Máà 13
13
Jízɛ̀ cɛ̃ Gèɖèpɔ́ɔ̀ gbǒɔ̀ wáɖá jè
(Máfíò 24:1-2; Ɖúù 21:5-6)
1Ti ɓɛ́ Jízɛ̀ nì ma ɖé Gèɖèpɔ́ɔ̀ gbǒɔ̀ mú sɔ̀ǔn wɛ̃ɛ, ɔ ɖeín-nà-nyɔ̀ ɓěɔ̀ ɖò cɛ̃ɛ ma ɔ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, gmɔ̀ nɔ̄! Dyé sɔ́ɔ́-kpò vɛ̀nɛ̀ ɓúá kɔ̃in ɓěɛ̀ wà! Ké poo-ɖɛ̀ ɓě nìà kɛ nɔ̀mɔ̀ dyíin mìɔ cá wà!”
2Ké Jízɛ̀ cɛ̃ɛ ma ɔ gbo, ké ɔ ɖá, “Má, m̀ dyé poo-ɖɛ̀ vɛ̀nɛ̀ ɓě nìà kɛ níe? Sɔ́ɔ́-kpò ɓě nìà kɛ ɖò se ɔ mǔè ɖò kɔ̃ sèɛ̌ mu. Wa mu wa wáɖáùn séín nyɛ̀nɛ̀ɛ̀.”
Fũ̀à-fṹá-tì kè nyɔ-gǎ-dyéìn-dyéìn ɓě nì ɖé dyúa kɛɛ jè
(Máfíò 24:3-14; Ɖúù 21:7-19)
3Sɔ̀ìn ɓóɛ gboɛɛ, Jízɛ̀ dèɖě ma dya ɖé Ɔ́ɖè-tòɖòɔ̀ dya, ɖé Gèɖèpɔ́ɔ̀ gbǒɔ̀ dyúa, ké Píɖɛ̀ kè Jĩ́ìn kè Jɔ̃́ɔ́ ɔ kè Ã́dòɖò diè ma ɔ dyi nyàà, ké wa ɖá, 4“Cɛ̃ɛ à gbo, tiɔ̀ nyɛ́ ɖɛ ɓě nìà kɛ mu ná kpáùn wɛ̃́? Ɖɛ́ mɔ̀ dyí-tɛ̀mɛ̀ìn-ɖɛ̀ ɓě, ɓɛ́ wa kéɛ à dyí tɛ̀mɛ̀ìn kà ɖɛ séín ɓě nìà kɛ mu kpáùn wɛ̃́?”
5Ké Jízɛ̀ dè ma wa ɖɛ tɛ̀mɛ̀ìn gbɔ, ké ɔ ɖá, “Ɓě mɛ ma mú, ɓɛ́ nyɔ ɖò ní kɔ̃̀ ɖà ɓě cá. 6Nyɔ pàɖǎ mu dyiìn, ɓɛ́ wa kéɛ cɛ̃ kà wa mɔ̀ mɔ̄ kɛ, ké wa mu nyɔ pàɖǎ cáùn. 7Ɓě dyi to ɓě xwɛ̃́ìn dyiɛ kè ɖíɛ́ ɓě tɔ̀mɔ̀ gboɛɛ bɔ̃̌ wɔ̃́ ní, nìí, ɓě ní ɖá ɓɛ́ ɓě ké fɛ̃̀ìn. Ɖɛ ɓěɛ̀ ɓéɖé wa ké kpá, kɛɛ ɔ séè ɖɛ séín mánáín-hwɛ̀ìn-naín ke. 8Ɓóɖó-dù ɓě mu gbo vɔ̃ǐn nììn, ké kã́á-ɓòɖò ɓě mu gbo vɔ̃ǐn nììn. Ké ɓóɖó-kpàà dà kò-kò ɓě mu dyi túòùn, ké mɔ́ mu kpáùn. Ɖɛ ɓě nìà kɛ mɔ̀ gǎ-dyé-dyé ɓěɔ̀ gbɔ-dè-dè.
9“Ɓě mɛ màìn ɓě mìɔùn mú. Wa mu ɓě zɔ̃́ín-wɔ̃-pòìn-naín ɓě kpaùn, ké wa mu ɓě gbàtò ɓàɖàìn ɖé Júù-nyɔ̀ ɓěɔ̀ cɔ́cì-gbò ɓěɔ̀ mú. Ké ɓě mu gɔ̌mànà-nyɔ̀ ɓě kè kã́á ɓě dyúa dyi nyànàùn ɓó ní jè, ɓɛ́ dyììn ɖéɛ múɛɛ, ɓě ké bɔ̃̌ nɔ̀mɔ̀ dyíinɔ̀ wa gbo cɛ̃. 10Ɓě ɓéɖé ɓɛ́ ɓě ké bɔ̃̌ nɔ̀mɔ̀ dyíinɔ̀ jè zio mú pòìn ɖé ɓóɖó-dù kã̀ìn séínɛ̀ nyɔ ɓě gbo kĩ́ín hwɛ̀. 11Ti séín ɓɛ́ wa mu ɓě kpɔ̃ùn, ɓɛ́ wa ké ɓě nyɔǔn xwaún po, nìí ɓɛ́ wa ké ɓěɛ̀ zaa cɛ̃ɛ, hwɛ̀ tiɔ̀ ké ɓó nyiniɛɛ, ɓěǐn ɖá ɓɛ́ ɓě ké hwìɖǐi poìn ɓó ɖɛ ɓě ké cɛ̃ɛ jè. Tiɔ̀ dyi ɓó nyini ní, ɖɛ séín ɓě ɓɛ́ Gèɖèpɔ́ɔ̀ mu ɓě wĩín poùn wɛ̃ɛ, ɓě mɛ cɛ̃ɛ. Sepóɛɖé wuɖu ɓě muà cɛ̃ìn nyɛɛ, ɔ se ɓě mìɔùn nììn wuɖu jǔɛ mu. Ɔ mu ɖé Zùù Hwɛ̀ǐn-hwɛ̀ǐnɔ̀ gbo sɔ̀ùn. 12Nyɔǔn ɓě mu waà ɖíí-gàà ɓě nyɔǔn ɓě xwaún poùn, ɓɛ́ wa ké wa ɖáɓá. Ké gàa ɓě mu waà dyú ɓě nyɔǔn ɓě xwaún poùn, ɓɛ́ wa ké wa ɖáɓá. Ké dyú ɓě mu waà wóɖóìn-nyɔ̀ ɓě gbo hwɛ̀ìn, ké wa muɛ nyuùn ɓɛ́ nyɔǔn ké wa ɖáɓá. 13Ké nyɔǔn séín mu ɓě mú nyɛ́ìn ɓó ní jè. Kɛɛ nyɔ mɔ̀ nyɔ mu hwòɖǒ kuùn tee, ɓɛ́ ɔ fɛ̀ɛ̀ ké mánáín hwɛ̀ kɛɛ, ɔ mu póùn.
Gǎ-dyé-dyé vɛ̀nɛ̀ nì dyiɛń nyɛ
(Máfíò 24:15-28; Ɖúù 21:20-24)
14“Ɓě mu Gèɖèpɔ́ɔ̀ gmaɔ̀ ɖuà-ɖɛ̀ ɓɛ́ ɔ dyàà ɖɛ nyàìn nyɔǔn dyiɛɛ dyéìn ɖé pá kɔ̃̀ mú ɔ se kɔ̃̀ ɔ ké nìɛ. (Nyɔ mɔ̀ nyɔ zà céè-ɖɛ̀ nìà kɛ wuɖuún wɛ̃ɛ, ɔ mɛ wɔ̃́ɔ múin.) Nìí, nyɔ ɓě nì ɖé Júɖìà-ɓòɖòɔ̀ kɔ̃ kɛɛ mɛ gbǔ, ɓɛ́ wa ké ɖé toɖo ɓěɔ̀ dya mu. 15Nyɔ mɔ̀ nyɔ nì ɖé ɔ gbǒɔ̀ dúún wɛ̃ɛ, ɔ ní ɖá ɔ ké ɖɛ ɖò ɖé gbǒɔ̀ mú zà. 16Ké nyɔ mɔ̀ nyɔ nì ɖé ɔ ɓíɖí-geɖeín nyɛɛ, ɔ ní ɖá ɓɛ́ ɔ ké ɔ ɓíɖí-taún ɖe kɔ́ìn, ɓɛ́ ɔ ké ɔ ɖɔ dyí ɖú. 17Màa ɓě nì zùù kɔ̃ɛ kè nyɔ ɓě nì dyú nyáǐn ɓó tia ɓaɖaa, ééɓàa, wa jè mu wìì-ɖɛ̀ jǔùn. 18Ɓě mɛ ɓaà Gèɖèpɔ́ɔ̀, ɓɛ́ ɔ ní kɔ̃̀ ɖà kpá ɓó sɔ̃̀ɔ̀-tìǐn. 19Ɓó tia ɓaɖaa, nyɔǔn-dyù mu gǎ dyéɛń ziìn, ɓɛ́ ɔ ké kà wa nyu ma gǎ dyéɛ sɔ̀ìn ti ɓɛ́ Gèɖèpɔ́ɔ̀ mɛ ma ɓóɖó-kpà nìà kɛ gbo, ké kàà-ɖɛ̀ǐn gbo dyiɛɛ dyí zi, ké wa se kǎa gǎ dyéɛ mu ɖe. 20Bounɓoɔ̀ seɔ́ má wé ɓěa ɓoún xwã́ìn ní, nìí, nyɔ ɖò seɔ́ má toɖo-kpàà kɔ̃ sèɛ̌ mu. Kɛɛ ɔ mu wé ɓěa ɓoún xwã́ìn ɓó nyɔ ɓě ɓɛ́ ɔ ɖǎà gã kɛɛ jè.
21“Ɓó tia ɓaɖaa, nyɔ ɖò dyiɛ ɓě gbo cɛ̃, ké ɔ dyi níiń, ‘Gmɔ̀ nɔ̄, kà Kɛ́ɖɛ́ìɔ̀ nì kɛ,’ mɔɔ ‘Gmɔ̀ nɔ̄, kà ɔ nì ɖéɛ’ ní, nìí, ɓě ní po nyɔɔ̀ wuɖuɔ̀ jǎà. 22Sepóɛɖé nyɔ ɓě mu dyiìn, ɓɛ́ wa ké wa mìɔùn Kɛ́ɖɛ́ì ɖáìn, ké ɖíɛ́ ɓě mu wa mìɔùn kpáá-ɖɛ̀-cɛ̃-nyɔ̀ ɖáìn. Wa mu ɖàɓàìn-ɖɛ̀ ɓě kè dĩ́ín-dĩ̀ìn-ɖɛ̀ ɓě nyuùn, ɓɛ́ ɔ dyi xwa fɛ̃́ìn ní, ɓɛ́ wa ké nyɔ ɓě ɓɛ́ Gèɖèpɔ́ɔ̀ ɖǎà gã kɛɛ cá. 23Kɛɛ ɓě mɛ ma múo! Ḿ nì ɓě náún poɛń nɔ̀ɔ̀, hwɛ̀ ɓɛ́ ɖɛ ɓěɛ̀ ké kpá.
Nyɔǔn-dyùɛ̀ Dyú-gààɔ̀ dyi jè
(Máfíò 24:29-31; Ɖúù 21:15-28)
24“Ɓó tia ɓaɖaa, nyɔǔn-gǎ-dyéìn-dyéìnɔ̀ ɖǎ dyi zi ní, dyóɖóɔ̀ mu tíe-kpò mú zɛ̃̀ìn, ké dɛ̀nɛ̀ɔ̀ se fãá mu, 25ké dɛ̀nɛ̀ mɛ́nɛ́ɛ́ ɓěɔ̀ mu dyií ɓuɖuùn, ɓɛ́ wa ké dyi kpáuń nì. Ké ɖɛ séín nì ɖé dyɔɔ̀ dyíɛɛ mu dyi túòùn. 26Nìí, wa mu mɔ̄ Nyɔǔn-dyùɛ̀ Dyú-gààɔ̀ dyéìn, ɓɛ́ ḿ ké ɖé dyɔún sɔ̀ǔn nì, ɓɛ́ ḿ ké ní-kpò ɖò mú dyìɛ̌n nì ɖé kpé vɛ̀nɛ̀ kè dĩ́ín-dĩ̀ìn mú. 27Nìí, ní mu ínjà ɓěɔ̀ ɖé ɓóɖó-kpàà gã hĩinyɛ ɓěɔ̀ kɔ̃in toìn, ké wa mu nyɔ ɓě ɓɛ́ ḿ ɖǎà gã kɛɛ dyí poìn sɔ̀ìn ɖé ɓóɖó-kpàà máná ɖò gbo, ké ɔ máná tɔ̀ɔ̀ gbo muɛ.
Tɛ̀mɛ̀ìn-ɖɛ̀ ɓá féè-cù jè dyíɛ
(Máfíò 24:32-35; Ɖúù 21:29-33)
28“Féè-cùɔ̀ mɛ tɛ̀mɛ̀ìn ɓě ɖɛ. Ɓě dyiɛ dyé, ké ɔ ɖɔ́ ɓěɔ̀ dyiá dɔ̀ɔ̀-dɔ̀ɔ̀ nì, ké ɔ dyi mí poɛń nìǐn, nìí, ɓě mɛ dyuòɛ̀ kà ní-tì nìǎ dyi xwɛ̃́ǐn nyɛ. 29Kà dyúáɖòɔ̀ kǎà ɓě dyi ɖɛ ɓě nìà kɛ dyéɛń nìǐn, ɓě mɛ dyuòɛ̀ dyí kà mánáín-hwɛ̀-tìɔ̀ nìǎ dyi xwɛ̃́ǐn nyɛ, ké kà ɔ nìǎ ɓě ɓo kɔ̃ dyáuń wɛ̃. 30Ḿ cɛ̃ ɓě jǎà gbo, nyɔ ɓě nìà kàǔn wɛ̃ɛ, wa se mɛ́ɛ hwɛ̀ɛ̌ mu, ké ɖɛ séín ɓěɛ̀ kpá hwɛ̀. 31Dyɔɔ̀ kè ɓóɖó-kpàà mu dyi ziìn, kɛɛ ní wuɖu ɓěɔ̀ se dyi ziɛ́ mu.
Nyɔ ɖò se ɖɛ séín mánáín-hwɛ̀-tìɔ̀ dyuò
(Máfíò 24:36-44)
32“Ɓá ti ɓɛ́ ɖɛ ɓě nìà kɛ mu kpáùn wɛ̃ɛ jè dyíɛɛ, nyɔ ɖò seɛ dyuò. Ínjà ɓě nì ɖé dyɔún wɛ̃ kè mɔ̄ mɔ̀à Dyú-gààɔ̀ kɛɛ seɛ dyí dyuò. Ɓǎɔ̀ ɖòùn mɔ̀ nyɔ dyuòɛ̀ dyí. 33Ɓě mɛ ma mú, ɓɛ́ ɓě ké ɓɛ́ɖɛ́ kɔ̃ nì, sepóɛɖé ɓě se ti wéɔ̀ mu dyiìn nyɛɛ dyí dyuò. 34Ɔ nì kà gàa ɖò nìà da muɛń nyɛ. Ti ɔ nì dyí sɔ̀ǔn wɛ̃ɛ, ɔ po ɖɛ séín ɓě ɔ gbo-nì-nyɔ̀ ɓěɔ̀ xwaún, ké wa ɓéɖé waà kũ̀à ɖò-ɖò. Ɔ cɛ̃ɛ nyɔ ɓɛ́ ɔ gmɔ̀à gmɔ-wɔ̃̀ɔ̀ dyíɛɛ gbo, ɓɛ́ ɔ ké ɓɛ́ɖɛ́ kɔ̃ nì tee. 35Ɔ jèɛɛ, ɓě mɛ gmɔ̀ hwìǐ, sepóɛɖé ɓě se ti ɓɛ́ gbo-nì-ɓǎɔ̀ mu dyiìn nyɛɛ dyuò. Ɔ ɓɛ́ìn hwìo-nyɛ̀ bũ̌ mɔɔ hwuɖu hwìɛ̀ǐn mɔɔ zɔ̃ wĩín vɛ̀nɛ̀. 36Ɓě gmɔ̀ hwìǐ, ɔ kɔ̃̀ ɖà dyi wàɖà ní, nìí, ɔ ní kɔ̃̀ ɖà ɓě nyíɔún dyi dyɛ̀ìn. 37Ɖɛ ḿ cɛ̃à ɓě gboɛɛ, ḿ cɛ̃ɛ nyɔǔn séín gbo. Ɓě mɛ nì ɓɛ́ɖɛ́ kɔ̃.”
Chwazi Kounye ya:
Máà 13: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.
Máà 13
13
Jízɛ̀ cɛ̃ Gèɖèpɔ́ɔ̀ gbǒɔ̀ wáɖá jè
(Máfíò 24:1-2; Ɖúù 21:5-6)
1Ti ɓɛ́ Jízɛ̀ nì ma ɖé Gèɖèpɔ́ɔ̀ gbǒɔ̀ mú sɔ̀ǔn wɛ̃ɛ, ɔ ɖeín-nà-nyɔ̀ ɓěɔ̀ ɖò cɛ̃ɛ ma ɔ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, gmɔ̀ nɔ̄! Dyé sɔ́ɔ́-kpò vɛ̀nɛ̀ ɓúá kɔ̃in ɓěɛ̀ wà! Ké poo-ɖɛ̀ ɓě nìà kɛ nɔ̀mɔ̀ dyíin mìɔ cá wà!”
2Ké Jízɛ̀ cɛ̃ɛ ma ɔ gbo, ké ɔ ɖá, “Má, m̀ dyé poo-ɖɛ̀ vɛ̀nɛ̀ ɓě nìà kɛ níe? Sɔ́ɔ́-kpò ɓě nìà kɛ ɖò se ɔ mǔè ɖò kɔ̃ sèɛ̌ mu. Wa mu wa wáɖáùn séín nyɛ̀nɛ̀ɛ̀.”
Fũ̀à-fṹá-tì kè nyɔ-gǎ-dyéìn-dyéìn ɓě nì ɖé dyúa kɛɛ jè
(Máfíò 24:3-14; Ɖúù 21:7-19)
3Sɔ̀ìn ɓóɛ gboɛɛ, Jízɛ̀ dèɖě ma dya ɖé Ɔ́ɖè-tòɖòɔ̀ dya, ɖé Gèɖèpɔ́ɔ̀ gbǒɔ̀ dyúa, ké Píɖɛ̀ kè Jĩ́ìn kè Jɔ̃́ɔ́ ɔ kè Ã́dòɖò diè ma ɔ dyi nyàà, ké wa ɖá, 4“Cɛ̃ɛ à gbo, tiɔ̀ nyɛ́ ɖɛ ɓě nìà kɛ mu ná kpáùn wɛ̃́? Ɖɛ́ mɔ̀ dyí-tɛ̀mɛ̀ìn-ɖɛ̀ ɓě, ɓɛ́ wa kéɛ à dyí tɛ̀mɛ̀ìn kà ɖɛ séín ɓě nìà kɛ mu kpáùn wɛ̃́?”
5Ké Jízɛ̀ dè ma wa ɖɛ tɛ̀mɛ̀ìn gbɔ, ké ɔ ɖá, “Ɓě mɛ ma mú, ɓɛ́ nyɔ ɖò ní kɔ̃̀ ɖà ɓě cá. 6Nyɔ pàɖǎ mu dyiìn, ɓɛ́ wa kéɛ cɛ̃ kà wa mɔ̀ mɔ̄ kɛ, ké wa mu nyɔ pàɖǎ cáùn. 7Ɓě dyi to ɓě xwɛ̃́ìn dyiɛ kè ɖíɛ́ ɓě tɔ̀mɔ̀ gboɛɛ bɔ̃̌ wɔ̃́ ní, nìí, ɓě ní ɖá ɓɛ́ ɓě ké fɛ̃̀ìn. Ɖɛ ɓěɛ̀ ɓéɖé wa ké kpá, kɛɛ ɔ séè ɖɛ séín mánáín-hwɛ̀ìn-naín ke. 8Ɓóɖó-dù ɓě mu gbo vɔ̃ǐn nììn, ké kã́á-ɓòɖò ɓě mu gbo vɔ̃ǐn nììn. Ké ɓóɖó-kpàà dà kò-kò ɓě mu dyi túòùn, ké mɔ́ mu kpáùn. Ɖɛ ɓě nìà kɛ mɔ̀ gǎ-dyé-dyé ɓěɔ̀ gbɔ-dè-dè.
9“Ɓě mɛ màìn ɓě mìɔùn mú. Wa mu ɓě zɔ̃́ín-wɔ̃-pòìn-naín ɓě kpaùn, ké wa mu ɓě gbàtò ɓàɖàìn ɖé Júù-nyɔ̀ ɓěɔ̀ cɔ́cì-gbò ɓěɔ̀ mú. Ké ɓě mu gɔ̌mànà-nyɔ̀ ɓě kè kã́á ɓě dyúa dyi nyànàùn ɓó ní jè, ɓɛ́ dyììn ɖéɛ múɛɛ, ɓě ké bɔ̃̌ nɔ̀mɔ̀ dyíinɔ̀ wa gbo cɛ̃. 10Ɓě ɓéɖé ɓɛ́ ɓě ké bɔ̃̌ nɔ̀mɔ̀ dyíinɔ̀ jè zio mú pòìn ɖé ɓóɖó-dù kã̀ìn séínɛ̀ nyɔ ɓě gbo kĩ́ín hwɛ̀. 11Ti séín ɓɛ́ wa mu ɓě kpɔ̃ùn, ɓɛ́ wa ké ɓě nyɔǔn xwaún po, nìí ɓɛ́ wa ké ɓěɛ̀ zaa cɛ̃ɛ, hwɛ̀ tiɔ̀ ké ɓó nyiniɛɛ, ɓěǐn ɖá ɓɛ́ ɓě ké hwìɖǐi poìn ɓó ɖɛ ɓě ké cɛ̃ɛ jè. Tiɔ̀ dyi ɓó nyini ní, ɖɛ séín ɓě ɓɛ́ Gèɖèpɔ́ɔ̀ mu ɓě wĩín poùn wɛ̃ɛ, ɓě mɛ cɛ̃ɛ. Sepóɛɖé wuɖu ɓě muà cɛ̃ìn nyɛɛ, ɔ se ɓě mìɔùn nììn wuɖu jǔɛ mu. Ɔ mu ɖé Zùù Hwɛ̀ǐn-hwɛ̀ǐnɔ̀ gbo sɔ̀ùn. 12Nyɔǔn ɓě mu waà ɖíí-gàà ɓě nyɔǔn ɓě xwaún poùn, ɓɛ́ wa ké wa ɖáɓá. Ké gàa ɓě mu waà dyú ɓě nyɔǔn ɓě xwaún poùn, ɓɛ́ wa ké wa ɖáɓá. Ké dyú ɓě mu waà wóɖóìn-nyɔ̀ ɓě gbo hwɛ̀ìn, ké wa muɛ nyuùn ɓɛ́ nyɔǔn ké wa ɖáɓá. 13Ké nyɔǔn séín mu ɓě mú nyɛ́ìn ɓó ní jè. Kɛɛ nyɔ mɔ̀ nyɔ mu hwòɖǒ kuùn tee, ɓɛ́ ɔ fɛ̀ɛ̀ ké mánáín hwɛ̀ kɛɛ, ɔ mu póùn.
Gǎ-dyé-dyé vɛ̀nɛ̀ nì dyiɛń nyɛ
(Máfíò 24:15-28; Ɖúù 21:20-24)
14“Ɓě mu Gèɖèpɔ́ɔ̀ gmaɔ̀ ɖuà-ɖɛ̀ ɓɛ́ ɔ dyàà ɖɛ nyàìn nyɔǔn dyiɛɛ dyéìn ɖé pá kɔ̃̀ mú ɔ se kɔ̃̀ ɔ ké nìɛ. (Nyɔ mɔ̀ nyɔ zà céè-ɖɛ̀ nìà kɛ wuɖuún wɛ̃ɛ, ɔ mɛ wɔ̃́ɔ múin.) Nìí, nyɔ ɓě nì ɖé Júɖìà-ɓòɖòɔ̀ kɔ̃ kɛɛ mɛ gbǔ, ɓɛ́ wa ké ɖé toɖo ɓěɔ̀ dya mu. 15Nyɔ mɔ̀ nyɔ nì ɖé ɔ gbǒɔ̀ dúún wɛ̃ɛ, ɔ ní ɖá ɔ ké ɖɛ ɖò ɖé gbǒɔ̀ mú zà. 16Ké nyɔ mɔ̀ nyɔ nì ɖé ɔ ɓíɖí-geɖeín nyɛɛ, ɔ ní ɖá ɓɛ́ ɔ ké ɔ ɓíɖí-taún ɖe kɔ́ìn, ɓɛ́ ɔ ké ɔ ɖɔ dyí ɖú. 17Màa ɓě nì zùù kɔ̃ɛ kè nyɔ ɓě nì dyú nyáǐn ɓó tia ɓaɖaa, ééɓàa, wa jè mu wìì-ɖɛ̀ jǔùn. 18Ɓě mɛ ɓaà Gèɖèpɔ́ɔ̀, ɓɛ́ ɔ ní kɔ̃̀ ɖà kpá ɓó sɔ̃̀ɔ̀-tìǐn. 19Ɓó tia ɓaɖaa, nyɔǔn-dyù mu gǎ dyéɛń ziìn, ɓɛ́ ɔ ké kà wa nyu ma gǎ dyéɛ sɔ̀ìn ti ɓɛ́ Gèɖèpɔ́ɔ̀ mɛ ma ɓóɖó-kpà nìà kɛ gbo, ké kàà-ɖɛ̀ǐn gbo dyiɛɛ dyí zi, ké wa se kǎa gǎ dyéɛ mu ɖe. 20Bounɓoɔ̀ seɔ́ má wé ɓěa ɓoún xwã́ìn ní, nìí, nyɔ ɖò seɔ́ má toɖo-kpàà kɔ̃ sèɛ̌ mu. Kɛɛ ɔ mu wé ɓěa ɓoún xwã́ìn ɓó nyɔ ɓě ɓɛ́ ɔ ɖǎà gã kɛɛ jè.
21“Ɓó tia ɓaɖaa, nyɔ ɖò dyiɛ ɓě gbo cɛ̃, ké ɔ dyi níiń, ‘Gmɔ̀ nɔ̄, kà Kɛ́ɖɛ́ìɔ̀ nì kɛ,’ mɔɔ ‘Gmɔ̀ nɔ̄, kà ɔ nì ɖéɛ’ ní, nìí, ɓě ní po nyɔɔ̀ wuɖuɔ̀ jǎà. 22Sepóɛɖé nyɔ ɓě mu dyiìn, ɓɛ́ wa ké wa mìɔùn Kɛ́ɖɛ́ì ɖáìn, ké ɖíɛ́ ɓě mu wa mìɔùn kpáá-ɖɛ̀-cɛ̃-nyɔ̀ ɖáìn. Wa mu ɖàɓàìn-ɖɛ̀ ɓě kè dĩ́ín-dĩ̀ìn-ɖɛ̀ ɓě nyuùn, ɓɛ́ ɔ dyi xwa fɛ̃́ìn ní, ɓɛ́ wa ké nyɔ ɓě ɓɛ́ Gèɖèpɔ́ɔ̀ ɖǎà gã kɛɛ cá. 23Kɛɛ ɓě mɛ ma múo! Ḿ nì ɓě náún poɛń nɔ̀ɔ̀, hwɛ̀ ɓɛ́ ɖɛ ɓěɛ̀ ké kpá.
Nyɔǔn-dyùɛ̀ Dyú-gààɔ̀ dyi jè
(Máfíò 24:29-31; Ɖúù 21:15-28)
24“Ɓó tia ɓaɖaa, nyɔǔn-gǎ-dyéìn-dyéìnɔ̀ ɖǎ dyi zi ní, dyóɖóɔ̀ mu tíe-kpò mú zɛ̃̀ìn, ké dɛ̀nɛ̀ɔ̀ se fãá mu, 25ké dɛ̀nɛ̀ mɛ́nɛ́ɛ́ ɓěɔ̀ mu dyií ɓuɖuùn, ɓɛ́ wa ké dyi kpáuń nì. Ké ɖɛ séín nì ɖé dyɔɔ̀ dyíɛɛ mu dyi túòùn. 26Nìí, wa mu mɔ̄ Nyɔǔn-dyùɛ̀ Dyú-gààɔ̀ dyéìn, ɓɛ́ ḿ ké ɖé dyɔún sɔ̀ǔn nì, ɓɛ́ ḿ ké ní-kpò ɖò mú dyìɛ̌n nì ɖé kpé vɛ̀nɛ̀ kè dĩ́ín-dĩ̀ìn mú. 27Nìí, ní mu ínjà ɓěɔ̀ ɖé ɓóɖó-kpàà gã hĩinyɛ ɓěɔ̀ kɔ̃in toìn, ké wa mu nyɔ ɓě ɓɛ́ ḿ ɖǎà gã kɛɛ dyí poìn sɔ̀ìn ɖé ɓóɖó-kpàà máná ɖò gbo, ké ɔ máná tɔ̀ɔ̀ gbo muɛ.
Tɛ̀mɛ̀ìn-ɖɛ̀ ɓá féè-cù jè dyíɛ
(Máfíò 24:32-35; Ɖúù 21:29-33)
28“Féè-cùɔ̀ mɛ tɛ̀mɛ̀ìn ɓě ɖɛ. Ɓě dyiɛ dyé, ké ɔ ɖɔ́ ɓěɔ̀ dyiá dɔ̀ɔ̀-dɔ̀ɔ̀ nì, ké ɔ dyi mí poɛń nìǐn, nìí, ɓě mɛ dyuòɛ̀ kà ní-tì nìǎ dyi xwɛ̃́ǐn nyɛ. 29Kà dyúáɖòɔ̀ kǎà ɓě dyi ɖɛ ɓě nìà kɛ dyéɛń nìǐn, ɓě mɛ dyuòɛ̀ dyí kà mánáín-hwɛ̀-tìɔ̀ nìǎ dyi xwɛ̃́ǐn nyɛ, ké kà ɔ nìǎ ɓě ɓo kɔ̃ dyáuń wɛ̃. 30Ḿ cɛ̃ ɓě jǎà gbo, nyɔ ɓě nìà kàǔn wɛ̃ɛ, wa se mɛ́ɛ hwɛ̀ɛ̌ mu, ké ɖɛ séín ɓěɛ̀ kpá hwɛ̀. 31Dyɔɔ̀ kè ɓóɖó-kpàà mu dyi ziìn, kɛɛ ní wuɖu ɓěɔ̀ se dyi ziɛ́ mu.
Nyɔ ɖò se ɖɛ séín mánáín-hwɛ̀-tìɔ̀ dyuò
(Máfíò 24:36-44)
32“Ɓá ti ɓɛ́ ɖɛ ɓě nìà kɛ mu kpáùn wɛ̃ɛ jè dyíɛɛ, nyɔ ɖò seɛ dyuò. Ínjà ɓě nì ɖé dyɔún wɛ̃ kè mɔ̄ mɔ̀à Dyú-gààɔ̀ kɛɛ seɛ dyí dyuò. Ɓǎɔ̀ ɖòùn mɔ̀ nyɔ dyuòɛ̀ dyí. 33Ɓě mɛ ma mú, ɓɛ́ ɓě ké ɓɛ́ɖɛ́ kɔ̃ nì, sepóɛɖé ɓě se ti wéɔ̀ mu dyiìn nyɛɛ dyí dyuò. 34Ɔ nì kà gàa ɖò nìà da muɛń nyɛ. Ti ɔ nì dyí sɔ̀ǔn wɛ̃ɛ, ɔ po ɖɛ séín ɓě ɔ gbo-nì-nyɔ̀ ɓěɔ̀ xwaún, ké wa ɓéɖé waà kũ̀à ɖò-ɖò. Ɔ cɛ̃ɛ nyɔ ɓɛ́ ɔ gmɔ̀à gmɔ-wɔ̃̀ɔ̀ dyíɛɛ gbo, ɓɛ́ ɔ ké ɓɛ́ɖɛ́ kɔ̃ nì tee. 35Ɔ jèɛɛ, ɓě mɛ gmɔ̀ hwìǐ, sepóɛɖé ɓě se ti ɓɛ́ gbo-nì-ɓǎɔ̀ mu dyiìn nyɛɛ dyuò. Ɔ ɓɛ́ìn hwìo-nyɛ̀ bũ̌ mɔɔ hwuɖu hwìɛ̀ǐn mɔɔ zɔ̃ wĩín vɛ̀nɛ̀. 36Ɓě gmɔ̀ hwìǐ, ɔ kɔ̃̀ ɖà dyi wàɖà ní, nìí, ɔ ní kɔ̃̀ ɖà ɓě nyíɔún dyi dyɛ̀ìn. 37Ɖɛ ḿ cɛ̃à ɓě gboɛɛ, ḿ cɛ̃ɛ nyɔǔn séín gbo. Ɓě mɛ nì ɓɛ́ɖɛ́ kɔ̃.”
Chwazi Kounye ya:
:
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.