Máà 11
11
Jízɛ̀ dyá Jùɖúsɛ̀ɖɛ̀ìn-hwɔ̀ɖɔ̀ɔ̀ to-ɖu-kà
(Máfíò 21:1-11; Ɖúù 19:28-40; Jɔ̃́ɔ́ 12:12-19)
1Ké ti ɓɛ́ Jízɛ̀ kè ɔ ɖeín-nà-nyɔ̀ ɓěɔ̀ ɖǎ ma Jùɖúsɛ̀ɖɛ̀ìn-hwɔ̀ɖɔ̀ɔ̀ bũ̌in xwɛ̃́ìn nyɛɛ, wa nyini ma ɖé Bɛ́fèjì-hwɔ̀ɖɔ̀ɔ̀ kè Bɛ́fènì-hwɔ̀ɖɔ̀ɔ̀ wĩín, ɖé Ɔ́ɖè-tòɖòɔ̀ gbo. Hwɛ̀ ké ɔ ɖoɓo ma ɔ ɖeín-nà-nyɔ̀ ɓěɔ̀ sɔ̃́ dyúa. 2Ɔ cuò ma wa, ké ɔ ɖá, “Ɓě mu ɖé hwɔɖɔ nìà ɖé ɓě dyúa kɛɛ mú. Ɓě dyi hwɔɖɔɔ̀ mú nyini nyɛ̀nɛ̀ɛ̀ ní, ɓě mu jǎkasì gmɔ̀ ɖò ɓɛ́ wa wã̀ìn dyiɛɛ dyéìn. Nyɔ ɖò séè ɔ kɔ̃ún kò ɖò. Ɓě buɛ̀ ɔ, ɓɛ́ ɓě ké ɔ dyà. 3Nyɔ ɖò dyi ɓě dyi diè, ké ɔ dyi níiń, ‘Ɖɛ́ kɔ̃̀ jè ɓě nìà nimiiɔ̀ buɛ̀ǐn nyɛ́?’ ní, nìí, ɓě mɛ ɖá, ‘Bounɓoɔ̀ mɔ́ɔ ní, ké ɔ muɛ ɖe tòùn wàɖà.’ ”
4Ké ɖeín-nà-nyɔ̀ ɓěɔ̀ mu ma, ké wa dyé jǎkasì gmɔ̀ɔ̀. Ɔ wã̀ìn ma ɓó gbǒ-wɔ̃̀ ɖò gboi, ɓó hwìèɔ̀ dyí. Ké wa buɛ̀ ma ɔ. 5Ké nyɔ ɓě ɓɛ́ wa nyànà ma ɓó dyiɛɛ ɖíɛ́ ɓě diè ma wa dyi, ké wa ɖá, “Ɖɛ́ kɔ̃̀ jè ɓě nì jǎkasì gmɔ̀ɔ̀ buɛ̀ǐn nyɛ́?” 6Ké ɖeín-nà-nyɔ̀ ɓěɔ̀ cɛ̃ ma ɖɛ ɓɛ́ Jízɛ̀ cɛ̃ ma kà wa gboɛɛ nyɔ ɓěɔ̀ gbo, ké nyɔ ɓěɔ̀ zà ma jǎkasìɔ̀ wuɖu kɔ̃. 7Ké ɖeín-nà-nyɔ̀ ɓěɔ̀ dyà ma jǎkasìɔ̀ Jízɛ̀ gbo, ké wa gba waà ɖɔ ɓě jǎkasìɔ̀ kɔ̃ún dyi, ké Jízɛ̀ kòɛ̀ kɔ̃ún. 8Ké nyɔ kúɖúú ɓě soɖo ma waà ɖɔ ɓě hwìèɔ̀ kɔ̃in, ké ɖíɛ́ ɓě cɛ̃ ma cu-ɖɔ́ ɓě, ké wa wáɖá ma wa hwìèɔ̀ kɔ̃in. 9Nyɔ kúɖúú ɓě ɓɛ́ wa nì ma ɔ dyúa kè ɔ ɖeín nyɛɛ páná ma mú, ké wa ɖá, “Ɓěà ɓàìn Gèɖèpɔ́ɔ̀. Mana mɛ nì nyɔ ɓɛ́ ɔ dyi ɖé Bounɓoɔ̀ nyɛ́nɛ́ɔ̀ múɛɛ kɔ̃. 10Mana mɛ nì à ɓǎ Dèɓéɛ̀ kã́á-ɓòɖò nìà dyiɛń nyɛɛ kɔ̃. Ɓàìn-ɓàìn mɛ nì Gèɖèpɔ́ɔ̀ nìà ɖé dyɔún wɛ̃ɛ kɔ̃.”
11Ké Jízɛ̀ nyini ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké ɔ mu ɖé Gèɖèpɔ́ɔ̀ gbǒɔ̀ mú. Ti ɓɛ́ ɔ ɖǎ ma ɖɛ séín kɔ̃in gmɔìn nyɛɛ, ɔ kè ɖeín-nà-nyɔ̀ ɓaɖa-bùè sè sɔ̃́ ɓěɔ̀ kɔ́ìn ma ɖé Bɛ́fènì-hwɔ̀ɖɔ̀ɔ̀ mú ɖe, sepóɛɖé tíe nìǎ ma kpɔ̃uń jè.
Jízɛ̀ gboò féè-cù ɖò
(Máfíò 21:18-19)
12Wéɔ̀ nyɔ kɔ ma ɓó dyíɛɛ, ti ɓɛ́ wa nì ma ɖé Bɛ́fènì-hwɔ̀ɖɔ̀ɔ̀ mú sɔ̀ǔn wɛ̃ɛ, mɔ́ nyu ma Jízɛ̀. 13Ɔ dyé ma féè-cù gùsùù ɖò ɖé ɔ dyúa, ké ɔ mu ma ɖéɛ gbo, ɓɛ́ ɔ kéɛ dyé kɛbì ɔ muɛ ɓo ɖò dya dyéìn ní. Kɛɛ ti ɔ nyini ma ɓóɛɛ, ɔ seɛ ma ɓo ɖò dya dyé, ɔ sèìn mí saá-saá, sepóɛɖé ɔ se ma féè-tòɖò-tì. 14Ɔ jèɛɛ, ɔ cɛ̃ɛ ma cu-gɔ̃̀ɔ̀ gbo, ké ɔ ɖá, “Nyɔ ɖò se m̀ ɓo dya ɖiɛ́ mu ɖe fɔɔ.” Ké ɔ ɖeín-nà-nyɔ̀ ɓěɔ̀ wɔ̃́ɔ.
Jízɛ̀ mu ɖé Gèɖèpɔ́ɔ̀ gbǒɔ̀ mú
(Máfíò 21:12-17; Ɖúù 19:45-48; Jɔ̃́ɔ́ 2:13-22)
15Ti ɓɛ́ wa dyá ma Jùɖúsɛ̀ɖɛ̀ìn-hwɔ̀ɖɔ̀ɔ̀ kɛɛ, Jízɛ̀ mu ma ɖé Gèɖèpɔ́ɔ̀ gbǒɔ̀ mú. Ké ɔ dè ma nyɔ ɓě ɓɛ́ wa nì ma ɖé ɖɛ peɖeɛń nyɛ kè nyɔ ɓě ɓɛ́ wa nì ma ɖé ɖɛ dɔ̃uń wɛ̃ɛ kúmúɛ gbɔ. Ké ɔ dè ma nyɔ ɓě ɓɛ́ wa nì ma wíɖí gbo zĩàǐn nyɛɛ téɓèɖè ɓěɔ̀ kíé, ké ɔ dè ma nyɔ ɓě ɓɛ́ wa nì ma gbúɛ́ peɖeɛń nyɛɛ kɔ̃-kò-ɖɛ̀ ɓěɔ̀ kíé ɖekè. 16Ké ɔ se ma wɔ̃́ɔ ɓɛ́ìn ɓɛ́ nyɔ ɖò ké ɖɛ ɖò ɖé Gèɖèpɔ́ɔ̀ gbǒɔ̀ mú zĩ̀ìn. 17Ké ɔ tɛ̀mɛ̀ìn ma nyɔ ɓěɔ̀ ɖɛ, ké ɔ ɖá, “Gèɖèpɔ́ɔ̀-cèè-ɖɛ̀ɔ̀ ɖá, ‘Wa mu ní gbǒɔ̀ ɓaàìn-naín ɖáìn ɓó ɓóɖó-dù kò-kò séín bìì.’ Ɔ se ná nìì? Kɛɛ ɓě nyuɛ ké ɔ mɔ̀ǎ sṹún-gɔ̀-nyɔ̀ ɓěɛ̀ cĩ́-naín gàná cá.” 18Ké sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ wɔ̃́ɔ ma, ké wa mɔ́ ma hwìè ɖò dyi, ɓɛ́ wa ké ma ɔ ɖáɓá, sepóɛɖé wa fɛ̃̀ìn ma ɔ ní. Wa dyuòɛ̀ kà díɖí taɓa ma nyɔ kúɖúú ɓěɔ̀ ɓó ɖɛ ɔ nì ma kà wa tɛ̀mɛ̀ǐn nyɛɛ jèɛ. 19Ti tíe nìǎ ma kpɔ̃uń wɛ̃ɛ, Jízɛ̀ kè ɔ ɖeín-nà-nyɔ̀ ɓěɔ̀ sɔ̀ ma hwɔɖɔɔ̀ mú.
Tɛ̀mɛ̀ìn-ɖɛ̀ ɓá féè-cùɔ̀ mɛ́ jè dyíɛ
(Máfíò 21:20-22)
20Ti wa nì ma ziɛń ɓó gànà-kṹún wɛ̃ɛ, wa dyé ma féè-cùɔ̀, ké sɔ̀ìn ɖé ɔ gmɛ̀nɛ̀ɛ̀ɔ̀ gbo ké ɖé ɔ dú-hwìɛ̀ nyiniɛɛ mɛ́ nyɛ̀nɛ̀ɛ̀. 21Púɛɛ, ɖɛ dyi ma Píɖɛ̀ hwìɖǐi, ké ɔ cɛ̃ɛ ma Jízɛ̀ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, gmɔ̀ nɔ̄, féè-cù ɓɛ́ m̀ gboò ma kɛɛ, ɔ ɖǎ mɛ́ wà!”
22Ké Jízɛ̀ cɛ̃ɛ ma wa gbo, ké ɔ ɖá, “Ɓě mɛ taɓa Gèɖèpɔ́ɔ̀ hwìɖǐǐ. 23Ḿ cɛ̃ ɓě jǎà gbo, nyɔ mɔ̀ nyɔ ɓɛ́ ɔ cɛ̃ɛ toɖo nìà kɛ gbo, ké ɔ dyi níiń, ‘Sɔ̀ dà dyí, ɓɛ́ m̀ ké ɖé dyóóɔ̀ kɔ̃ kpá’ kɛɛ ní, nìí, ɔ mu ná nììn ɓó ɔ bìì. Kɛɛ ɔ hwòɖǒɔ̀ se mɛ́ín, nìí, ɔ se ná kpáa mu. Ɔ mɛ poɛ jǎà kà ɓɛ́ ɖɛ ɔ cɛ̃à kɛɛ mu kpáùn wɛ̃ɛ hwɛ̀. 24Ɔ jèɛɛ, ḿ cɛ̃ɛ ɓě gbo, ti ɓɛ́ ɓě dyi ɓaàǔn nììn nyɛɛ, ɖɛ séín ɓě ɓɛ́ ɓě zɔ̀ kɛɛ, ɓě mɛ poɛ jǎà kà ɓɛ́ ɓě ɖǎa dyé jɛ́ɛ́ kɛ, nìí, ɓě muɛ dyéìn. 25Ti ɓɛ́ ɓě nyànà dyi ɓɛ́ ɓě ké ɓaà kɛɛ, ɔ jǔ ké nyɔ ɖò dyi ɓě ɖɛ gbà ɖò bũ̌ nyu ní, ɔ jè mɛ hwɛ̀ ɓě hwìɖǐi fɔɔ. Ɓě mɛ nyuɛ náa, ɓɛ́ ɓě nììn ɖɛ gbà ɓěɔ̀ ké ɓě Ɓǎ nìà ɖé dyɔún wɛ̃ɛ hwìɖǐi hwɛ̀ ɖekè. [ 26Kɛɛ ɔ jǔ ké ɓě mǔè ɖòɛ̀ ɖɛ gbà ɓě jè se ɓě hwìɖǐi hwɛ̀ ní, nìí, ɓě nììn ɖɛ gbà ɓěɔ̀ jè se ɓě Ɓǎ nìà ɖé dyɔún wɛ̃ɛ hwìɖǐi hwɛ̀ɛ̌ mu ɖekè.”]
Wa diè ɖɛi ɓá Jízɛ̀ɛ̀ kpéɔ̀ jè dyí
(Máfíò 21:23-27; Ɖúù 20:1-8)
27Sɔ̀ìn ɓóɛ gboɛɛ, Jízɛ̀ kè ɔ ɖeín-nà-nyɔ̀ ɓěɔ̀ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe. Ti ɓɛ́ Jízɛ̀ nì ma ɖé Gèɖèpɔ́ɔ̀ gbǒɔ̀ múin nàǔn wɛ̃ɛ, sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɔ kè Júù-nyɔ̀ vɛ̀nɛ̀ ɓěɔ̀ mu ma ɔ gbo, 28ké wa diè ma ɔ dyi, ké wa ɖá, “Kpéɔ̀ nyɛ́ m̀ ɓéɖé ɓɛ́ m̀ dyià ɖɛ ɓě nìà kɛ nyuɛń nì kɛ́? Nyɛ́ nyí m̀ kpé ɓɛ́ m̀ ké wa nyuɛ́?”
29Ké Jízɛ̀ jǔ ma wa gɔ̃̌, ké ɔ ɖá, “Mɔ́ún mu ɓě ɖɛ dyúáɖò dyi dièìn. Ɓě dyi ḿ gɔ̃̌ jǔ ní, nìí, mɔ́ún mu dɛ̀ ḿ zà kpé ɓɛ́ ḿ dyià ɖɛ ɓěɛ̀ nyuɛɛ ɓě gbo cɛ̃ìn. 30Dɛ̌ Jɔ̃́ɔ́ zà ma ɔ nyɔ-níɔ-po-kpèɔ̀ kɛ́? Ɔ sɔ̀ìn ɖé Gèɖèpɔ́ɔ̀ gboò, mɔɔ ɔ sɔ̀ìn ɖé nyɔǔn gboò? Ɓě zà ɖé wuɖu.”
31Ké wa cɛ̃ìn cɛ̃̀ìn ma gbo, ké wa ɖá, “À dyiɛ cɛ̃, ké à dyi níiń, ‘Ɔ sɔ̀ìn ɖé Gèɖèpɔ́ɔ̀ gboo’ ní, nìí, ɔ muɛ à gbo cɛ̃ìn, ɓɛ́ ɔ ké níiń, ‘Ɔ dyi ná nìǐn, ɖɛ́ kɔ̃̀ jè ɓě se ma kà ɔ wuɖuɔ̀ jǎà poɛ́?’ 32Mɔɔ à dyiɛ cɛ̃, ké à dyi níiń, ‘Ɔ sɔ̀ìn ɖé nyɔǔn gbo’ ní, nìí, à fɛ̃̀ìn ɖɛ nyɔ ɓěɔ̀ mu à bũ̌ nyuùn wɛ̃, sepóɛɖé wa séín poɛ jǎà kà Jɔ̃́ɔ́ mɔ̀ ma kpáá-ɖɛ̀-cɛ̃-nyɔ̀ kɛ.” 33Ɔ jèɛɛ, wa jǔ ma Jízɛ̀ gɔ̃̌, ké wa ɖá, “À se dyuò.”
Ké Jízɛ̀ mɔ̀ùn cɛ̃ɛ ma wa gbo, ké ɔ ɖá, “Ɔ dyi ná nìǐn, nìí, ḿ se dɛ̀ ḿ zà kpé ɓɛ́ ḿ dyià ɖɛ ɓěɛ̀ nyuɛɛ ɓě gbo cɛ̃ɛ́ mu.”
Chwazi Kounye ya:
Máà 11: ƁB02
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.
Máà 11
11
Jízɛ̀ dyá Jùɖúsɛ̀ɖɛ̀ìn-hwɔ̀ɖɔ̀ɔ̀ to-ɖu-kà
(Máfíò 21:1-11; Ɖúù 19:28-40; Jɔ̃́ɔ́ 12:12-19)
1Ké ti ɓɛ́ Jízɛ̀ kè ɔ ɖeín-nà-nyɔ̀ ɓěɔ̀ ɖǎ ma Jùɖúsɛ̀ɖɛ̀ìn-hwɔ̀ɖɔ̀ɔ̀ bũ̌in xwɛ̃́ìn nyɛɛ, wa nyini ma ɖé Bɛ́fèjì-hwɔ̀ɖɔ̀ɔ̀ kè Bɛ́fènì-hwɔ̀ɖɔ̀ɔ̀ wĩín, ɖé Ɔ́ɖè-tòɖòɔ̀ gbo. Hwɛ̀ ké ɔ ɖoɓo ma ɔ ɖeín-nà-nyɔ̀ ɓěɔ̀ sɔ̃́ dyúa. 2Ɔ cuò ma wa, ké ɔ ɖá, “Ɓě mu ɖé hwɔɖɔ nìà ɖé ɓě dyúa kɛɛ mú. Ɓě dyi hwɔɖɔɔ̀ mú nyini nyɛ̀nɛ̀ɛ̀ ní, ɓě mu jǎkasì gmɔ̀ ɖò ɓɛ́ wa wã̀ìn dyiɛɛ dyéìn. Nyɔ ɖò séè ɔ kɔ̃ún kò ɖò. Ɓě buɛ̀ ɔ, ɓɛ́ ɓě ké ɔ dyà. 3Nyɔ ɖò dyi ɓě dyi diè, ké ɔ dyi níiń, ‘Ɖɛ́ kɔ̃̀ jè ɓě nìà nimiiɔ̀ buɛ̀ǐn nyɛ́?’ ní, nìí, ɓě mɛ ɖá, ‘Bounɓoɔ̀ mɔ́ɔ ní, ké ɔ muɛ ɖe tòùn wàɖà.’ ”
4Ké ɖeín-nà-nyɔ̀ ɓěɔ̀ mu ma, ké wa dyé jǎkasì gmɔ̀ɔ̀. Ɔ wã̀ìn ma ɓó gbǒ-wɔ̃̀ ɖò gboi, ɓó hwìèɔ̀ dyí. Ké wa buɛ̀ ma ɔ. 5Ké nyɔ ɓě ɓɛ́ wa nyànà ma ɓó dyiɛɛ ɖíɛ́ ɓě diè ma wa dyi, ké wa ɖá, “Ɖɛ́ kɔ̃̀ jè ɓě nì jǎkasì gmɔ̀ɔ̀ buɛ̀ǐn nyɛ́?” 6Ké ɖeín-nà-nyɔ̀ ɓěɔ̀ cɛ̃ ma ɖɛ ɓɛ́ Jízɛ̀ cɛ̃ ma kà wa gboɛɛ nyɔ ɓěɔ̀ gbo, ké nyɔ ɓěɔ̀ zà ma jǎkasìɔ̀ wuɖu kɔ̃. 7Ké ɖeín-nà-nyɔ̀ ɓěɔ̀ dyà ma jǎkasìɔ̀ Jízɛ̀ gbo, ké wa gba waà ɖɔ ɓě jǎkasìɔ̀ kɔ̃ún dyi, ké Jízɛ̀ kòɛ̀ kɔ̃ún. 8Ké nyɔ kúɖúú ɓě soɖo ma waà ɖɔ ɓě hwìèɔ̀ kɔ̃in, ké ɖíɛ́ ɓě cɛ̃ ma cu-ɖɔ́ ɓě, ké wa wáɖá ma wa hwìèɔ̀ kɔ̃in. 9Nyɔ kúɖúú ɓě ɓɛ́ wa nì ma ɔ dyúa kè ɔ ɖeín nyɛɛ páná ma mú, ké wa ɖá, “Ɓěà ɓàìn Gèɖèpɔ́ɔ̀. Mana mɛ nì nyɔ ɓɛ́ ɔ dyi ɖé Bounɓoɔ̀ nyɛ́nɛ́ɔ̀ múɛɛ kɔ̃. 10Mana mɛ nì à ɓǎ Dèɓéɛ̀ kã́á-ɓòɖò nìà dyiɛń nyɛɛ kɔ̃. Ɓàìn-ɓàìn mɛ nì Gèɖèpɔ́ɔ̀ nìà ɖé dyɔún wɛ̃ɛ kɔ̃.”
11Ké Jízɛ̀ nyini ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké ɔ mu ɖé Gèɖèpɔ́ɔ̀ gbǒɔ̀ mú. Ti ɓɛ́ ɔ ɖǎ ma ɖɛ séín kɔ̃in gmɔìn nyɛɛ, ɔ kè ɖeín-nà-nyɔ̀ ɓaɖa-bùè sè sɔ̃́ ɓěɔ̀ kɔ́ìn ma ɖé Bɛ́fènì-hwɔ̀ɖɔ̀ɔ̀ mú ɖe, sepóɛɖé tíe nìǎ ma kpɔ̃uń jè.
Jízɛ̀ gboò féè-cù ɖò
(Máfíò 21:18-19)
12Wéɔ̀ nyɔ kɔ ma ɓó dyíɛɛ, ti ɓɛ́ wa nì ma ɖé Bɛ́fènì-hwɔ̀ɖɔ̀ɔ̀ mú sɔ̀ǔn wɛ̃ɛ, mɔ́ nyu ma Jízɛ̀. 13Ɔ dyé ma féè-cù gùsùù ɖò ɖé ɔ dyúa, ké ɔ mu ma ɖéɛ gbo, ɓɛ́ ɔ kéɛ dyé kɛbì ɔ muɛ ɓo ɖò dya dyéìn ní. Kɛɛ ti ɔ nyini ma ɓóɛɛ, ɔ seɛ ma ɓo ɖò dya dyé, ɔ sèìn mí saá-saá, sepóɛɖé ɔ se ma féè-tòɖò-tì. 14Ɔ jèɛɛ, ɔ cɛ̃ɛ ma cu-gɔ̃̀ɔ̀ gbo, ké ɔ ɖá, “Nyɔ ɖò se m̀ ɓo dya ɖiɛ́ mu ɖe fɔɔ.” Ké ɔ ɖeín-nà-nyɔ̀ ɓěɔ̀ wɔ̃́ɔ.
Jízɛ̀ mu ɖé Gèɖèpɔ́ɔ̀ gbǒɔ̀ mú
(Máfíò 21:12-17; Ɖúù 19:45-48; Jɔ̃́ɔ́ 2:13-22)
15Ti ɓɛ́ wa dyá ma Jùɖúsɛ̀ɖɛ̀ìn-hwɔ̀ɖɔ̀ɔ̀ kɛɛ, Jízɛ̀ mu ma ɖé Gèɖèpɔ́ɔ̀ gbǒɔ̀ mú. Ké ɔ dè ma nyɔ ɓě ɓɛ́ wa nì ma ɖé ɖɛ peɖeɛń nyɛ kè nyɔ ɓě ɓɛ́ wa nì ma ɖé ɖɛ dɔ̃uń wɛ̃ɛ kúmúɛ gbɔ. Ké ɔ dè ma nyɔ ɓě ɓɛ́ wa nì ma wíɖí gbo zĩàǐn nyɛɛ téɓèɖè ɓěɔ̀ kíé, ké ɔ dè ma nyɔ ɓě ɓɛ́ wa nì ma gbúɛ́ peɖeɛń nyɛɛ kɔ̃-kò-ɖɛ̀ ɓěɔ̀ kíé ɖekè. 16Ké ɔ se ma wɔ̃́ɔ ɓɛ́ìn ɓɛ́ nyɔ ɖò ké ɖɛ ɖò ɖé Gèɖèpɔ́ɔ̀ gbǒɔ̀ mú zĩ̀ìn. 17Ké ɔ tɛ̀mɛ̀ìn ma nyɔ ɓěɔ̀ ɖɛ, ké ɔ ɖá, “Gèɖèpɔ́ɔ̀-cèè-ɖɛ̀ɔ̀ ɖá, ‘Wa mu ní gbǒɔ̀ ɓaàìn-naín ɖáìn ɓó ɓóɖó-dù kò-kò séín bìì.’ Ɔ se ná nìì? Kɛɛ ɓě nyuɛ ké ɔ mɔ̀ǎ sṹún-gɔ̀-nyɔ̀ ɓěɛ̀ cĩ́-naín gàná cá.” 18Ké sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ wɔ̃́ɔ ma, ké wa mɔ́ ma hwìè ɖò dyi, ɓɛ́ wa ké ma ɔ ɖáɓá, sepóɛɖé wa fɛ̃̀ìn ma ɔ ní. Wa dyuòɛ̀ kà díɖí taɓa ma nyɔ kúɖúú ɓěɔ̀ ɓó ɖɛ ɔ nì ma kà wa tɛ̀mɛ̀ǐn nyɛɛ jèɛ. 19Ti tíe nìǎ ma kpɔ̃uń wɛ̃ɛ, Jízɛ̀ kè ɔ ɖeín-nà-nyɔ̀ ɓěɔ̀ sɔ̀ ma hwɔɖɔɔ̀ mú.
Tɛ̀mɛ̀ìn-ɖɛ̀ ɓá féè-cùɔ̀ mɛ́ jè dyíɛ
(Máfíò 21:20-22)
20Ti wa nì ma ziɛń ɓó gànà-kṹún wɛ̃ɛ, wa dyé ma féè-cùɔ̀, ké sɔ̀ìn ɖé ɔ gmɛ̀nɛ̀ɛ̀ɔ̀ gbo ké ɖé ɔ dú-hwìɛ̀ nyiniɛɛ mɛ́ nyɛ̀nɛ̀ɛ̀. 21Púɛɛ, ɖɛ dyi ma Píɖɛ̀ hwìɖǐi, ké ɔ cɛ̃ɛ ma Jízɛ̀ gbo, ké ɔ ɖá, “Nyɔ-ɖɛ-tɛ̀mɛ̀ìn-nyɔ̀, gmɔ̀ nɔ̄, féè-cù ɓɛ́ m̀ gboò ma kɛɛ, ɔ ɖǎ mɛ́ wà!”
22Ké Jízɛ̀ cɛ̃ɛ ma wa gbo, ké ɔ ɖá, “Ɓě mɛ taɓa Gèɖèpɔ́ɔ̀ hwìɖǐǐ. 23Ḿ cɛ̃ ɓě jǎà gbo, nyɔ mɔ̀ nyɔ ɓɛ́ ɔ cɛ̃ɛ toɖo nìà kɛ gbo, ké ɔ dyi níiń, ‘Sɔ̀ dà dyí, ɓɛ́ m̀ ké ɖé dyóóɔ̀ kɔ̃ kpá’ kɛɛ ní, nìí, ɔ mu ná nììn ɓó ɔ bìì. Kɛɛ ɔ hwòɖǒɔ̀ se mɛ́ín, nìí, ɔ se ná kpáa mu. Ɔ mɛ poɛ jǎà kà ɓɛ́ ɖɛ ɔ cɛ̃à kɛɛ mu kpáùn wɛ̃ɛ hwɛ̀. 24Ɔ jèɛɛ, ḿ cɛ̃ɛ ɓě gbo, ti ɓɛ́ ɓě dyi ɓaàǔn nììn nyɛɛ, ɖɛ séín ɓě ɓɛ́ ɓě zɔ̀ kɛɛ, ɓě mɛ poɛ jǎà kà ɓɛ́ ɓě ɖǎa dyé jɛ́ɛ́ kɛ, nìí, ɓě muɛ dyéìn. 25Ti ɓɛ́ ɓě nyànà dyi ɓɛ́ ɓě ké ɓaà kɛɛ, ɔ jǔ ké nyɔ ɖò dyi ɓě ɖɛ gbà ɖò bũ̌ nyu ní, ɔ jè mɛ hwɛ̀ ɓě hwìɖǐi fɔɔ. Ɓě mɛ nyuɛ náa, ɓɛ́ ɓě nììn ɖɛ gbà ɓěɔ̀ ké ɓě Ɓǎ nìà ɖé dyɔún wɛ̃ɛ hwìɖǐi hwɛ̀ ɖekè. [ 26Kɛɛ ɔ jǔ ké ɓě mǔè ɖòɛ̀ ɖɛ gbà ɓě jè se ɓě hwìɖǐi hwɛ̀ ní, nìí, ɓě nììn ɖɛ gbà ɓěɔ̀ jè se ɓě Ɓǎ nìà ɖé dyɔún wɛ̃ɛ hwìɖǐi hwɛ̀ɛ̌ mu ɖekè.”]
Wa diè ɖɛi ɓá Jízɛ̀ɛ̀ kpéɔ̀ jè dyí
(Máfíò 21:23-27; Ɖúù 20:1-8)
27Sɔ̀ìn ɓóɛ gboɛɛ, Jízɛ̀ kè ɔ ɖeín-nà-nyɔ̀ ɓěɔ̀ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe. Ti ɓɛ́ Jízɛ̀ nì ma ɖé Gèɖèpɔ́ɔ̀ gbǒɔ̀ múin nàǔn wɛ̃ɛ, sáa-zà-nyɔ̀ kpa ɖɛ ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀ ɔ kè Júù-nyɔ̀ vɛ̀nɛ̀ ɓěɔ̀ mu ma ɔ gbo, 28ké wa diè ma ɔ dyi, ké wa ɖá, “Kpéɔ̀ nyɛ́ m̀ ɓéɖé ɓɛ́ m̀ dyià ɖɛ ɓě nìà kɛ nyuɛń nì kɛ́? Nyɛ́ nyí m̀ kpé ɓɛ́ m̀ ké wa nyuɛ́?”
29Ké Jízɛ̀ jǔ ma wa gɔ̃̌, ké ɔ ɖá, “Mɔ́ún mu ɓě ɖɛ dyúáɖò dyi dièìn. Ɓě dyi ḿ gɔ̃̌ jǔ ní, nìí, mɔ́ún mu dɛ̀ ḿ zà kpé ɓɛ́ ḿ dyià ɖɛ ɓěɛ̀ nyuɛɛ ɓě gbo cɛ̃ìn. 30Dɛ̌ Jɔ̃́ɔ́ zà ma ɔ nyɔ-níɔ-po-kpèɔ̀ kɛ́? Ɔ sɔ̀ìn ɖé Gèɖèpɔ́ɔ̀ gboò, mɔɔ ɔ sɔ̀ìn ɖé nyɔǔn gboò? Ɓě zà ɖé wuɖu.”
31Ké wa cɛ̃ìn cɛ̃̀ìn ma gbo, ké wa ɖá, “À dyiɛ cɛ̃, ké à dyi níiń, ‘Ɔ sɔ̀ìn ɖé Gèɖèpɔ́ɔ̀ gboo’ ní, nìí, ɔ muɛ à gbo cɛ̃ìn, ɓɛ́ ɔ ké níiń, ‘Ɔ dyi ná nìǐn, ɖɛ́ kɔ̃̀ jè ɓě se ma kà ɔ wuɖuɔ̀ jǎà poɛ́?’ 32Mɔɔ à dyiɛ cɛ̃, ké à dyi níiń, ‘Ɔ sɔ̀ìn ɖé nyɔǔn gbo’ ní, nìí, à fɛ̃̀ìn ɖɛ nyɔ ɓěɔ̀ mu à bũ̌ nyuùn wɛ̃, sepóɛɖé wa séín poɛ jǎà kà Jɔ̃́ɔ́ mɔ̀ ma kpáá-ɖɛ̀-cɛ̃-nyɔ̀ kɛ.” 33Ɔ jèɛɛ, wa jǔ ma Jízɛ̀ gɔ̃̌, ké wa ɖá, “À se dyuò.”
Ké Jízɛ̀ mɔ̀ùn cɛ̃ɛ ma wa gbo, ké ɔ ɖá, “Ɔ dyi ná nìǐn, nìí, ḿ se dɛ̀ ḿ zà kpé ɓɛ́ ḿ dyià ɖɛ ɓěɛ̀ nyuɛɛ ɓě gbo cɛ̃ɛ́ mu.”
Chwazi Kounye ya:
:
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bassa Bible © Bible Society Liberia, 2002.