛ́ ɓě kè nyɔǔn ké cĩ́ ɖé gìɖìǐ mú, ɔ jǔ ké ɔ dyi ná nìɛ̀ ɓɛ́ìn ní. 19Ní ɖɛ̀ɓɛ̀-nyɔ̀ ɓě, ɓěǐn ɖá ɓɛ́ ɓě ké ɓě mìɔùn nììn kpa zà, kɛɛ ɓě mɛ táà dyi, ɓɛ́ Gèɖèpɔ́ɔ̀ dyoɖoɔ̀ kéɛ nyu, sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Mɔ̄ Bounɓoɔ̀ kɔ̃̀ kpa-zà-zà kpé gbo. Mɔ̄ mu wa kpa kɔ̃in zàìn.” 20Kɛɛ Gèɖèpɔ́ɔ̀-cèè-ɖɛ̀ɔ̀ ɖá, “Mɔ́ dyi nì mú-nyɛ́-nyɔ̀ nyuɛń nìǐn, nyí ɔ ɖii-ɖɛ̀. Ní-ná-tò dyi ɔ nyu ní, nyí ɔ ní. M̀ dyiɛ náa nyu ní, ní mu ɔ mú gbɔɔ̀ùn kà nyɔ gbǒìn kà nyɔ nyɛ-kɛ̀nɛ̀-kòò dúɛ.” 21Ɓěǐn ɖá ɓɛ́ ɖɛ gbà ké ɓě ɖu, kɛɛ ɓě mɛ ɖu ɖɛ gbà dyììn ɖé nɔ̀mɔ̀ dyíin nyu-nyu mú.
Chwazi Kounye ya:
Wóɖómà 12: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.