Ñwed Mbon Rom 15
15
1Ñnyịn mbon se isọñ idem akpena iyọ ye mbon mmemidem utu ke ñnyịn inem idem ñnyịn esịd. 2Ñnyịn keedekeed akpena inam esịd anem mme mbọhọidʌñ ñnyịn ke adiyem ufọn ammọ ye adisọọñọ ammọ idem ke mbuọdidem. 3Sia Krais ke idem amọ ikinamma ñkpọ se inem idem amọ esịd, ado nte naña ewet: “Mme usọñanyen a-mbon awo usọññọ fiin ekappa enduọññọ miin ke idem.” 4Sia afịd ñkpọ se ekewet ke mme usen edem, ekewet adikpeep ñnyịn, nọ ato do ato ke ukpeeb adinie ime ye nsọọñọidem ke ikọ Abasi a-ammọ inọọhọ ñnyịn, ñnyịn inie idodanyen.
5Yak Abasi a-anọọhọ awo ukeme adiyọ ye adisọọñọ mbon mfen idem inọ ndufo ukem esịd adibono ke ima naña Krais Yisọs akenie, 6nọ ato ke esịd keed ye uyio keed ndufo ekeme adinọ Abasi ye Ete Abọọñ ñnyịn Yisọs Krais ubọọñ.
7Inyịmme emọ-emọ, naña Krais akinyịmme ndufo, nọ ato do enọ Abasi itooro. 8Sia ami ntañ inọ ndufo ke Krais akappa ado ayịnufọk anọ mme Yuu ke ntak akpanikọ Abasi, nọ esọọñọ mme enwọñọ e-ekenamma enọ mme nsọbom mme Yuu, 9ñkọ, nọ anam mme Gentile etooro Abasi ebaña mbọm amọ. Nte ewette:
“Ke ntoro ami ñyautooro fiin ke atu mme Gentile;
ñyaakwọ ikwọ itooro nnọ anyịñ mfo.”
10Ñko anye amaana atañ:
“Idaara, ndufo mme Gentile, ye ikọd amọ.”
11Ndin emaana ewet:
“Itooro Abọọñ, afịd ndufo mme Gentile,
yak afịd awo enekke etooro anye.”
12Ndin Aisaiya amaana atañ,
“Adʌñ Yesi ayaawuọ ada,
anye a-adiidakka ida idikaara ke afịd mme idịd;
mme Gentile ediinie idodanyen ito anye.”
13Yak Abasi idodanyen iyọhọ ndufo ye afịd idadesịd ye emem naña ndufo edot anyen ke anye, nọ ndufo ekpesʌk eyọhọ ye idodanyen ke adudu Adisana Sịbidịd.
Pọọl, Akwọrọikọ Nnọọ mme Gentile
14Nditọeka mmi ke Krais, ami ke idem mmi mmenịm nte, ke ndufo ke idem ndufo emeyọhọ ye eti ido, emeyọhọ ye ifiọk enyʌñ enie ukeme adikpeep emọ-emọ ñkpọ. 15Ado ami mmiwet ndufo ataa uko-uko mbaña mme uwọdñkpọ, adimaana itoiyo ndufo ke abaña mme ñkpọ ami akañ mfen, ke ntak mfọn a-Abasi annọọhọ miin 16adido akwọrọikọ Krais Yisọs nnọọ mme Gentile. Anye amannọ miin iso utom nte aku adisuan eti etob Abasi, nọ ato do mme Gentile ekpekappa ñkpọ uwa anemme Abasi esịd a-Adisana Sịbidịd adiọññọ anọ Abasi.
17Ke ntak ado ami mmetooro Krais Yisọs ke utom a-ami nnamma nnọ Abasi. 18Ami ndiidomoke aditañ ñkpọ ndomokeed ibọhọke se Krais anam ama anto miin ke adidat mme Gentile usʌñ nọ ammọ esuuk iwuod enọ Abasi ato ke se ami ntañ ñnyʌñ nnam, 19ke adudu ye mme idiọọñọ ye mme utịppeñkpọ, a-atooho ke adudu Sịbidịd Abasi. Ndin tọọñọ ke Yeruselem tutu akanna akewuọ Ilirikum, ami mmesuan etob eti mbʌk Krais ayọhọ-ayọhọ. 20Asido udọñ mmi adikwọrọ eti etob Krais ke itie nte awo miikidiọọñọke Krais kpaanam, mbaak ami ndibọp ndot ke itiad idakisọñ awo mfen. 21Ado, naña ewet:
“Mbon a-awo imiikidọkkọke ibaña anye eyaekịt,
ndin mbon i-imiikikoppo eyaediọọñọ.”
22Ami ado ntak ubiọọñọ mmi uwak ini adidi ndikịt ndufo.
Pọọl Anam Akikere Adika Rom
23Ado sia mme itie mfen ibaaha se ami nnam utom ke mme ñkanñkʌk umi, ñko sia mmaanenie udọñ ke uwak isua adidise ndufo, 24mmenie akikere adinam ntoro ke mmaaka Speen. Ami mmenie idodanyen adidise ndufo ke idaha ndiiboiyo do, nọ ndufo eñnyaaña miin ke isañ mmi, sia mmaakop inem ke atu ndufo ke etək ini. 25Ado idahami, ami mba ke usʌñ adika Yeruselem adinam utom nnọọ ikọd Abasi ke udo. 26Sia Masidonia ye Akaya emaenem esịd adikeene ntịp etịbe ñnwam mme uweene ke atu mme ndisana ikọd Abasi ke Yeruselem. 27Ammọ emaenem esịd adinam ami, sia ke akpanikọ ado isʌñ ke ammọ ekama ikọd Abasi ke Yeruselem. Sia adieke mme Gentile ewanake ke mme adidiọñ Sịbidịd mme Yuu, ammọ ñko ekama mme Yuu isọn ke adiwuana inie ederimbod ammọ ye mme Yuu. 28Ndin ke ami mmaakekweeñe iso utom ami, ñnyʌñ ntʌm ndiọọñọ ke ammọ e-ebọ enọ ami, ami ñyaakaa Speen ñnyʌñ mboiyo ndise ndufo. 29Ami mmediọọñọ ke mmaadi ibịne ndufo, ndiidi ke ayọhọ adidiọñ Krais.
30Ami mmikpeiye ndufo, nditọeka ke Krais ke ntak Abọọñ Yisọs Krais ye ke ima Sịbidịd, nte ediana ye ami ke anwan ami ke adibọñ akam nnọọ Abasi ke iwuod mmi. 31Ibọñ akam ibo eñnyaaña miin ke Yudia esio ke ubọk mbon i-imiinịmme Abasi ke akpanikọ, ñko nọ ikọd Abasi ke Yeruselem ebọ enọ a-ami mbenne ñka do ke inemesịd, 32nọ ato do ke uduak Abasi ami ndi ibịne ndufo ke inemesịd, ñnyʌñ mbọ nduọkadudu ke ufọọd ndufo. 33Yak Abasi emem aba ye afịd ndufo. Amen.
Chwazi Kounye ya:
Ñwed Mbon Rom 15: ICB
Pati Souliye
Kopye
Konpare
Pataje
Ou vle gen souliye ou yo sere sou tout aparèy ou yo? Enskri oswa konekte
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.