Ñwed Mbon Rom 16
16
Akpọ-akpọ Ekọọm
1Ami mmenọ ayịneka awonwaan ñnyịn Fibi, a-adooho dikịn#16:1 Se ñko utom dikịn ke Filipai 1:1 ye 1 Timoti 3:8, 12 ufọkabasi ke Senkre isọk ndufo. 2Ndufo ibọ anye ke Abọọñ ke usʌñ a-adotto ke se mme ndisana awo ekpenam, inyʌñ inọ anye unwam akeedodo a-anye akpeyemme, sia anye ado unwam anọ uwak awo, ye ami ñko.
3Ikọọm Prisila#16:3 Ke Greek Priskaasʌk ado Prisila ye Akwila, mme nsaña utom mmi ke Krais Yisọs. 4Ammọ emaenyịmme adiduọọk uwem ammọ ke ntak mmi. Idooho ami ikpọọñ, ado afịd ufọkabasi mme Gentile ekọọm ammọ.
5Inyʌñ ikọọm ufọkabasi e-esisooboke ke ufọk ammọ.
Ikọọm adima ufan mmi Ebenetus, a-akedooho akpa awo se ikikappa esịd ikeene Krais ke ñkanñkʌk Esia.
6Ikọọm Mmeri, a-akesịnne ifịk anam utom inọọ ndufo.
7Ikọọm Andronikus ye Yunia, mme nditọete mmi mme Yuu e-ekebaaha ke ñkpakọb ye ami. Ammọ edo mme awuọiso ke atu mme abọsịd, emaenyʌñ ediọọñọ Krais mbemiso ami.
8Ikọọm Ampliatus, adima ufan mmi ke Abọọñ.
9Ikọọm Ubanus, awo nsaña utom ñnyịn ke Krais, ye ataa adima ufan mmi Stakis.
10Ikọọm Apeles, e-emaekedomo ekịt ke nsuukiwuod amọ nnọọ Krais afọn.
Ikọọm mbon e-etooho ufọk Aristobulus.
11Ikọọm Herọdiọn, awo Yuu nte ami.
Ikọọm ikọd ufọk Nasisọs e-ebaññake ke Abọọñ.
12Ikọọm Trifena ye Trifosa, mme ibaan e-enamma akpọsọñ utom ke Abọọñ.
Ikọọm adima ufan mmi Pesis, awonwaan mfen a-anamma akpọsọñ utom ke Abọọñ.
13Ikọọm Rufọs e-emekke ke Abọọñ, ye eka amọ, a-adooho eka annọ miin ñko.
14Ikọọm Asinkritus, Flekọn, Hemas, Patrobas, Emas, ye mme nditọeka ke Krais mbon ñko e-ebaññake ye ammọ.
15Ikọọm Filọlọkus, Yulia, Nerus ye ayịneka amọ awonwaan, ye Olimpas ye afịd ndisana ikọd Abọọñ e-ebaññake ye ammọ.
16Ikọọm emọ-emọ ke adisana ntʌminua.
Afịd mme ufọkabasi Krais edọñ ekọọm.
17Ami mmibeeñe ndufo nditọeka ke Krais, aditịñ anyen nse mbon e-esịnne ubakka enyʌñ enịm ñkpọiduọ ke usʌñ ndufo i-imiisañake ke ukpeeb a-ndufo ebọọhọ. Idiañña nsaña ikpọñ ammọ. 18Sia utọ ibon ado inamma ñkpọ inọ Abọọñ Krais, ado enam enọ idiọọk itọñ ammọ. Ke nneminua utañ ikọ ye ntiik, ammọ ebiaña mbon e-enieghe mfefeere esịd. 19Afịd awo e-ekop ebaña nsuukiwuod ndufo, ndin ami mmekop ayọhọ inemesịd ibaña ndufo. Ado ami ñyem ndufo ediọọñọ se ifọn ndin enyʌñ enana ndudue ke se ido idiọọk.
20Abasi emem ayaasọp anuak Setan ke idak mkpad ndufo.
Yak mfọn Abọọñ Yisọs aba ye ndufo.
21Timoti awo nsaña utom mmi, a-adọñ ekọọm inọ ndufo, ukem ñko ye Lusiọs, Yasọn ye Sosipata ñko e-edoññoke Yuu nte ñnyịn.
22Ami, Tetius, andiwet ñwedetob ami mmikọọm ndufo ke Abọọñ.
23Kayọs, a-ami ye afịd ufọkabasi idiaha ufọn ukama isen amọ, a-adọñ ekọọm inọ ndufo.
Erastus, a-adooho adaiwuod ke utom abio, ye ayịneka ñnyịn Kwaatus, e-edọñ ekọọm inọ ndufo ñko.
24Yak mfọn Abọọñ ñnyịn Yisọs Krais aba ye afịd ndufo. Amen.
25Ndin yak nsinsi ubọọñ anie anye a-akanna inọọ ndufo nsọọñọnda ke abaña eti etob ye se ñkwọrọ mbaña Yisọs Krais, naña asaña akekem ke adiyaara ndedịbe akpanikọ e-ekedịppedịp ke mme ayio edem a-amaakeboiyo, 26ado idahami eyaara enyʌñ enam ediọọñọ eto ke se mme prọfed ekewet, a-atooho ke ewʌhọ nsi-nsi Abasi, nọ ato do afịd awo ekpenịm ikọ Abasi enyʌñ esuukiwuod enọ anye ke mbuọdidem. 27Yak ato Yisọs Krais itooro anie ukweeñe adiọọñọñkpọ Abasi ke nsi-nsi! Amen.
Chwazi Kounye ya:
Ñwed Mbon Rom 16: ICB
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.