Máà 12
12
Nɔ́ɔ́ ɓá nyɔ ɓě ɓɛ́ wa sè ma géɖéè-gbǎ ɖò gboɛɛ jè dyíɛ
(Máfíò 21:33-46; Ɖúù 20:9-19)
1Ké Jízɛ̀ dè ma nɔ́ɔ́ ɖò poɛ gbɔ ɖé wa gbo, ké ɔ ɖá, “Gàa ɖò nì zɔ̃̌ɔ̀ ɓó, ké ɔ ɓá ma géɖéè, ké ɔ mɔ̀ ma géɖéè-gbǎ. Ké ɔ cɛ̃̀ìn gba-gba ɖei, ké ɔ ɓúɖú ma dɛ̀ ɓɛ́ wa ké géɖéèɔ̀ mú píníìn nyɛ, ké ɔ zà ɖé gbàà ɖò. Ké ɔ sè ma geɖeɔ̀ nyɔǔn ɓě gbo, ɓɛ́ wa kéɛ dyí gmɔ̀. Ké ɔ sɔ̀ dyí, ké ɔ mu ma ɓóɖó vɛ̃in ɖò kɔ̃. 2Ti ɓɛ́ géɖéèɔ̀ kpã́-tì nyini ma ɓóɛɛ, ɔ ɖoɓo ma ɔ gbo-nì-nyɔ̀ ɓěɔ̀ ɖò ɖé nyɔ ɓě nì ma kà géɖéè-gbǎɔ̀ dyí gmɔ̀ǔn wɛ̃ɛ gbo, ɓɛ́ wa ké ɔ géɖéèɔ̀ ɖò gbo ɖoɓo. 3Kɛɛ wa kpɔ̃ ma ɔ gbo-nì-nyɔ̀ɔ̀, ké wa ɓaɖa ma ɔ, ké wa fɔ̀nɔ̀ìn ma ɔ xwa, ké wa ɖoɓo ma ɔ ɖe. 4Ké gàaɔ̀ ɖoɓo ma gbo-nì-nyɔ̀ ɖò ɖé wa gbo ɖe, ké wa nàmàìn ma ɔ ɖɛ dú, ké wa nyìnììn ma ɔ bũ̌in dɛ̃-kà. 5Ké gàaɔ̀ ɖoɓo ma gbo-nì-nyɔ̀ ɖò ɖe, ké wa ɖáɓá ma ɔ. Ké gbo-nì-nyɔ̀ pàɖǎ dyé ma ná ɖɛ dyúáɖòɔ̀ dyí. Wa ɓaɖa wa ɖíɛ́ ɓě, ké wa ɖáɓá wa ɖíɛ́ ɓě. 6Kɛɛ gàaɔ̀ ɓéɖé ma nyɔ dyúáɖò ke. Ɔ mɔ̀ ɔ hwòɖǒ-kɔ̃-dè-dyùɔ̀. Ɖé mánáín nyɛɛ, ɔ ɖoɓo ma ɔ dyúɔ̀ ɖé wa gbo, ké ɔ ɖá, ‘Ḿ dyuòɛ̀ wa mu ní dyúɔ̀ kpéín dyéìn.’ 7Kɛɛ géɖéè-gbǎɔ̀ dyí-gmɔ̀-nyɔ̀ ɓěɔ̀ cɛ̃ìn cɛ̃̀ìn gbo, ké wa ɖá, ‘Nyɔ nìà kɛ mɔ̀ nyɔ mu ɔ ɓǎà kɔ̃̀ɔ̀-ɖɛ̀ ɓěɔ̀ dúí sèìn. Ɓě dyi, ɓɛ́ ɓěà ké ɔ ɖáɓá, nìí, ɓěà mu kɔ̃̀ɔ̀-ɖɛ̀ ɓě ɓɛ́ ɔ kéà dúí sèɛɛ dyí ɖúùn.’ 8Ké wa kpɔ̃ ma ɔ, ké wa ɖáɓá ma ɔ, ké wa zà ma ɔ xwɛ́ɔ̀ ɖé géɖéè-gbǎɔ̀ mú, ké wa poɛ xwáɖáún.
9“Ɖɛ́ nyɔ kɔ̃̀à géɖéè-gbǎɔ̀ kɛɛ mu nyuùn wɛ̃́? Ɔ mu dyiìn, ɓɛ́ ɔ ké nyɔ ɓě gmɔ̀à géɖéè-gbǎɔ̀ dyíɛɛ ɖáɓá, ɓɛ́ ɔ ké géɖéè-gbǎɔ̀ nyɔ kà kò ɖò nyí, ɓɛ́ wa kéɛ dyí gmɔ̀. 10Ɓě séè ɖɛ Gèɖèpɔ́ɔ̀-cèè-ɖɛ̀ɔ̀ cɛ̃à kɛɛ wuɖuún zà ɖòò? Ɖɛ ɔ cɛ̃ɛ kɛà kɛ̀. Ɔ ɖá,
‘Sɔ́ɔ́-kpò ɓɛ́ poo-ɖɛ̀ po-nyɔ̀ ɓěɔ̀ ɓɔ́ ma kɛɛ ɖǎ gbǒɔ̀ gãún-sɔ̀ɔ̌ mú zɛ̃̀ìn.
11Bounɓoɔ̀ mɔ̀ nyɔ ɖǎ ɖɛ nìà kɛ nyu.
Ké ɖɛ ɔ nyuà kɛɛ mɔ̀ ɖɛ dĩ́ín-dĩ̀ìn ɖé à dyéɖéín.’ ”
12Nyɔ ɓě ɓɛ́ Jízɛ̀ nì ma kà gbo wùɖùɛ̌n nyɛɛ dyuòɛ̀ ma dyí kà ɓɛ́ nɔ́ɔ́ ɔ po ma kà kɛɛ ɓá ma wa dyíɛ. Ɔ jèɛɛ, wa mɔ́ ɓɛ́ wa ké ma ɔ kpɔ̃, kɛɛ wa fɛ̃̀ìn ma nyɔ kúɖúú ɓěɔ̀ ní. Wa sɔ̀ ma ɓó Jízɛ̀ gbo dyí, ké wa mu ma.
Dyi-diè-ɖɛ̀ ɓá tácì pɛ́ɛ̀ jè dyíɛ
(Máfíò 22:15-22; Ɖúù 20:20-26)
13Sɔ̀ìn ɓóɛ gboɛɛ, wa ɖoɓo ma Fáɖòsíì-nyɔ̀ ɓěɔ̀ ɖíɛ́ ɓě kè Hɛ́wɔ̀ɖɔ̀ nììn nyɔ ɓěɔ̀ ɖíɛ́ ɓě, ɓɛ́ wa ké ma Jízɛ̀ kpɔ̃ ɖé ɔ wĩín-wùɖù mú. 14Wa dyi, ké wa cɛ̃ɛ ma ɔ gbo, ké wa ɖá, “Nyɔ-ɖɛ-tɛ̀mɛ̀ìn-nyɔ̀, à dyuòɛ̀ dyí kà m̀ mɔ̀ dyí-sɛ́ɖɛ́ìn-nyɔ̀ kɛ. Mɔ̀ǔn mɔ́ nyɔ múin, sepóɛɖé m̀ se nyɔ ɖòɛ̀ dyéɖé peɖe jè. Ké m̀ tɛ̀mɛ̀ìn nyɔǔn hwìè ɓě ɓɛ́ Gèɖèpɔ́ɔ̀ mɔ́ nyɔǔn ké kpaa ɖé jǎà mú. Ɔ nɔ̀mɔ̀ dyíin ɓɛ́ à ké Síízɛ̀ mɔ̀à Wóɖóùn-kã̀ǎɔ̀ kɛɛ tácì dyéɖéín pɛ́ɛ̀ìn, mɔɔ ɔ se dyíin nɔ̀mɔ̀ɔ̀? 15À ɓéɖé à kéɛ pɛ́ɛ̀, mɔɔ ɔ se ɓéɖé ɔ ké ná nìì?”
Kɛɛ Jízɛ̀ dyuòɛ̀ dyí kà ɓɛ́ wa nì ma dyéɖéi nyuɛń nyɛ jèɛɛ, ɔ cɛ̃ɛ ma wa gbo, ké ɔ ɖá, “Ɖɛ́ kɔ̃̀ jè ɓě nìà ḿ mú dɔ̃̌uń wɛ̃́? Ɓě dyà ḿ wíɖí-pĩ̀à dyúáɖò, ɓɛ́ ḿ kéɛ kɔ̃ gmɔ̀.”
16Ké wa dyà ma dyúáɖò. Ké ɔ diè ma wa dyi, ké ɔ ɖá, “Nyɛ́ kɔ̃̀ dú-ɓò nìà wíɖí-pĩ̀àɛ̀ kɔ̃ kɛ́? Ké nyɛ́ ɖɛ ɓě céèà ɓó ɔ kɔ̃ɛɛ ɓá dyíɛ́?”
Ké wa cɛ̃ɛ ma ɔ gbo, ké wa ɖá, “Ɔ mɔ̀ Síízɛ̀e.”
17Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Ɓě nyí ɖɛ Síízɛ̀ kɔ̃̀ kɛɛ Síízɛ̀, ké ɓě nyí ɖɛ Gèɖèpɔ́ɔ̀ kɔ̃̀ kɛɛ Gèɖèpɔ́ɔ̀.” Ké wa giniìn ma dyi mìɔ ɓó Jízɛ̀ jè.
Dyi-diè-ɖɛ̀ ɓá gĩɔ wóɖó jè dyíɛ
(Máfíò 22:23-33; Ɖúù 20:27-40)
18Sɔ̀ìn ɓóɛ gboɛɛ, Sádyùsíì-nyɔ̀ ɓěɔ̀ ɖíɛ́ ɓě dyi ma Jízɛ̀ gbo. Wa mɔ̀ nyɔ ɓě cɛ̃à kà ɓɛ́ nyɔ ɓě ɖǎà mɛ́ kɛɛ se gĩɔ wóɖóɛ ɓɛ́ìn ɖeɛ̀. Wa diè ma ɔ dyi, ké wa ɖá, 19“Nyɔ-ɖɛ-tɛ̀mɛ̀ìn-nyɔ̀, Mózèɛ̀ gmaɔ̀ ɖá gàa ɖò dyi mɛ́, ké ɔ gmàà dyi ɓíɖíi sè, ké gàaɔ̀ se dyú ɖò ɓéɖé ní, nìí, gàaɔ̀ ɖíí-gàà mɛ kpɔ̃ ɔ gmààɔ̀ dyi, ɓɛ́ ɔ kèɔ̀ kè ké dyú wóɖóìn ɖé ɔ ɖíí-gàà mɛ́à kɛɛ nyɛ́nɛ́ mú. 20Ɖíí-gàà mɛ̀nɛ̌ìn-sɔ̃́ ɓě nì zɔ̃̌ɔ̀ ɓó. Waà ɖíí-gàà vɛ̀nɛ̀ kpɔ̃ ma nyɔ́nɔ́ dyi. Ké ti waà ɖíí-gààɔ̀ mɛ́ ma kɛɛ, ɔ se dyú ɖò ɓíɖíi sè. 21Ké nyɔ kɔ ɓó waà ɖíí-gàà vɛ̀nɛ̀ɔ̀ gbo dyíɛɛ kpɔ̃ ma màaɔ̀ dyi. Ké ɔ mɔ̀ùn mɛ́ ɖe, ké ɔ kè màaɔ̀ se dyú ɖò ɓéɖé. Wa nyɔ vɛ̀nɛ̀ tã nììnɔ̀ nì ma ná ɖekè. 22Ké màaɔ̀ kè wóɖó-wóɖó mɛ̀nɛ̌ìn-sɔ̃́ ɓěɔ̀ kpɔ̃ìn ma dyi nyɛ̀nɛ̀ɛ̀, ké wa se ma dyú ɖò wóɖóìn fɔɔ. Ti ɓɛ́ wa séín ɖǎ ma mɛ́ɛ, màaɔ̀ mɔ̀ùn mɛ́ ma ɖekè. 23Ti ɓɛ́ Gèɖèpɔ́ɔ̀ muà nyɔ ɓě ɖǎà mɛ́ɛ gĩɔ zàùn wɛ̃ɛ, nyɛ́ kɔ̃̀ gmàà màaɔ̀ mu jǔùn wɛ̃́? Sepóɛɖé màaɔ̀ ɖǎ ma wa ɖò-ɖòɛ̀ gmàà jǔ nyɛ̀nɛ̀ɛ̀.”
24Ké Jízɛ̀ jǔ ma wa gɔ̃̌, ké ɔ ɖá, “Má, ɓě bĩ ɖɛ xwae? Ɖɛ kɔ̃̀ jè ɓě bĩà ɖɛ xwaa mɔ̀ ɓě se ɖɛ Gèɖèpɔ́ɔ̀-cèè-ɖɛ̀ɔ̀ cɛ̃ɛ dyuò, ké ɓě se ɔ kpéɔ̀ jè dyuò. 25Sepóɛɖé ti ɓɛ́ nyɔ ɓě ɖǎà mɛ́ɛ muà gĩɔ wóɖóùn wɛ̃ɛ, màa kè gàa se dyi kpɔ̃ǐn mu ɖe. Wa muá nììn kà ínjà ɓě nìà ɖé dyɔún wɛ̃ɛ nìà kɛ. 26Ɓá nyɔ ɓě ɖǎà mɛ́ɛ gĩɔ wóɖó jè dyíɛɛ, ɓě séè céè-ɖɛ̀ ɓɛ́ Mózè céèà kɛɛ wuɖuún zà ɖòò? Ɖé céè-ɖɛ̀ɔ̀ dɛ̀ ɓɛ́ ɔ cɛ̃à ɖɛ ɓá cu-gbɔ̌ɔ̀ jè dyíɛ múɛɛ, Gèɖèpɔ́ɔ̀ cɛ̃ɛ Mózè gbo, ké ɔ ɖá, ‘Mɔ̄ mɔ̀ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀.’ 27Ɔ se gĩɔ-nyɔ̀ ɓěɛ̀ Gèɖèpɔ́ɔ̀. Ɔ mɔ̀ Gèɖèpɔ́ɔ̀ ɓó nyɔ ɓě nì cĩ́ɛń nyɛɛ bìì. Ɓě ɖǎ ɖɛ xwa bĩ mìɔ.”
Gmaɔ̀ nyɔ kpa ɖɛ mìɔ kɛ
(Máfíò 22:34-40; Ɖúù 10:25-28)
28Ɓó tia ɓaɖaa, Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ dyúáɖò xwɛ̃́ìn ma Sádyùsíì-nyɔ̀ ɓěɔ̀ bũ̌in, ké ɔ wɔ̃́ ɖɛ wa nì ma cɛ̃iń ɖé wa mìɔùn hwìɛ̀ kɛ. Ɔ dyuòɛ̀ ma dyí kà ɓɛ́ Jízɛ̀ zà ma ɖé wuɖu nɔ̀mɔ̀ dyíin nyɛ. Ké Gèɖèpɔ́ɔ̀-cèè-ɖɛ̀ dyuò-nyɔ̀ɔ̀ diè ma Jízɛ̀ dyi, ké ɔ ɖá, “Gmaɔ̀ nyɛ́ kpa ɖɛ mìɔ ké ɔ zi wa séín dyíɛ́?”
29Ké Jízɛ̀ jǔ ma ɔ gɔ̃̌, ké ɔ ɖá, “Gma kpa ɖɛɔ̀ ɖá, ‘Ɓě tò ɖùǔo, Éézùɖùɛ̀-nyɔ̀ ɓě! Bounɓoɔ̀ ɖòùn mɔ̀ ɓěà Gèɖèpɔ́ɔ̀. 30Ké ɓě mɛ ɖɛ̀ɓɛ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ mú hwòɖǒɛ̀-ɖé-hwɛ̀-kà ɖé ɓěɛ̀ hwìɖǐi-poìn-ɖɛ̀ séín mú ɔ kè ɖé ɓěɛ̀ kpé séín mú.’ 31Gma kpa ɖɛɔ̀ nyɔ kɔ ɓó dyíɛɛ, ɔ kɛà kɛ̀: ‘M̀ mɛ ɖɛ̀ɓɛ̀ m̀ mǔè ɖò mú kà m̀ ɖɛ̀ɓɛ̀à m̀ mìɔùn múɛ.’ Gma ɖò se ɖɛ kpa ɓɛ́ ɔ ké gma ɓě nìà kɛ dyí zi.”
32Ké Gèɖèpɔ́ɔ̀-cèè-ɖɛ̀ dyuò-nyɔ̀ɔ̀ cɛ̃ɛ ɔ gbo, ké ɔ ɖá, “Kē! Ɔ mɔ̀ jǎà wà, Nyɔ-ɖɛ-tɛ̀mɛ̀ìn-nyɔ̀. M̀ cɛ̃ ɖɛ sɛ́ɖɛ́ìn dyí kà ɔ ɖòǔn mɔ̀ Gèɖèpɔ́ɔ̀ ké Gèɖèpɔ́ɔ̀ kà kò ɖò se ɓó ɔ wáún nì ɖeɛ. 33Ké m̀ dyi ɔ mú ɖɛ̀ɓɛ̀ hwòɖǒɛ̀-ɖé-hwɛ̀-kà ɖé nì ɖɛ-múin-wɔ̃́-wɔ̃́ séín mú ɔ kè ɖé nì kpé séín mú, ké m̀ dyi nì mǔè ɖò mú ɖɛ̀ɓɛ̀ kà m̀ ɖɛ̀ɓɛ̀à m̀ mìɔùn múɛɛ ní, nìí, ɔ nɔ̀mɔ̀ dyíin mìɔ, ké ɔ zi fɔ̃ɔ-sàǎ-zàìn-ɖɛ̀ séín kè sáa-zàìn-ɖɛ̀ tɔ̀ɔ̀ ɓě dyí.”
34Ti ɓɛ́ Jízɛ̀ dyéɛ ma kà ɓɛ́ Gèɖèpɔ́ɔ̀-cèè-ɖɛ̀ dyuò-nyɔ̀ɔ̀ zà ma ɖé wuɖu hwòɖǒ-fɔ̀nɔ̀-kà kɛɛ, ɔ cɛ̃ɛ ma ɔ gbo, ké ɔ ɖá, “M̀ kè Gèɖèpɔ́ɔ̀ kã́á-ɓòɖòɔ̀ se gboi tɔmɔìn.” Sɔ̀ìn ɓóɛ gboɛɛ, nyɔ ɖò se ma ɔ ɖɛ ɖò dyi dièɛ̀ ɓɛ́ìn ɖe fɔɔ.
Dyi-diè-ɖɛ̀ ɓá Kɛ́ɖɛ́ìɔ̀ jè dyíɛ
(Máfíò 22:41-46; Ɖúù 20:41-44)
35Ti ɓɛ́ Jízɛ̀ nì ma nyɔ ɓěɔ̀ ɖɛ tɛ̀mɛ̀ǐn ɖé Gèɖèpɔ́ɔ̀ gbǒɔ̀ múɛɛ, ɔ ɖá, “Xwɛ̌ Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ dyiɛ cɛ̃ kà ɓɛ́ Kɛ́ɖɛ́ìɔ̀ mɔ̀ Dèɓéɛ̀ dyú kɛ́? 36Dèɓé mìɔùn wùɖùìn zɔ̃̌ɔ̀ ɖé Zùù Hwɛ̀ǐn-hwɛ̀ǐnɔ̀ mú, ké ɔ ɖá,
‘Bounɓoɔ̀ cɛ̃ɛ ma ní wuɖuí-kɔ̃̀-nyɔ̀ɔ̀ gbo, ké ɔ ɖá,
“Dèɖě dà ḿ ɖiaún dya,
ɓɛ́ ḿ ké nì mú-nyɛ́-nyɔ̀ ɓěɔ̀ m̀ ɓo xwíɖíi po hwɛ̀.” ’
37Dèɓé mɔ̀ùn ɖáìn ma ɔ wuɖuí-kɔ̃̀-nyɔ̀. Nìí, xwɛ̌ Kɛ́ɖɛ́ìɔ̀ ɓɛ́ìn ɔ dyú jǔɛ kɛ́?” Ɓó tia ɓaɖaa, nyɔ kúɖúú ɓě nì ɓó kɛɛ kpá ma múàǔn, ɓɛ́ wa ké ɔ gbo ɖùǔ tò.
Jízɛ̀ po nyɔ ɓěɔ̀ náún ɓá Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ jè dyí
(Máfíò 23:1-36; Ɖúù 20:45-47)
38Ti ɓɛ́ Jízɛ̀ nì ma nyɔ ɓěɔ̀ ɖɛ tɛ̀mɛ̀ǐn nyɛɛ, ɔ ɖá, “Ɓě mɛ ma mú ɓó Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ jè. Wa mɔ̀ nyɔ ɓě ɖɛ̀ɓɛ̀à mú ɓɛ́ wa kéà wáɖá-ɖɔ̀ zɛin mú po, ɓɛ́ wa kéà dyi téɛ. Wa ɖɛ̀ɓɛ̀ ɓɛ́ nyɔǔn ké wa nyíɔún zà ɖé kpéín-dyé-dyé mú, ɖé ɖɛ-pèɖèìn-naín ɓěɔ̀. 39Wa ɖɛ̀ɓɛ̀ ɓɛ́ wa ké dà kpa ɖɛ ɓě nì ɖé waà cɔ́cì-gbò ɓěɔ̀ múɛɛ kò. Wa dyi hwɔ kɔ̃ mu ní, wa ɖɛ̀ɓɛ̀ ɓɛ́ wa ké dà kpa ɖɛɔ̀ kò. 40Wa kpɔ̃ jɔ̌ɔ̀-màà ɓě ɖɛ ɓě xwai. Wa hwèɖèìn ɓaàǔn, kɛɛ wa nyu dyéɖéi. Ɔ jèɛɛ, zaa ɓɛ́ ɔ mu wa kpɔ̃ùn wɛ̃ɛ mu dyí ɓúáùn mìɔ.”
Jɔ̌ɔ̀-màà ɖòɛ̀ nyíí-ɖɛ̀
(Ɖúù 21:1-4)
41Wé ɖòɛ̀ ɓaɖaa, Jízɛ̀ kò ma ɖé Gèɖèpɔ́ɔ̀ gbǒɔ̀ mú dyi, hwɔ ɖé dɛ̀ ɓɛ́ nyɔ ɓěɔ̀ po ma wíɖí kɛɛ dyúa dyí. Ké ɔ nì ma nyɔ kúɖúú ɓěɔ̀ dyéɛń, ké wa nì ma ɖé wíɖí poɛń. Ké nyɔ pàɖǎ ɓě ɓɛ́ wa ɓéɖé wíɖí kɛɛ po ɖé pàɖǎ. 42Ké jɔ̌ɔ̀-màà dyé gǎ ɖò dyi ma, ké ɔ po ɖé jɛ̃̀-pĩ̀à sɔ̃́ ɓɛ́ìn kápà dyúáɖò kɛɛ ɖé. 43Ké Jízɛ̀ ɖá ma ɔ ɖeín-nà-nyɔ̀ ɓěɔ̀ ɓó ɔ gbo, ké ɔ cɛ̃ɛ ma wa gbo, ké ɔ ɖá, “Ḿ cɛ̃ ɓě jǎà gbo, jɔ̌ɔ̀-màà mɔ̀ gǎ-dyé-nyɔ̀ nìà kɛɛ, ɖɛ ɔ poà ɖéɛɛ ɓúá kpéín, ké ɔ zi wíɖí séín ɓɛ́ nyɔ ɓěɔ̀ poà ɖé kɛɛ dyí. 44Sepóɛɖé wa po ɖé waà wíɖíɔ̀ nyɔ seìn dyiɛɛ ɖò, kɛɛ màa ɓɛ́ ɔ seà ɖɛ ɖò ɓéɖé kɛɛ, ɔ po ɖé ɖɛ séín ɓɛ́ ɔ kéɔ́ ɖii-ɖɛ̀ mú dɔ̃ɛ.”
Chwazi Kounye ya:
Máà 12: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.
Máà 12
12
Nɔ́ɔ́ ɓá nyɔ ɓě ɓɛ́ wa sè ma géɖéè-gbǎ ɖò gboɛɛ jè dyíɛ
(Máfíò 21:33-46; Ɖúù 20:9-19)
1Ké Jízɛ̀ dè ma nɔ́ɔ́ ɖò poɛ gbɔ ɖé wa gbo, ké ɔ ɖá, “Gàa ɖò nì zɔ̃̌ɔ̀ ɓó, ké ɔ ɓá ma géɖéè, ké ɔ mɔ̀ ma géɖéè-gbǎ. Ké ɔ cɛ̃̀ìn gba-gba ɖei, ké ɔ ɓúɖú ma dɛ̀ ɓɛ́ wa ké géɖéèɔ̀ mú píníìn nyɛ, ké ɔ zà ɖé gbàà ɖò. Ké ɔ sè ma geɖeɔ̀ nyɔǔn ɓě gbo, ɓɛ́ wa kéɛ dyí gmɔ̀. Ké ɔ sɔ̀ dyí, ké ɔ mu ma ɓóɖó vɛ̃in ɖò kɔ̃. 2Ti ɓɛ́ géɖéèɔ̀ kpã́-tì nyini ma ɓóɛɛ, ɔ ɖoɓo ma ɔ gbo-nì-nyɔ̀ ɓěɔ̀ ɖò ɖé nyɔ ɓě nì ma kà géɖéè-gbǎɔ̀ dyí gmɔ̀ǔn wɛ̃ɛ gbo, ɓɛ́ wa ké ɔ géɖéèɔ̀ ɖò gbo ɖoɓo. 3Kɛɛ wa kpɔ̃ ma ɔ gbo-nì-nyɔ̀ɔ̀, ké wa ɓaɖa ma ɔ, ké wa fɔ̀nɔ̀ìn ma ɔ xwa, ké wa ɖoɓo ma ɔ ɖe. 4Ké gàaɔ̀ ɖoɓo ma gbo-nì-nyɔ̀ ɖò ɖé wa gbo ɖe, ké wa nàmàìn ma ɔ ɖɛ dú, ké wa nyìnììn ma ɔ bũ̌in dɛ̃-kà. 5Ké gàaɔ̀ ɖoɓo ma gbo-nì-nyɔ̀ ɖò ɖe, ké wa ɖáɓá ma ɔ. Ké gbo-nì-nyɔ̀ pàɖǎ dyé ma ná ɖɛ dyúáɖòɔ̀ dyí. Wa ɓaɖa wa ɖíɛ́ ɓě, ké wa ɖáɓá wa ɖíɛ́ ɓě. 6Kɛɛ gàaɔ̀ ɓéɖé ma nyɔ dyúáɖò ke. Ɔ mɔ̀ ɔ hwòɖǒ-kɔ̃-dè-dyùɔ̀. Ɖé mánáín nyɛɛ, ɔ ɖoɓo ma ɔ dyúɔ̀ ɖé wa gbo, ké ɔ ɖá, ‘Ḿ dyuòɛ̀ wa mu ní dyúɔ̀ kpéín dyéìn.’ 7Kɛɛ géɖéè-gbǎɔ̀ dyí-gmɔ̀-nyɔ̀ ɓěɔ̀ cɛ̃ìn cɛ̃̀ìn gbo, ké wa ɖá, ‘Nyɔ nìà kɛ mɔ̀ nyɔ mu ɔ ɓǎà kɔ̃̀ɔ̀-ɖɛ̀ ɓěɔ̀ dúí sèìn. Ɓě dyi, ɓɛ́ ɓěà ké ɔ ɖáɓá, nìí, ɓěà mu kɔ̃̀ɔ̀-ɖɛ̀ ɓě ɓɛ́ ɔ kéà dúí sèɛɛ dyí ɖúùn.’ 8Ké wa kpɔ̃ ma ɔ, ké wa ɖáɓá ma ɔ, ké wa zà ma ɔ xwɛ́ɔ̀ ɖé géɖéè-gbǎɔ̀ mú, ké wa poɛ xwáɖáún.
9“Ɖɛ́ nyɔ kɔ̃̀à géɖéè-gbǎɔ̀ kɛɛ mu nyuùn wɛ̃́? Ɔ mu dyiìn, ɓɛ́ ɔ ké nyɔ ɓě gmɔ̀à géɖéè-gbǎɔ̀ dyíɛɛ ɖáɓá, ɓɛ́ ɔ ké géɖéè-gbǎɔ̀ nyɔ kà kò ɖò nyí, ɓɛ́ wa kéɛ dyí gmɔ̀. 10Ɓě séè ɖɛ Gèɖèpɔ́ɔ̀-cèè-ɖɛ̀ɔ̀ cɛ̃à kɛɛ wuɖuún zà ɖòò? Ɖɛ ɔ cɛ̃ɛ kɛà kɛ̀. Ɔ ɖá,
‘Sɔ́ɔ́-kpò ɓɛ́ poo-ɖɛ̀ po-nyɔ̀ ɓěɔ̀ ɓɔ́ ma kɛɛ ɖǎ gbǒɔ̀ gãún-sɔ̀ɔ̌ mú zɛ̃̀ìn.
11Bounɓoɔ̀ mɔ̀ nyɔ ɖǎ ɖɛ nìà kɛ nyu.
Ké ɖɛ ɔ nyuà kɛɛ mɔ̀ ɖɛ dĩ́ín-dĩ̀ìn ɖé à dyéɖéín.’ ”
12Nyɔ ɓě ɓɛ́ Jízɛ̀ nì ma kà gbo wùɖùɛ̌n nyɛɛ dyuòɛ̀ ma dyí kà ɓɛ́ nɔ́ɔ́ ɔ po ma kà kɛɛ ɓá ma wa dyíɛ. Ɔ jèɛɛ, wa mɔ́ ɓɛ́ wa ké ma ɔ kpɔ̃, kɛɛ wa fɛ̃̀ìn ma nyɔ kúɖúú ɓěɔ̀ ní. Wa sɔ̀ ma ɓó Jízɛ̀ gbo dyí, ké wa mu ma.
Dyi-diè-ɖɛ̀ ɓá tácì pɛ́ɛ̀ jè dyíɛ
(Máfíò 22:15-22; Ɖúù 20:20-26)
13Sɔ̀ìn ɓóɛ gboɛɛ, wa ɖoɓo ma Fáɖòsíì-nyɔ̀ ɓěɔ̀ ɖíɛ́ ɓě kè Hɛ́wɔ̀ɖɔ̀ nììn nyɔ ɓěɔ̀ ɖíɛ́ ɓě, ɓɛ́ wa ké ma Jízɛ̀ kpɔ̃ ɖé ɔ wĩín-wùɖù mú. 14Wa dyi, ké wa cɛ̃ɛ ma ɔ gbo, ké wa ɖá, “Nyɔ-ɖɛ-tɛ̀mɛ̀ìn-nyɔ̀, à dyuòɛ̀ dyí kà m̀ mɔ̀ dyí-sɛ́ɖɛ́ìn-nyɔ̀ kɛ. Mɔ̀ǔn mɔ́ nyɔ múin, sepóɛɖé m̀ se nyɔ ɖòɛ̀ dyéɖé peɖe jè. Ké m̀ tɛ̀mɛ̀ìn nyɔǔn hwìè ɓě ɓɛ́ Gèɖèpɔ́ɔ̀ mɔ́ nyɔǔn ké kpaa ɖé jǎà mú. Ɔ nɔ̀mɔ̀ dyíin ɓɛ́ à ké Síízɛ̀ mɔ̀à Wóɖóùn-kã̀ǎɔ̀ kɛɛ tácì dyéɖéín pɛ́ɛ̀ìn, mɔɔ ɔ se dyíin nɔ̀mɔ̀ɔ̀? 15À ɓéɖé à kéɛ pɛ́ɛ̀, mɔɔ ɔ se ɓéɖé ɔ ké ná nìì?”
Kɛɛ Jízɛ̀ dyuòɛ̀ dyí kà ɓɛ́ wa nì ma dyéɖéi nyuɛń nyɛ jèɛɛ, ɔ cɛ̃ɛ ma wa gbo, ké ɔ ɖá, “Ɖɛ́ kɔ̃̀ jè ɓě nìà ḿ mú dɔ̃̌uń wɛ̃́? Ɓě dyà ḿ wíɖí-pĩ̀à dyúáɖò, ɓɛ́ ḿ kéɛ kɔ̃ gmɔ̀.”
16Ké wa dyà ma dyúáɖò. Ké ɔ diè ma wa dyi, ké ɔ ɖá, “Nyɛ́ kɔ̃̀ dú-ɓò nìà wíɖí-pĩ̀àɛ̀ kɔ̃ kɛ́? Ké nyɛ́ ɖɛ ɓě céèà ɓó ɔ kɔ̃ɛɛ ɓá dyíɛ́?”
Ké wa cɛ̃ɛ ma ɔ gbo, ké wa ɖá, “Ɔ mɔ̀ Síízɛ̀e.”
17Hwɛ̀ ké Jízɛ̀ cɛ̃ɛ ma wa gbo, ké ɔ ɖá, “Ɓě nyí ɖɛ Síízɛ̀ kɔ̃̀ kɛɛ Síízɛ̀, ké ɓě nyí ɖɛ Gèɖèpɔ́ɔ̀ kɔ̃̀ kɛɛ Gèɖèpɔ́ɔ̀.” Ké wa giniìn ma dyi mìɔ ɓó Jízɛ̀ jè.
Dyi-diè-ɖɛ̀ ɓá gĩɔ wóɖó jè dyíɛ
(Máfíò 22:23-33; Ɖúù 20:27-40)
18Sɔ̀ìn ɓóɛ gboɛɛ, Sádyùsíì-nyɔ̀ ɓěɔ̀ ɖíɛ́ ɓě dyi ma Jízɛ̀ gbo. Wa mɔ̀ nyɔ ɓě cɛ̃à kà ɓɛ́ nyɔ ɓě ɖǎà mɛ́ kɛɛ se gĩɔ wóɖóɛ ɓɛ́ìn ɖeɛ̀. Wa diè ma ɔ dyi, ké wa ɖá, 19“Nyɔ-ɖɛ-tɛ̀mɛ̀ìn-nyɔ̀, Mózèɛ̀ gmaɔ̀ ɖá gàa ɖò dyi mɛ́, ké ɔ gmàà dyi ɓíɖíi sè, ké gàaɔ̀ se dyú ɖò ɓéɖé ní, nìí, gàaɔ̀ ɖíí-gàà mɛ kpɔ̃ ɔ gmààɔ̀ dyi, ɓɛ́ ɔ kèɔ̀ kè ké dyú wóɖóìn ɖé ɔ ɖíí-gàà mɛ́à kɛɛ nyɛ́nɛ́ mú. 20Ɖíí-gàà mɛ̀nɛ̌ìn-sɔ̃́ ɓě nì zɔ̃̌ɔ̀ ɓó. Waà ɖíí-gàà vɛ̀nɛ̀ kpɔ̃ ma nyɔ́nɔ́ dyi. Ké ti waà ɖíí-gààɔ̀ mɛ́ ma kɛɛ, ɔ se dyú ɖò ɓíɖíi sè. 21Ké nyɔ kɔ ɓó waà ɖíí-gàà vɛ̀nɛ̀ɔ̀ gbo dyíɛɛ kpɔ̃ ma màaɔ̀ dyi. Ké ɔ mɔ̀ùn mɛ́ ɖe, ké ɔ kè màaɔ̀ se dyú ɖò ɓéɖé. Wa nyɔ vɛ̀nɛ̀ tã nììnɔ̀ nì ma ná ɖekè. 22Ké màaɔ̀ kè wóɖó-wóɖó mɛ̀nɛ̌ìn-sɔ̃́ ɓěɔ̀ kpɔ̃ìn ma dyi nyɛ̀nɛ̀ɛ̀, ké wa se ma dyú ɖò wóɖóìn fɔɔ. Ti ɓɛ́ wa séín ɖǎ ma mɛ́ɛ, màaɔ̀ mɔ̀ùn mɛ́ ma ɖekè. 23Ti ɓɛ́ Gèɖèpɔ́ɔ̀ muà nyɔ ɓě ɖǎà mɛ́ɛ gĩɔ zàùn wɛ̃ɛ, nyɛ́ kɔ̃̀ gmàà màaɔ̀ mu jǔùn wɛ̃́? Sepóɛɖé màaɔ̀ ɖǎ ma wa ɖò-ɖòɛ̀ gmàà jǔ nyɛ̀nɛ̀ɛ̀.”
24Ké Jízɛ̀ jǔ ma wa gɔ̃̌, ké ɔ ɖá, “Má, ɓě bĩ ɖɛ xwae? Ɖɛ kɔ̃̀ jè ɓě bĩà ɖɛ xwaa mɔ̀ ɓě se ɖɛ Gèɖèpɔ́ɔ̀-cèè-ɖɛ̀ɔ̀ cɛ̃ɛ dyuò, ké ɓě se ɔ kpéɔ̀ jè dyuò. 25Sepóɛɖé ti ɓɛ́ nyɔ ɓě ɖǎà mɛ́ɛ muà gĩɔ wóɖóùn wɛ̃ɛ, màa kè gàa se dyi kpɔ̃ǐn mu ɖe. Wa muá nììn kà ínjà ɓě nìà ɖé dyɔún wɛ̃ɛ nìà kɛ. 26Ɓá nyɔ ɓě ɖǎà mɛ́ɛ gĩɔ wóɖó jè dyíɛɛ, ɓě séè céè-ɖɛ̀ ɓɛ́ Mózè céèà kɛɛ wuɖuún zà ɖòò? Ɖé céè-ɖɛ̀ɔ̀ dɛ̀ ɓɛ́ ɔ cɛ̃à ɖɛ ɓá cu-gbɔ̌ɔ̀ jè dyíɛ múɛɛ, Gèɖèpɔ́ɔ̀ cɛ̃ɛ Mózè gbo, ké ɔ ɖá, ‘Mɔ̄ mɔ̀ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀.’ 27Ɔ se gĩɔ-nyɔ̀ ɓěɛ̀ Gèɖèpɔ́ɔ̀. Ɔ mɔ̀ Gèɖèpɔ́ɔ̀ ɓó nyɔ ɓě nì cĩ́ɛń nyɛɛ bìì. Ɓě ɖǎ ɖɛ xwa bĩ mìɔ.”
Gmaɔ̀ nyɔ kpa ɖɛ mìɔ kɛ
(Máfíò 22:34-40; Ɖúù 10:25-28)
28Ɓó tia ɓaɖaa, Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ dyúáɖò xwɛ̃́ìn ma Sádyùsíì-nyɔ̀ ɓěɔ̀ bũ̌in, ké ɔ wɔ̃́ ɖɛ wa nì ma cɛ̃iń ɖé wa mìɔùn hwìɛ̀ kɛ. Ɔ dyuòɛ̀ ma dyí kà ɓɛ́ Jízɛ̀ zà ma ɖé wuɖu nɔ̀mɔ̀ dyíin nyɛ. Ké Gèɖèpɔ́ɔ̀-cèè-ɖɛ̀ dyuò-nyɔ̀ɔ̀ diè ma Jízɛ̀ dyi, ké ɔ ɖá, “Gmaɔ̀ nyɛ́ kpa ɖɛ mìɔ ké ɔ zi wa séín dyíɛ́?”
29Ké Jízɛ̀ jǔ ma ɔ gɔ̃̌, ké ɔ ɖá, “Gma kpa ɖɛɔ̀ ɖá, ‘Ɓě tò ɖùǔo, Éézùɖùɛ̀-nyɔ̀ ɓě! Bounɓoɔ̀ ɖòùn mɔ̀ ɓěà Gèɖèpɔ́ɔ̀. 30Ké ɓě mɛ ɖɛ̀ɓɛ̀ Bounɓo mɔ̀à ɓěɛ̀ Gèɖèpɔ́ɔ̀ kɛɛ mú hwòɖǒɛ̀-ɖé-hwɛ̀-kà ɖé ɓěɛ̀ hwìɖǐi-poìn-ɖɛ̀ séín mú ɔ kè ɖé ɓěɛ̀ kpé séín mú.’ 31Gma kpa ɖɛɔ̀ nyɔ kɔ ɓó dyíɛɛ, ɔ kɛà kɛ̀: ‘M̀ mɛ ɖɛ̀ɓɛ̀ m̀ mǔè ɖò mú kà m̀ ɖɛ̀ɓɛ̀à m̀ mìɔùn múɛ.’ Gma ɖò se ɖɛ kpa ɓɛ́ ɔ ké gma ɓě nìà kɛ dyí zi.”
32Ké Gèɖèpɔ́ɔ̀-cèè-ɖɛ̀ dyuò-nyɔ̀ɔ̀ cɛ̃ɛ ɔ gbo, ké ɔ ɖá, “Kē! Ɔ mɔ̀ jǎà wà, Nyɔ-ɖɛ-tɛ̀mɛ̀ìn-nyɔ̀. M̀ cɛ̃ ɖɛ sɛ́ɖɛ́ìn dyí kà ɔ ɖòǔn mɔ̀ Gèɖèpɔ́ɔ̀ ké Gèɖèpɔ́ɔ̀ kà kò ɖò se ɓó ɔ wáún nì ɖeɛ. 33Ké m̀ dyi ɔ mú ɖɛ̀ɓɛ̀ hwòɖǒɛ̀-ɖé-hwɛ̀-kà ɖé nì ɖɛ-múin-wɔ̃́-wɔ̃́ séín mú ɔ kè ɖé nì kpé séín mú, ké m̀ dyi nì mǔè ɖò mú ɖɛ̀ɓɛ̀ kà m̀ ɖɛ̀ɓɛ̀à m̀ mìɔùn múɛɛ ní, nìí, ɔ nɔ̀mɔ̀ dyíin mìɔ, ké ɔ zi fɔ̃ɔ-sàǎ-zàìn-ɖɛ̀ séín kè sáa-zàìn-ɖɛ̀ tɔ̀ɔ̀ ɓě dyí.”
34Ti ɓɛ́ Jízɛ̀ dyéɛ ma kà ɓɛ́ Gèɖèpɔ́ɔ̀-cèè-ɖɛ̀ dyuò-nyɔ̀ɔ̀ zà ma ɖé wuɖu hwòɖǒ-fɔ̀nɔ̀-kà kɛɛ, ɔ cɛ̃ɛ ma ɔ gbo, ké ɔ ɖá, “M̀ kè Gèɖèpɔ́ɔ̀ kã́á-ɓòɖòɔ̀ se gboi tɔmɔìn.” Sɔ̀ìn ɓóɛ gboɛɛ, nyɔ ɖò se ma ɔ ɖɛ ɖò dyi dièɛ̀ ɓɛ́ìn ɖe fɔɔ.
Dyi-diè-ɖɛ̀ ɓá Kɛ́ɖɛ́ìɔ̀ jè dyíɛ
(Máfíò 22:41-46; Ɖúù 20:41-44)
35Ti ɓɛ́ Jízɛ̀ nì ma nyɔ ɓěɔ̀ ɖɛ tɛ̀mɛ̀ǐn ɖé Gèɖèpɔ́ɔ̀ gbǒɔ̀ múɛɛ, ɔ ɖá, “Xwɛ̌ Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ dyiɛ cɛ̃ kà ɓɛ́ Kɛ́ɖɛ́ìɔ̀ mɔ̀ Dèɓéɛ̀ dyú kɛ́? 36Dèɓé mìɔùn wùɖùìn zɔ̃̌ɔ̀ ɖé Zùù Hwɛ̀ǐn-hwɛ̀ǐnɔ̀ mú, ké ɔ ɖá,
‘Bounɓoɔ̀ cɛ̃ɛ ma ní wuɖuí-kɔ̃̀-nyɔ̀ɔ̀ gbo, ké ɔ ɖá,
“Dèɖě dà ḿ ɖiaún dya,
ɓɛ́ ḿ ké nì mú-nyɛ́-nyɔ̀ ɓěɔ̀ m̀ ɓo xwíɖíi po hwɛ̀.” ’
37Dèɓé mɔ̀ùn ɖáìn ma ɔ wuɖuí-kɔ̃̀-nyɔ̀. Nìí, xwɛ̌ Kɛ́ɖɛ́ìɔ̀ ɓɛ́ìn ɔ dyú jǔɛ kɛ́?” Ɓó tia ɓaɖaa, nyɔ kúɖúú ɓě nì ɓó kɛɛ kpá ma múàǔn, ɓɛ́ wa ké ɔ gbo ɖùǔ tò.
Jízɛ̀ po nyɔ ɓěɔ̀ náún ɓá Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ jè dyí
(Máfíò 23:1-36; Ɖúù 20:45-47)
38Ti ɓɛ́ Jízɛ̀ nì ma nyɔ ɓěɔ̀ ɖɛ tɛ̀mɛ̀ǐn nyɛɛ, ɔ ɖá, “Ɓě mɛ ma mú ɓó Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ jè. Wa mɔ̀ nyɔ ɓě ɖɛ̀ɓɛ̀à mú ɓɛ́ wa kéà wáɖá-ɖɔ̀ zɛin mú po, ɓɛ́ wa kéà dyi téɛ. Wa ɖɛ̀ɓɛ̀ ɓɛ́ nyɔǔn ké wa nyíɔún zà ɖé kpéín-dyé-dyé mú, ɖé ɖɛ-pèɖèìn-naín ɓěɔ̀. 39Wa ɖɛ̀ɓɛ̀ ɓɛ́ wa ké dà kpa ɖɛ ɓě nì ɖé waà cɔ́cì-gbò ɓěɔ̀ múɛɛ kò. Wa dyi hwɔ kɔ̃ mu ní, wa ɖɛ̀ɓɛ̀ ɓɛ́ wa ké dà kpa ɖɛɔ̀ kò. 40Wa kpɔ̃ jɔ̌ɔ̀-màà ɓě ɖɛ ɓě xwai. Wa hwèɖèìn ɓaàǔn, kɛɛ wa nyu dyéɖéi. Ɔ jèɛɛ, zaa ɓɛ́ ɔ mu wa kpɔ̃ùn wɛ̃ɛ mu dyí ɓúáùn mìɔ.”
Jɔ̌ɔ̀-màà ɖòɛ̀ nyíí-ɖɛ̀
(Ɖúù 21:1-4)
41Wé ɖòɛ̀ ɓaɖaa, Jízɛ̀ kò ma ɖé Gèɖèpɔ́ɔ̀ gbǒɔ̀ mú dyi, hwɔ ɖé dɛ̀ ɓɛ́ nyɔ ɓěɔ̀ po ma wíɖí kɛɛ dyúa dyí. Ké ɔ nì ma nyɔ kúɖúú ɓěɔ̀ dyéɛń, ké wa nì ma ɖé wíɖí poɛń. Ké nyɔ pàɖǎ ɓě ɓɛ́ wa ɓéɖé wíɖí kɛɛ po ɖé pàɖǎ. 42Ké jɔ̌ɔ̀-màà dyé gǎ ɖò dyi ma, ké ɔ po ɖé jɛ̃̀-pĩ̀à sɔ̃́ ɓɛ́ìn kápà dyúáɖò kɛɛ ɖé. 43Ké Jízɛ̀ ɖá ma ɔ ɖeín-nà-nyɔ̀ ɓěɔ̀ ɓó ɔ gbo, ké ɔ cɛ̃ɛ ma wa gbo, ké ɔ ɖá, “Ḿ cɛ̃ ɓě jǎà gbo, jɔ̌ɔ̀-màà mɔ̀ gǎ-dyé-nyɔ̀ nìà kɛɛ, ɖɛ ɔ poà ɖéɛɛ ɓúá kpéín, ké ɔ zi wíɖí séín ɓɛ́ nyɔ ɓěɔ̀ poà ɖé kɛɛ dyí. 44Sepóɛɖé wa po ɖé waà wíɖíɔ̀ nyɔ seìn dyiɛɛ ɖò, kɛɛ màa ɓɛ́ ɔ seà ɖɛ ɖò ɓéɖé kɛɛ, ɔ po ɖé ɖɛ séín ɓɛ́ ɔ kéɔ́ ɖii-ɖɛ̀ mú dɔ̃ɛ.”
Chwazi Kounye ya:
:
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.