Máà 14
14
Wa sɔ́ Jízɛ̀
(Máfíò 26:1-5; Ɖúù 22:1-2; Jɔ̃́ɔ́ 11:45-53)
1Tia ɓaɖaa, ɔ sèǎ ma ɓó wé sɔ̃́ ɓɛ́ wa ké Zĩ̀ìn-Kɔ̃in-hwɔ̀ɔ̀ kè Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ pa. Ké sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ nì ma hwìè ɖò dyi mɔ́uń, ɓɛ́ wa ké ma Jízɛ̀ kpɔ̃ nyàà, ɓɛ́ wa ké ma ɔ ɖáɓá. 2Kɛɛ wa cɛ̃ɛ ma, ké wa ɖá, “Ɓěà ní nyuɛ hwɔɔ̀ pa-tìǐn, ɓɛ́ nyɔ ɓěɔ̀ ní kɔ̃̀ ɖà à gbo vɔ̃.”
Wa po Jízɛ̀ cáná dúún ɖé Bɛ́fènì-hwɔ̀ɖɔ̀ɔ̀ mú
(Máfíò 26:6-13; Jɔ̃́ɔ́ 12:1-8)
3Ɓó tia ɓaɖaa, Jízɛ̀ nì ma ɖé Sã́ɓò ɓɛ́ ɔ zà ma kà caà-wɛ̀ múɛɛ ɓíɖí-gbǒǔn ɖé Bɛ́fènì-hwɔ̀ɖɔ̀ɔ̀ mú. Ké ti Jízɛ̀ nì ma ɖɛ ɖiɛń nyɛɛ, màa ɖò dyi ma, ké ɔ dyà ma tɛ̀ɓɛ̀ɛ̌ ɓɛ́ wa nyùìn ma áɖàɓásà-sɔ̀ɔ̌ kɛ. Ké cáná nɔ̀mɔ̀ nyɔ́ún ɖò ɓɛ́ wa ɖáìn náà kɛɛ dyí ma ɖéɛ mú. Cánáɔ̀ kpa ma wíɖí pàɖǎ mìɔ. Màaɔ̀ wa ma tɛ̀ɓɛ̀ɛ̌ɔ̀ wĩín, ké ɔ púè ma cánáɔ̀ Jízɛ̀ dúún. 4Púɛɛ, nyɔ ɖíɛ́ ɓěɛ̀ hwòɖǒ kpá ma ɖé ɖei mìɔ, ké wa cɛ̃ìn cɛ̃̀ìn gbo, ké wa ɖá, “Ɖɛ́ kɔ̃̀ jè cáná nìà kɛ gbɔɔ̀à kà múɛ́? 5Wa ɓɛ́ìnɔ̌ má cánáɔ̀ wíɖí pàɖǎ pèɖèɛ̀n, ɓɛ́ ɔ wíɖíɔ̀ kéɔ́ má gàa ɖòɛ̀ pɛ́ɛ̀-wìɖì jǔ ɓó zɔ̃ gàná, ɓɛ́ wa kéɔ́ wíɖíɔ̀ gǎ-dyé-nyɔ̀ ɓě nyí.” Ké wa nì ma màaɔ̀ dúi jɛ̀ǐn.
6Kɛɛ Jízɛ̀ cɛ̃ɛ ma wa gbo, ké ɔ ɖá, “Ɓě táà màaɔ̀ dyi. Ɖɛ́ kɔ̃̀ jè ɓě nìà ɔ fũ̀à-fṹá nyùɛ̌n nyɛ́? Ɔ ɖǎ ḿ ɖɛ zi dyíin nɔ̀mɔ̀ǔn wɛ̃ɛ dyí nyu. 7Sepóɛɖé gǎ-dyé-nyɔ̀ ɓěɔ̀ mu dà ɓě gbo nììn kánáá pū, ké ti séín ɓě dyi wa nɔ̀mɔ̀ dyíin dyí nyuɛ mɔ́uń wɛ̃ɛ, ɓě ɓɛ́ìn nyuɛ, kɛɛ ḿ se dà ɓě gbo nìɛ̌ mu kánáá pū. 8Ɖɛ màaɔ̀ ɓɛ́ìn nyuɛ kɛɛ, ɔ ɖǎa nyu. Ɔ ɖǎ ní kpóɖó-dyùàɔ̀ ti dyéìn nɔ̀ɔ̀ ɓóɛ dyóɖóún zà jè. 9Ḿ cɛ̃ ɓě jǎà gbo, ɓóɖó-kpàà dà séín ɓɛ́ wa mu bɔ̃̌ nɔ̀mɔ̀ dyíinɔ̀ jè zio mú pòìn nyɛɛ, ɖɛ ɓɛ́ màaɔ̀ ɖǎà nyuɛɛ, wa mu ɔ jè cɛ̃ìn ɖekè, ɓɛ́ màaɔ̀ jè ké nyɔǔn hwìɖǐi nì.”
Júdà mɔ́ ɓɛ́ ɔ ké Jízɛ̀ peɖe
(Máfíò 26:14-16; Ɖúù 22:3-6)
10Púɛɛ, Júdà Ɛ́sìkáɖìɔ̀ ɓɛ́ ɔ mɔ̀ ma kà Jízɛ̀ɛ̀ ɖeín-nà-nyɔ̀ ɓaɖa-bùè sè sɔ̃́ ɓěɔ̀ ɖòɛɛ mu ma ɖé sáa-zà-nyɔ̀ kpa ɖɛ ɓěɔ̀ gbo, ɓɛ́ ɔ ké ma Jízɛ̀ wa xwáɖáún zàìn. 11Ti ɓɛ́ wa wɔ̃́ɔ ma kɛɛ, wa kpá ma múàǔn, ké wa cɛ̃ɛ ma ɔ gbo kà wa mu ma ɔ wíɖí nyíìn nyɛ. Ké Júdà nì ma hwìè dyi mɔ́uń, ɓɛ́ ɔ ké ma Jízɛ̀ wa xwáɖáún zàìn.
Jízɛ̀ kè ɔ ɖeín-nà-nyɔ̀ ɓěɔ̀ ɖi Zĩ̀ìn-Kɔ̃in-hwɔ̀ɔ̀
(Máfíò 26:17-25; Ɖúù 22:7-14, 21-23; Jɔ̃́ɔ́ 13:21-30)
12Ɓó Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ wé kĩ́ín-kĩ́ínɔ̀ ɓaɖaa, ti ɓɛ́ wa ɖáɓáà ɓáɖáá-dyù ɓě ɓá Zĩ̀ìn-Kɔ̃in-hwɔ̀ɔ̀ jè dyíɛ kɛɛ, Jízɛ̀ɛ̀ ɖeín-nà-nyɔ̀ ɓěɔ̀ diè ma ɔ dyi, ké wa ɖá, “Dɛ̌ m̀ mɔ́ ɓɛ́ à ké Zĩ̀ìn-Kɔ̃in-hwɔ̀ɔ̀ naɓaà ɓó m̀ bììɛ́?”
13Ké Jízɛ̀ ɖoɓo ma ɔ ɖeín-nà-nyɔ̀ ɓěɔ̀ sɔ̃́, ké ɔ cɛ̃ɛ wa gbo, ké ɔ ɖá, “Ɓě mu ɖé hwɔɖɔɔ̀ mú, ké ɓě kè gàa ɓéɖé mɛ-dyàà nì ní mú ɖò mu gmɔ̌ìn. Ɓě sí ɔ kíɖíí. 14Ké dɛ̀ ɔ wáɖáìn nyɛɛ, ɓě mɛ cɛ̃ɛ gbǒɔ̀ kɔ̃̀-nyɔ̀ gbo, ɓɛ́ ɓě ké níiń, ‘Nyɔ-ɖɛ-tɛ̀mɛ̀ìn-nyɔ̀ɔ̀ ɖá dɛ̌ ɔ ɖéè-ɓì-dyùɔ̀ ɖé? Dɛ̌ ɔ kè ɔ ɖeín-nà-nyɔ̀ ɓěɔ̀ muà Zĩ̀ìn-Kɔ̃in-hwɔ̀ɔ̀ ɖiìn nyɛ́?’ 15Ké ɔ mu ɓě ɓí-dyù vɛ̀nɛ̀ ɖò nì ɖé dyií-gbòɔ̀ dyaa da zàìn. Ɖɛ séín hwɛ̀ ɖé ɖe, ké wa ɖǎ ti dyé. Ɖé ɓě mɛ naɓaà à bìì.”
16Ké ɖeín-nà-nyɔ̀ ɓěɔ̀ sɔ̀ dyí, ké wa mu ɖé hwɔɖɔɔ̀ mú, ké wa dyé ma ɖɛ ɓěɔ̀ ɖé kà Jízɛ̀ nyuɛ ma kà wa gbo cɛ̃ɛ kɛ. Ké wa dyéìn ma hwɔɔ̀ ɖii-ɖɛ̀ɔ̀ ti.
17Ti ɓɛ́ hwìo ɖǎ ma jǔɛɛ, Jízɛ̀ kè ɔ ɖeín-nà-nyɔ̀ ɓaɖa-bùè sè sɔ̃́ ɓěɔ̀ dyi ma ɖé. 18Ti wa nì ma ɖɛ ɖiɛń nyɛɛ, Jízɛ̀ ɖá, “Ḿ cɛ̃ ɓě jǎà gbo, ɓě dyúáɖò mu ḿ xwáɖáún zàùn ɖé ní mú-nyɛ́-nyɔ̀ ɓěɔ̀ gbo. Ɔ mu ɓě mɔ̀ nyɔ ɓě ḿ kè ɓě nìà ɖɛ ɖiɛń nyɛɛ dyúáɖò jǔùn.”
19Ké ɔ ɖeín-nà-nyɔ̀ ɓěɔ̀ hwòɖǒ kpá ma ɖé ɖei, ké wa diè ma ɔ dyi ɖò-ɖò, ké wa ɖá, “Ɔ mɔ̀ mɔ̄ɔ̀?”
20Ké ɔ cɛ̃ɛ ma wa gbo, ké ɔ ɖá, “Ɔ mɔ̀ ɓě mɔ̀ ɖeín-nà-nyɔ̀ ɓaɖa-bùè sè sɔ̃́ ɓěɛ̀ ɖò. Ɔ mɔ̀ nyɔ ɓɛ́ ḿ kè ɔ nìà bɛɖɛɛ̀ ɖɛ-fùù dyúáɖò mú taɓauń wɛ̃. 21Mɔ̄ Nyɔǔn-dyùɛ̀ Dyú-gààɔ̀ mu muùn kà ɔ nyuà ɖé Gèɖèpɔ́ɔ̀-cèè-ɖɛ̀ɔ̀ mú céèɛ̀ kɛ. Kɛɛ gàa ɓɛ́ ɔ zàà mɔ̄ Nyɔǔn-dyùɛ̀ Dyú-gààɔ̀ xwáɖáún ɖé ní mú-nyɛ́-nyɔ̀ ɓěɔ̀ gboɛɛ, ééɓàa, gboò-wùɖù nì ɔ kɔ̃. Ɔ muɔ́ dyíin nɔ̀mɔ̀ùn ɓó gàa nìà kɛ bìì, ɓɛ́ ɔ ké seɔ́ má wóɖó.”
Gèɖèpɔ́ɔ̀-bɛ̀ɖɛ̀ɛ̀ɔ̀ ɖi-ɖi
(Máfíò 26:26-30; Ɖúù 22:15-20; 1 Kɔ̀ɖéíntĩ̀ɔ̀ 11:23-25)
22Ti ɓɛ́ wa nì ma ɖɛ ɖiɛń nyɛɛ, Jízɛ̀ zà ma bɛɖɛɛ̀ɔ̀ ɖò ɓó, ké ɔ po Gèɖèpɔ́ɔ̀ zùo, ké ɔ jaɖaìn kpói. Ké ɔ nyíɛ wa, ké ɔ ɖá, “Ɓě kpɔ̃ɔ dyi. Ɖɛ nìà kɛ mɔ̀ ní kpóɖó-dyùàɔ̀.”
23Ké ɔ ɖú ma kópòɔ̀ dyí, ké ɔ po Gèɖèpɔ́ɔ̀ zùo, ké ɔ nyíɛ ma wa, ké wa séín ná ma ɖɛ nìà ɖéɛɛ mú. 24Ké ɔ cɛ̃ɛ ma wa gbo, ké ɔ ɖá, “Ɖɛ nìà kɛ mɔ̀ ní nyɔmɔɔ ɓɛ́ ɔ wáɖáìn dyi ɓó nyɔ pàɖǎ bììɛ. 25Ḿ cɛ̃ ɓě jǎà gbo, ḿ se géɖéè-ɓòɔ̀ ní ɖò náa mu ɖe fɔɔ. Ḿ kéɛ dyɛ ná ɖe ní, nìí, ɔ mɔ̀ ti ɓɛ́ ḿ muà ɔ ɖieɔ̀ náùn ɖé Gèɖèpɔ́ɔ̀ kã́á-ɓòɖòɔ̀ kɔ̃ɛ.”
26Sɔ̀ìn ɓóɛ gboɛɛ, wa ɓeɖe ma wɛ́ɖɛ́ ɖò. Hwɛ̀ ké wa sɔ̀ dyí, ké wa mu ma ɖé Ɔ́ɖè-tòɖòɔ̀ dya.
Jízɛ̀ cɛ̃ɛ kà Píɖɛ̀ mu ɔ jè mú doìn nyɛ
(Máfíò 26:31-35; Ɖúù 22:31-34; Jɔ̃́ɔ́ 13:36-38)
27Púɛɛ, Jízɛ̀ cɛ̃ɛ ma wa gbo, ké ɔ ɖá, “Ɓě séín mu ḿ ɖei hwɛ̀ìn, sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, ‘Gèɖèpɔ́ɔ̀ mu ɓáɖáá-dyí-gmɔ̀-nyɔ̀ɔ̀ ɖáɓáùn, ké ɓáɖáá ɓěɔ̀ mu dyi gbɛ̀ìn.’ 28Kɛɛ ḿ ɖǎ gĩɔ wóɖóín, ní mu ɖé ɓě dyúa muùn ɖé Gáɖàɖíì-ɓòɖòɔ̀ kɔ̃.”
29Hwɛ̀ ké Píɖɛ̀ cɛ̃ɛ ma ɔ gbo, ké ɔ ɖá, “Kɛbì nyɔǔn séín mɛ hwɛ̀ m̀ ɖeiɛɛ, mɔ́ún seɛ náa nyuɛ́ mu fɔɔ.”
30Ké Jízɛ̀ cɛ̃ɛ ma ɔ gbo, ké ɔ ɖá, “Ḿ cɛ̃ m̀ jǎà gbo, máaǔn, hwɛ̀ ɓɛ́ sòò ké wuɖu pòìn sɔ̃́ ní, nì mu ní jè mú-doìn-kpà tã nyuùn.”
31Ké Píɖɛ̀ cɛ̃ɛ ma ɔ gbo kóɖó-kóɖó, ké ɔ ɖá, “Ɔ mɔ̀ ɖɛ ní, ḿ kè mɔ̀ ɓɛ́ìn mɛ́ɛ pū, kɛɛ ḿ se nì jè mú doɛ̀n ɓɛ́ìn fɔɔ.” Ké wa séín cɛ̃ ma ɖɛ dyúáɖòɔ̀ ɖekè.
Jízɛ̀ ɓaà ɖé Gɛ̀sɛ́mɛ̀níì-pàɔ̀ mú
(Máfíò 26:36-46; Ɖúù 22:39-46)
32Sɔ̀ìn ɓóɛ gboɛɛ, Jízɛ̀ kè ɔ ɖeín-nà-nyɔ̀ ɓěɔ̀ mu ma ɖé pá ɖò ɓɛ́ wa ɖáìn Gɛ̀sɛ́mɛ̀níì kɛɛ mú, ké ɔ cɛ̃ɛ ma wa gbo, ké ɔ ɖá, “Ɓě kò dà dyi, ɓɛ́ ḿ ké ɓaǎ mu.” 33Ɔ kpa ma Píɖɛ̀ kè Jĩ́ìn ɔ kè Jɔ̃́ɔ́. Ké wìì ɖú ma ɔ nyu kpàǐ, ké fũ̀à-fṹá nyu ma ɔ mìɔ. 34Ké ɔ cɛ̃ɛ ma wa gbo, ké ɔ ɖá, “Wìì nyu ḿ mìɔ, ké hwɔ ḿ mɛ mɛ́á. Ɓě sè dà ɓó, ɓɛ́ ɓě ké ɓɛ́ɖɛ́ kɔ̃ nì.”
35Ké ɔ mu ma ɖé dyúa ɖɛ wè, ké ɔ jìɖǐ ma ɓó ɓóɖó-kpàɔ̀ kɔ̃ dyi, ké ɔ nì ma ɓaàǔn, ɓɛ́ ɔ jǔ ké ɔ dyi ná nìɛ̀ ɓɛ́ìn ní, tia jè ké ɔ dyíin zi. 36Ɔ ɖá, “Ḿ Ɓǎ, m̀ ɓɛ́ìn ɖɛ séín nyuɛ. Zà dà gǎ-kòpò nìà kɛ ɓó ḿ bũ̌. Kɛɛ wɛ̃́ɛ́ kɛɛ, m̀ mɛ nyu ɖɛ nì hwòɖǒɔ̀ mɔ́ kɛ. Mɔ̀ǔn ɖá ɓɛ́ m̀ ké ní hwòɖǒɛ̀-mɔ́ɔ́-ɖɛ̀ nyu.”
37Ké Jízɛ̀ kɔ́ìn ma ɖé ɖeín-nà-nyɔ̀ ɓěɔ̀ gbo ɖe, ké ɔ dyɛ̀ìn wa nyíɔún dyi. Ké ɔ diè Píɖɛ̀ dyi, ké ɔ ɖá, “Sã́ɓò, m̀ nì mɔ́uńǹ? Ɖɛ́ kɔ̃̀ jè m̀ seà ḿ gbo nìɛ̀ ɓɛ́ìn ɓó áɓà dyúáɖò xwíníín, ɓɛ́ m̀ kéà ɓɛ́ɖɛ́ kɔ̃ nì kɛ́? 38Ɓě mɛ nì ɓɛ́ɖɛ́ kɔ̃, ɓɛ́ ɓě ké ɓaà, ɓɛ́ mú-dɔ̃̌-dɔ̃̌ ní kɔ̃̀ ɖà ɓě kɔ̃ dyi. Ɓěɛ̀ hwòɖǒ-dyùàɔ̀ nì kpéí, kɛɛ kpé hwɛ̀ ɓě mìɔùn dyí.”
39Ké Jízɛ̀ mu ma ɖe, ké ɔ ɓaà ma, ké ɔ cɛ̃ ɖɛ dyúáɖòɔ̀ ɖe. 40Ké ɔ dyi ma ɖe, ké ɔ dyɛ̀ìn ma wa nyíɔún dyi ɖe, sepóɛɖé waà dyéɖé-kpɔ̀ɔ̌ ɓěɔ̀ ku ma xwa mìɔ. Ké wa se dyuò ɖɛ wa ké ma ɔ gbo cɛ̃ kɛ.
41Ti ɓɛ́ ɔ dyi ma ɔ ɖeín-nà-nyɔ̀ ɓěɔ̀ gbo ɖe kpa tã nììnɔ̀ kɛɛ, ɔ diè ma wa dyi, ké ɔ ɖá, “Ɓě pɛ̃́ dyi, ké ɓě nì mɔ́uń keè? Ɔ ɖǎ hwɛ̀. Tiɔ̀ ɖǎ nyini. Wa muá mɔ̄ Nyɔǔn-dyùɛ̀ Dyú-gààɔ̀ xwáɖáún zàùn ɖé nàmàǔn-nyɔ̀ ɓěɔ̀ gbo. 42Ɓě sɔ̀ dyí, ɓɛ́ ɓěà ké mu. Ɓě dyéɛ, nyɔ kéà ḿ xwáɖáún zàa ɖǎ nyini.”
Wa kpɔ̃ Jízɛ̀
(Máfíò 26:47-56; Ɖúù 22:47-53; Jɔ̃́ɔ́ 18:3-12)
43Ti ɓɛ́ Jízɛ̀ nì ma wùɖùɛ̌n keɛɛ, Júdà ɓɛ́ ɔ mɔ̀ ma kà ɖeín-nà-nyɔ̀ ɓaɖa-bùè sè sɔ̃́ ɓěɔ̀ ɖò kɛɛ dyi ma. Ɔ kè nyɔ kúɖúú ɓéɖé gàsíà kè kpó-kpó-ɓà-cù ɓě dyi ma. Nyɔ ɓěɔ̀ sɔ̀ìn ma ɖé sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɔ kè Júù-nyɔ̀ vɛ̀nɛ̀ ɓěɔ̀ gbo. 44Nyɔ ɓɛ́ ɔ mu ma kà Jízɛ̀ xwáɖáún zàùn wɛ̃ɛ ɖǎ ma ɔ da-zà-ɖɛ̀ ɖò nyɔ kúɖúú ɓěɔ̀ nyí, ké ɔ ɖá, “Nyɔ kɔ̃̀ wɔ̃ ní muà nyáùn wɛ̃ɛ, ɔ mɔ̀ gàaɔ̀ mɔ̀. Ɓě kpɔ̃ ɔ, ɓɛ́ ɓě ké ɔ kpa.”
45Ti Júdà dyi ma kɛɛ, ɔ mu ma Jízɛ̀ gbo wàɖà, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀!” Ké ɔ nyá ma ɔ wɔ̃. 46Púɛɛ, nyɔ ɓěɔ̀ kpɔ̃ ma Jízɛ̀. 47Ké nyɔ ɓě nì ma kà ɓó Jízɛ̀ gboɛɛ ɖò zà ma ɔ gàsíàɔ̀ kpaɖaún, ké ɔ cɛ̃ ma sáa-zà-nyɔ̀ vɛ̀nɛ̀ɔ̀ gǐìɔ̀ ɖùǔ dú. 48Ké Jízɛ̀ wùɖù ma nyɔ kúɖúú ɓěɔ̀ gbo, ké ɔ ɖá, “Ɓě dyà gàsíà kè kpó-kpó-ɓà-cù, ké ɓě dyi ḿ kpɔ̃ùn kà nyɔ dyià nyɔ-ɖɛ-gana-xwa-zàìn-nyɔ̀ ɖò kpɔ̃ùn wɛ̃ɛ̀? 49Ḿ nì ma ɖé Gèɖèpɔ́ɔ̀ gbǒɔ̀ múin wé séín ɓaɖa, ké ḿ nì ma ɓě ɖɛ tɛ̀mɛ̀ǐn. Ké ɓě se ma ɖé ḿ kpɔ̃̀ìn. Kɛɛ ɖɛ ɓě nìà kɛ kpá, ɓɛ́ ɖɛ ɓě céèà ɖé Gèɖèpɔ́ɔ̀-cèè-ɖɛ̀ɔ̀ múɛɛ ké jǎà kpá.” 50Ké ɔ ɖeín-nà-nyɔ̀ séín ɓěɔ̀ gbɛ̀ ma ɔ ɖei, ké wa gbǔ ma.
51Ké gàa-dyù gmɔ̀ ɖò sí ma Jízɛ̀ kíɖíí. Ɔ se ma ɖɔ ɖò mú po, kɛɛ ɔ gba ɖénì-ɖɔ̀ ɖò kɔ̃in. Ké wa kpɔ̃ ma ɔ, 52kɛɛ ɔ sè ma ɔ ɖɔɔ̀ wa xwaún, ké ɔ kpã́á-kpòɔ̀ gbǔ.
Jízɛ̀ nì ɓó tɔ̀ɔ̀-ɓìɔ̀ ɓě dyúa
(Máfíò 26:57-68; Ɖúù 22:54-55, 63-71; Jɔ̃́ɔ́ 18:13-14, 19-24)
53Ké wa kpa ma Jízɛ̀ ɖé sáa-zà-nyɔ̀ vɛ̀nɛ̀ɔ̀ ɓíɖí-taún. Sáa-zà-nyɔ̀ kpa ɖɛ ɓěɔ̀ kè Júù-nyɔ̀ vɛ̀nɛ̀ ɓěɔ̀ ɔ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ séín poìn ma ɖé dyí. 54Ti ɓɛ́ wa nì kà Jízɛ̀ kpauń wɛ̃ɛ, Píɖɛ̀ sí ma wa kíɖíí, kɛɛ ɔ sè ma ɖe vɛ̃in. Ké ɔ dyá ma ɖé sáa-zà-nyɔ̀ vɛ̀nɛ̀ɔ̀ kɔ̃̀pã́ùnɔ̀ kɔ̃, ké ɔ kè sójà ɓěɔ̀ kò ma ɓó dyi, ké ɔ nì ma wíàǔn. 55Ɓó tia ɓaɖaa, sáa-zà-nyɔ̀ kpa ɖɛ ɓěɔ̀ kè tɔ̀ɔ̀-ɓìɔ̀ séín ɓěɔ̀ nì ma nyɔ kɔ̃̀ wuɖu ké Jízɛ̀ zaa kpɔ̃̀ìn nyɛɛ dyi mɔ́uń, ɓɛ́ ɔ kéɛ nyu ɓɛ́ wa ké ma ɔ ɖáɓá. Kɛɛ wa se ma nyɔ jɛ́ɛ́ ɖò dyé ɖé zàse ɓěɔ̀ hwìɛ̀. 56Zàse pàɖǎ ɓě tɔ́mɔ́ìn ma Jízɛ̀ se wĩin dyɛo, kɛɛ wa séín se ɖɛ dyúáɖò cɛ̃.
57Hwɛ̀ ké nyɔ ɖíɛ́ ɓě nyànà ma dyi, ké wa tɔ́mɔ́ìn ma ɔ se wĩin, ké wa ɖá, 58“À wɔ̃́ɔ, ké ɔ ɖá ɔ mu Gèɖèpɔ́ɔ̀ gbǒ ɓɛ́ wa poà kɛɛ wáɖáùn. Ké wé tã kéá ziín, ɔ muɛ ɖie ɖò poùn ɖe, ké nyɔǔn-dyù seɛ poɛ́ mu.” 59Kɛɛ nyɔ ɓěa, wa se ɖɛ dyúáɖò cɛ̃ ɖekè.
60Ké sáa-zà-nyɔ̀ vɛ̀nɛ̀ɔ̀ nyànà ma ɓó wa hwìɛ̀ dyi, ké ɔ diè ma Jízɛ̀ dyi, ké ɔ ɖá, “M̀ se ɖɛ ɖò ɓéɖé ɓɛ́ m̀ kéɛ cɛ̃ ɓá ɖɛ wa nìà m̀ kɔ̃ún cɛ̃iń nyɛɛ dyíì?” 61Kɛɛ Jízɛ̀ nì ma gìɖìǐ, ké ɔ se ma wùɖù fɔɔ. Ké sáa-zà-nyɔ̀ vɛ̀nɛ̀ɔ̀ diè ma ɔ dyi ɖe, ké ɔ ɖá, “Mɔ̀ mɔ̀ Kɛ́ɖɛ́ìɔ̀ɔ̀? Mɔ̀ mɔ̀ Gèɖèpɔ́ɔ̀ à ɓàìn nyɛɛ dyú-gààɔ̀ɔ̀?”
62Ké Jízɛ̀ ɖá, “Ɔ mɔ̀ mɔ̄. Ɓě mu mɔ̄ Nyɔǔn-dyùɛ̀ Dyú-gààɔ̀ dyéìn. Ní mu kpé-ɓéɖé-Gèɖèpɔ́ɔ̀ ɖiaún dya dèɖěìn, ké ní mu ní-kpò nìà ɖé dyɔɔ̀ dyíɛɛ mú dyììn.”
63Ké sáa-zà-nyɔ̀ vɛ̀nɛ̀ɔ̀ fáìn ma ɔ mìɔùn ɖɔún dyi, ké ɔ ɖá, “Ɖɛ́ kɔ̃̀ jè ɓěà kéà zàse ɖò dyi mɔ́ ɖeɛ́? 64Ɓě ɖǎa wɔ̃́, ké ɔ ɖǎ Gèɖèpɔ́ɔ̀ ɖɛ gbà kɔ̃ún cɛ̃. Xwɛ̌ ɓě ɖá kɛ́?”
Ké wa séín kpɔ̃̀ìn ɔ zaa, ɓɛ́ wa ké ɔ ɖáɓá. 65Ké wa ɖíɛ́ ɓě nì ma ɔ tɔ̃ɔ dya poɛń, ké wa jìnììn ma ɔ ɖɛ ɖò dyéɖéín, ké wa nì ma ɔ kpá taɓauń. Ké wa cɛ̃ɛ ma ɔ gbo, ké wa ɖá, “Nyɔ taɓaà m̀ kpáa, ɖá ɔ nyɛ́nɛ́.” Ké sójà ɓěɔ̀ ɓaɖa ma Jízɛ̀ ɖekè.
Píɖɛ̀ doìn Jízɛ̀ jè mú
(Máfíò 26:69-75; Ɖúù 22:56-62; Jɔ̃́ɔ́ 18:15-18, 25-27)
66Ti ɓɛ́ Píɖɛ̀ nì ma ɖé kɔ̃̀pã́ùnɔ̀ kɔ̃ keɛɛ, sáa-zà-nyɔ̀ vɛ̀nɛ̀ɔ̀ gbo-nì-màà ɖò dyi ma, 67ké ɔ dyé ma Píɖɛ̀ wíà ɓó nyɛɔ̀ wĩín. Ɔ gmɔ̀ ma ɔ dya, ké ɔ ɖá, “M̀ nì ma ɖé Jízɛ̀ sɔ̀ìn kà Názɛ̀ɖɛ̀-hwɔ̀ɖɔ̀ɔ̀ múɛɛ gbo ɖekè.”
68Kɛɛ Píɖɛ̀ doɛ̀n ma mú, ké ɔ ɖá, “Ḿ se ɖɛ m̀ nìà cɛ̃iń nyɛɛ dyí dyuò, mɔɔ ké ḿ seɛ múin wɔ̃́.” Ké Píɖɛ̀ sɔ̀ ma dyí, ké ɔ mu ma ɖé kɔ̃̀pã́ùnɔ̀ gmɔ-wɔ̃̀ɔ̀ gbo. Wàɖà cá kɛɛ, sòò ɖò zoɖo ma.
69Ké gbo-nì-mààɔ̀ dyé ma ɔ ɖe, ké ɔ nìɛ̀ ma nyɔ ɓě nì ma ɓóɛɛ gbo cɛ̃iń, ké ɔ ɖá, “Gàa nìà kɛ mɔ̀ wa ɖò.” 70Ké Píɖɛ̀ doɛ̀n ma mú ɖe.
Ti ɓɛ́ ɔ ɖǎ ma hwèɖèìn kpã́ún wɛ̃ɛ, nyɔ ɓě nì ma ɓóɛɛ cɛ̃ɛ ma Píɖɛ̀ gbo, ké wa ɖá, “M̀ mɔ̀ wa ɖò jǎà, sepóɛɖé m̀ sɔ̀ ɖé Gáɖàɖíì-ɓòɖòɔ̀ kɔ̃ ɖekè.”
71Ké Píɖɛ̀ ɖú ma gboò kpàǐ, ké ɔ cɛ̃ɛ gana-kà, ké ɔ ɖá, “Ḿ se gàa kɔ̃̀ jè ɓě cɛ̃à kɛɛ dyí dyuò.” 72Wàɖà kɛɛ, sòò ɖò zoɖo ma ɖe. Púɛɛ, ɖɛ Jízɛ̀ cɛ̃ ma kà Píɖɛ̀ gboɛɛ dyi ma ɔ hwìɖǐi. Ɔ mɔ̀, “Hwɛ̀ ɓɛ́ sòò ké wuɖu pòìn sɔ̃́ ní, nì mu ní jè mú-doìn-kpà tã nyuùn.” Ké Píɖɛ̀ ɖú ma vĩ̌ kpàǐ.
Chwazi Kounye ya:
Máà 14: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.