Ñwed Mbon Rom 9
9
Mbʌññọesịd Pọọl ke Abaña Nditọ Isrel
1Ami ntañ akpanikọ ke Krais, nsʌhọke nsu; akikere esịd mmi asọọñọ ntoro ato Adisana Sịbidịd. 2Ami mmenie ekamba mfʌhọ ye ubiak ke esịd mmi. 3Sia ami ñkpaama ensueñ miin ke idem mmi enyʌñ eñkpịkke miin esio ekpọñ Krais ke ntak mbon mmi, mbon a-ñnyịn itooho ubon keed, 4ubon Isrel. Ammọ edo mbon edatta nte mme amanaisọñ, ammọ enie adisana ubọọñ, mme edioomo, adibọ mbed, ukpono ke tembịd ye mme enwọñọ. 5Ammọ enie mme nsọbom, ndin ato ke ammọ ediọọñọ nte Krais aketo adimana nte awo, a-adooho Abasi andikara afịd ñkpọ. Itooro anie anye ke nsi-nsi! Amen.
Adimek ake Abasi
6Idooho nte ke enwọñọ Abasi awuọ ikpu-ikpu. Sia idooho afịd awo se ito Isrel edo mbon Isrel. 7Inyʌññọ ido sia ammọ edoñño ubon Ebraham, awọt abo ke afịd ammọ edoñño nditọ Ebraham. Ke aditʌm ntañ, ñko nte ñwed Abasi atañña “Adiito ke Aisik ke ubon mfo adiisakka.” 8Ke aditañ ke usʌñ mfen, idooho mme uduud nditọ abʌkidem edoñño nditọ Abasi, ado nditọ enwọñọ ke edat nte asaña-asaña ubon Ebraham. 9Sia naña ekewet enwọñọ ado ado ami: “Ini amaakem ami ñyaatịmme ndi, ndin Sera ayaaman ayịn.”
10Idooho ado ikpọọñ, Ribeka akenie nditọ anọ ete keed kpọd, akedooho ete ñnyịn Aisik. 11Ado, mbemiso mme amanamba ado ekemana me ekenam eti ñkpọ me idiọọk, nọ uduak Abasi a-asañake akedʌk ke se Abasi akemek asọọñọ ada, 12itooho ke utom ado ato ke anye a-akoodo, emaedọkkọ Ribeka ebo, “Andikpon ñkan adiinam ñkpọ inọ andisịb ñkan.” 13Kpa naña ewet ate “Yekọb ke ami ñkema, ado Isọ ke ami ñkesua.”
14Nsoo ndin ke ñnyịn idiitañ? Nte Abasi inenne? Idooho ntoro! 15Sia anye amaadọkkọ Moses ate,
“Ami ñyaatua awo se ami ñyem aditua mbọm,
ndin ñnyʌñ ñkop udʌk mbaña awo se ami ñyem adikop udʌk.”
16Ke ntoro, idooho ke udọñ me adudu awo, ado ato ke mbọm Abasi. 17Sia e-edọkkọ Fero ke ikọ Abasi ate: “Ami ñkudịppe fiin nnịm nnọ kpa ntak ami, nọ ami uwọt fiin adudu mmi ke idem mfo nọ anyịñ mmi asuana ke afịd ederimbod.” 18Ke ntoro Abasi anie mbọm abaña awo se anye ayem inie mbọm mbaña, ndin anye anyʌñ asọñesịd ye awo a-anye ayemme isọñesịd.
19Keed ke atu ndufo ayambo miin: “Ndin nsoo ido ntak a-Abasi asʌkkọ akịt ndudue ke idem ñnyịn? Sia anie ikan ibiọọñọ uduak amọ?” 20Ado afo ado anie, ado awo, adifaaña ikọ ye Abasi? Nte ñkpọ se ebot ayaabo andibod anye ate, “Ntak a-afo ambotto miin ntom-o?” 21Nte abodabañ inieghe unen adikama ukem eboho aduañ mbot nsio-nsio ñkpọ, ubaak asaña-asaña ñkpọ ubaak ado adaña-adaña ñkpọ?
22Yak diin ise, adieke Abasi akpemekke adiwọt ifiobesịd amọ anyʌñ anam ediọọñọ adudu amọ, ado ayọ ye ekamba ime mme ñkpọ e-enọọhọ anye ifiobesịd, a-anye akebeeñeke idem adisoobo-o? 23Ñko, akpedo anye akenam ami adiyaara ekamba ubọọñ amọ nnọọ ñkpọ a-anye anieghe mbọm abaña, a-anye akebakka adiọñ anịm adinọ ubọọñ, 24kpa ñnyịn, a-anye amaakekoot, idooho ke atu mme Yuu ikpọọñ ado mme Gentile ñko-o? 25Kpa naña anye abo ke ñwed Hosie:
“Ami ñyaakoot ammọ ‘ikọd mmi’ akpesʌkado ammọ imiidooho ikọd mmi;
ami ñkọ ñyaakoot anye ‘ima mmi’ akpesʌkado a-anye imiidooho ima mmi,”
26ndin,
“Ayaatịppe kpa ke itie e-ekebooho ammọ,
‘Ndufo idooho ikọd mmi’
eyaekoot ammọ ‘nditọ aduuwem Abasi.’ ”
27Aisaiya a-abọọñ ke akpọsọñ uyio abaña Isrel:
“Akpesʌkado ibad nditọ Isrel ewakka nte ntan ke mben inyañ,
mme ñyọhọnsʌhọ kpọd ke ediinyaaña.
28Sia Abọọñ ayaasọsọp anam ubiideikpe
amọ ke ederimbod ama ataa afịd-afịd.”
29Ado naña nte Aisaiya amaaketatañ:
“Imiikpikidooho Abọọñ Andikponñkan akeyaak nsʌhọ
ubon anịm inọọ ñnyịn,
ñnyịn ikpikiba nte Sọdọm,
ñnyịn ikpikiba nte Komora.”
Unana Mbuọdidem Isrel
30Nsoo ndin ke ñnyịn idiitañ? Idiibo ke mme Gentile, i-idiikikeeneke adinenido, ebọ adinenido a-atooho ke mbuọdidem; 31ado mbon Isrel, e-ekekeeneke mbed adinenido, ikanna inie anye? 32Ke nsoo ntak? Ke ntak adooho ammọ ikiyemme adinenido ito mbuọdidem ado nte ebo ke ekebọ eto utom. Ammọ emaetuak ukod ke itiad iduọ enyʌñ eduọññọ. 33Nte naña ewet:
“Se, ami mmenịm itiad ke Saiyọn a-anamma nọ mme awo etuak ukod,
ye ekamba itiad a-anamma mme awo eduọññọ,
ndin awo a-anịmme anye ke akpanikọ idiikịtte abuud ke nsi-nsi.”
Chwazi Kounye ya:
Ñwed Mbon Rom 9: ICB
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.